[多圖][一年長途遊記] 中南美到南極-西伯利亞至東歐 (完)

地下教堂好靘

波蘭我都覺得好好玩，物價平質素高，普遍波蘭人都幾有禮貌

呢一日我地收拾心情，黎到一直好想去，但又令人聞之生畏既奧斯威辛集中營。

奧斯威辛位於Krakow西南，由市中心搭一程巴士就可以直接去到。除左不準飲食，遊客係度無咩限制，你可以自由周圍行，大部份地方都可以隨便影相，但你唔會有呢個心情。我地都無乜影到幾多張相，盡量試下用僅餘記憶寫返呢段遊記。

因為呢度既資訊太殘酷，所以14歲以下既小朋友係禁止入場。普通入場參觀係免費既，參加導賞團就要付費，我地參加左三個半鐘既導賞團，奧斯威辛有三個營區，呢個tour會帶我地去奧斯威辛一號營 同 比克瑙二號營


奧斯威辛集中營係納粹德軍建造最大既一個集中營，初期係用黎困住政治犯同知識分子，最終解決方案頒布後，隨即成為大批量處決猶太人既種族滅絕營。大部份人一送到黎就會被處決，生還落黎既就會強制勞動，或者被送去做各種人體實驗，所有人既結果都係好快就會捱唔過折磨而死。1940-1945既短短5年期間，估計就有110萬人係度死去，其中九成以上係猶太人


集中營門口諷刺既標語 “勞動帶來自由”

呢度既勞動係嚴苛既勞役，係處理毒氣室既屍體、建設新營地、甚至係朝早挖窿下晝埋返同一個窿呢啲無意義而消磨意志既工作。而自由，或者就係死亡得到既解脫。

呢一棟棟紅磚囚房而家成為左不同既展區



納粹政府同猶太人人講，奧斯威辛係比佢地建設新家園既地方，所以佢地都帶上最好既家當，有啲人甚至係自掏腰包買火車票黎呢度。黎到之後佢地會被粗略地分類，年青力壯既會被留低，孖生既兄弟姊妹亦會被留低做人體實驗既對象，其餘既老弱婦孺一概會評為無價值既人，馬上會送入毒氣室處死。為左減低將入毒氣室既人既疑心，軍人會話呢個係長途拔涉後安排比佢地既淋浴，仲會係行李上寫低記號，方便沖完涼出黎領取

可惜呢一間沖涼房，佢地永遠都無辦法行返出黎，而行李亦永遠唔能夠拎得返。

所有行李隨即會被充公分類納粹既物資，分類行李中既物品同屍體上既物品亦係囚犯既工作，每日處理住同胞既屍體，除左係體力勞動，更係精神虐待。因為係被欺騙黎展開新生活，所以行李入面帶左唔同既生活必需品，例如係碗碗碟碟、鞋、小朋友既玩具，屍體上取下既物品例如係眼鏡、義肢、金牙等等亦會被取下，如今呢啲種種成為左展品，提醒世人呢110萬唔淨只係個死亡數字，佢地當中每個都曾經係個有血有肉既人


灌入毒氣室既化學物，空罐堆積如山，每一罐足夠係20分鐘內毒死整個毒氣室內千幾個人


挑選出黎進入集中營既人會先被剃去頭髮，然後影大頭照存檔，其中一個展區全幅牆上面都貼滿左呢啲照片，每張下方都有字清楚紀錄每人既入營同死亡日期，大部份都係入營後幾星期至幾個月內就會死去。望住相中一對對神情空洞既雙眼，完全唔敢想像當時佢地腦海中諗緊既，到底係啲咩。影相作紀錄只限於初期，後來納粹德軍發現囚犯係營中壽命太短，索性省略呢個步驟，直接係佢地身上烙上編號。係呢度，囚犯並無作為人類既尊嚴，而荒謬既係，在此以前佢地根本就無犯下任何過錯。

最終解決方案實行之後，本來既一號營地已經唔滿足納粹德軍大量屠殺猶太人既慾望，佔地更廣既比克瑙二號營地因而建成。二號營地可以容納10萬人，而且設計成火車可以直接駛入，方便納粹德軍更快速更大批量咁緊將送到黎既人馬上處死


佢地乘搭黎奧斯威辛既係呢款原本用黎運牲畜既車卡，每個車卡入面有成80人迫埋一齊，因為路途遙遠加上衛生情況惡劣，好多人未黎到已經捱唔住過身，或者到達時身體已經好虛弱


二號營地比一號營地既居住情況更惡劣，呢啲床板高峰時期每層要訓7個人

二號營地開放參觀既地方比較少，我地以參觀囚室作結。導賞完結之後可以自由活動，我覺得頭暈暈好唔舒服，係火車軌行左陣，就離開呢個地方了。

1945年紅軍解放奧斯威辛集中營，當時只有約7000名生還者被救出。納粹德軍撤退前，怕呢個大型屠殺基地被揭發，更打算一把火燒左呢度。好在呢一切未被完全焚毀，歷史得以保存落黎，成為警剔世人既沉重教材。

無力、哀怨、絕望，呢度既負能量重到令人窒息，參觀博物館尚且可以知道故事既全部，知道苦難過後會迎來光明，但係集中營呢度只會感到無盡既絕望。呢度室內莫名奇妙咁凍，毒氣室入面既氣場更加令人頭痛欲裂，整理呢啲資料既時候都好唔舒服，又唔知咁沉重既歷史應該點寫，有諗過直接跳左呢個部分唔寫算。但我真係好想同大家分享呢個地方，原址建立紀念館唔係為左令遊人恐懼，而係想令人更深刻地認識以及從歷史中學習。係度感受到既，遠超過所有文章課本展覽同紀錄片，震撼既感覺好似打樁咁打入心坎。我詞窮，唔知點樣妥善咁表達果種感覺，大家黎到參觀就會明白。

政治囚禁、種族清洗、集中營，由三小國黎到波蘭，呢啲離我地70年前既歷史，卻又令人感覺似遠還近，種種看似唔應該再係文明社會出現既野，似乎正係世界不同角落以其他方式重演緊。係人類文明既倒退，定係有極權自大到拒絕向歷史學習?

”The one who does not remember history is bound to live through it again”

[下一站: 波蘭-Warsaw]

大吊燈咁靚，竟然係鹽結晶而成？
多謝絲打令我開眼界

你地好得意，成日都多謝我，完post之後我會掛住你地

是
但唔知係咪我地唔識嗌野食，食親都係薯仔餃、薯仔糕、薯仔團，好fail。然後去既地方呢度又話曾經係行刑地方，果度又話以前用黎吊死反對人士，加埋餐餐食薯仔，硬係覺得呢個民族好艱苦咁

蘋果鴨同酸菜餃都好正
以後有機會去波蘭住就好

絲打經過半年後，我個遊記出到同你同步左

差唔多 睇唔到對面個唔係樓主

樓主影相好靚

[波蘭-Warsaw]

離開Krakow之後，我地搭火車返到黎首都華沙


即係咁，去集中營之前男朋友已經講過好多次不如唔好去，佢知我個人好多愁善感、生人唔生膽、間唔時仲會見到靈異野，驚我會頂唔順，不過我都無聽佢講 唔知係集中營太衝擊腦袋、入面負能量太強勁、定係我撞邪，明明去之前仲好生猛，參觀完之後就一直都好唔舒服，又頭痛又作嘔，行到去住宿已經發燒燒到精智不清，一路攬住個馬桶嘔。

旅行以黎都未試過病得咁辛苦，攤左係床度郁唔到，迷迷糊糊之際又好擔心今晚唔知食乜，無我照顧男朋友會唔會無啖好食，佢好似未試過自己煮好一餐飯架喎，會唔會又求其買隻燒雞返黎當晚飯比我食架。訓左一晝，精神好返啲，出到廳見到佢竟然煲好左湯

可能見我煲得多，佢煲左蘋果紅蘿蔔湯比我飲，真係大個仔喇 碗湯好甜好足料，不過一落到胃又嘔返哂出黎，浪費哂佢一番心機

在華沙的第二天，繼續卧病在床，食乜嘔乜。男朋友做完家頭細務，就踩scooter出去，話買餸返黎煲粥，叫我放心好好休息


望住佢揦手唔成勢咁將隻雞起肉拆骨

開住youtube邊睇邊學

唔知係咪我病到眼花，覺得佢成個人好似發緊光咁 其實我最憎食粥，但佢話嘔一定要食粥恢復元氣，所以寸步不離咁攪住烹粥，落足成擔心機想煮一碗好味既雞粥氹我食。

煲好喇，呢碗雞粥真係好好味，係我食過最好味既粥

唔知點解，呢一刻我覺得男朋友由男仔變成左男人。可能因為細細個就認識對方，一直都覺得佢仲係果個搶哂我啲好野食、笑我男仔頭、通山跑、大唔透既男仔。原來不知不覺間，呢個兒時玩伴已經長大左咁多，識得咁溫柔咁照顧人，會輕吻額頭叫我起身，將我捧係手掌心疼愛。望住摸住我個頭憂心忡忡既男朋友，我上一世到底到左啲咩好事，今世竟然可以遇到佢。

可惜轉個頭，我又將食落肚既雞粥嘔返哂出黎

出唔到去玩，好在呢間屋既景觀都好開揚，攤係梳化上面就可以望到好靚既夕陽


就算以後既日子都係咁樣平平淡淡，只要有你係我身邊，就足夠了。呢幾日，除左嘔到黃膽水都出埋黎，個心都甜到糖尿喇。

係喎 今次加油唔好爛尾喇

後生果陣就真係好大隻，而家回左塘了

又放閃

放閃可恥

又比樓主閃親

樓主可恥

樓主有冇靈異野分享下

樓豬
睇黎你真係時運低奶左野
最後點收科

留名

推

留名

[波蘭-Bialowieza]

如是者嘔左幾日，係時候出發去之前報落既睇動物團喇。上一篇好似殘親唔少巴打對眼，呢兩篇我地就睇多啲綠色野，護下眼啦。

Bialowieza forest位於波蘭邊境，橫跨波蘭同白羅斯，係歐洲現存唯一一個原始森林，因此動植物種類好豐富，好期待係度既10日會見到啲咩野呀。

我地參加既係一個叫Wild Poland既旅行社，佢地會由華沙接送參加者去到Bialowieza國家公園入面既遊客中心，每人5000HKD既團費包左係中心入面十日既食宿，不過睇動物既guided tour就要額外收費，每個大約係300hkd，每日都有兩三個tour比大家自行參加，大家可以按自己既喜好同作息時間報名，每團都只係有3~10個團友，幾唔錯架。

入到去既頭幾日我都仲嘔緊，咩活動都無參加，靠飲糖+鹽溝水續命，再係出面草地散步下咁，呢個環境咁好既遊客中心就變左我既療養院，話時話因為呢度太近邊境，連電話都會跳左去白羅斯既台


係我地住既營地出面已經係一個類似維園咁大既小森林，比植物包圍既感覺真係好好





有團友話食完飯散步既時候見到貓頭鷹，有一對帶著單反大砲既老友記仲索性唔報啲收費團， 自己留係營地附近影雀。我地散步果時都見到啄木鳥同埋野生狐狸架，不過設備所限影唔到

見唔見到果個動感呀


可能因為呢度空氣好，天氣又好，曬左幾日太陽我就精神返啲，可以報名出去玩喇。 雖然仲未好番哂，體力只夠一日參加一個團，但見到我終於行得走得，男朋友都鬆左一口氣

每日活動室都會放左報名表出黎比大家報名，活動時間係動物最活躍既清晨、黃昏同埋專睇夜行動物既夜晚時段，上面除左時間同價錢之外，仲會話比大家知呢個tour有可能見到既動物，有啲睇特別動例如係野牛同埋狼既團一早就會full 哂，我地就無乜所謂，見到有咩團有位就報咩，反正有緣的話就會遇到小動物架啦。

我地最鐘意清晨出發既團，就算咩動物都遇唔到，係森林中穿過晨曦既薄霧呢個感覺都好舒服，令人覺得呢個真係一個充滿靈氣既森林





呢個唔係啲要攀山涉水既歷險團，每個tour都係三四個鐘既輕鬆散步，我地既團友大部份都係老人家，國家公園既路都唔難行，有啲地方仲係舖左好行既木板路，佢地帶隊既時候都會帶我地行啲見唔到盡頭既大直路， 話一黎可以望得遠啲， 比較容易見到動物，二黎原來啲動物都中意行呢種 “無障礙通道”




唔知哪兒來的貓



你可能會覺得奇怪，點解睇左咁耐仲都係得啲樹同隻貓 因為頭幾日我地確實係無乜野見到，始終野生動物唔係想見就見到，每日出發都唔知今日會見到啲咩，咁既隨機感我地好喜歡

係度第一次成功清楚紀錄既，就係之前係愛沙尼亞好想見到既河狸喇!! 河狸係夜行動物，我地夜晚黑就出去坐船仔搵佢地




呢條河住左好多河狸!! 佢地都唔係太怕人，就算走近少少都唔會嚇親，繼續係度刨佢地既樹皮，有一隻仲吽吽哣哣咁一路望住我地一路R肚皮，真係好盞鬼 可以咁近距離見到佢地，真係太興奮喇

愛要及時，表達愛意都要及時呀