[多圖][一年長途遊記] 中南美到南極-西伯利亞至東歐 (完)

上回提要
墨西哥




伯利茲


危地馬拉



哥斯達黎加


南極




阿根廷



智利



玻利維亞



秘魯



哥倫比亞


蒙古



俄羅斯



愛沙尼亞


拉脫維亞

故事係咁既，事源我同男朋友27歲既時候決定裸辭，想係組織小家庭之前任性一次，揹起背囊去一場自由自在既旅行，一齊好好感受呢個世界。時間上當初定左係去一至兩年，最後係19年因為放唔低香港既事就提早腰斬左個行程返左黎，但我地從來無後悔呢個決定，因為就算外面既世界再美好，都唔係我既家。

世界好大，有好多未知既事、唔同既文化、美麗而善良既人民，我地認識到好多朋友，亦遇上過車禍同搶劫，所有好既壞既都係一個美好既經歷。好感激我地曾經有一個咁美好既旅程，希望有朝一日可以將未行完既旅程繼續啦。

最後整個旅程去左一年，因為我地都比較鍾意隨心而行，所以全程都無訂一個行程表，只有由北至南，東至西既一個大約概念，沿途再邊走邊問人會唔會有咩當地人先知道既有趣地方咁。而中途發生左啲意外所以返左一返香港，最後整體既路線如下:

美國>墨西哥>伯利茲>危地馬拉>哥斯達黎加>巴拿馬>阿根廷>南極>阿根廷>智利>玻利維亞>秘魯>哥倫比亞>西班牙>德國>法國>意大利>馬爾他>香港>北京>蒙古>俄羅斯>芬蘭>愛沙尼亞>拉脫維亞> [立陶宛] >波蘭>匈牙利>塞浦路斯>格魯吉亞>香港

多謝大家鍾意睇我地呢兩個平凡人既遊記，亦唔介意我會間歇性失蹤幾日繼續支持我(好似係)。希望大家睇完都可以知道，即使係好似我地咁樣既普通人，只要願意揹起背囊踏出去，就再無任何野可以阻止到你窺探呢個世界。當你敞開心扉去感受，最後從旅行中得到既野，將會遠超想像。

歡迎重溫返前兩篇遊記:
美國至伯利茲篇 -
https://lihkg.com/thread/972871/page/1
危地馬拉至拉脫維亞篇 -
https://lihkg.com/thread/2156793/page/1

下一站，我地要繼續向立陶宛進發喇。

[立陶宛 – Šiauliai]

離開拉脫維亞，我地帶住晌街市買既兩盒士多啤梨上路，出發去波羅的海三小國既最後一個國家，立陶宛北部既城市Šiauliai


三小國之間既交通時間好短，坐一至三個鐘車就可以由一個城市去到另一個城市，對比起之前晌中南美閒閒地都要搭十零廿個鐘巴士，車上面廁所成日壞，有啲又無冷氣，呢度簡直係天堂。雖然係咁，我地硬係會成日掛著係中南美旅行既日子，到底人總係犯賤丫，定係果種刺激感真係太令人上癮呢? 適應左之前果種刺激既旅行模式，原來好難返得返轉頭。

Šiaulia最出名既景點係十字架山，時間唔夠既話可以day trip咁去完十字架山就走，但我地唔想咁趕，所以會係度住返兩晚。繼續住殘舊風apartment

估唔到真係有屋主會將鎖匙放係地毯底 睇黎呢度治安好好


屋主品味都幾獨特，我諗起將雪櫃放係洗衣機頂果個post

上面個乾衣機仲要放到歪歪地，開機之後部機邊fing邊搖咁，很是不安。

呢度係立陶宛第四大既城市，感覺似係一個城市化少少既小鎮。市入面都唔係好見到遊客，我地出街隨便行下


去到一個湖邊，瞓下草地，睇下鴨


湖邊有個形狀成個腦咁既石陣，上網睇話呢個叫做能量迷宮，由內行去外再行返入內就可以完成一個吸收能量同治癒心靈既療程 可以我地悟性太低，行完一轉覺得無乜料到


隔離係一個紀念太陽既公園，中間有個小金人像，Šiauliai呢個名係由立陶宛文中既弓手變化而成，所以我地諗佢某程度上應該係代表左呢個城市


返去既時候經過呢個有啲特別既公雞鐘，上網睇話佢識講多國語言歡迎遊客黎到，不過我地記錯左雞叫時間，聽唔到


我地發現呢度啲人好鐘意食紅菜頭，而且鐘意搞到啲顏色好詭異，今日晚飯係晌超級市場不既紅菜頭沙律搭雞脾。呢度啲紅菜頭又幾好食，一啲草青味都無，仲好甜添

立陶宛似乎仲有一道名菜，係用紅菜頭整既粉紅色凍湯，聽落好有趣，急不及待想獵奇一下了

休息左一日，第二日我地就出發去十字架山，由Šiauliai巴士總站搭15分鐘巴士就去到架喇

巴士站有schedule拎，每個鐘都有一班車，幾方便


呢架係晌鄉村之間穿梭既普通巴士，除左我地之外所有乘客都係啲公公婆婆居民

遊客坐得呢架車都係去十字架山，所以司機同啲老人家都好好，差不多到站就會係咁提我地準備落車。落地之後唔係即刻見到十字架山，要先行半個鐘左右既路，途中經過一大片小黃花，係個陽光普照既天氣下寧舍靚，係春天既氣息呀




好快我地就黎到入口位置，呢度有幾間士多，有興趣既話可以係度買啲十字架入去

旁邊係一間對住十字架山既教堂



十字架山並唔係一座山，亦唔係墳墓或者教堂，最貼切既形容應該係一個抗爭既標誌。呢度前身係一個丘堡，由1831年開始已經有人將十字架放係度，紀念反俄既烈士。真正開始堆起十字架係直至到後來既蘇聯時期，立陶宛淪陷，信眾開始紛紛前來放低十字架。除左祈求和平，仲帶有一個更重要既訊息，立陶宛人透過呢個行為，表達即使被侵佔，但佢地仍然會忠於原來既身份、宗教信仰同傳統，係一個和平抗爭既象徵。無數既立陶宛人將十字架帶黎放晌呢度，久而久之遠望就好似一個由十字架堆成既山丘


所有極權都害怕人民團結而具民族主義，就算只係黎放低十字架，呢個彰顯民族性既行為都足以令當時既蘇聯政府畏懼，三番四次想剷除呢個地方，但每次清場過後，立陶宛人總會繼續將十字架帶黎，放低，帶黎，又再放低。立陶宛人就係靠住呢一份信念，捱過被侵佔既艱苦歲月。

呢度每個十字架都帶住人民既信念，令十字架山彷彿有著一股好強既力量，即使無任何宗教信仰，黎到呢度都會有一種莫名既感動





大十字架上掛滿小十字架


倒塌既舊十字架上又插滿新既十字架


痛苦既歷史已經過去，而家新掛上既係各式各樣不同既十字架，帶住來自世界各地既祈望，現時粗略估計呢度已經有超過20萬個十字架喇




雖然十字架山咁出名，但呢度遊客其實唔多，行左一晝都係得幾個人。行行下，見到個老師帶左一大班小朋友黎


應該係帶佢地郊遊順便認識歷史喇，呢班小朋友好活潑，不停同我地打招呼，見到男朋友拎住相機，仲自動波擺pose影相

望左陣先知原來佢地扮緊呢度既十字架，仲識好似山上既十字架咁個個面向唔同方向像真度極高，真係好趣緻。

陽光燦爛既日子之下，充滿鮮花同小朋友笑聲既十字架山，感覺好有希望


[下一站: 立陶宛-Vilnius]

立陶宛妹好正，仲回味緊

入左黎睇幾日 終於出新post
絲打最近點呀？ 搞咩咁夜都未訓

圖呢

正想問 樓主都唔後生上左年紀啦，夜訓唔會好唔舒服咩

終於有update

留名支持，寫得好好，相又靚，每日我上黎就係要睇下你有無update

新post LM

啲相好出色

新post留名

畀埋圖就自爆

留名
大家記得正評個po

新post

還好啦
近排都係搵下工返下pt咁，今晚凌晨會出文架喇

[立陶宛-Vilnius]

Vilnius係立陶宛既首都，由Siauliai搭火車過去，兩個半鐘左右就去到，車廂仲非常光鮮添



同愛沙尼亞同拉脫維亞既首都一樣，Vilnius古城區亦係世界文化遺產，附近既屋都有返咁上下歷史，而呢種無軌電車係呢度好常見既交通工具


佢地既行人路燈好得意，同車用既路燈一樣，都有紅黃綠三盞燈

仲比我地搵到一樣好有親切感既野添

殘體字既香港飯店係咩玩法目測有好多鬼佬入去食


我地對建築無乜興趣，去得多好似度度都話係世界文化遺產，間間教堂睇落都差不多咁，對於呢啲建築開始有啲審美疲勞。所以我地無特別去睇古城區，反而想繼續惡補下呢度既歷史，去左Vilnius最出名既一間博物館參觀。

Museum of Occupations and Freedom Fights，一間令人好難忘既博物館

呢度既氣氛明顯比起之前Riga果間博物館沉重好多，之前果度只得展品，而呢度既地下室係侵領時期折磨同處決異見人士既監獄，有實行各種酷刑既囚室同埋處決室，成個氣氛都令人感覺好唔舒服




博物館名叫Museum of Occupations and Freedom Fights，除左occupation既歷史，亦有關於freedom fight既展館。入面講述左抗爭者當時點樣組織自衛隊、遊擊隊，製作既文宣，政府捉到之後受到點樣凌辱佢地、將佢地吊死係教堂門前示眾、挖眼後棄屍係街市恐嚇民眾唔好反抗。呢啲相好血淋淋，極權好可怕，更令人深深感受到立陶宛人願意犧牲自己去反抗既堅強意志。

為左減低國內既反抗力量，除左囚禁同處決異見者，蘇聯同納粹政府仲會將人民流放至各地既集中營，迫佢地捨棄本來既國籍同宗教。即使係咁，人民既意志依然好堅定，無論去到咩地方，佢地始終堅持保留自己既傳統同語言。為左唔忘記自己既身份，佢地都會偷偷帶上一啲小物品，可能係一個小小既十字架、迷你版聖經、繡左親人名字既布碎等等。呢度展示左一啲當時佢地既隨身物品，都係立陶宛恢復獨立後由有幸生還回國既人士所捐出，其中最令我印象最深刻既係呢份15號展品

佢係一個火柴盒咁細既布袋，入面袋左一堆立陶宛既泥土，對物主黎講，布袋承載既唔只係泥土，仲係對故鄉呢片土地既思念同原本身分既肯定。布袋而家可以呈現我地眼前，代表最後呢個被流放既人最終都可以帶住佢回到日思夜想既家鄉，係眾多悲劇故事之中一個比較好既結局。

每次參觀完呢啲博物館都好唔舒服，尤其是行入處決室既時候，個頭好痛好想嘔，要返出去公園啲櫈坐低抖抖氣。博物館入面紀錄左好多年青人為左奪回國家既自由獨立被迫害同殘殺，返到香港之後我都成日會諗返起，歷史果然係會不斷重演。

慶幸既係蘇聯最終都瓦解，三小國得以重新獨立。無一個極權會係永恆，人民對自由既追求同抗爭亦係永不止息，雖然唔知黑暗會持續幾耐，但過後總會迎來光明。呢間真係一間好值得參觀既博物館。

圖呢+1

早排有啲忙，唔好意思呀

多謝繼續支持

男朋友影既相係我心目中係最靚架