主角前期有個金毛宿敵同佢兩條𡃁，粉毛女同藍毛男。
去到中段宿敵同兩條𡃁加入主角一齊救世，
但喺火山迷宮，3個同主角失散咗，
之後再比人暗算，喺岩漿帶比七隻機械人圍攻。
粉毛同藍毛中咗偷襲奄奄一息，但都拼死拖住敵人，
本身金毛已經心存死志諗住殺得一個得一個，
殺咗6個之後，都係力竭。
粉毛同藍毛用盡最後力量打死咗最後一隻機械人同推走咗金毛離開岩漿帶，但力量餘波令火山開始噴發，藍毛粉毛叫金毛隊長走，唔好理佢哋，
但金毛同佢哋感情好好，點都唔肯走。
粉毛就同金毛講細佬你快啲走，家姐唔想你死。
藍毛話粉毛已經傷得太重，認錯咗金毛隊長係自己死咗嘅細佬，懇求金毛隊長俾佢冇遺憾咁走。
金毛隊長唯有含淚告別。
然後畫面去返粉毛同藍毛，原來粉毛根本就冇幻覺，只係佢哋知道自己傷勢太重一定走唔到，於是夾計氹金毛走。然後兩個就挨埋一齊比岩漿吞噬咗，死之前仲好多謝個天俾咗咁好嘅後天家人佢哋
本身淨係呢段已經喊到仆街，點知之後仲有個支線任務，講話去返粉毛長大嗰間孤兒院，個個細路同埋修女都問點解粉毛咁耐冇嚟，因為粉毛同佢哋感情勁好，主角勁猶豫講唔講實情好。
之後有兩個分支俾你揀：一就係同最年長嗰個百厭細路講實情，第二個就係唔講。
我揀咗講實情之後，個百厭細佬忍唔住大喊，但係喊完一輪之後成熟咗好多，應承主角會保守呢個秘密同保護其他細路，然後送咗一個好珍貴嘅道具俾主角。但係每一個細路都仲係好掛住粉毛，心噏到痴線…
多圖：
