[多圖][一年長途遊記] 中南美到南極-西伯利亞至東歐 (完)

聽日下星期會密啲手希望完到

舒服左咁耐，我地都休息夠，係時候重拾返揹住背囊冒險既感覺啦。現時身處既塞浦路斯位於歐位大陸同中東之間，我地諗左兩條路線，一係南行去中東，去約旦以色列埃及，一係去東行中亞，由高加索三國經伊朗進入一堆斯坦國。我地選擇左後者，因為途經既國家比較吸引，而且如無意外呢條路線到最後應該可以經新彊返香港。

[格魯吉亞-Tbilisi]

格魯吉亞係紅酒既故鄉，亦有”上帝的後花園”之稱，傳說上帝將土地分配諸國既時候，格魯吉亞人掛著沉醉係美酒之中而缺席，事後仲邀請上帝黎一齊參加佢地既派對。上帝受佢地既熱情同美酒打動，決定將原本打算留返黎自用黎做後花園既美麗土地分比格魯吉亞人，因此呢度氣候宜人，風景優美，係一個地靈人傑既絕佳之地。

歷史、美酒、自然風光，愈做得多資料搜集，就愈發現格魯吉亞呢個地方真係好吸引。去得旅行太耐，好耐都未有過呢種有好多好多地方想去既心動感覺，呢個感覺就好似岩岩去到拉丁美洲，從未接觸過既文化衝擊所帶比我既興奮。個熱血沸騰既程度係，從來唔會plan行程既我地，竟然拎左本簿仔出黎寫低黎緊既行程


呢度有美酒與燒肉既浪漫城市Sighnaghi，古城Mtskheta，古老既山中村莊Ushguli，可以飲靚酒，又可以係高加索山脈中行山，就算係度留20日都似乎唔多夠喉呀。

上網睇話格魯吉亞人好友善，由搭飛機去首都Tbilisi既時候已經感覺到喇。坐隔離個姨姨唔知係減緊肥定覺得我太瘦弱，不停將佢飛機餐啲野請我食，又係咁拎啲口立濕出黎同我分享，仲教我講左幾句格魯吉亞話添: 你好=加媽租爸，多謝=馬打loop(呠匙)，練下練下，好快飛機就降落啦



到埗既時間係朝早5點，時間有啲早，去住宿休息返陣先。我地住係間位於舊樓中既apartment，可以坐係露台遙望遠處既山景，都幾舒服架




抖左陣我地就落街行下，格魯吉亞文好得意，我覺得好似一條條麵包咁

Tbilisi雖然係格魯吉亞首都，但依然係保存住好多古舊建築既地方。與其話古舊，不如話殘舊仲更合適，呢啲舊到就黎冧既殘破街景，我真係好鐘意

可能我地住果區比較多老人，去雜貨舖賣野既時候都無人識講英文，不過啲公公婆婆真係好友善，反而會捉住我地教我地講格魯吉亞文，拎住啲生果遂個生字教。黎到未夠一日，我已經覺得自己將會好鍾意呢個地方了。

呢個首次踏足既高加索地區，每一樣野對於我地黎講都好新奇，冒險既感覺開始返返黎喇。黎緊會係度睇到啲咩風景，遇到啲咩人同事呢，我真係好期待好期待。

反正正苦有2萬蚊可以拎黎學野，咪唔好蝕用左佢

是
我成日同男朋友講就算明知會比人偷多次電話，我都想再去阿根廷食牛飲酒

呢個係呢次旅行除左擴闊眼界之外既最大得著，兩個人之間既關係呈幾何級增長

千奴巴寫左四年，呢個紀錄好難超越

有更新

時間好難就

好睇好想去高加索地區
之後會去亞美尼亞同阿塞拜疆？

咁咪好
通常我聽都係去完頂唔順就分手

仲以為爛尾

我有同事既老婆係格魯吉亞人，等我收下料有咩好玩先

掉西瓜搵樓豬

然而，萬萬都估唔到，係格魯吉亞既第三日，我地就買左機票返香港。

細心睇既巴打可能留意到，我地到達格魯吉亞既時候係2019年6月10日。當時發生既事相信都唔需要多講，身處異國既我地無力感好重，都已經無乜心情去玩，自從第一日落街買完餸之後就日日屈係房，拎實電話追新聞。

我地開始係度諗，係旅途中既我地有咩可以做到? 或者我地可以係hostel同外國人解釋發生緊咩事? 雖然一直講得輕鬆，但呢個始終係我地放棄左唔少野黎換取既旅行，錯過左今次機會，下次可以再了無牽掛咁去長旅行都唔知係幾時喇，所以我地仍然不斷說服自己繼續行程。

直至到612。

同當時所有香港人一樣，我地無諗過形勢會咁急轉直下。我好記得當日我地睇住live，望住被催淚彈驅散既人群、擋係防暴前既姨姨…… 抑制左幾日既情緒終於忍唔住崩潰，扮無事繼續平行時空咁吃喝玩樂，我知道自己做唔到。比起完成夢想中既旅程，原來有啲野我更加想做。

抹乾眼淚之後，我同男朋友講，我地返香港啦。男朋友話，佢其實一早知我既諗法，已經睇好左機票，最快後日就有飛機返香港，佢就係等緊我呢一句。得一靈魂伴侶如此，真係夫復何求

所以，忽然之間，我地既旅程就黎到尾聲喇。一如以往既率性，但今次，唔再係因為貪玩而下既決定了。

要留返下次再去了
以後一定要再去高加索三國行山飲酒

咁正，可摸耳叫佢寄幾箱酒黎

去到狂飲好過

終於尾聲
咁樣完左真係唔知應該話可惜定咩
希望你地將來可以再去到未去既部份啦

不經不覺就快到結尾

好想飲,香港唔飲酒,但去旅行自然想試

[下一站: 香港]
終於埋尾了~