【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

250 回覆
52 Like 4 Dislike
2021-09-26 19:44:43
2014夏:[處男親善訪日之旅]7天京阪鴨仔團
https://lihkg.com/thread/2169568

2016冬:[紅葉。基友。京阪奈]兩個小生去日本7天團
https://lihkg.com/thread/2232918

2017夏:[帶住班人自由行]9日關東關西跳板之旅
https://lihkg.com/thread/2370411

2018夏:[極限挑戰]用10日獨遊半個日本
https://lihkg.com/thread/1957043

2019夏:[腳痛勝景美食團]用12日獨遊關西 (山陰‧琴平‧天橋立‧京阪)
https://lihkg.com/thread/1964209

2019秋:[文青勝景美食團]獨遊台北4日 (野柳‧九份‧總統府)
https://lihkg.com/thread/2009433

2019秋:[帶住父母去旅行]12日橫越日本列島 (札幌 ~ 鹿兒島)
https://lihkg.com/thread/2089476

------------------------------------------------------------------
時間: 2018年頭
人:3 (我,媽,姐)
練成技能:
‧ 超長距離移動
‧ 拉麵品評師
‧ 偷食師
‧ 交通魔童 (周遊券系列)
------------------------------------------------------------------

聲明
此遊記屬於咸豐年前,切勿跟足導致行程受阻
2021-09-26 19:45:51
序言
2016冬:[紅葉。基友。京阪奈]兩個小生去日本7天團
https://lihkg.com/thread/2232918

之前同個fd去完京阪奈之後
當左日本係鄉下既我又開始plan行程
有左之前同人去東京大阪既經驗
我發覺人地好慢自己睇野既速度比較高
好想試下冇人阻住無拘無束獨遊全日本
你地睇番我啲獨遊記就知我唔係講笑
一日係可以去到好多地方架


首次獨遊我就唔太進取
揀番大城市去就比較穩陣
就算唔就搵野食,衰極都有間松屋俾我食飯
香港去日本好多地方都有直航
但係去大城市既就唔係好多
我就唔想重覆去番東京大阪
最後我就揀左褔岡
除左因為多野食,去周邊地方交通方便之外
最重要係有廉航到,機票平

原本都plan得七七八八去1個禮拜
跟番以往慣例夏天去
因為去親天氣都特別好自帶晴天娃娃屬性
點知無啦啦就俾家族團食左個timeslot
詳情睇番之前遊記既序言:
2017夏:[帶住班人自由行]9日關東關西跳板之旅
https://lihkg.com/thread/2370411/page/1?ref=sharer&post=3


去完之後本人對獨遊信心大增
就積極籌劃下一年既處男極限挑戰之旅
褔岡既行程就封存左係Google Drive冇理到
2018夏:[極限挑戰]用10日獨遊半個日本
https://lihkg.com/thread/1957043

點知冇幾耐家姐係FB睇到啲旅遊page
話快運搞回程1蚊機票,問我去唔去
姐係問我帶唔帶埋佢去啦
望一望又好似幾平,尤其係褔岡
如果同家姐去都OK既
因為佢唔會好似老豆老母咁一直跟住我
之前去東京我去老秋嗰陣佢自己走去新宿行
但係Schedule上面就有一輸激辯...
---------------------------------------------------------------
:咁不如去福岡啦,橫掂我plan好左咁滯
:好呀好呀,有乜野行有乜野食架
:(無視mode)咁幾時去?聖誕前?元旦後?
:不如跨年啦,唔駛請咁多日假
:哪有錢你呀媽個女,你請我就去
:...咁你話事囉,你想幾時去
:元旦後好唔好?預去1星期
:...咁我預番假囉,我跟你行架咋
:OK
---------------------------------------------------------------

機票就真係俾我搶到回程1蚊機票
唔知係我好彩定快運做善事
2個人去程0kg+回程30kg行李
連稅唔駛1400蚊
單人飛東京大阪唔包行李都差唔多要呢個價
不過平到咁就梗係有伏啦,啲時間閪到爆炸
下晝機去朝早機返,6日得番4日玩
就係因為咁cut到個行程十分古怪
家姐冇意見,咁就照番原訂計劃
我思疑佢根本冇睇過個行程

買哂機票之後家姐先同老母講
原來老母都好似好有興趣咁
又同啲姨媽姑姐講我地去幾平幾平咁
老豆冇興趣,話凍喎
家姐感受到無比既壓力
突然良心發現話要帶埋佢去
叫我幫老母禁多張機票我地請佢去
平時又唔見你咁孝順既衰女
遲左幾星期買,最平既飛當然就搶哂
我幫佢買左去程15kg+回程0kg行李
去程我地唔駛拎喼上機咁辛苦
回程用番我地30kg應該都有突

咁樣計哂稅都係1100蚊,都唔特別貴既

BTW呢一篇係我手頭上最後一篇日本遊記
希望遲啲開番關可以去到旅行寫到下一篇
其實可以講韓國既,大家想睇既再寫
2021-09-26 19:46:27
行程
Day 0
UO638 HKG -> FUK
福岡空港 -> 宿博多

Day 1
博多 ------> 廣島市 (廣島城,原爆圓頂屋,平和紀念館) ------> 嚴島神社
宿博多

Day 2
博多 -------> 長崎 (眼鏡橋,大浦天主堂,中華街,稲佐山)
宿博多

Day 3
博多 -> 太宰府 -> 熊本 (熊本城,城彩苑)
宿博多

Day 4
博多 <-> 天神 <-> 運河城
宿博多

Day 5
博多 -> 福岡空港
UO601 FUK -> HKG
2021-09-26 19:47:26
Day 0
唔知係咪機票太平冇錢租閘口
明明之前都係中場客運廊閘口直接上機
今次就要搭車過去停機坪



天氣十分好


褔岡係九州最大城市,位置係日本既西南面
所以香港飛過去會近過東京大阪
3個半鐘就會到,唔會坐到腳痺
不過褔岡機場過關counter唔夠多
我地咁啱撞正連續5班機一齊落機
全部都係首爾同釜山飛過黎
所以都等左成個鐘先過到關
拎埋行李出機場天都黑埋
但其實都只係6點,日本冬天好快天黑


首先去統合案內所拎啲旅遊單張
用黎plan獨遊


福岡機場分開左國際線同國內線大樓
國際線大樓近市區
搭巴士既話15分鐘就會去到博多巴士總站
國內線大樓就係跑道另一邊,但有地鐵站
搭地鐵空港線5分鐘就會到博多駅
不過我地係Google Map睇到條路紅色
為左早啲去酒店checkin,我地就揀地鐵
要搭15分鐘免費接駁車過去國內線大樓
等車嗰陣凍到出煙,出面得5度

2021-09-26 19:49:10
lm
2021-09-26 19:50:33
去到博多駅都係6點半
本身諗住去左酒店checkin先
之後先食飯同換JR Pass
但係我見到換Pass Counter離奇地冇乜人排隊
咁就拿拿聲搞埋佢啦

買Pass既程序好簡單
出發之前係JR網上申請
填番個人資料,護照號碼同取Pass地點
之後印番張確認e-mail帶去日本
去到Counter俾職員check護照
最後課金就出到張Pass,順便可以劃埋位

成個行程我地會用兩張Pass
一張係JR西日本,一張係JR九州
要去各自既みどりの窓口排隊換飛
JR九州個counter係車站正中心,好易搵到
排左10分鐘就搞掂


JR西日本嗰個係筑紫口邊
大部分排隊既都係買新幹線飛既上班族
所以都好快排完隊換飛
2021-09-26 20:00:23
2021-09-26 20:01:47
LM慢慢睇
2021-09-26 22:05:51
眾所周知,轉酒店係一件好痛苦既事
尤其係你帶住異地言語不通既屋企人
基本上就係攞苦黎辛
我係上一次既行程有好深感受
所以今次我揀左博多駅附近既酒店
行程都係以博多駅為中心,盡量搭JR
而且可以做到1日來回,咁就唔駛轉酒店

今次就住係福岡博多CROOM西鐵酒店
係博多駅北面行5分鐘就到
地下有LAWSON,夜晚肚餓可以買野食
仲要有溫泉浸,不過就唔係混浴
由於都仲係新年時間,屬於旺季尾
所以每人每晚都要600蚊,唔算平
去到先知原來酒店對面就係巴士總站
早知係咁我就搭巴士唔駛拎個喼推上推落



我本身係Expedia Gold會員
Checkin嗰陣Reception妹妹話我地有VIP Access
我地住5日,就每人送左5張早餐券俾我地
自助早餐每人1200yen,姐係港紙差唔多100蚊
計計埋埋等於回贈左1500蚊

家姐同老母住雙床房


除左每日有水同茶點送之外
枱面仲有部iPad俾佢地search野
除左唔俾裝app之外,乜網都上到



另外仲有部足部按摩器
老母話都幾好舒服
2021-09-26 22:07:00
如果你覺得雙人房有按摩器好正既話
你會對單人商務房表示震驚
因為呢度有部按摩椅
不枉我挪用公款upgrade間房


水同茶點照樣都有,仲有部膠囊咖啡機
枱面冇左部iPad,但有部handy
廁所有個窗對住張床,但可以拉落黎
好處就係沖涼同去廁所都睇到電視
但我好少係度沖涼,通常都係落地下大浴場
順便浸埋溫泉先返房訓覺
因為呢間酒店實在太正
之後帶住父母去旅行再黎褔岡
毫無懸念揀番同一間酒店黎住


2021-09-26 22:21:31
參觀完老母間房再放低行李
都差唔多搞到夜晚8點,係時候醫肚
黎得褔岡,有一樣野係冇可能唔試
就係豚!骨!拉!麵!
因為呢度就係豚骨拉麵湯底既發源地
周圍都係見到拉麵店
所以係唯一一次去日本冇食過松屋
快快手去博多駅樓上既博多めん街道
呢度個設計同京都拉麵小路一樣
成層都係有大大小小唔同拉麵舖進駐
今次食既就係博多一幸舍
[Tabelog評分:3.50]



我之前係京都站上面食過
所以推介老母試呢個味玉ラーメン
姐係普通拉麵加隻蛋
我飲左啖湯,味道同嗰陣食差唔多
濃得黎唔鹹,冇味精
--------------------------------------------------------
:個拉麵好好食呀仔
:你上次去大阪食四天王拉麵都話好食
:呢個好食到飛天啦
--------------------------------------------------------


家姐叫味玉ネギチャーシューメン
其實就姐係有4塊叉燒既味玉ラーメン
所有野味道一樣




我係全個團既辣味同試伏擔當
叫左味玉赤ラーメン,赤姐係辣
上次係京都試左正常味,今次就試辣味
呢個拉麵係原本既拉麵加埋海鮮辣油黎煮
雖然紅卜卜,但其實又冇想像中咁辣
辣度大約係譚仔5小辣
湯底望落好稀,但飲落都係好濃好黏口
又唔會死鹹,飲哂佢喉嚨都係好c伏
不過我食完流汗流到好似跑完步咁
叉燒好嫩,不過薄得滯冇乜實感
麵條係幼麵,超級索湯,類似一蘭嗰隻咁
味玉既蛋黃溏心,味道正常冇乜特別
2021-09-26 22:24:18
食完拉麵就係附近行一陣
見到附近有個銀魂展
但係冇時間去


我地黎既時候都仲係新年
所以車站前啲燈飾仲未拆
都仲有少少聖誕氣氛





因為第二朝6點就要出發
所以好早就返酒店沖涼訓覺
背後係基於一個好自私既決定

Day0 完
2021-09-27 00:48:48
點解唔廣島入福岡走??
2021-09-27 02:43:12
樓主仲有貨
好想瘋狂食博多拉麵呀呀呀
2021-09-27 04:45:33
你去左幾多次日本???
2021-09-27 16:32:02
我估你咁樣zip廣島入行程,本身都已經係自私既決定?
照計冇理由咁既日數,咁既地點仲zip廣島入行程架喎
2021-09-27 16:49:49
其實有三個人又住博多不如搭的士好過
2021-09-27 19:23:16
一黎唔想轉酒店
二黎買機票嗰陣冇諗過去廣島
2021-09-27 19:25:16
好快會揭曉
2021-09-27 20:23:17
4日4県不愧係交通魔童
一般應該double先夠玩咁多
2021-09-27 20:24:17
驚塞車
2021-09-27 20:40:19
每個縣都淺遊je, 都ok嘅
2021-09-27 21:06:46
Day 1 - 廣島篇

原本呢一日應該係去由布院同別府
雖然都趕趕地,但都應該去得哂
但係2017年7月落大雨
單程去由布院由2個鐘變成4個鐘
當時諗住JR九州幾個月可以搞得掂
點知12月都未通翻,唯有忍痛cut左佢
結果搞左成年到2018年7月先全線恢復通車
不過上年7月又斷過,今年3月先通番
但係今年8月暴雨又黎斷過

結果替代路線就揀左去廣島
首要原因唔係因為嗰度多景點
而係我可以搭到特別版新幹線

上次關東關西跳板之旅先第一次坐新幹線
係廣告牌見到JR西日本有架500 TYPE EVA
每日來回一次博多駅同新大阪
有時佢會運休,要上網睇時間表
但嗰陣夾唔到時間,冇得見真身
今次就擇日不如撞日,橫掂有機會
一於就搭佢廣島
不過呢架車係博多駅朝早6:40開出
所以天都未光我地就咬住個Lawson飯團出發去車站

特別版新幹線有幾特別呢
特別在佢同國民動畫新世紀福音戰士合作
將一架500系新幹線變成500 TYPE EVA
外皮原本係以灰色藍色為主
而家就變成初號機既紫色同螢光綠線條
再加埋兩盞覺醒左既紅色車頭燈



呢架新幹線車次係こだま730
こだま姐係山陽新幹線最低等列車
代表佢係最慢兼且會站站停
去廣島駅差唔多要2個鐘
除非係搭短途或者係我呢啲狂熱份子
正常人屎忽痕都唔會搭呢架車
因為仲有のぞみ,みずほ,さくら呢啲更快既還擇
最快嗰班唔駛1個鐘就到

不過既然黎到就無謂出番去第二個月台搭快車
況且咁早到廣島啲景點又未開
都係上架車慢慢chok去目的地好過
同埋嗰陣天都未光好撚凍,體感-1度
留係月台太耐會凍死


2021-09-27 21:17:17
架車除左外表,裡面都做過啲功夫
凳墊,枱底,窗框同門都有NERV標誌
而且因為時間太早,兼且冇乜人係總站上慢車
所以影相好方便,唔駛驚影到人





連窗廉同地下都有



出發嗰陣博多仲落緊雨
好鬼驚廣島都係咁


之前提過買左2張Pass
呢日就係用廣島&山口地區鐵路周遊券
JR西日本出品,5日有效期
當年價值11000yen
除左包博多去廣島既所有新幹線班次自由席之外
用Japan Rail Pass (JRP)會唔俾搭のぞみ/みずほ
廣島市既在來線同埋宮島渡輪都包埋
如果好似係我咁係博多廣島做長距離移動
呢張Pass就fit哂
而家雖然貴左2000yen
但加碼包6程指定席,其實抵用左

https://www.westjr.co.jp/global/tc/ticket/pass/hiroshima_yamaguchi/

張Pass我剩係用1日,好似好傻仔咁
但作為交通魔童,我梗係計過數啦
博多去廣島自由席單程已經9000yen
計埋中間搭既在來線同渡輪,冇可能回唔到本
我自己設計左一條性價比Formula
將實際車費除以周遊券價格
數值越大就代表張Pass越抵用
我用呢張Pass既性價比係1.72
以第一次用周遊券黎講算唔錯
最痴線嗰次就係帶父母橫越日本列島
我地用Japan Rail Pass普通車7日券
用足7日長距離移動,性價比去到3.99
搭到JR破產


我地坐係第二卡,當然有原因
因為前面第一卡有啲特別野
除左有EVA模型展覽之外
仲有部模擬器駕駛艙俾你試揸EVA
不過因為前一晚好夜訓,橫掂大把時間
諗住訓番陣先去睇......
----------------------------------------------------------
:(老母搖醒我)仔係咪廣島落車呀?
:(起身伸懶腰)...係呀
:個報站好似寫下個站到喎
吓咁快?
:係咪到喇...
------------------------------------
起身既時候,個車長已經開咪講到站
根本就冇時間俾我再捐入去影相
所以到最後我係冇機會入到去參觀
btw慢車既新幹線真係好好訓


500 TYPE EVA: on9仔
2021-09-27 21:24:20
想講由布院火車又因為上月九州大雨斷左了
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞