【思鄉回顧系列】[帶住母姐去旅行]4日北九州跳板之旅 (廣島‧長崎‧熊本‧博多)

仲未試過係火車上食野

渣㗎

Day 2 - 長崎篇

一提到廣島，好難唔提長崎
因為廣島同長崎都有個世界紀錄
就係被原子彈炸過
長崎又係北九州，非常順路
既然去得廣島，今次唔爭在就去埋長崎啦
橫掂張Pass包左唔駛補錢

之前嗰張廣島&山口地區鐵路周遊券就收番埋
呢日開始就用北九州鐵路周遊3日券
係熊本同大分以北既JR九州路線都可以用
小倉至博多既新幹線唔用得
因為嗰段係屬於JR西日本既山陽新幹線
想唔補錢就要搭JR九州既特急列車
2018年既時候價值8500yen，包指定席10次
而家雖然變左9500yen，但冇左指定席次數限制
仲可以出發前1個月上網book定指定席
不過每張就要收番840-1000yen手續費
某啲熱門觀光特急例如由布院之森
你到日本先訂指定席分分鐘冇位

雖然都要早起身，不過7點幾先出發
所以食得切酒店送既免費早餐
呢度有2間餐廳，一間西式一間和式
今次我地就試下和式早餐先
去到門口俾張早餐券個侍應就可以入座
呢間舖夜晚係居酒屋做到通宵
臨收工就會轉做酒店早餐
所以見到啲侍應同啲員工係有啲眼訓

呢度係半自助早餐，有4款主餐揀
我地3個人就試左其中3隻


家姐要雜炊，賣相唔錯


老母要燒魚，舊魚就好似細左啲


我就叫左燒牛舌
同menu一樣得4塊，符合商品說明條例
味道係鹽燒，冇乜特別
啲牛舌雖然薄但係都好韌


主餐就只會上一次，冇得添食
但係出面都有好多野俾你任攞任食
飯，沙律，飲品，配菜等等都係無限refill
味道都唔錯，所以一定食得飽
食完就行去搭火車

呢日搭7:54分既かもめ
專門行駛博多駅至長崎駅
今次搭既呢架係885系振子式列車
會跟隨慣性傾斜提高穩定性
轉彎可以用比普通列車更快既速度過彎
對於多山多彎既環境好有幫助
不過轉彎快都冇乜用
因為路程有一半係單線要停站避車
根本就上唔到極速



車箱設計到好似機艙咁，上面係儲物空間
凳就係大班椅，超級舒服
張枱就收埋左係扶手入面，比較細
如果係用電腦或者食便當就難搞啲



火車過左褔岡市區就開始見到一望無際既田野
睇景睇到悶悶地就係架車度遊蕩下
係車門位見到有部售賣機
就禁左支九州產蜜柑汁試下
支野幾好飲，有啲果粒咬下都幾過癮
不過甜到糖尿，飲完要灌水



肥前鹿島駅至諫早駅一段係海邊
好天既時候個景都幾靚
雖然塊玻璃做過處理，不過都係曬到仆街



野生捕獲817系列車


係諫早駅見到一架好特別既列車
嗰架車係屬於私鐵島原鐵道線
可以去到長崎縣東面既島原市
我相信如果唔係無聊到震
應該都唔會去嗰頭既

話就話博多同長崎都係北九州
但因為太多單線區間，車速唔快
都搭左1小時57分鐘先到長崎駅
仲耐過我搭站站停500 TYPE EVA去廣島

等啲人落哂車就可以慢慢影下架車
如果你地細心留意JR九州既列車
會發現好多車既外觀同內裝都有啲相似
因為好多車都係出自同一個人設計
嗰個人就係水戶岡銳治
佢既特色就係列車獨有logo同埋走木系風格
呢一架885系，頭先見到既817系
同埋前一晚見到既800系新幹線都係佢既作品
かもめ姐係鷗，所以架車有個鷗既圖案



885系單睇個顏色同車頭外型
好易令人聯想到和諧號，呢個判斷係冇錯既
皆因885系同和諧號CRH-3型
都係參照德國ICE-3高速列車
水戶岡銳治同ICE-3個設計師關係非常好
經過佢同意借左個外觀設計去885系
除此之外其他野都係自己設計番
所以絕對唔可以話佢抄

而和諧號CRH-3型就真係基於ICE-3技術
當年鐵道部全球招標引入高鐵技術
引左西門子過黎合資起廠生產同埋低價轉移技術
最終強國掌握左好多西門子手持既ICE-3技術
之後致敬自主研發下一代國產列車
西門子慘成Condom
另一個轉移技術既例子就係日本
川崎重工同鐵道部合作生產CRH-2型和諧號
列車既技術就係建基於新幹線E2系列車
所以點解動感號咁似佢
再講落去我驚犯國安法


隔離月台停左架787系，同樣都係かもめ
所以都有かもめ個logo係架車度

當時既長崎駅仲係地面既港灣式月台
但因為將會成為西九州新幹線既總站
所以成個站向西移兼擴建同高架化
不過呢條連接博多至長崎既新幹線
都只係興建左武雄溫泉至長崎段
博多至武雄溫泉段就因為佐賀縣既反對
到而家都未落實到走線
佐賀縣知事話中央政府同長崎縣冇同佢商量
私自起左造價最貴既雙線標準規格
想生米煮食熟飯焗鳩佐賀縣起埋佢
佐賀縣知事就話：你大我呀，唔起咪唔起

所以到下年武雄溫泉至長崎段通車既時候
由博多去長崎既人都係需要搭番特急
去到武雄溫泉駅先可以轉乘新幹線
最終都只係慳左半個鐘
不過如果真係起得成全標準規格
博多去長崎最快51分鐘就到
比而家平均2個鐘快左超過一半



長崎既交通同廣島好相似
都係靠電鐵貫通市區大部分街道
今日大部分時間都靠佢走黎走去
所以就去左站前面既觀光案內所
買張500yen既電車一日乘車券
長崎電鐵無論搭幾遠都係130yen一程
所以搭4程就回到本
而且係呢度買稻佐山登山纜車門票
仲可以用比較平既團體票價買到
唔駛去到纜車站用正價買



電鐵站就係舊既長崎駅前面，要行天橋過去
望番轉頭就係AMU PLAZA商場
商場本身就係舊車站既一部分
而家就有條好長既通道駁去新車站

長崎既第一站係去眼鏡橋
搭3號線係市民会館駅落車行過去就到


不過呢度有好多線，要睇清楚3號線先好上
btw長崎電鐵好多款車






搭2個站，唔駛5分鐘就到左市民会館駅
長崎電鐵都有個眼鏡橋站(めがね橋駅)
但係要轉車，不了
落車行過去5分鐘就到，好方便
呢條橋建於1634年
係日本第一座石拱橋，橫跨中島川
因為有兩個拱形好似眼鏡，啲人就叫佢眼鏡橋
唔知係我地黎得比較早定長崎少遊客
有一刻我以為自己去錯地方
點解旅遊景點周圍係冇人既




中島川上面唔止得眼鏡橋呢條石橋
只不過其他都係遲過佢起，所以唔出名
每條橋既設計都有唔同




河上面都有啲石俾你跳飛機咁行過對岸
就好似咁樣

宮島最正係依間
https://www.kaki-ya.jp/
我都係岩岩上年去完, 而家都無再食過蠔

一早攞左飛先,行完下面就差不多等到纜車了先再上去

條眼鏡橋咁濕鳩咪鬼去啦

上網寫到係日本三大名橋乜乜乜
點知去到一睇，咁咋
早知就去長崎平和紀念館

LM

有排都未有得去

眼鏡橋遊覽過程非常順暢
除左冇人之外，附近又冇乜特別野行
所以就捉緊時間去下一個景點 - 大浦天主堂
行番過去市民会館駅搭5號線去大浦天主堂駅
當年我去既時候個站仲係叫公会堂前駅
而家已經改左名


長崎電鐵300形，典形綠白底色
1953年製造，用左差唔多70年都未壞
由日立生產，襟用到一個點



搭大約15分鐘就會到大浦天主堂駅
離遠望到一幢奇怪中國風既大樓
呢幢野好有名堂，叫做四海樓
係由明治時期一個褔建人創立既餐廳
長崎名物皿うどん同ちゃんぽん就出自呢度
中文姐係肉絲炒麵同湯肉絲麵/強棒麵
原先係諗住出啲大件夾抵食既麵俾窮苦留學生
點知因為好食，傳下傳下連本地人都走黎幫襯
紅到連孫中山訪日經過都要黎食
於是就變左長崎其中兩樣名物料理


四海樓隔離有個大斜坡
斜坡頂就係大浦天主堂
大斜坡望番落去就係長崎港
呢日個天超級靚，同個海一樣色

講起大浦天主堂就要講下日本天主教歷史
第一批傳教士係1549年既鹿兒島上岸
借貿易為名，驅使大名開放領地傳教
佢地努力學日文融入當地人
又將教義同日本傳統思想互相結合
結果天主教好快就傳遍九州，甚至整個日本
唔少平民同大名都改信天主教兼受洗
肥前國既大名甚至將長崎奉獻俾教會
成為日本天主教既中心

但之後既政權認為天主教徒勢力過大
佢地有西方自由既思想，難以用愚民政策管治
又驚佢地勾結外國勢力顛覆國家政權
於是實施禁教令明確定義天主教為邪教
傳教既活動變得地下化好似大陸咁
1597年，政府係京都同大阪捉到人違規傳教
於是捉佢地去長崎西坂處死祭旗
及後因為禁極都有，索性鎖國唔俾外國人訪日
直到200幾年後發生既黑船事件
日本先被迫開國同外國有正常往來

大浦天主堂就係之後興建既第一批教堂
建於1865年，係日本現存最舊既天主教建築
亦成為第一個西式建築既日本國寶
教堂另一個名係"二十六聖殉教者堂"
因為教宗將1597年長崎西坂既26個殉教者封聖
於是佢地就被稱為日本二十六聖人
為表紀念，教堂正面係對位西坂方向既
係2016年佢被封為日本唯一既宗座聖殿
並且係2018年成為世界遺產之一

大浦天主堂入場費1000yen，都幾貴
但係我地黎既時候撞正佢整修
教堂外牆要翻新，某啲室內地方都封左
可能申請緊世界遺產要整翻靚
與其俾左錢入去影棚架同食裝修塵
今次我都係影出面當打卡算數
下次起好新幹線再去啦

既然冇去教堂，就行下斜坡啲舖頭


呢度有幾間手信舖專賣長崎名物長崎蛋糕
相傳係葡萄牙傳教士將當地既甜品傳過黎
將蛋，糖同麵粉混合之後倒落個模度焗既蛋糕
呢度有文明堂總本店同埋清風堂
2間既評價都好好，仲有得試食
雖然好食，不過就偏甜



再行落去就聞到好香既蒸包味同肉味
原來係出名賣角煮饅頭既岩崎本舖
睇黎要好好懲罰下佢


睇到角煮饅頭個樣
如果唔同你講佢係長崎既名物
你應該以為我去左台灣
因為角煮饅頭就係台灣刈包咁既樣
一塊扁平既蒸麵團包住舊滷扣肉
老母同家姐就試呢個正宗角煮饅頭
個包仲有彈性，中間塊五花肉好淋
味道係偏甜既東坡肉，都幾好食



我就要左個最貴既白漢堡
姐係芝士長崎和牛漢堡饅頭
個汁同角煮一樣，都係甜甜地
中間塊和牛漢堡好香牛肉味好多肉汁
但係加左芝士就滯上加滯，扣分
正宗角煮饅頭好食啲
總括黎未食過都值得一試既
但係當手信買番香港就似乎唔太可能
因為角煮要保持零下18度急凍
而且豬肉有可能過唔到檢疫
費事搞到過唔到檢疫被充公啦

呢度附近開港之後就變左外國人居留地
所以有大量外國建築依山而建
上網見好似好靚咁，又有時間
所以就取道オランダ坂 (荷蘭坡)
行過去下一站 - 長崎中華街
但首先要經過間孔廟同長崎教會



呢度就係荷蘭坡既起點
開頭上斜好急，有啲吃力



中段就唔會太斜，唔難行
而且可以望到長崎南面既山景
最後就落斜行番落大街就好輕鬆
我就覺得冇乜特別，唔駛專登去
由大浦天主堂起計
20分鐘就可以行到去長崎中華街

長崎中華街全名長崎新地中華街
同飛田新地完全無關
呢度同橫濱山下町、神戶南京町
合稱日本三大中華街
而長崎就係當中歷史最悠久既一個
大約係17世紀就有華人聚居
因為華人事業為重，搵錢大哂不問世事
幕府覺得佢地安份守己唔會搞事
就算之後鎖國都照樣俾佢地經商
成為當中既一個特例

同咁多個中華街一樣
長崎呢度都係有牌坊座落係唔同出入口
呢度就係南門，出面條街就係福建通り
因為當年行船過黎既好多都係褔建人
所以專登改條街做褔建街紀念佢地貢獻
可見福建幫既影響力有幾大
佢地都影響左呢度既文化，尢其係食
例如頭先講過既皿うどん同ちゃんぽん
刈包角煮饅頭都係其中之一


南門隔離呢間有個大鐘係頂
間舖頭叫釣鐘堂，係專賣漢方藥既老字號

呢度既規模比神戶同橫濱細好多
10分鐘都行得完
裡面既野同橫濱既差唔多
又係嗰啲日式中華料理店呀
占卜舖呀，中式手工藝店嗰類





呢度就係北門


係北門向西望會見到有啲西洋風建築
嗰度係人工島出島既一部分
以前係荷蘭既通商地域
日本鎖國之後，除左華人之外
另一個獲准係長崎貿易既國家就係荷蘭
因為冇公然違反幕府既紀錄，紀錄良好
而且單靠華人不足以入口足夠既物資
於是就DQ原本係度既葡萄牙人俾荷蘭入主
話就話俾佢地貿易通商，但有嚴格限制
就係唔可以離開個島半步
因為怕佢地會好似天主教徒咁搞搞震
反而華人就可以周圍走

係鎖國時期，荷蘭就係西方既代名詞
而當年由西方傳入既知識
日本人就稱為蘭學，蘭就係指荷蘭
不過個島之後因為發展而填平左同拆左唔少舊建築
而家睇到既好多都係跟番以前圖則起過
我就冇太大興趣就費事行過去lu

係中華街北門再行多5分鐘就會到去觀光通
嗰度就係長崎市既市區，好多野行好多野食
但係點解都係冇乜人既





本身我地就揀左吉宗本店食茶碗蒸既
不過老母睇到啲食物模型就有啲野講...
----------------------------------------------------------
：呢度食乜架
：食茶碗蒸，姐係蒸蛋
：食呢啲野邊度飽架，又咁貴
：媽，係唔係都試一次先講啦
：咦要除鞋坐榻榻米上面食喎
：吓係架，咁不了，去食拉麵啦咁
-----------------------------------------------------------

Plan B就係思案橋ラーメン[Tabelog評分：3.57]
因為黎到都已經1點半，過哂食飯時間
所以唔駛排隊直入就得



呢間舖頭望落好似小店咁
實際上就大有來頭
因為佢係長崎生招牌褔山雅治既愛店
每次返黎鄉下都會過黎食番碗麵
有時仲會帶埋啲藝人朋友過黎幫襯
所以間舖都好多簽名板，啲名大家都好熟悉
例如Daigo，佐藤健，三浦春馬(RIP)



當然唔少得一大堆褔山雅治簽名板

廚房嗰邊有個大鑊煮關東煮
全自助，想食就自己行出去揀
不過我見得番好少野揀
可能因為頭先食飯時間夾哂
聽人講比較重口味


坐低之後阿姐問我地食乜
唔識日文都唔緊要，指住menu咁叫就得
除非你唔識睇中文
我地跟番啲blogger咁叫，應該冇伏
首先黎既係餃子，煎到好脆口
味道就正常冇乜特別
覺得油既可以點啲醋消滯



老母話食拉麵，我就真係叫左個ラーメン俾佢
湯底係豚骨，有少少麻油所以都幾香
有啲似出X一丁豬骨湯嗰種味
叉燒就偏瘦，不過都唔韌
麵就係幼麵，麵質都正常有啲彈牙
但如果你係第一次黎既話
呢個拉麵味道太普通，唔建議叫



家姐就叫呢間舖既招牌 - 特製チャンポン
姐係長崎其中一種麵食名物 - 強棒麵
褔山雅治最鍾意就係食呢個麵
同普通拉麵外觀最唔同就係多左好多料
有椰菜芽菜海鮮魚板，仲有隻生蛋
湯底同普通拉麵好唔同，少少杰身
雖然都係豚骨但係就帶蔬菜同海鮮既鮮甜
飲落有少少黏口，濃得黎但唔滯
撈埋隻蛋個味道就更加濃厚
麵既粗度質感好似車仔麵既油麵
索湯得黎又彈牙
雖然有少少鹼水味，不過都接受到


最驚喜既就係我叫既呢一個 - 皿うどん
睇到之後我覺得非常之有親切感
因為呢個根本就係酒樓茶餐廳既肉絲炒麵
底麵用番拉麵既幼麵，炸得好脆
淋上同強棒麵一樣既湯芡
味道同チャンポン一樣，但就香口好多
啲麵炸乾左所以勁索汁，超好味


3個麵既合照，就咁睇都知邊個最好食啦
家姐食得慢，啲麵漲哂

哥拉巴園 夜晚入場睇燈飾都唔錯

其實係因為冇乜時間去哂所有景點
橫掂都上稻佐山睇風景，就唔去哥拉巴園