第二朝早,訓醒就見到男朋友乖乖煮早餐
佢心情咁靚,因為佢今日終於可以久違了地去潛水喇。Larnaca附近有一個被評為世界十大沉船潛點之一既Ms Zenobia,佢係一艘於1980晌Larnaca對出海域沉沒既瑞典輪船,全長172米,體形之大令佢有地中海鐵達尼號之稱。當時因為機件固障,令呢艘載滿貨物同百幾輛汽車既輪船沉沒於42米深既海床,幸好呢次事故無造成任何人命傷亡,但就造成左2億英磅既損失,亦意外令世上既潛水發燒友從此多左個潛水熱點。
係度出一次海大約70歐左右,包兩次潛。睇黎呢度真係好出名,船上來自世界各地既團友個個都帶哂私伙gear,佢地全部都係專程為左呢架沉船而黎塞浦路斯旅行,仔仔仲話佢係船上面識左個鬼妹,全程言談甚歡添
呢日天氣都唔錯,一落水已經可以見到打橫翻側係海床上既沉船
架船真係太大,睇極都睇唔哂佢既全貌。落到去之後由船尾開始潛,一開始會經過佢個螺旋槳,淨係個turbo都成兩個人咁高
之後一路沿住船既外圍潛,因為佢係運車既輪船,所以係船既附近可以見到好多大貨車散落一地
第二個潛就會進入船身啦,由上層既船倉潛入內部
穿過一間間房,係房與房之間穿插,見到啲光由窗口透入黎,感覺好夢幻
有啲應該係船員既房間,可以見到佢地生活過既痕跡,例如係啲支離破碎既衣櫃同床架,仲有馬桶添
不過穿插既時候都發生左個小意外,可能男朋友太肥胖,經個門口既時候個鉛袋卡住左係門邊,用力一扯就成個跌左,轉個頭已經搵唔返。好彩之後有人幫手執返,如果唔係就可能要潛落水底執幾舊石頂住先了。
臨上水既時候仲見到一堆海狼BB,真係幸運既一日呀
因為潛沉船太高階,我呢個無潛水牌既人無得去,只好安坐家中嘆下冷氣洗下衫,跟手去附近買餸煮定飯,等男朋友影多啲相返黎比我睇講起上黎,塞浦路斯果然係近年熱門既移民地方,係機場已經見到唔少寫殘體字既樓盤廣告,街上都有唔少寫英文既地產舖。望下先,價格都好超值,百零二百萬港紙就有間house或者連泳池既villa
係外國啲地產舖八卦得愈多,愈覺得香港既樓價真係好撚荒謬
話時話,我地黎塞浦路斯都係為左陽光與海灘,但係黎左幾日,發現Larnaca啲沙灘真係好唔掂。大街旁邊係有個好長好長既大沙灘既,但啲沙好粗,水質都唔係特別好,分分鐘淺水灣仲靚過佢。媽,為何呢度與我想像中不一樣 我地都係快啲執行李,移動去下一個水更清沙更幼既地方啦!!
[下一站: 塞浦路斯-Ayia Napa]