觀察、等待。Ahsoka不再恐懼。
﹒ ﹒ ﹒
Kaeden曾經聽過，人類為咗上位咩都做得出。呢啲場面親身都見過唔少。佢知道兩公婆都可以嗌到大打出手，佢見過一齊玩嘅小朋友周身傷痕。有一次，有個大佬試過落格，扣起班細嘅份糧。佢唔風光得幾耐。個次係Vartan一野啪斷佢手指，但係Kaeden仲記得同Miara戰戰兢兢嘅日子，每日都希望唔好惹事上身。
被人掟入監倉之後，感覺好似已經過咗大半日。僅有嘅窗口外面仲未天光，令佢明白實際上無可能耐過四個鐘，但係都足以令佢重複又重複諗返起自己聽過嘅每一個恐怖故事，每一秒都愈見瘋狂。無謂再忍住眼淚，佢知道，最終，帝國會逐步逐步睇穿佢。
