【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

廣島係中國地方最大最多人住既城市
此中國不同彼國
日本既中國地區係指山陰同山陽地區
亦都係所有新幹線既必停站
所以班次都幾密


呢隻吉祥物好似比較流
而家應該用新幹線褔音戰士


黎到廣島駅都係8點鬆啲
正值返工繁忙時間
無謂專登搭車迫沙甸魚
而且下一站廣島城9點先開
咁早去到食西北風冇意思
所以就行左出JR車站望下

廣島駅南口早幾年重建過
多左唔少起到好靚既高樓



而下面就係廣島電鐵廣島駅
作為全日本最大既路面電車系統
佢有8條線，總長超過35公里
最遠可以搭到去宮島碼頭嗰邊
不過我地今日唔坐佢

Hea到差唔多時間就縮番入站等車
望到對面月台有好多遠古時期既車
實際上廣島係JR西日本最多舊車營運既地區
呢款黃色塗裝既國鐵クハ115系電車
就係其中一隻主要既列車
論出廠日子分分鐘老過你老母
不過呢幾年應該都換得七七八八
係加班車先至會出現番


由2015年起，國鐵列車開始被新車227系取代
就係我地搭山陽本線去新白島駅呢款



廣島駅去新白島駅只係1個站，2分鐘就到
山陽本線同可部線都去到，睇時間搭就得
新白島駅同時都係Astram線既轉乘站
佢個站好得意係半地面式
不過因為鏡頭太廢影唔哂個站
其實係因為好撚凍唔想揸機


到站之後向南行10分鐘就會到廣島城外圍


估唔到1月都仲有紅葉未謝

留名

lm ,記得你之前半爛尾好似

留名食蠔

之前嗰篇寫左半年，寫得完架

LM 寫完就好快d出文啦

伯母知唔知比樓主水咗去坐慢車

強帖留名～

佢冇所謂，影車影得幾開心

如果睇過我姫路城嗰篇啲遊記
大家應該知道現存天守有幾得來不易
現存天守係指江戶時期或之前建成
而整體結構到現代都冇大改動過既天守
廣島城以前都係現存天守
明治時期廢城令冇拆到，做左軍事用途
明治天皇更親自係呢度督師指揮甲午戰爭
令廣島成為當時日本既臨時首都
但係原子彈一野轟落去，渣都冇得淨
而家見到既樣係1958年建成既鋼筋水泥天守
同大阪城一樣冇左嗰種傳統既味道
所以我冇興趣入去，影個相打個卡就算
但聽講個天守因為老化要重建
市議會傾緊用以前技術起番個木造既天守出黎
如果成真既話就正喇




地獄梗 - 廣島城既石油氣罐

係廣島城向南行就會行到平和紀念公園
但我專登兜遠少少
去左一間叫做島病院既醫院
就係為左呢一個牌 - 爆心地
意思姐係原子彈爆炸既中心點

廣島會做左原子彈既首要攻擊目標
除左因為呢度係重要既軍事基地之外
仲因為廣島附近冇大型城市兼三面環山
轟炸完引起既幅射擴散對周圍影響較少
戰略上又可以產生威懾作用
於是就成為人類史上第一個核子試驗場
軍方為左可以拍攝到爆炸一刻情況
要求當地能見度要夠高先可以投下原子彈
如果天氣唔好，就會去炸九州既小倉或者長崎
1945年8月6日朝早8:15
Enola Gay轟炸機裝住重4000kg既Little Boy原子彈
係廣島相生橋上空投下原子彈
43秒後，原子彈係呢度600m上空爆炸
不過呢度70年如一日
島病院既後人繼續係度營運醫院
希望佢地可以走出傷痛


平和紀念公園入面有一幢危樓
但唔好睇少呢幢咁殘舊既建築危樓
實際上佢係原爆後少數仍然屹立不倒既建築之一
都係離爆心地最近既完整建築，人稱原爆圓頂
因為佢遭受原爆既超高熱同衝擊波之後都唔冧
象徵即使經歷困難都會不屈不撓堅強面對
成為廣島重建復興同無核化願景既其中一個icon
而且係1996年成功登陸成為世界遺產
作為紀念人類歷史上最慘痛既事件之一

留名

樓主 好耐無見喇

又有得追樓豬遊記

廣島真心正

之後我地沿河邊向南行
經元安橋行去下一站 - 廣島平和記念資料館
過橋向右望會睇到原爆圓頂隔離有條橋
嗰度就係原子彈預定目標 - 相生橋
揀佢既原因除左佢係廣島市區中心點之外
係高空睇仲係T字型，做靶一流
只係因為大風先吹側左去東南面既島病院
以接近1萬米高空投擲黎講算係好準架喇



原爆之子像斜對面係一個窄長既廣場
沿著廣場行到尾就係資料館
望番轉頭會見到個廣場係有特別設計過
因為資料館，石碑，火炬同原爆圓頂係成一中軸線

資料館前面既石碑，就係平和都市記念碑
碑上面寫住一段日文

「安らかに眠って下さい 過ちは 繰返しませぬから」

意思姐係 "請安息吧 錯誤不會再重演了"
入面裝住廣島原爆死難者名冊
記載左超過31萬廣島市民既名字
見到有唔少人過黎獻花悼念
上面既馬鞍形物體其實係個遮雨亭
希望受難者的靈魂唔好再淋到黑雨唔駛再受苦
黑雨係乜後面會講

石碑後面有個水池，叫做平和之池
池上面有團火既火炬，就叫做平和之燈
火種自廣場建成以黎點燈之後從來都冇熄過
象徵反核嗰團火從不熄滅

lm 樓主遊記唔錯

之後雨越落越大
拿拿聲行過去平和記念資料館
入場券200yen，仲送Post Card
Postcard係用紙鶴回收既再造紙整成
有心意得黎又對環境有好處
呢啲野真係得日本人先會諗得到


話到明係資料館，呢度放左超多展品
詳述廣島原爆前既歷史同原爆當日既情況
又講下重建既過程同復興之路
最後就係講核武發展同世界既反核浪潮
如果係鍾意行博物館既一定唔會令你失望
但現場氣氛異常凝重，好似去緊喪禮咁
有啲公公婆婆睇住啲展板一路睇一路抹眼淚
可能係觸景傷情或者有親人牽涉原爆
現場係可以影相，唔開閃光燈就得
不過個氣氛會搞到你唔想影相，所以冇圖

如果你地覺得呢度係普通歷史展覽
好似香港歷史博物館咁合家歡既話
呢度恐怕會令你地失望
因為呢度有啲展品同人體奧妙展有得揮
包括藏有屍骨既半溶瓦磯堆，真係睇到有骨
一啲燒到變炭既人形物體
幫被爆者治療診症既彩色研究片段
個醫生仲要揭開啲傷口黎睇
仲有啲原爆倖存者畫既印象畫
全部都一地血成地死人周圍都係火
睇得多都真係幾壓抑
但有啲部分我印象都幾好深刻：

1. 爆炸威力
有科學家利用當年既調查報告同實地調查
計算出係爆心方圓2km範圍內
溫度可以達到攝氏3000度
身處戶外既人唔止係炸死燒死咁簡單
而係會係1秒內灰飛煙滅
搜救隊伍係爆心地附近搵唔到屍體
但就係建築物既牆邊見到啲人形黑影
正正就係嗰啲人曾經存在過既痕跡
現場有人影石實物同唔少半熔既原爆展品

2. 幅射雨 - 黑雨
原子彈爆炸所產生既高溫同氣流
將一切地面既物質捲哂上高空
例如水，瓦礫，幅射塵，蒸發左既人等等
因為啲物質經過超高溫消毒焚燒變哂炭粉
遇到冷空氣溝埋啲水蒸氣
就會變成墨汁咁既黑雨落番地下

據倖存者所講，原爆後現場既環境又熱又乾
好多人一見到落雨就走出去淋雨降溫或者飲雨水
但呢啲黑雨同核反應堆入面啲廢水差唔多
等同直接將幅射食落肚，當場死亡
之後黎到既搜救隊同軍隊當然唔知咁大獲
佢地淋住雨救人，間接接觸輻射
令唔少人患上幅射後遺症，例如白血病
輻射後遺症唔多講
資料館圖文並茂講到好核突

想去廣島
但唔想去原爆紀念館，怕感覺太沉重

好鐘意睇樓主嘅遊記

上次去好多小學生做問卷之類，佢地反思/反戰教育做得好好