[2020日本東北雪祭] 秋田青森 暖冬下的暴雪之旅

真係好大雪，睇住雪景真係好正，不過要行出去就不了

真係唔明點解日本識整暖板但又冇暖水洗手 我係歐洲大部分地方都有暖水洗手

就係咁，訓下訓下就過左1-2鐘
天色都開始入黑，把握機會，衝返去會場影下相
入黑後完全係兩個景色，唔知點解反而似比上午更加有生氣
可能入黑後開始多人黎(應該唔太多人好似我咁由朝到晚都stay係度)
啲擋攤更加當人去買野食





我都去返頭先食燒蠔果間檔，飲返碗蠔湯
一樣咁鮮甜，一樣咁暖心
再去一檔買埋炸雞當晚餐




轉眼間個天真係黑哂，成個會場有大燈射落黎
黑夜下既雪地顯得更加白雪雪

注意音量
https://youtu.be/oop9h28EWJE

周圍行下影下相，見到有人出黎表演打下太鼓(?)
又見到有主人迫隻狗仔企定定唔比行開，要佢做model黎影相
其他人個個一齊舉機影，好好笑




入黑後開哂大燈，係四方會場外無燈照住
但寧寧舍舍有一棵無哂葉既樹
好多粉紅色燈飾掛左係上面
好多父母叫啲小朋友走過去做model黎影相，小朋友好得意呀





又有女仔著住傳統服裝出黎同人影相啦
其中有幾個係下午都出左黎既
都係一句啦，說好的秋田美人呢

大家可以睇下條片，就知當時雪同風係去到咩程度
建議睇左慢鏡先，再睇正常速度
咁樣對比就知有幾勁


慢鏡
https://youtu.be/vwTTk3fv2A8

正常速度
https://youtu.be/nAiaoUTJsZs

我入廁所果下已經feel到唔對路
因爲入邊無暖爐，柯尿柯到出煙
果然一洗手就中伏

又繼續update啦，今晚會完左Day 2依個雪犬祭

上回提過話夜晚更加有生氣，除左係越黎越多人去到會場
夜晚係大光燈下睇雪景睇調像更加靚之外
其實係因為今晚會有依個祭典既重頭節目，就係花火大會








個個都搵定靚位預備影相拍片
你地可以見到係有人set哂腳架擺好機 (其實都有10幾個人)
畫面外其實都有電視台既人係度做訪問

我都企定定預備，可過我得細細支自拍棍
放係雪地上係唔穩既
企企下都成半個鐘攰死

終於係倒數之下，花火大會正開始啦



嗯，你地覺唔覺有啲唔妥當

點解個天空咁蒙既?
點解個天空咁光既?

想知點解? 睇多幾張相先啦























咁大雪既?
仲有放煙花唔係應該要熄燈架咩?
雪地上既花火大會我真係識條鐵呀

依兩條片就係當時放煙花同開始前既情況
依家睇返真係大雪到痴線

開始前
https://youtu.be/KF8n2xEt1U8

放緊煙花
https://youtu.be/oIVsYdd8S1I

開始之前落大雪，就係咁既情況
第一粒就射左上天空
即係咁，放煙花有咩理由唔熄大燈架
較暗佢都好呀，成件事好白痴
燈光打落啲雪度，仲搶眼過啲煙花
就係咁，第一次落住雪睇煙花就變成咁

初頭都好好心機用部相機同OSMO Pocket拍片
之後都放棄，咁大雪既情況無腳架手持都唔會拍得靚
同埋我要趕火車上返秋田，再唔走就遲到
你地都知隨時1-2個鐘先有一班，miss左就麻煩
行返去一開始落車果度既途中
果然見到無大燈射住既煙花係正常好多

行到去場地出入口
就排隊搭shuttle bue返湯沢JR站啦
未有車黎果時凍到傻，個個成身雪
好彩都有個臨時帳慕比你等車，入邊有個細暖爐好少少

雪犬祭終於完左啦 (雖然仲未放完煙花)
依個祭典，算係我日本第一日完完整整咁參加既祭典
仲要係冰天雪地，由朝玩到晚
真係好難忘

平心而論，值唔值得留係度玩成日呢?
我會答你地唔值，可能玩3-4個鐘已經好夠
但我有無後悔呢? 就一定無
雖然我係度無無聊聊周圍行
係個館度又座又訓成個幾2個鐘

但今次既所見所聞，未必可以再感受到
係雪地度仆個幾次街，有咁多狗狗一齊玩又可以影相
落住大雪又開住大燈咁放煙花



再座底既時候，真係覺得係雪地上面行成日真係好很攰呀

我搭返去秋田果架叫快速-犬っこまつり号
都係特別為雪犬祭已開設既
係之前買新幹線pass果時已經劃好位，可免費座
依班車大約8點半開出，我至少早左半個鐘返到車站

反正有時間就係車站睇下野
有間大房係介紹附近周邊既景點，有少少手信賣
便利店都無間，想買少少野食都唔得
先醒起成日都無正正經經咁食過完整既一餐

留名追post

之後就上左月台等車又影下相，第一次係夜晚既月台等車
車站外面無咩建築物，又唔多人好鬼靜
等等下又落雪，雖然好靚不過好鬼凍

真正雪花火

睇到都好凍

正呀喂

唔好意思遲左update，講返上轉

我要係湯沢去返秋田，其實同樣都係經奥羽本線
不過今晚走既就唔係搭普通列車
而係搭快速犬っこまつり号
轉為雪犬祭依兩日而加開既

資料來源: 冬の増発列車のお知らせ（JR東日本秋田支社）


終於等到班車黎啦，班車比想像中舊，不過咁先有feel
通常班車都係停一陣，先開走，所以我都把握時間去影下
見到個運転士要落車拎個鏟出黎剷車頭啲雪
依啲唔係現場真係唔會留意到

影完就上車，個車廂好大又座得舒服
可惜係夜晚，無咩風景睇
只好休息，座成大約1個半鐘到返秋田



到秋田都成10點半
一落車就衝去便利店買野食返酒店
成日雪犬祭無食過正餐
但係已經累到唔想出去食
食完仲要執好行李，預備聽朝check out開始出去青森
就係咁，我Day 2就完左啦

包薯片食完都唔知咩叫秋田の味

湯沢站 - 普通列車埋站
https://youtu.be/AWRWzAjrGNA

湯沢站 - 快速犬っこまつり号埋站
https://youtu.be/83sI_rOCSj4

快速犬っこまつり号 - 內部
https://youtu.be/0wy7Dg2sOEE

Day3 秋田 > 青森 > 弘前(第44回弘前城雪燈籠まつり) > 青森
因為JR既意外為變成咁
Day3 秋田 > 弘前(第44回弘前城雪燈籠まつり) > 青森

相信有追頭post既都知中間有意外發生左，無錯就係今日發生既
睇行程，其實出意外之後更為合理既
幅圖


今日原先既行程係朝早搭特急係秋田出發直上青森先
然後就拆返去弘前城雪燈籠祭 - 雪燈籠まつり
咁尋晚湯沢返到秋田都係10點11點幾唔算太夜
而今朝班車就8點半先開
所以相對之前5點就要起係無咁辛苦既
可以慢慢check-out酒店

左邊: 係尋晚雪犬祭快速犬っこまつり号返秋田
右邊: 特急つがる1号今朝上青森

執好野就要離開我逗留左2日既秋田(其實有日落左湯沢都唔係好當1日)
雖然短短既時間又匆匆忙忙，但我所見所感受到既實在太深刻

依2日係日本完完全全聽唔到廣東話同普通話(雪犬祭有少量)呀
你想唔想像到係一個二三四線既城市，落雪季節又有祭典既時候
竟然聽唔到廣東話普通話係咩野概念呀
我真係可以完全投入到，我真係去左另一個國度咁樣
(依加去東京咁多廣東話同普通話真係無咩feel)
所以希望武肺完左之後，再黎多次，好想再係街上面慢慢行呀

再見啦秋田

第一幅圖，畫面正中間最遠既地方
就係之前提過話，車站同商場相連既位置
間店鋪正好係便利店黎

我搭去青森既係特急つがる1号(奥羽本線)，大約8:30出發
我自己都早左少少身，check-out去車個便利店，買定野食
因為都要搭成2個幾鐘先到青森，即係約11:30先會到
上到去青森本來又無諗住食野，去完酒店放低啲野就即刻落返弘前
(我相信好多人都覺得咁安排浪費時間，不過我真係想放低行李先)

其實買完野食拖住行李落埋月台，其實8:00都未到
咁早係因為我怕有野出錯既性格
所以出國旅行，就算plan好時間，會再預早少少出發
落到月台，靜靜地睇下其他火車係雪地埋站者開車，個畫面都好靚

不過等等下唔到對路，突然好大雪，好似沙塵暴
啲雪真係迎面打落個身到，有個運転士著哂大褸，都行返埋去有頂蓋既地方
我無帶遮但件褸有帽，頂硬上拎部機出黎影相拍片啦
係火站有咁既情況真係可遇不可求呀(諗多左)
唔洗一陣我真係手就硬哂，又影完就拿拿聲行返埋去避雪