[多圖][一年長途遊記] 中南美到南極-西伯利亞至東歐 (完)

無乜特別，通常都係見到啲好高大發光既人影慢動作咁行黎行去，由牆入面行出黎再穿返入牆咁，最驚果次都係凌晨經和合石既小巴上面見到個好清晰既女仔。

不過大個左之後都好少見到了

樓豬
睇黎你真係時運低奶左野
最後點收科

嘔左成個星期，我都未試過病得咁辛苦
果時覺得再咁落去會餓死，咪日日倒包砂糖落杯水度再加啲鹽溝黎飲，然後去到國家公園日日曬太陽飲多啲水就自己好返了。

樹林啲相好有拍戲feel

樹林D相好靚

樹林啲相靚到好似係google search “forest wallpaper “

一大排杉樹(?) 下半漏光個張好靚

呢度間中仲會有啲兩日一夜團，可以去附近啲鄉村住一晚

住宿都唔錯架，好有鄉村小屋feel


漸漸我地都習慣早睡早起既生活，如果問有咩吸引我地晨早爬起身，就係清晨呢個好似仙境一樣既森林喇



呢一日仲見到一對elk母子添


可惜佢地好怕羞，離遠聽到人聲就走左lu。之前係中南美既時候我地都好鍾意去國家公園睇動物，拉丁美洲既動物同果個地方既人一樣，都係比較熱情，無咁怕人，而歐洲呢度既就好似都好怕羞，好有距離感。

呢一日去到山坡上睇風景既時候，見到個老師帶左班𡃁仔黎，唔係長氣又噚氣咁講書，而係帶佢地不斷跑上山，碌落去

嘻嘻哈哈咁do nothing，無憂無慮，睇見都開心，小朋友就應該係咁樣長大

話時話，遊客中心間餐廳既野都唔係太可口，身體好返啲之後我地間中就會竄出隔離條村度搵野食




呢日男朋友食既係Kopytka，係類似gnocchi既薯仔糰子，配啲炆豬肉食，味道好唔錯。我呢幾舊蘿蔔糕咁既就叫Babka Ziemniaczana

佢唔只睇落似蘿蔔糕，食落都好似，唔同在呢舊糕既主體係薯仔，入面既臘味都變成左煙肉，煎香左配埋sour cream食，其貌不揚但意想不到地好食架!!

就係咁，我地每日係度睇下雀、睇下鹿、睇下風景







好快就到左係度既最後一日喇。最後一日係用黎埋單結算既，所以呢一日無任何收費團比我地參加，當我地係房訓緊晏覺既時候，突然之間有工作人員逐間房拍門叫我地快啲出去

唔記得左講，男朋友黎呢度最大既心願就係想睇bison，佢每朝風雨不改3點鐘爬起身出門口就係為左一睹呢啲雄糾糾既歐洲野牛。因為濫捕獵殺，野生既歐洲野牛一度絕種，曾經只係剩返唔夠50隻係動物園入面，幸好經過保育以及重新放養，而家係波蘭、白羅斯、俄羅斯等地方都可以見到佢地蹤影。而家生活係野外既野牛大約有3000隻，其中約三分之一都生活係Bialowieza forest，可惜導遊話因為呢一年雨季早左到，森林入面一早已經長滿青草，野牛唔使行出黎搵食都食飽飽，所以好難搵到佢地。

不過!! 有村民打電話黎報料，話屋企後面塊草地有群野牛係度食緊草!! 接獲線報既工作人員即刻黎摷大家出去睇!! 老友記們好多都趁最後一日出左去散步，訓晏覺既我地反而得到呢個消息，真係躺著也中獎了


佢地身形真係好壯好雄糾糾，好英偉呀 聽講野牛好兇猛，導遊都叫我地注意安全唔好行咁近，不過就咁睇佢地都係乖乖食草既好孩子呢。導遊同埋司機都好興奮，佢地話原來以前呢度日日都可以見到bison，但係因為今年天氣反常，以為今年再見佢地唔到喇，所以而家見到班牛牛安好都覺得好開心呀。

明明只係見到隻牛妹下妹下咁食草，見到啲河狸岸鳩鳩咁R肚皮，已經夠我地心跳加速開心好耐。唔知啲人去非洲睇動物係咪都係呢種心情架呢，去非洲睇動物大遷徙都係我其中一個心願，不過大旅行大部份budget都放左係南極，希望以後有機會去到啦

睇到bison，心滿意足了，臨走前既一晚大家一齊黎開返個營火晚會

大家聽住手風琴，圍住營火唱歌跳舞燒大肉腸食，好正好有氣氛呀



導遊話黎到Bialowieza，一定要飲呢度最出名既vodka，Bison Grass


媽呀 呢杯野好似洗甲水咁既味，真係頂唔緊，唔係凡人識得欣賞既飲料。

係度住左十日，身為老人殺手既我地都同唔少老友記成為左朋友。佢地每個人都好鍾意同我地分享年輕事既往事，有縱橫四海留精不留情既風流大叔，後生做空姐時係薩爾瓦多被綁架既西班牙嬸嬸，其中一個七十幾歲英國婆婆既故事令我印象好深刻

婆婆既老公後生時係一位水手，每次出去行船一去就去幾年，有一次婆婆真係太掛著佢，知道佢架船會係上海靠岸，就隻身飛左去上海想話見伯伯。幾十年前上海啲人唔識英文，婆婆又唔識中文，好不容易先痴到的士去酒店。我好好奇當時無手提電話，咁公公同婆婆係點相約見面架呢? 婆婆話當時有上海人幫佢托上托上托，托左唔知幾多個人之後，搵到個係當時上海一棟最高酒店做既朋友。呢位朋友放左婆婆上去酒店頂樓間餐廳，果度有一個向海既露台，每逢有船埋岸，婆婆就拎住塊大枱布起勢咁fing，船上面既人見到就會知道有人係果度等緊佢。就係咁，公公同婆婆就成功見面喇!!

真係好似電影一樣既情節呀，呢對水手公公同痴情婆婆而家仲好冤氣咁打情罵悄，手拖手係營火邊跳舞，真係恨死隔離。婆婆成日都話好欣賞我地到處去陌生既地方遊歷，覺得我地好勇敢，計我話呢個70年代隻身飛去中國會愛郎既婆婆先係女中豪傑呀

係滿天星星下，森林中，營火邊，係波蘭民謠伴奏之下聽住大家既故事，呢一個真係意料之外既波蘭體驗呀。

英國婆婆個故事好正，通訊唔方便反而造就好多愛情故事。

新一篇都係好閃，不過係啲老人家閃

d相好靚

[波蘭-Warsaw]

動物團完左之後，我地又返返去華沙。其實華沙無乜野吸引我地，只不過因為個團會係華沙放低我地，又懶得即刻轉車去第二度，所以係度hea兩晚先。

呢個團都幾好，唔係剩係晌車站扔低我地，返到華沙既時候仲帶左我地去古城行一個圈，講下華沙歷史，岩哂老友記團友同埋我地呢啲無人生規劃既廢青




團餐塊炸豬扒都好好味


打完個白鴿轉，去搵呢兩晚住既地方喇

今次住呢間apartment 三百幾蚊港紙一晚，有廚房有洗衣機有smart TV，唔錯唔錯



大病初癒，好耐無食過好野，係度既三日兩夜都係瘋狂進食



係亞洲超市見到辛辣麵，好開心，諗都無諗就買左返去煮。有時都唔係好明，明明辛辣麵係韓國野，點解去旅行思鄉既時候會咁想食佢架呢。食即食麵最緊要就係要配啲唔健康既食物，所以我前一晚特登留左幾塊雞皮炸黎食

西瓜味大樹cider，難飲到仆街，點解咁既產品都可以流出市面


如果backpacker既定義係要餐餐捱麵包，晚晚訓碌架床既話，去旅行去到愈黎愈肥既我地係絕對唔合格既。男朋友望住自己愈黎愈大既肚腩同肥仔波，覺得好沮喪，開始瘋狂做運動

係歐洲一段時間，古城睇到有啲悶，寒冷既天氣又令肥仔既脂肪開始積聚，都係時候要去海邊哂下太陽玩下水喇。問男朋友波蘭同地中海之間堆國家仲有無邊度想去，有無啲咩心願未了? 佢後生時係Budapest exchange過，係果度有好多美好既回憶，話好想今次帶住我再去呢個城市行下。所以係再次投入大海既懷抱之前，就先去布達佩斯行下啦!!

[下一站: 匈牙利-Budapest]

個森林本身就好靚

睇完你講即刻去search，真係好似

係 現場睇仲靚，好似會係精靈係啲光度出現咁

見你就嚟寫完整個旅程，替你開心我覺得寫完個遊記仲難過去完個旅行

樓主老公突點bam

budapest夜景好靚👍

[匈牙利-Budapest]

為左滿足男朋友想舊地重遊既心願，我地就由華沙搭12個鐘巴士去到匈牙利既布達佩斯，一路見到啲河都好似河水氾濫，污糟邋遢咁


配合返歐洲氣氛，今次搭長途車帶左橄欖黎配麵包


我地係度住既井字形大廈外表溶溶爛爛，中間有個天井，走廊牆身都剝落哂，殘殘舊舊咁，好鐘意





450hkd一晚，有啲貴，不過好舒服



第二日天陰陰，好似想落雨咁，我地打算去左中央市場行街市。買左張72小時既pass，可以暢快地搭車了



古色古香既布達佩斯中央市場係1896年建成，呢個街市有三層，一樓係賣菜肉香腸酒之類既舖頭，二樓係餐廳同賣衫既，地庫就係賣魚同醃菜。比起城牆同教堂，果然最吸引我地既都係街市

呢度除左當地師奶之外都有好多遊客，似乎都係個旅遊景點黎。我地發現Budapest街上有好多韓國人，唔知係咪又有邊度韓劇係度拍過呢。原來匈牙利人都好鍾意食辣，周圍都掛滿一串串乾辣椒，我地都買左一抽返去煮餸

佢地既鵝肝都好出名，除左鵝肝醬，仲有好多新鮮既鵝肝鴨肝，大約HUF7000 (200HKD) 1KG，不過要成舊買，唔可以切，我地驚兩條友會食到爆血管就無買到

佢地啲咸酸菜鍾意整到好歡樂咁既樣

又見到呢啲炸豬/ 鴨肥膏，呀姐話當地人會拎黎配麵包食，仲請左兩舊比我地食添

食落似未炸透既豬油渣咁，仲有少少油抑味同鴨蘇味，我本身好鍾意食肥肉同豬油渣既，但係都覺得呢舊野好漏，可能因為唔係新鮮炸出黎啦，唔好食既。

行完一個圈，我地就去左街市樓上啲餐廳度食晏，估唔到匈牙利菜原來咁好味架!! 我叫左匈牙利牛肉湯Goulash，辣辣地好好味

男朋友既唔知咩燉肉都好正




行完街市，我地去左隔離條綠色既Liberty bridge，打算跨過多瑙河，行上對岸個小山丘Citadella睇風景

同前一日搭巴士黎時見到啲河一樣，多瑙河既水都係好湍急

果一年歐洲既天氣好反常，雨落得特別多，可能就係因為咁令到多惱河既水流咁急，仲不斷湧起白頭浪。唔知大家記唔記得19年多瑙河既觀光船事件? 呢單意外就係我地黎到既前一晚發生，當時一架載滿韓國遊客既觀光船沉左，三十幾人既團當日仲有二十幾個未搵得返，諗到呢度我地都無乜心情繼續望住條河。

我地繼續行上Citadella，男朋友話佢後生果時好鐘意黎呢度睇風景，係度可以望到成個Budapest既景色，可以見到沿住多惱河有好多條唔同特色既橋將西邊既Buda同東邊既Pest連接起黎

本身諗住睇夜景，可惜仲係個天愈黎愈陰，仲開始落雨，睇左陣風景就返歸煮飯了。

夜晚用岩岩買返黎既辣椒乾爆炒意粉，夠鑊氣，好正



另一日天氣好啲，我地又打算散步去多瑙河上既小島Margaret Island。出發之前食左lunch先，自從係街市見完啲肝之後一直念念不忘，終於忍唔住要嗌黎食喇

鵝肝太貴唔捨得嗌，嗌左鴨肝，70蚊港紙咋，都好肥美好好味
齋睇相都覺得血管塞塞地


今日我地遊電車河



過橋既時候發現兩邊掛滿黑色旗，可能係悼念沉船既死難者


Margaret Island上面其實無乜野做，純粹黎無所事事下，同啲人一齊叉隻腳落噴水池浸下水

坐下草地，望住河發下吽哣咁樣


係草地碌碌下既時候見到黎左好大架旅遊巴，有好多身穿素服既韓國人神色凝重咁黎到河邊，有人不停飲泣抹眼淚，有人望住條河喊到企唔穩，就算聽唔明韓文，都知道佢地就係沉船意外失蹤者既家屬 原來我地身處呢度好接近事故發生既地點，當時意外已經發生左兩日，但大部份人仲未搵得返，急流又令搜救工作變得困難，情況好唔樂觀。上網搵返新聞，當時船上33個遊客除左即時被救起既7人之外，其餘全部罹難。

呢個情景真係好令人心酸，原本開開心心去旅行，點諗到會突然天人永隔。 我不禁係度諗，如果係玻利維亞炒車既時候我就咁死左，一句說話都來不及留低，可能我既親人就要承受呢一種悲傷。諗到呢度，唔知點解不嬲多愁善感既我竟然無覺得太難過，反而覺得茅塞頓開，更加明白到自己活著既每一日都係恩賜，要好好珍惜每個時刻。即使人生無常，但至少活著既每一日都要好好生活、好好陪伴愛既人、好好欣賞自己。活在當下，咁先對得住努力生活既自己

英國婆婆個故事好正，通訊唔方便反而造就好多愛情故事。

可能因為咁所以老一輩更加懂得珍惜

老人家閃仲殘眼

無錯呀就算有日記睇返，寫每篇都要腦交戰一輪，唔想交行貨，資料搜集仲勤力過自己去旅行果時。

巴打都終點在望啦，讀者表示感動!!

Bam左無文睇你捨得咩 下次比返個乳貼佢囉

lm

好掛住胸牙脷