【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

日頭黃昏個景好似幾靚
不過個夜景始終感覺普通啲

冇錯，就係依D景，現場睇好正

好慘，睇黎你冇去過旅行 好酸 單機啦

勁舒服喎

我話樓主寫到好伏下

長老話事

眼鏡橋真係唔駛去，伏到核爆
大浦天主堂都係靚既
我去嗰陣唔好彩整修緊咁解姐

Day 3 - 太宰府．熊本篇

前一日去左地下間和式早餐食有啲伏
呢日就試1樓既西式自助早餐
平時呢度係分開左做3間高級和式料理餐廳
但係早餐時段就會共用空間俾人食早餐
不過有樣野唔好，要除鞋先可以入去
所以最好都著番對襪



裡面既裝修係好傳統既木系風格
但係有好多種唔同既座位
有矮枱既個室，又有吧枱
個室既話唔駛驚要跪係度坐，有窿俾你放腳既


我地早黎，座位任揀
所以揀左入少少既個室霸哂成張枱
仲有得坐住懶人梳化食早餐
如果老人家腳唔好唔想爬黎爬去
近門口都有啲普通枱凳既位


呢度既自助早餐種類包羅萬有
啲食物同飲品多到打橫放滿幾張吧枱
和式同西式既加埋超過40種
飲品超過10種，正常既你講得出既都有
湯都有粟米湯味噌湯，仲有咖喱
講有乜野食真係講唔哂，自己睇圖
我地食左幾輪每樣拎少少
都食唔哂咁多種野食
但起碼每樣野都好食既
但我唔明點解早餐會有炸雞同咖喱

食飽飽就出發去第一站 - 太宰府天滿宮
搭巴士係最快同最平既方法
因為酒店對面就係博多巴士總站
搭太宰府直達列車旅人號，40分鐘就到
不過大家都知我好唔鍾意搭巴士
所以就用第二個方法 - 搭鐵
首先就係搭地鐵機場線去天神駅


明明係地鐵，點解又彈左架JR車出黎
因為機場線係同JR筑肥線直通運轉
最遠係可以去到佐賀既唐津
呢架車係JR九州305系通勤用車
繼續都係老是常出現既水戶岡銳治負責車箱設計
又係Logo，又係木系，又係車身數字
車門嗰隻KURO都係佢設計
係熊本去阿蘇既特急あそぼーい既吉祥物


搭5分鐘地鐵去到天神駅之後
出閘經地下街行5分鐘轉乘西鉄天神駅
不過條鐵同佢個名一樣咁西
我地一行到過去就送車尾
走嗰架仲要係直達太宰府既列車


其實走左車都可以去其他月台搭車
總之去到西鉄二日市駅
係嗰度再轉太宰府線去太宰府駅就得
不過呢度等車有樣好，就係等車冇咁凍
因為前一晚係稻佐山吹到有少少傷風


結果等左半個鐘先等到架直達車
但係點解頭先嗰架係新車
呢次就黎左架西車

搭西鉄去到太宰府駅唔駛半個鐘
由博多出發計起就大約45分鐘
唔計我走左架車要等半個鐘
但其實係博多出發既話
搭巴士絕對係方便過搭鐵既
因為一程就到，車費同時間都差唔多
咁就梗係坐定定好過要轉乘既

不過巴士半個鐘先一班，要早少少去排隊
因為近年多左好多人搭去中途站 - 太宰府政庁跡
嗰度同奈良既平城宮跡一樣係塊超大空地
附近有個神社叫做坂本八幡宮
係1300年前嗰度搞左個歌會俾啲文人吟詩作對
當中既詩詞收錄左係萬葉集入面
日皇新年號"令和"就係呢個經典入面引出黎
所以就變左旅遊熱點
如果多人得滯上唔到車
即刻走去搭鐵應該好過等多半個鐘既



太宰府個郵箱都特別唔同啲
後面架巴士就係博多去太宰府既直達車
總站就係太宰府駅出面


我地黎嗰日係星期日
所以街邊已經擺定檔等發市
又有朱古力香蕉又有串燒
總有一款啱你口味
不過食完早餐飽到上頸，冇位再裝


係火車站行去天滿宮會經過表參道
條路都幾闊幾好行
就算咁多人行都唔會迫

表參道中間有一個著名打卡點
就係呢間由隈研吾設計既Starbucks
特色就係運用左大量和式設計同自然物料
佢既作品包括山手線新車站東京高輪Gateway駅
同埋奧運主場館新國立競技場
場館座落於明治神宮外苑
外圍同屋頂都係用日本國內既木料鋪成
係世界上最大既木結構建築之一



行得越入條路就越窄
表參道個尾就係石鳥居
姐係太宰府天滿宮個入口
呢度開始就多人到好似行年宵咁



再行入去就係天滿宮既本殿
個個都想湧入去參拜
不過我地見入左去就好難出番黎咁
所以見到有空位就調頭番出黎算數
順帶一提，太宰府天滿宮係全國天滿宮既總本社
專門祭祀學問之神菅原道真
又係總本社，又係求學業
所以每年都會吸引幾百萬人參拜
唔少都係老豆老母帶住仔女過黎
以初詣人數黎計排名全國頭10

太宰府天滿宮有一種非常出名既食物
就係聽個名以為係用梅子整既梅枝餅
實際上佢只係用糯米糰子包住紅豆餡燒既餅
名稱既由來眾說紛紜，想知請Google
如果話博多係豚骨拉麵既鬥獸場既話
天滿宮就係梅枝餅既戰場
因為剩係表參道呢短短200米
賣梅枝餅既舖頭超過20檔
而佢既材料只係得糯米粉同紅豆
比起豚骨拉麵，味道仲冇咁多變
兼且全世界都係劃一賣緊1塊120yen
係大家競爭條件一樣既情況下
排隊既人數應該同好食既程度成正比
呢間舖冇人排唔代表唔好食
但係肚就得1個，等下次啦


寿庵 寺田屋 [Tabelog評分：3.50]
呢間舖就係石鳥居隔離
而且都幾多人排隊買
除左梅枝餅之外，佢仲有賣漬物



每一間舖既梅枝餅既餅面都有個梅花既印
差別在於材料既質素同師父既火候
寺田屋既梅枝餅餅面有少少焦黃燶燶地
趁熱食咬落去脆脆地好辣口
糰子皮唔係完全冇味，係帶少少鹹味
冇餡既邊邊食落有麻糬既感覺，好煙韌
紅豆餡非常多，做到真正既皮薄餡靚
但佢既紅豆餡係偏向豆沙，冇乜口感

中村屋 [Tabelog評分：3.39]
呢間野係寺田屋隔離，正職係做和食餐廳
個餅外觀望落都差唔多
食落個餡就少啲甜啲，都好食



お食事処 かさの家 [Tabelog評分：3.63]
作為一間近百年既老字號
兼當地Tabelog和菓子評分第一名
佢既人氣從排隊既長度可以睇到

之前既舖頭個個都係按人頭咁買
在場有5個人就買5件即食
而呢度啲人就按親戚人數咁買
除左即食之外，仲買成10個外賣走
仲指定要新鮮出爐入落禮品盒



因為供不應求，間舖做唔切
所以都要成10分鐘先拎到舊餅
視覺上我覺得呢度既梅枝餅比頭先2間舖既厚
咬落去都係脆，但糰子皮就比較軟
紅豆餡仲有豆粒既口感
而餡同糰子皮厚度比例1比1
有少少似高力豆沙feel
綜合黎講係咁多間入面最好食既



やす武 [Tabelog評分：3.55]
呢間舖都係其中一間名店，所以都多人排
賣相黎講呢一間最靚，外表係好完美既圓形
焦黃既表面都比較均勻
味道僅次於かさの家，只係個皮乾得滯

食完4個梅枝餅，係時候去熊本
太宰府車站隔離有間一蘭
佢係世界上唯一一間分店用五角碗裝拉麵
因為太宰府天滿宮係主學業
好多學生考試前或者放榜前都走黎求神
日文黎講五角同合格差唔多音
所以就取其諧音整隻五角碗出黎
吸引啲人以形補形
為左好意頭就過黎食碗麵


福岡去熊本好簡單，就係搭新幹線
但係太宰府呢度出發就有啲麻煩
睇過我之前幾次遊記既人
應該知我唔鐘意搭回頭車
就算搭車返博多轉新幹線係最方便都好
我都係選擇用個比較煩既方法去熊本
首先搭番太宰府線去總站西鉄二日市駅
終於搭到架新車



然後行去天神大牟田線月台
搭1個站普通車去紫駅
之後出閘向西南面行

行大約5分鐘就會去到JR二日市駅
呢個站算係大站，會停某啲特急
所以班次比其他細站密
黎到呢度又用得番北九州鐵路周遊3日券
上乜野車都唔駛補錢


落到月台就要睇下啲車經唔經新幹線站
姐係新鳥栖駅或者久留米駅
例如11:37班次總站係荒尾
經久留米駅，所以可以上車
11:39班次就係去鳥栖
唔經新幹線站，就唔好上


11:37架車係JR九州813系，非常面善
又係水戶岡銳治...(下刪1000字)


由太宰府駅上車搭到去紫駅
再行去JR二日市駅等車再搭去久留米駅
加埋其實唔駛1個鐘
時間同搭車返博多轉乘新幹線黎到呢個站差唔多
最重要係只係用210yen車費
太宰府返博多都要610yen，慳左好多錢

上到新幹線月台等5分鐘就有車
呢架係さくら549
用車係見慣見熟既N700系




我地揸Pass冇訂飛，剩係可以坐自由席
好彩都有連位坐


只需要20分鐘，我地就到左熊本駅


係隔離月台我地又見到800系新幹線
水戶岡銳治既作品老是常出現...(下刪1000字)




一講熊本，大家實係諗起嗰隻痴漢熊本熊
放心，佢已經俾人就地正法斬頭示眾

熊本駅係九州新幹線既必停站
因為出最近既大城市博多只係半個鐘
所以客量上都幾可觀
於是班次遠遠多於向南既鹿兒島
巴士要2個幾鐘先到博多，但只係平一半


熊本駅當時大規摸改建緊
又月台高架化又起新車站大樓
所以入面啲路改到迷宮咁樣
差啲唔識路行出個站
呢幢係白川口既白色車站大樓已經拆左
新大樓就直接起係呢幢野後面
用左黑色做主色，靚左好多
由設計師安藤忠雄參考熊本城而建造
拆左舊大樓原址起左個大商場
應該都多左幾多野行


除左廣島同長崎之外，熊本都係要搭電車既
個站就係白川口前面
日本超過一半地方既路面電車我都搭過

熊本市電無論搭幾多個站都係劃一170yen
搭得多既可以買500yen既一日券
但我地剩係搭來回340yen，所以就唔買
雖然點搭都係同價錢
但記住上車落車都要拍IC卡
老母以為剩係落車拍卡
搞到落車嘟唔到機嚇死佢
好彩司機幫手改機拍番就得
btw熊本市電都幾多款車




去熊本城最近係花畑町駅落車
熊本駅前出發係大約15分鐘就到
我地就搭多一個站
去熊本城・市役所前落車
因為我地第一站係去左熊本市役所先


前一次去姫路城我睇到呢張Poster
萌生左我去埋熊本城既願望
今次見有時間我就係返黎找數