【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

老母雖然睇唔明日文，但都睇得好留心
老實講，睇圖都知發生乜野事
家姐就直頭睇到呆左，話好恐佈
問我點解佢地要放核彈咁殘忍
你問我做乜姐，我又冇份
本身plan好去完資料館就行去本通食廣島燒
但睇完啲咁大壓力既野真係胃口都冇埋


既然係咁，直接去宮島散心再算
本通呢邊有2個方法去到宮島碼頭
第一個方法就係搭廣島電鐵2號線
搭到總站就係廣電宮島口駅
不過站站停要搭成30個站，成粒鐘先到
所以我地揀左第二個方法
就係搭Astram線去番新白島駅
嗰陣Astram未support IC card
要自己買飛
但係搭2個站就收190yen，都幾貴下



之後去番JR站轉山陽本線去宮島口駅
我地夾好轉車時間，45分鐘就到
最重要係可以用番張Pass慳錢

原來交通魔童仲有貨

係宮島口駅出左站行5分鐘就到宮島碼頭
搭廣島電鐵既話，車站隔離就係碼頭
呢度有2個碼頭，航線一樣落船地點一樣
左邊係宮島松大碼頭，右邊係JR碼頭
大家都係360yen來回，15分鐘船程
JR渡輪就特別標明自己係最近大鳥居
其實兩隻船航線距離頂多咪差10m
我揸JR Pass就梗係搭唔駛補錢既JR渡輪
但如果你會深度遊埋廣島市區
廣電同松大渡輪有一日乗車乗船券
搭宮島纜車憑券仲有折，都幾抵玩


呢度既渡輪唔似天星小輪咁隻隻一式一樣
我搭嗰隻就叫みせん丸，3層高
最底嗰層係放車同大型貨物
中間嗰層就係有冷氣有位坐既室內艙
頂層就係半露天位，可以吹下風



但其實一開船啲人就會好似我咁行出去影相
霸住船頭既右邊就可以影到靚相
但係近極都隔左幾百米
我用手機影都係大過粒米少少

落左船出碼頭向右行
就會去到宮島既表參道商店街
有好多手信舖同食野既檔口
見到咁多野食又聞到香味
終於擺脫到原爆既陰影走去搵食




行行下見到一個高過我既飯剷
睇Size應該係俾哥斯拉食飯用既
實際長7.7m，寬2.7m，重2.5噸
但佢唔係用黎裝飯，而係用黎祈褔
第一個將飯剷拎黎拜神既係一個叫做誓真既僧人
有一日佢黎到宮島，見到啲人拜褔神弁財天
但呢度啲人好窮，食都冇得食都要準備貢品拜神
誓真見到咁樣就覺得有啲反智
然後佢見到弁財天既肖像隨身會帶住一個琵琶
望落個形狀好似一隻飯剷
就同啲島民講不如用飯剷當貢品拜神
當係送個琵琶俾弁財天，神會明白既
唔知係村民餓到傻左定誓真既傳銷技巧一流
村民十分支持呢個方案
自從改用飯剷做祭祀之後
島民就過上幸福快樂既生活
久而久之就成為左宮島其中一種名物
神社都會用飯剷形既繪馬俾人祈願

除左飯剷之外，蠔都係其中一種名物
宮島所在既廣島灣地區
係廣島蠔其中一個最大既產地
係香港，好多日本黎既急凍蠔都係黎自呢度
黎得原產地又冇理由唔食啦
頭先係船上面都睇到有好多蠔排


今次就去左みやじま華屋敷[Tabelog評分：3.44]
右邊係普通賣手信既舖頭
左邊就係專賣蠔既Counter
揀呢間舖既原因係因為特別多人買
俾完錢都要等10分鐘先有
檔口啲員工keep住拆殼放上炭爐燒都燒唔切
所以燒出黎俾你既一定係最新鮮
如果覺得燒生蠔太普通既話
呢度仲有芝士燒蠔，穴子燒蠔等等
總有一款啱你口味
腸胃好啲既呢度都有新鮮生蠔
不過就只限當造期既冬天限定



第一次食就食原汁原味既燒生蠔
廣島蠔出名大隻兼肉厚
燒完縮左水都仲有手掌咁大
都只係500yen 2隻，一啲都唔貴
如果怕腥，呢度仲有柚子醋同檸檬汁俾你加
七味粉我聽得多，八味粉係乜野
雖然係燒蠔，但唔會燒到又乾又硬
一咬落去就噴汁，超級juicy
啲海水濃縮左所以都幾鹹
不過一啲都唔腥，好易入口
廣島蠔最當造既時期係每年2月
但係1月既蠔都已經相當肥美

好想試吓廣島蠔

宮島口附近有間食燒蠔放題
返到黎大半年冇再食過蠔
仲有勁掛住個炸嘅紅葉饅頭

剩係食蠔就梗係唔夠飽啦
家姐對一檔炸魚糕串好有興趣
就話不如去試番條
啲女見到條狀物體就興奮架喇
佢地叫乜味我就唔記得左，但我就叫左煙肉
叫完之後老細會翻炸一次，所以熱辣辣
煙肉唔死鹹，魚糕都幾彈牙
但係你睇圖都知真係幾油下，食左條有啲滯



食完炸魚糕串就行左去紅葉堂
呢間野創業於明治45年
係一間有超過100年歷史既老字號
專賣宮島其中一種名物 - 紅葉饅頭
外形就係細細個紅葉形既蛋糕
做手信送禮一流，有心思夠體面


紅葉堂唔係呢度唯一一間紅葉饅頭店
競爭程度同博多既拉麵舖有得揮
所以紅葉堂要突出重圍就要靠奇招
而策略就係即叫即炸紅葉饅頭
將啲饅頭浸麵糊炸一陣就上碟
十成十係炸Mars Bar啟發出黎

佢有3隻味揀，分別係Cream, 豆沙同芝士
我哋3個人，咁啱可以每人試一隻味
紅葉饅頭本身就係銅鑼燒咁既味
炸完之後外脆內暖但唔油，口感幾特別
因為個餡影到out哂fo，以下文字記錄
Cream味餡其實就係吉士醬
炸完流心而且有奶香味，呢個最好食
豆沙味餡粉得黎唔係太甜，都好味
但唔知點解個餡係灰色而唔係紅色
芝士味就有少少流心拉絲，鹹鹹地都幾好食
不過每個紅葉饅頭單買先100-120yen
炸饅頭就180yen 1個
加工費佔4成，食水都幾深

有冇上埋山

冇上山，因為太趕
下午1點幾先到宮島
剩係行街買手信食野已經要唔少時間
行埋嚴島神社都差唔多5點日落
事實證明廣島係冇可能一日玩得哂

樓主今次出文超級快
廣島有唔少野可以睇，一日太少喇

食小食都夠哂飽

之前紅葉季節上山等纜車要等50分鐘，最後行山行上去時間都係差唔多

紅葉堂再行前少少就係海邊，嗰度超多鹿
但係點解個島無啦啦會有鹿呢？
專家就話宮島以前係同本州大陸連埋
啲鹿得閒會走過黎呢度搵食
去到冰河時期後期海平面上升
宮島從此就變左個島，於是就被困左係度
不過呢度有個大樹林俾佢地瘋狂食草
餓佢地唔死之餘仲係度落地生根
久而久之變成而家既宮島鹿

如果去過奈良既話
你地會見識到啲鹿天生係黑社會同欖球員
因為俾遊客寵壞嬌生慣養
宮島本身比較鄉下少啲遊客，啲鹿民風淳樸
所以佢地好乖，唔會去襲擊女性同搶野食
唔夠食既話佢地自己識得行去後山食野果
因為食得比較清淡，所以細隻啲得意啲
地下都好乾淨，唔會四圍都係屎




你有你影相，佢有佢休息
影佢仲識得望鏡頭仲唔會撞鳩你攞野食
呢啲咪㩒撈囉


不過宮島鹿都係鹿，有野食都係會自己走埋黎
但就唔會好似奈良嗰啲收左陀地死都唔走
佢地食完就會自己行開

海邊呢度會望到宮島既象徵
就係好有名既海上大鳥居
日本既旅遊介紹入面經常都會見到佢
紅色既鳥居本身冇乜特別
伏見稻荷大社睇到你驚
不過係水上既鳥居日本就冇乜幾多個
以規模同景觀黎講呢個絕對冇得輸
呢個大鳥居並唔係一個獨立既建築
而係屬於呢個島最古老既建築 - 嚴島神社既一部分

唔好以為呢舊野遠睇好似細細舊輕飄飄咁
實際高16.5米，重成60噸
只係而家漲潮，有部分浸左係水底
呢個鳥居已經係第八代，建於1875年
咁多年黎打風都打唔冧佢
不過係2019年開始呢度封左大整修
睇個勢起碼整到2023年...

沿著海邊一直行就會到嚴島神社既陸路入口
黎到就要俾入場費，神社昇殿料300yen
如果想去埋隔離既寶物館，共通券可以平100yen
但我地黎到呢度已經2點半
去埋文物館都唔知有冇時間買手信
家姐同老母又對嗰啲文物野冇乜興趣
所以就唔去啦
下次我自己一個黎去哂佢
因為我地係1月笫一個禮拜黎
日本人習俗會做初詣
類似農曆新年會裝頭炷香或者拜車公咁
嚴島神社呢度就如同黃大仙祠一樣
多人到好似行年宵咁

黎到呢度我突然間有個疑問
呢度叫宮島，但個神社就叫嚴島神社
咁呢度究竟係叫宮島定嚴島呢？
經過Google大神既指引，發覺係冇答案既
自古以來呢兩個名已經溝埋黎用
你可以叫個島做嚴島或者宮島都得
但係個神社就一定係叫宮島神社

古時相傳呢度係航海之神宗像三女神住既地方
凡人唔可以隨便登島，否則會被天譴
梗係啦，偷窺女神仲想有命走
係1400年前既某一日
宮島地區所在既安藝國有一個豪族
佢夢見女神叫佢去嚴島起個神社俾佢
於是兵仔就跟住做，嚴島神社就正式奠基
因為有豪族大佬照住，咁多年黎都相安無事

嚴島神社風水好，人傑地靈
到17世紀江戶時代呢度已經成為名勝
儒學家林春齋係日本国事跡考呢本書入面
將陸奧松島，丹後天橋立同安藝嚴島並列為奇觀
之後啲人就將呢三個地方通稱日本三景
本人已經制霸左呢3個地方

松島遊記睇呢度
https://lih.kg/oPOdMgX
天橋立遊記睇呢度
https://lih.kg/paiKpEX

因為特別既建築工藝同歷史價值
早於1911年就已經成為日本國寶
係1996年同原爆圓頂一齊成為世界文化遺產

門口冇人check飛
大家都好自律買左飛先入場
一入門口既左邊就係鏡之池
而家退緊潮，好清楚見到泥地中間有個窿
聽說係滿月時份月亮會投映落呢度
不過冇乜人見過，因為夜晚唔開


呢度既設計風格同京都既神社接近
用左好多朱紅色既木做結構
唔同既區域就用迴廊連接住
成個神社都起係宮島西北面既淺灘上面
漲潮既時候就會好似浮左係海上面咁
當然打風既時候都係會浸哂啦
每逢退潮就會變左沙灘，可以行落去
不過之前check過5點開始日落，5點幾先退潮
可能等到天黑先行到落沙灘，今次就不了



山上面有個好大既屋頂同五重塔
嗰度就係宮島另一座歷史建築 - 豐國神社
400幾年前豐臣秀吉平定左九州既敵對勢力
揀左呢度起左個超大既佛堂誦經
黎祭祀係嗰段時間死左既手足
因為佛堂既面積大到可以放近千塊塌塌米
而1塊塌塌米叫1疊，所以就做千疊閣
但個佛堂未起好豐臣秀吉就瓜左
之後上場既德川家康係佢死對頭
梗係唔俾佢繼續起
所以天花板同牆壁一直都未起好
與其話佢係一個佛堂
形容佢係一個超大涼亭會比較貼切
而個五重塔比千疊閣早百幾年就存在
但就唔知幾時開始就當左係豐國神社一部分
我地冇上到去，因為行行下唔記得左

嚴島神社中間有個突出去既露天平台
同大鳥居成直線，距離大約160m
但因為呢日實在太多人，起碼排左50人等影相
所以我係側邊影埋去就算
呢度應該有啲重度課金導覽服務
可以搭大飛去大鳥居下面影相
影出黎應該宏偉過呢度影過去好多
排隊影相既人：喂喂，你企開啲啦DLLM



呢度係能舞台，專門演出能劇
亦係日本唯一一個係海上面既能舞台
我對呢樣野冇認識唔知點樣講
但係一定冇人冇聽過以下呢段能樂
https://www.youtube.com/watch?v=BJ8dV28kVrU
唔知點解有隻鹿亂入左


呢條叫反橋
通常出現係歷史比較悠久既地方
係天皇或者重要人士出入既專用通道
平時就封住唔俾人行
但係斜到咁真係行到？

行完嚴島神社已經3點幾
本身想去埋彌山展望台睇宮島全境
但係嗰度只係開到4點幾
就算即刻跑去纜車站坐纜車上去都趕唔切
橫掂又未天黑，所以又行番去商店街
繼續搵野食買手信


頭先啲燒蠔魚糕已經落哂格
聞到有好香肉包味就走左過去
其實係俾個靚靚店員吸引左過黎買
○錦本舗 [Tabelog評分：3.39]
我要左個廣島牛饅頭
熱辣辣得黎好多牛肉餡多過唐記
牛肉用醬油同洋蔥一齊炒過
所以又甜又好香牛油味
不過450yen一個，都幾貴




家姐叫左個穴子饅頭，姐係海鰻
味道就...
海鰻加柚子胡椒既破壞力都幾驚人



跟住我地又行番去みやじま華屋敷
今次就唔駛排隊直接買完就有
於是我地又encore多一次

食飽飽就差唔多5點，開始黃昏
見到開始有啲人行到落去個淺灘度
不過個天黑黑地，都怕危險
所以都係唔等退潮直接返歸了
如果真係想把握機會就最好係宮島住一晚
因為朝早同黃昏都會各有一次退潮


宮島碼頭平時冇咁靚，但呢年多左好多旗仔
因為2018年適逢平清盛出生900周年
兼嚴島神社動土850周年

平清盛係平安時代末期既權臣
大權到好似董卓咁可以廢帝另立新天皇
因為平氏一族一直信奉宮島既神
平清盛扶搖直上，當然就要酬謝神恩
動用權力同財力大規模擴建嚴島神社
啲人覺得平家有今日都因為個神社
於是就成為左飛黃騰達既象徵
即使後來平氏政權被推翻，神社依然繁盛至今
所以平清盛可以話係嚴島神社既大恩人
冇佢，宮島都冇今日咁繁盛
慶祝佢誕生都好正常



走既時候又係搭番JR渡輪
上左船之後走左去船尾諗住影下黃昏景
唔睇由至可，一睇把幾火
屌，而家個潮退哂可以行落去
仲見到啲人影相
早知我就遲15分鐘先走

紅葉堂好食呀

去番本州之後就搭番山陽本線去廣島駅
行左陣商場先轉新幹線返去
可能因為係星期五，好多上班族放工返老家
自由席條隊多人到仆街
上到月台架のぞみ啱啱到，好多人上車
我地就專登唔上車排頭位
等下一架さくら自由席，好彩有位坐
可能因為得さくら8卡
呢班車多人到走廊都企位



呢一日大家好早起身，又行左好多路
都冇乜力再去博多搵拉麵食
所以就趁未有車嗰陣揀左幾個駅弁
係車食完就返酒店休息
家姐買左廣島駅既名物便當 - 活あなごめし
あなご姐係穴子，又名海鰻
係繼蠔之外廣島既另一種名物
海鰻肉薄油脂少，口感比較削
不過佢魚味濃得黎又唔會腥
加左鰻魚汁都唔會蓋過個味



我就要左個乜都有既広島旅弁當
另加一支瀨戶內可樂
個便當乜都齊，有蠔有穴子有蛋有煮物
味道都幾出色，啲海鮮一啲都唔腥



老母貪平要左個食彩便當
雖然係平但野食都唔係太差
9格入面有炸蝦炸豬扒
然後有3格唔同既飯，仲有生果

搭左1個鐘新幹線終於返到博多
一落車就見到對面月台泊左一部車
就係九州新幹線專用列車800系
專門行駛站站停既つばめ列車
佢係新幹線系統入面最短編成既列車，得6卡
最主要因為九州新幹線客量唔係好多
沿線人口仲少過香港總人口
所以冇跟番山陽，東海道，東北新幹線咁
閒閒地都起個容納十幾卡車月台既大車站
除左博多駅之外，其他車站一律都係得8卡車月台
所以16卡既のぞみ到博多駅就要返轉頭
而つばめ站站停都預左冇乜人搭
所以JR九州索性cut到佢盡
非繁忙時間都真係裝空氣多


博多駅收費區隔離有間期間限定EVA Cafe
呢啲野一定係唔好睇又唔好食又貴


訂完第二日指定席就返酒店沖涼同浸溫泉
之後就攤係酒店房張按摩椅
但係第二日又要早起身，屌

Day1 完

留名，好想去日本