【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

想去北海道

九州嗰種少人、寧靜既感覺未必個個啱

我同呀媽呀妹去淨係食左一餐拉麵，都唔係一蘭
反而係博多站上邊食左3晚晚餐，JR PASS無限新幹線真係好爽

咁快就日本最後一篇Last day
希望樓主會繼續寫埋韓國

好掛住札幌湯咖哩

北九州都好啲，起碼有博多
如果係南九州既宮崎同鹿兒島
你預左睇完風景行完景點就冇野行

其實一蘭都唔駛專登去博多食，周圍都有
博多站真心超多野食，除左車站之外
百貨公司地庫同頂層又有餐廳
乜野價位野食都有

恐怕你要等到下年

九州幾適合plan4、5日短程trip
機場多又近，交通又方便
可以分幾次慢慢行哂九州各縣
其他地區唔排夠6-7日都難一次去哂主要景點

2020年3月買左機票去福岡 最後取消左

終於追到live
見樓主日日咁早起身，係咪轉酒店好d

因為帶埋老母同家姐去，有成2個大喼
如果要轉酒店，搭火車都還好
撞正繁忙時間搭巴士都驚落唔到車

再者，寄存行李都係一個大問題
如果行程同下一間酒店順路
可以放低行李之後兩手空空走去玩都還好
如果要放係啲收費設施
大喼呢啲特大物件每日都可能要使多幾千yen架
橫掂我去既地方大部分單程交通時間少過1個鐘
仲短過朝早返工係新界西去觀塘
咁不如舒服啲，唔駛成日執行李checkin checkout啦

如果係獨遊或者少行李又唔同講法
寄存locker易搵得黎又唔貴
咁就轉酒店都唔駛咁煩

食完拉麵都係4點幾，都唔知有乜做
不過佢地拎住啲戰利品似乎都行到攰
於是就返酒店放番低啲野再行下博多駅附近
呢度都有地下街，有間卡樂B買手信



購物呢家野係女士專利
偷食就係我既專利
見佢地行得咁忘我，我又閃走先
走左去博多駅入面排長龍嗰間牛角包店
佢有2個舖位，右邊排隊條龍仲長過紅隧等巴士
專門賣3種味 - 原味，朱古力，蕃薯
但唔係每個計錢，而係按重量俾錢
去到this this this再攤大手板俾手勢要幾多個
個店員就會幫你裝入袋去磅計錢
左邊冇人排既
雖然都有牛角包賣但唔係賣主打味道
如果唔想排都可以一試既




我就當然唔會咁衰仔剩係買俾自己食啦
我每個味要左3個，冇記錯好似500yen咁上下
除番開每個港紙4蚊，都唔算特別貴
買完佢地就行到過黎準備開餐
-------------------------------------------------------------
：有得食，新鮮出爐
：乖仔，衰女學下人啦
：頭先買野邊個俾錢架
-------------------------------------------------------------

呢個就係原味，食落好香牛油味
酥皮薄得黎又唔會好似食空氣咁一咬就碎哂
仲食到一層層，質感非常好


呢個係蕃薯味，有爆餡既蕃薯
所以味道甜甜地，口感粉粉地


呢個係朱古力味，睇個顏色就知
個餡有朱古力，唔係太甜，都幾好味


食完牛角包，又繼績行

KITTE門口有一個奇怪既郵筒
就咁睇似係專登用黎寄情信之類既野
事實上就唔係既，純粹係打卡位引人黎影相
左眼係寄單頁既書信同postcard
右眼就寄大型郵件同空郵
個口就俾矮細既小朋友寄信


頭先落左場大雨，地下積左水
加埋啲燈飾搞到天空之鏡咁又幾靚





食牛角包都唔可以當飯食既
本身都仲諗住去食拉麵
--------------------------------------------------
：唔好食拉麵啦食左咁多日，有冇飯食
：松屋好唔好...(查地圖)行10分鐘有一間
：出面又落雨又大風，好凍呀大佬
：咁食便當囉，近近地係車站買完拎番房食
：媽我呢期冇廁所去，會唔會去超級市場買生果食下
：GoGoGo

因為貪方便，便當就咁去博多駅嗰間駅弁買就算
之後去老母家姐間房開餐

老母叫左最平既吉列豬扒便當
反而係咁多個入面最正常既一個
吉豬佔成個便當盒4分1，份量好足
又有炸薯角西蘭花筑前煮
最重要係呢個便當可以叮熱
所以熱辣辣咁食特別好味


家姐就要博多味自慢弁当，乜都有
有蝦有魚有明太子有炸蟹鉗有燒賣有玉子etc
仲有甜薯同蕨餅做甜品
每樣野都試到，味道都幾好


我就叫左燒肉便當
但係燒肉個肉量少到舖唔哂個飯面
個味係唔錯既，啲燒肉汁甜甜地好好送飯
但係啲肉放唔滿飯面觀感上唔太好
餸既種類雖然比味自慢弁当，但都唔少
仲有舊橙俾你做飯後果


家姐話冇屎痾腸胃唔係太好
所以行超級市場嗰陣老母就買左士多啤梨
咁啱俾佢搵到盒特價既褔岡縣產甜王
佢揀生果既技術都係一流既，冇一舊係爛既
又可能因為就快爛，所以超級甜
甜到食完係要飲番水



食完就返自己房執野準備聽朝返香港
轉台嗰陣見到有西川貴教同Aqour就睇左陣
原來係NHK World搵佢地上歌唱節目唱歌
Lovelove大法已經攻略埋日本官台
聽住歌執野特別有效率



Day4 完

Day 5 - 離日篇

最後一日，朝早浸番個溫泉先
因為太早，基本上就係包場
不過聽講空肚浸溫泉好易暈
所以浸左5分鐘就返房換衫


之後就唔駛諗
一定係食番西式自助早餐



我地搭1點機，計番時間11點出發都唔會遲
不過朝早車站附近又冇乜野行
所以10點就出發去機場磅行李
我地買左30kg行李，而家磅到30.9kg
啱啱好過到關唔駛俾人罰錢
同場見到好多疑似代購既人
一次過拎十個八個大紙皮箱寄倉
搞到成條隊15分鐘都唔識郁



褔岡機場過關既效率比想像中快好多
雖然航廈細，國際航班唔算好多
但過關櫃位相對都多，而且大部分都開住
所以用左15分鐘就由安檢直入禁區
去成田嗰次屌哂鬼
機場大得黎人又多，又唔夠staff做野
安檢又慢過關又慢櫃位又少
用左成30分鐘先去到登機口
好彩我預早入去買手信
如果唔係實上唔切機

每個機場都會有既扭蛋機



雖然呢一年福岡罕見地遇到超強寒流
氣溫好多時都係5度以下，但我就從未見過雪
上次同基友去京都0度都冇雪睇
離上機仲有1個鐘，出面突然間由天晴變天陰
之後就落起飄雪，歷時5分鐘咁大把
雖然唔係好多，但見到雪我已經好開心




褔岡機場禁區有Starbucks同7仔
所以臨上機都可以飲下咖啡買啲小食
家姐驚上機肚餓，所以買左飯團同草莓牛奶
不過UO會捉人偷食，食既時候小心啲




然後，就沒有然後了


【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多) 完

北海道係唔會悶

點解？

利伸冇去過 機票夠去歐洲

仲有冇遊記出呀？

其實飛東京轉新幹線可以好平架
北海道係一個洗滌心靈既地方

後記

去完呢一次北九州旅程
仲有4個月就係我既處男獨遊記
諗住用盡一張Japan Rail Pass 7日普通車周遊券
由東京出發去富山金澤，再去京阪神
之後沿東海道新幹線去埋名古屋
最後返到東京搭飛機走，總共7日
路線都plan得相對輕鬆同好多自由時間
但同完家母家姐去旅行之後
我發現如果用番同一個行程模式套用係獨遊
應該半日就行完，多左既時間唔知做乜好
因為我睇野都幾快，又行得快，又怕悶
於是就諗住加景點等個行程充實啲

去完熊本城，感嘆再堅固既城都會有倒塌既一日
所以就想趁仲睇到，去哂國寶五城制霸
又因為臨走前終於見到雪
所以就想去埋立山黑部睇雪
更因為食拉麵食上癮
而專登加多幾間評價高既拉麵試下
搞搞下plan到走火入魔
整理左一份同日本鐵路時間表差唔多咁精密既行程表
mark低左景點之間既交通轉乘路線建議
研究埋搭邊班車可以無縫轉乘下班車
縮短等車同轉乘時間，有效運用時間

之後發現有好多野想去但唔夠時間
再加碼請多3日假玩埋上北海道既函館
係總支出冇特別增加既情況下
代價就係由訓酒店變哂做訓膠囊
雖然係攰，但就係做完運動爽嗰隻攰
最終行程就係本州雙重大迴環


想回顧既話就留意呢度

2018夏：[極限挑戰]用10日獨遊半個日本
https://lihkg.com/thread/1957043

唔好呀
等你再出遊記
好想去日本