【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

嗰陣老母先第二次去日本
食乜都覺得好食架啦
同埋帶佢地食得好野多，佢地會嘴刁架
上次帶完兩老橫越日本列島食好野
返到香港帶佢地食日本野就話
點解香港又貴又冇咁好食

Day 4 - 褔岡市區篇

雖然張周遊券仲有一日用
但係前嗰幾日搭左咁多車，費事佢地辛苦
呢日就剩係市區一日遊俾佢地行街
所以都唔駛咁早出發，9點先落去食早餐
我仲專登早啲起身浸個溫泉

至於揀邊款早餐食邊隻，諗都唔駛諗
一定係西式，食過返唔到轉頭
不過今日遲黎，好多靚位俾人霸哂
唯有坐門口嗰啲高枱
大部分野食同前一日一樣
不過老實講，好食得黎又有咁多款式
食幾日都唔會厭既




食完野就搭地鐵去天神
地鐵站一出就係天神地下街
尋日去太宰府都經過，但係冇行
成條街懶復古咁，又磚地又彩繪玻璃咁
但係成條街都好鬼黑，好易kick到仆街
因為係新年期間，好多舖頭都做特價
所以女士們十分開心
呢一日係1月第二個星期一
咁啱就係日本既成人之日
好多20歲既少女化到鬼火咁靚
著住好靚既和服行過
應該係行完成人禮之後去太宰府祈褔
人地話褔岡出名多靚女，本人心感認同
不過靚女們行得太快影唔到




天神地下街呈南北走向，長600m
得2條巷俾你行，都好難迷路
只要你行到街尾轉去隔離條巷再行
基本上就唔會miss任何舖頭
另外佢係一個超級地下通道
除左有地鐵西鐵巴士總站出入口之外
佢同時接駁住大量百貨公司同商業大樓既地庫
如果真係要行埋，1個禮拜都行唔完
但兩位女士只係行左1個鐘就想走...
--------------------------------------------------------
：阿仔係得呢度咁多咋，仲有冇
：吓你地行完？百貨公司呢
：百貨公司博多都有啦，我想睇下啲細舖頭，邊度有
：咁去運河城望下囉
：咁你帶路啦
-------------------------------------------------------

去運河城既話無論係搭巴士定搭鐵
基本上同行路過去時間差唔多
都係15分鐘咁上下
等得車黎我都行到，仲唔駛錢
咁就決定就咁行過去
不過因為有啲雨，係凍左少少咁解姐



運河城附近既中洲河邊望落好冷清
但夜晚會擺屋台，姐係街邊檔既居酒屋
不過我建議唔識日文既小心俾人呃
因為menu全日文，又有啲海鮮價
因住食碗拉麵就收你幾千yen
但聽講氣氛唔錯，唔怕生外既可以試下




運河城係個超級大商場，好多野行
又多牌子舖頭，有啲仲有得退稅
行行下肚餓都仲有好多餐廳俾你揀
我地行完既時候大約1點，諗住食野
點知好多餐廳都要排隊
唔駛排隊既姐係唔好食啦
橫掂家姐想去番天神地下街買野
我就決定順路行去Donki入一入貨先
中間經過無料案內所

屋台真心不了去aeon好過

博多Donki係地鐵中洲川端駅上面
係運河城行過去大約10分鐘
斜對面有棟好顯眼既啡色高樓
就係鼎鼎大名既一蘭本社總本店
地下同一樓係拉麵舖，上面就係office
雖然我預定係食一蘭，但唔係呢間




之後行番落地下街
佢地都行慣行熟，唔駛我帶路
我就自己行睇下有乜野食過下口癮先
首先無意中發掘到呢間RINGO
因為門口keep住都幾多人排隊
於是我又跟住排

RINGO 天神地下街店 [Tabelog評分：3.17]
呢度剩係賣一樣野 - 吉士蘋果批
399yen 1個，size大約係半個八月堂牛角包咁大
個酥皮超脆，食既時候小心食到周圍都係
個餡好多蘋果粒，林林地又唔係完全煮爛哂
唔似M記嗰種大部份都係糖漿
食多啖先食到後面既吉士醬
因為係焗完先擠入去，所以凍凍地
佢中和左蘋果既酸味
兩者加埋係非常好既配搭
呢間野香港改左名叫RAPL
開左係老銅SOGO
不過賣成40蚊1舊，貴左勁多

行行下又見到有人排隊食甜品
人流仲多過RINGO，於是我又排

ベイク チーズ タルト 天神地下街店 [Tabelog評分：3.46]
呢間野叫BAKE Cheese Tart
係頭先間RINGO既姊妹店，屬同一集團
亦都同頭先一樣剩係賣一樣野 - 芝士撻
佢個網址係cheesetart.com
連.jp都冇，串到呢
呢間野排左我15分鐘先買到


芝士撻係香港紅左一排
當年無論係連鎖麵包舖定街坊餅店
只要係有焗爐既都實有得買
因為可以賣到10幾20蚊1個，FatFat
我係香港食過就覺得麻麻地
一黎貴，二黎餡太酸皮太林好唔夾
但呢個芝士撻改變左我既想像
我望住佢新鮮出爐
由焗起到我隻手唔多於5分鐘，所以超級香
撻皮好香脆，但咬落去唔會散哂
撻餡既芝士係流心狀態，暖暖地
芝士味濃得黎仲食到少少奶味，非常出色
香港幾年前都開過，不過執左

我奶埋個撻都差唔多3點
拿拿聲閃番去摧搵兩位女士食飯
我地去食一蘭，但唔係去頭先經過嗰間總店
而係去天神西通り店
除左因為唔駛行咁遠之外
呢度有全世界唯二既分店限定menu
就係釜だれとんこつラーメン
另一間有得食既就係運河城店
只係頭先多人得滯費事排
就係因為咁特別，招牌都寫住日本唯一
門口隔離仲專登有塊板介紹佢



我地去到咁啱有位唔駛等
同普通一蘭一樣，都係禁左食券先入座
不過拉麵就只係得限定嗰隻
而且餐就只係得有蛋同冇蛋，冇乜選擇
如果想食番正常款，最近就要行番去總本店



去到自修室坐低先慢慢填嗰張Order紙
如果去過日本食一蘭應該明我講乜
禁鐘仔叫人收飛，好快就有得食
如果唔同你講既話應該以為佢係鰻魚飯

一揭開蓋就同平時既一蘭拉麵好唔同
湯底顏色比較深，而且都比較油
因為佢係用醬汁燒豚肉既汁煮成
所以聞起黎有好重醬油既香味

正當諗住限定野就實冇死啦
點知希望越大失望越大
個湯飲落不得了，鹹到好似飲緊豉油咁
食幾啖就要飲幾啖冰水俾條脷休息下
麵就用番一蘭既幼麵，冇乜特別
但可能因為呢個釜既儲熱能力太高
啲麵好快就索哂湯脹哂淋哂，越食越難頂
唯一要讚既就係叉燒
佢係用五花腩，中間有啲肥肉入口即溶
又整得好入味，配搭埋湯底既濃味都真係會食上癮
但如果要改善既話最好就叉燒同拉麵分開上
起碼叉燒啲鹹味同汁唔會落哂個湯度



老母投哂降，飲水都頂唔順
叫我幫佢叫碗白飯送拉麵
點知佢話拉麵當餸配白飯又幾夾
我就偷左啖飯食，條脷又真係冇咁辛苦
終於知道點解日本人咁鍾意拉麵配白飯
但我始終都係接受唔到碳水化合物配碳水化合物


我自己就好少食剩野既
為左俾大家睇到碗底係啲乜
我決定玩爆我個腎飲哂佢
屌，咪同普通一蘭一樣

想上阿蘇火山但去之前爆完封左

鐵膠去九州真心正
咁間多jr入面九洲最有心搞特色列車
https://www.jrkyushu.co.jp/trains/sp/

熊本城黎緊幾年應該部分開放番
阿蘇又開番，所以會多番遊客
我去嗰陣明明係星期日中午，但係成個死城咁款
同我印象中既熊本相差好遠

由布院之森超級靚
但我去左九州兩次都搵唔到機會搭

睇完樓主既文 我已經打消左去 九州既念頭

個可樂餅超難食

九州主要都係文化風景遊
如果怕悶都真係有啲難搞

提提你 去天神分店 易排d

又提下你 南熊本果間靚d 大d 唔駛等

重點…響站附近

仲有隻熊辦公室既…

由布院之森幾年前去由布院坐過
感覺良好
當時目標都係睇金麟湖
住一晚由布院 第二朝晨早去睇
但好可惜...果日大風，吹散晒D霧氣