【作者的話】
故事起源自今年年頭一宗喺議辦接到嘅求助個案(賣個廣告,多少少詳情有性趣可以去
https://bit.ly/3uf6Rt1 睇)
當時一認識到卡普格拉綜合症,就已經好想用佢作為一個故事主題寫出嚟,但後來再做多啲資料搜集,就發覺將佢變成懸疑故事嘅謎底係有好多事先始料不及嘅難度。雖然唔知大家想唔想知,純粹想分享少少寫作上嘅making of
首先因為卡普格拉綜合症嘅矛盾其實好明顯,患者覺得屋企人被換走,一問原因通常都會講因為佢哋身體上出現咗一啲改變(其中一個案例就係話一位患者覺得阿爸被人換走咗,純粹就係因為佢真嘅阿爸揸車無呢個人揸得咁快)。我哋旁觀睇就會知道呢啲改變其實好正常,但患者係唔會咁覺得。如果將呢啲理由直接擺落劇情上,好快就會發現主角講嘅嘢係唔合理。所以諗咗好耐,最後就為主角加上咗卡普格拉綜合症嘅friend面盲症,嘗試用複製人嘅猜測誤導大家去諗故事會唔會係走科幻/其他可能,先至可以將主角有病嘅謎底hold到去較後階段。
第二就係其實即使佢哋覺得家人被人換走咗,案例比率上其實得好少患者會傷害「假冒者」。正路可能就會諗如果屋企人被人捉咗,肯定會打柒個假冒者追問屋企人下落。但唔知點解(或者只係我未搵到相關資料)卡普格拉患者只有少數會做出呢啲行為,呢個亦都變成劇情上另一個唔合理嘅位。但既然故事係想將主角患病嘅事實埋到最後,事前就要合理化佢相對上退縮、保守嘅行為。最後就用咗兩人長年累月嘅婚姻問題、主角個人嘅性格特質、旁邊角色一啲輔助等等嘗試堆砌解釋點解佢唔去同假安琪正面衝突。
除咗想試下寫呢個罕見病,主角嘅婚姻問題都係我幾想探討嘅一點。與其話想透過故事帶出咩訊息,其實我一直都好認同文學(或者故事)唔應該係作為一個媒介去灌輸一啲概念,自問都無資格去教人要點做點做先好先啱。相反故事應該係作為一個平台,提出一啲話題去等寫嘅人可以思考;睇嘅人亦都可以一齊討論。故事唔係提供一個好肯定嘅答案要讀者去跟從自己諗法,而係應該提出一個問題,喺寫/睇嘅過程我哋一齊嘗試去搵個答案。去到最後搵唔到答案、或者根本無一個答案都唔緊要,重要嘅係喺思考嘅過程中我哋都會諗多咗、感受多咗。例如今次係幾好奇想知道到底人點解要結婚;到底係基於咩敢去作出一個咁大嘅承諾;面對對方違背誓言當事人會點自處;喺信任自己同信任另一半之間應該要點取捨等等。其實寫嘅過程就係思考嘅過程,睇完之後其實主角都無一個確實嘅答案。不過喺寫嘅過程,自己都會設身處地諗多咗少少,如果大家睇完又會一齊諗多少少,咁又係一個bonus啦。
其實今次都係新嘗試,想踏出寫開嘅comfort zone試下寫啲唔同類型、氛圍嘅故事去磨練下。每一次睇返都會忍唔住改啲改啲,睇完大家意見又會更加發現到有咩不足,諗下下次可以點樣改好佢。吸收多啲意見養份,希望唔使等到下世,終有一日可以成為一個更好更全面嘅講故佬
多謝大家睇到呢到
最後俾我多次廣告,鍾意睇嘅可以喺連登「追蹤」我咁下次一出故就會第一時間知道
想大大力支持,可以科勞我睇短故/散文/其他無法分類的文字
:
Instagram:
https://www.instagram.com/waittobewritten/
Facebook:
https://www.facebook.com/waittobewritten
終於連載完!