【懸疑】你有懷疑過跟你同住的家人，可能並不是他們嗎？ 2

>33

安琪低頭不語，抿唇想說甚麼卻欲言又止。對著我的家人，她由始至終都在戴著那副Angel Version 的假面具，使我現在也搞不清到底是她仍在裝溫婉，還是真的無法反駁我姐的指控。

同樣被罵上一份的Javier重重嘆息，理直氣壯地反問姐：「你錄我哋音，咁你聽到咩？」

被挑機的她不忿氣，急忙在手機播放當時尾隨兩人上巴士得來的錄音。


「我份工咁忙邊有時間，應酬你一個都夠。」

「咁我哋一陣係咪返你屋企睇埋套戲唧？」


雖說我當時對失去這段婚姻已經沒了太大的感覺，反正從來擁有的感覺就不強烈。存在意義上來說你不能失去一些你未曾擁有的東西。截掉一邊肢體是痛不欲生，但當它本來就動不了又感覺不了，好像就較易說服自己沒甚麼大不了。
可是他們在巴士上說過的話，我聽過後還言猶在耳。

備受出軌的指責，一直沉默的安琪終於也按捺不住駁斥姐：「前排我同Javier喺DONUT聯繫返，我知道咗佢做醫生後就就同佢講咗我老公嘅情況。其實喺好耐之前，我同Javier都一直都密切聯絡觀察你嘅情況。呢種病唔常見，Javier都未試過處理相關病例，佢平時嘅工作已經好忙。佢係睇在同你一場舊同學嘅份上，先至用自己嘅工作工餘時間幫我哋咋，佢咪話仲邊有時間去溝女去做其他嘢呀。」

「哦，睇病定睇戲呀？你隻臭雞想呃邊個？」姐急不及待又質問她。說起被背叛或不忠，家姐都有過比我豐富和慘痛得多的經歷。我能理解她的動氣其實也不完全是為了我，某部分也是為了某個在內心已經死去了很久的自己。


本來安琪想說點甚麼，激動得半個身子都向餐桌傾斜。可是Javier伸手制止，代為回答：「其實喺處理精神疾病上面，患者家屬往往都擔任住一個好重要嘅角色。安琪作為佢身邊最接近嘅人，好有需要更加了解多啲呢個病，咁先有機會幫到李生。雖然唔算大路，但係都有劇集電影係用卡普格拉綜合症為題材，拍得好嘅話其實幫到好多無醫學相關知識嘅家屬去做一個初步了解。如果你咁堅持我哋睇戲就係有路嘅，不如你講下你拍拖會唔會睇《Criminal Minds》、《The Broken》或者《Brain on Fire》呀？」

安琪此時也開腔，不過說話的對像不是姐，也不是Javier。
原本安放在桌底的手想要伸出來，可是她像經過了好多重的慎密思考後，還是決定放回原位。

「我諗你都知道，呢幾年我哋的確好不滿大家，成日鬧交。如果我話從來無諗過要離開你就假嘅。」

她捉住自己的雙手，明明我就在她正對面，她的視線還是堅持落在餐桌面：「不過事實就係，我同Javier一心只係想你好返，其他嘢都係後話。佢同我講，呢個病會令到你成日疑神疑鬼、每次喺我身邊都會提高警覺、不停咁諗好多假設然後推翻自己，我淨係想像已經覺得好辛苦……

所以，我憎唔憎你都好，至少我無憎你憎到想你承受呢種痛苦。」

她這樣跟我說話。

你們說這是真安琪，可是真正的安琪會跟我這樣說話？你們開玩笑吧？她的視線依舊落在桌面，使得我可以毫不忌諱地直視她的面容。在我看來，她的下半臉仍然和我記憶中的不盡相同。我再看牆上的全家福，嘗試將一張臉切割成數塊不同的小拼圖來對比。鼻子對鼻子，嘴巴對嘴巴依然不見得是一樣。

可是當我再度想起Javier說我的病原跟面盲症或者類似，我再強迫自己將她臉部的小拼圖再分析成更小的小細節，嘴唇對嘴唇，嘴角對嘴角，好像……又比起剛才更像了一點。只是我只要一把視角拉遠，我還是不能覺得這兩張臉是一樣的。意識告訴我它們是不同的，可是認知卻無法確實指出哪裏不一樣。


姐明顯不買安琪的帳，故意嘲諷她：「講到懶深情，呃鬼咩。咁多醫生唔搵，係要搵佢呢個舊同學啦？如果你真係覺得出咗事，點解你唔搵正正經經搵個醫生嚟幫手呀？」

這次卻換來Javier維護自尊心的澄清：「容許我clarify一下其實我都係一個合法執業嘅醫生嚟。何來唔正經呢？更何況安琪本身係唔想搵任何——」

說到這裏，安琪馬上就用力捏住他西裝褸下的手臂，示意他不能說下去。Javier一接到眼神就非常識相，馬上轉移話題。

我沒心神理會他們在玩甚麼把戲，只忙著分析自己此刻的認知是否屬實。其實這回事是很瘋狂，但我要證明自己沒有瘋掉，就必須要想通這一點。我首先得抽離原有意識，然後用一個旁觀的角度去分析自己的觀點是否合理。

好了，即使我是有Javier所說的面盲症病源，可是安琪她突如其來的溫柔、每天下廚、還有連夜說的纏綿情話，不可能是幻覺啊？

Javier清清喉嚨，續說：「其實呢，我跟住就係想講病發原因，不外乎都係外在同內在嘅啫。外在創傷即係整親頭呀、撞親腦呀嗰啲一啲外在嘅撞擊影響咗腦部啦；內在就即係指患者受到情緒困擾。幻覺嘅衍生，追根溯源其實好多都係為咗保護個人嘅心智，而造成幻覺去填補返大腦入面理智同情緒嘅矛盾同空隙。

當你見到而家出現喺眼前嘅安琪突然變得溫柔體貼咗咁多，去做一啲平時唔做嘅事、講一啲平時唔講嘅說話，
呢一個「安琪」同你記憶感知上所認識嘅「安琪」有太大出入，所以你受損嘅迴路就直接將佢變成咗另一個人，去『滿足』你大腦入面出現嘅裂縫。

而我研究過你同安琪嘅婚姻狀況咁多年一直比較疏離，所以當佢稍為表現同平時唔同——無論係咩原因令佢突然性情大變啦，總之你寧願覺得佢係變咗第個人，都唔肯相信佢係真心想對你咁做。

宏觀嚟睇，我個人相信係心因性上，你病發係因為呢段似有還無嘅婚姻多年嚟一直對你構成無形嘅壓力，再加上安琪份工嘅關係，no offense——你喺呢段婚姻之中缺乏安全感，一直覺得佢份工作係拋頭露面、好容易會俾人搶走，所以先加重咗你卡普格拉綜合症嘅病癥。結合上述咁多點就編成咗『有人複製咗兩個安琪出嚟』嘅故事，去滿足你上面所有嘅假設。」


「即係點？講完咁大輪，你哋真係無路？你點證明呀？」家姐不待Javier說完又插話，進一步挑戰他。
我留意到，Javier在說「缺乏安全感」的時候故意瞥了家姐一眼。他沒直接回應姐再一次的質疑，反而刻意又重複一次剛才所說過的：

「所以喺精神病學上嚟講，好多時候患者家屬都真係擔當緊好『重要』嘅角色㗎。」

那天Javier待到夜深才離開，姐臨行之前多番問我是否真的不回老家。
我說我想留下，跟真安琪、不，跟安琪有一點私人空間說話。

儘管Javier似乎已經釐清了這幾個月來的疑惑，但我在心底還是沒有完全取信於他。我和真假安琪在這個家日夕相對，好多謎團還是像砂子攝進鞋底一樣不起眼卻使人坐立難安。

我對安琪所產生的一切懷疑，都是源自她訛稱自己去了Z鎮的一天。
後來被我們發現她根本沒有離過境，就更加奠定我確信這一切都是謊言的基礎。當然，如果Javier的話屬實，我的甚麼迴路甚麼失常就是驅使我會作出這種懷疑的主因。


「點解你要呃我去Z鎮？嗰晚，其實你去咗邊？」


門一關上，待到所有人都離開我就開口問她。要知道如果姐在家，說起這些事神經敏感的她肯定會咄咄逼人。我不是想要追究她甚麼，事到如今我只渴望得知事實的真相。我相信Z鎮這件事就是一切疑難雜結的開端。要解開繩結，必須由頭解開。


安琪先是一想，沒有直接回答。「你跟我嚟呀。」她擺擺手，示意我跟她走。

我們由客廳移至主臥室，看起來一切如常。安琪坐在床邊，也拍拍旁邊的位置讓我坐下。

她咬咬唇，彷彿有甚麼難以啟齒：「你記唔記得我話去Z鎮之前嗰晚，喺度發生咩事？」

是日終了 之

【作者的話】（打尖）

嚟到呢度，故事其實只係去咗九成。

不過唔知道大家對於「主角有精神病」會唔會有好多想法同意見，所以容許我將本身放喺故事最尾嘅「作者的話」搬上嚟先。

睇過唔少故事，知道讀者觀眾傾向唔鍾意主角有精神病嘅情節。但係點解明知係咁我都照寫出嚟呢，唔通真係搏屌挑戰世界底線咩


上面講到，全世界只有0.12％人口患有卡普格拉綜合症。

唔知係好彩定唔好彩，
喺上年年頭，我哋真係親身遇上咗一位患者。

就喺香港呢個咁細嘅地方，就喺我哋住嘅附近，全球0.12%嘅機率就係咁隨機俾我哋遇上咗。


睇戲唔鍾意劇本就咁用「精神病」草草解釋晒所有荒謬，好似好兒戲咁；但係當我哋無意間切實接觸到一位患者喺唔知自己有病嘅情況下向我哋求助，嗰0.1%就突然變成1，睇呢個病突然就唔再覺得天馬行空。患者唔再係數字，而係一個好真實嘅故事。


遇到呢件事嗰陣仲寫緊《誠信破產管理局》，其實我甚少會喺寫緊一個故事嘅時候分心去諗第二個，不過嗰陣已經決定咗下一個故事，一定要將呢個病有關嘅故事寫出嚟。（因為咁，所以今次先至完故無耐咁快又有新故事


當然，寫主角有精神病，唔代表故事一定係求其用一句精神病去敷衍晒所有疑點就算數。今次寫嘅時候我都set咗呢個課題俾自己，希望呢個故事可以做得更加多，即使係病，亦希望每一個疑點都用病理病徵解釋。同時最想做到一日未到結局，一日都仲有驚喜俾到大家。故事仲有幾日內就會結局。暫不劇透後面會係點，不過衷心好希望大家可以陪我去到最尾。
假使你真係對呢啲情節好反感決定唔再睇落去，依然好感謝你睇到呢度，希望我嘅下一個故事可以帶俾你更好體驗。由第一次寫小說開始就希望可以做到佢唔單純係一個kill time嘅娛樂，直到而家都係。雖然好老土，但寫故事係我好享受嘅事嚟，所以更想每一次都做得比上一次更加好。

如果大家有興趣，喺完故後嘅「作者的話」再同大家分享下我哋遇到嘅嗰位患者。以上只係解咗部分謎題，之後幾日我哋繼續。

今日出咗咁多文，大家喜歡嘅可以擺低正皮同留言啊
有啲問題如果係之前會喺故事講嘅，我驚劇透就唔特別覆了其他都會回覆的


想大大力支持理想巴，科勞我：
Instagram:https://www.instagram.com/waittobewritten/
Facebook:https://www.facebook.com/waittobewritten

同居生活 ｜ 「疑」情別戀
每日連載中

留名睇埋落去

推推推

會唔會有反轉再反轉就算男主有精神病，都未解釋到露露點解會話有兩個媽咪

又係停喺呢啲位

好有興趣聽呢個真故事加油

露露個位可以睇返上個post最後嗰章

「你點知道，嗰個唔係媽咪？」我再追問，盡量抑制自己的語氣不要太進取：「係咪——媽咪個樣唔同咗？」說罷我加上手勢比劃，指著自己的下半邊臉示意。

可是露露搖頭，她沒有看到樣貌上的差異，讓她知道安琪不同了的是另一回事：
「呢個媽咪唔鍾意龜仔、唔鍾意我。」

她是知道的。

「我想要鍾意我同龜仔嗰個媽咪。」

至於點解會突然性格大變就故事之後再講

遺傳病？

Shutter Island 係你癲咗定全世界癲咗

留名繼續追故
我都係其中一個唔鐘意用精神病 幻覺之類嚟解釋所有疑點嘅讀者可能係因為咁樣可以將所有疑點1對1咁perfect match哂所有嘢太唔真實

Lm

好想一次過睇哂

關唔關床頭d血跡事？

我諗如果樓主以前嘅故冇用過精神病去埋尾 就會對今次嘅安排接受程度高d
同一條formula用幾次會有d吹漲
不過其實開頭已經估到 所以都係願者上釣 亦證明樓主都係有d堆砌懸疑嘅功力嘅

發生咗咩事

呢位巴打不如上水講講

係咪去深圳之前主角喺到撞到個頭呀，加埋佢情緒困擾，就內在+外在病發原因齊曬

懷疑係男主角打佢

可能打埋露露 所以先想送走佢

飛𨋢 好快結局了