[多圖][一年長途遊記] 中南美到南極-西伯利亞至東歐 (完)

好靚呀你地影啲森林相真係

睇完最新一篇真係好可惜

想睇結局

終於由第1個POST睇到尾
希望可以睇到樓主同男友去埋未去嘅旅程

[香港]

就係咁，我地既旅程黎到最後一日喇。

係哈薩克轉機既時候，我地遇到個北京姨姨，佢既工作好有趣，係為負責旅行社既新行程探路。我地由checkin傾到入候機室，佢問我地中亞仲有咁多好玩既國家，點解唔去埋先走? 我同男朋友對望左一下，心諗我地既原因到底可唔可以同眼前呢個中國人講呢? 諗左一陣，我都係用電話開左啲相出黎，冒住被鬧唔愛國既可能，圖文並茂咁同佢講香港當時發生緊既事。我固然講得激動，但我估唔到既係，當我抬頭望向佢既時候，佢竟然流緊眼淚。

佢一邊好認真咁睇啲相，一邊抹眼淚。臨分別既時候，呢位北京姨姨緊緊擁抱住我，然後捉實我雙手，嗚咽住同我講，佢唔方便講太多，只可以希望我地所有人都平安，佢會為香港人祈禱。我知道，呢個祝福，盛載住好多野。

旅途上遇過好多人，有幾乎比我地更熟悉香港局勢既埃及人，話希望係我地土地上仲有希望既新疆大哥，墨西哥妹妹問如果有比家鄉更適合生活既地方點解唔試下去發展，英國婆婆問我地點解唔移民，移民左美國既港人苦口婆心勸我地唔好再留係香港……

以前既我地會話，係囉，其實都物色緊地方走架喇。但隨著去既地方愈黎愈多，體會到愈多事之後，漸漸我地都會答，但始終香港係我地既家，我地好愛呢個地方，有時啲野壞左都想試下整唔整得返。大家會報以苦笑，應該心諗，呢兩個後生真係好傻好天真




有如神仙眷侶一樣既旅程，我地一直都唔捨得比佢完。之前我地都有幻想過，會有咩原因令我地提早返香港呢，會唔會因為病、因為受傷、定因為比人偷哂啲野而令旅程被迫結束呢。朋友們都話咁樣腰斬唔值得，但係我地就覺得好幸運，至少呢個係自己既選擇，唔會後悔。

大旅行真係一段好快樂，令人上癮既時光。每一日都自由自在，就算撞板，就算受傷，只要有對方係身邊，笑一笑拍拍背囊咪又再諗辦法繼續上路囉。希望我地以後都要記住呢個感覺，有一顆自由、感恩又頑皮既心，記得死過翻生、互相扶持、活著既美好，唔好成為一個無靈魂既大人。

返到黎香港，同大家一齊站於街頭之上，有一刻我忽然發現，尋遍世界，原來最動人既風景，就喺我地既香港。

********************[完]********************

[後記]

無諗過呢篇遊記一寫就寫左咁耐，終於唔爛尾寫完!!
終於唔使再扔西瓜搵我喇!! 多謝大家既支持呀!!

你問我呢次旅行到底有啲咩得著? 呢條問題就好似男女朋友問你鍾意佢啲咩咁，你腦海入面冒出左好多野，但又唔知點具體恰當表達。每一個相遇，每個經歷，都令我學識更加珍惜、豁達、執著，同埋活在當下。或者你地都揹起揹囊去一次，就會明白架喇。

朋友都話我地好傻，點解見識過世界之大，仲要留係呢個囚牢之中。我反而覺得，四處遊歷過，更令我覺得世界上只有我地係香港人，有啲野只能由我地黎堅持同傳承。能夠身處呢個大時代，感受歷史洪流，見證時代興衰，與有榮焉。

返黎短短兩年之間，萬物俱變，香港唔同哂，世界唔同哂，以前留返話遲啲再去遲啲再去既地方，始終未有機會可以再出發。而男朋友都唔再係男朋友，要成為老公喇。多謝你牽住我手去見識呢個美麗既世界，以後再繼續手拖手，一齊經歷更多啦




寫左咁耐既遊記要完喇，有啲唔捨得 希望好快我地可以再次出發，繼續未完成既旅程，到時再將佢寫成遊記同大家分享丫

記住擺酒請埋我地

去得越多地方，就會發覺香港其實唔差，同埋去每個地方都會諗係到住/生活會點呢

每日望住靚景都係會厭

竟然寫到大結局
想喊

終於寫完大結局
恭喜恭喜

極少長篇遊記寫到結局，祝福你地。

祝福！兩年真係好快

睇到最後真係好感動
同時都多謝絲打你地願意返黎香港一齊撐
共勉之

好感動 見埋樓主結埋婚 好多謝你想繼續留係香港 雖然我已身在他方 但我都會繼續支持香港

最終回啦，好感動
恭喜你地，祝你地幸福

Feel到故事未完，等睇你地下一次旅行

由頭追到落尾，祝福你哋

你寫完先好走

再見~!!!!!!

多謝樓主呢編遊記絕對係番工時間的精神綠洲 (掌聲)(掌聲)(掌聲)(掌聲)

有緣再會 !

原來我都追咗篇遊記差唔多成年了
望住你話旅程完 我都覺得好唔捨得
多謝絲打咁用心打呢篇遊記
我一得閒就會開黎睇㗎
我都希望第時可以同另一半周遊列國 見識下世界各地
體驗下唔同嘅生活
世界真係好大
祝幸福呀！

恭喜絲打呀
睇咗成個月終於追到智利
好好睇呀

感動
你哋要幸福啊

連登網聚(婚宴版)
原本我地諗住搞bbq party架，但而家武肺搞唔成，索性連酒都唔擺了 唔係疫情既話大家一齊黎燒下野食應該都好開心

"去每個地方都會諗係到住/生活會點呢"

係呀，我地曾經都認真考慮過幾個想長期stay既地方，真心會研究佢地國家既移民門檻政治教育醫療等等既野。不過而家對於去留多左好多諗法，只能夠講歷史從來都唔會一時三刻改變，無野會係永恆。堅持好難，但我地都想試下，大家都要加油呀。