[2020日本東北雪祭] 秋田青森 暖冬下的暴雪之旅

幾時到奧入瀨姐

無呀，你睇我之前啲post，Day3最後同Day4一開始
就知我前晚食飯到凌晨2點
朝早8-9點就出去
未消化哂所以無食

今日會開始講到
不過我唔多相

講到係Auga商場地下果層海鮮市場
食個好地道既海鮮丼
食飽飽，就真係預備要同青森講byebye啦
襯仲有少少時間，去返JR站隔離個商場LOVINA





依個商場裝修，相對黎講比較新淨，我地香港人都會行得幾舒服
慣常地下1-2層都係賣下飾物，女仔衫等等
再上就有餐廳，仲有無印同さわや書店







依間書店既規模都好細，總共得幾間分店係東北依邊

我難得黎到，當然即刻拖住行李搵廁所去大解
一陣要搭個成幾個鐘巴士，唔爆返啲出黎就不得了
好彩個商場新淨，去得好暢順
順利解決完，就行下無印同書店
不過拖住行李同無咩特別野睇，我就好快出返去外面等車啦

等咩車呢? 如果大家有由一開始追我依個遊記
相信會知道我依次旅程既原點，即係我下一個目的地
星野集團 奧入瀨溪流酒店
(我終於寫到黎依度啦)

當時就係唔知頭唔知路咁book左依一日入住奧入瀨溪流酒店
令到我此時此刻落住雪咁企係度等車

等車既同時諗起黎到青森都只係逗留唔係好耐
尋晚大約10點幾到，依家下午2點幾3點都預備要走
但行程都非常充實，除左訓覺之外，基本上就係外面不斷周圍行
幾個市內出名景點都去左，手信又買左一大袋
海岸公園既景色都令我印象非常深刻

青森，其實係我book奧入瀨溪流酒店之前
係東北最想黎既一個方，想去本州最北既青森大間町
距離十萬九千里，去果度又無理由唔搭埋船上北海道
所以不斷改plan之下，青森可惜地係逗留得最短時間既一個地方
不過咁樣下次再黎，咪可以有唔同既體會

提一提，啲相無加水印，即係代表上網搵唔係我影既
因為寫寫下發覺好多畫面都想貼出黎但原來無影到

等等下架旅遊巴終於黎到啦，司機對完我名之後
就幫我拎行李上車，我都上車座前排，等住出發
係度簡單介紹下奧入瀨溪流
要講之前就先要提及十和田湖










依個湖非常之大，橫跨左青森縣同秋田縣
係由噴發而形成的二重火山湖，日本第12大既湖，深度更係排第3
而奧入瀨溪流就係十和田湖其一個伸延
總共長14公里，有十幾個瀑布，無數樹林，充滿種生機既溪流

而奧入瀨溪流酒店，就係唯一係溪流旁興建既酒店
雖然地點非常之不便，但因為周邊景色非常優美
四季分明既變化亦令依呢度全年都好多人入住

雖然奧入瀨溪流酒店地點係比較偏遠
但酒店都會安免費既接駁巴士
每日都會有一程係JR青森站/新青森站/八戶站等，去接/送旅客
不過就要預早去到官網預約座位
預約完你會收到確認email





跟住好似我咁係指定既時間同地點，等待巴士黎到
check完你既預約資料，就可以un un 腳等出發




如果你覺得接駁巴士既時間唔岩，或者等車地點唔夾你既行程
你當然可以自行搭其他巴士，或者的士入去
https://www.oirase-keiryuu.jp/zh/parts/cms/images/oirase_keiryu_hotel_access_06.pdf

不過要注意冬天因積雪既關係，有唔少幹道會封閉避免意外發生
我本來係plan自己搭巴士入去，不過就係怕有突發事
所以都係用返酒店既安排最穩陣

終於向住酒店出啦

繼Day3 JR火車出事要搭旅遊巴之後，又要搭多次
(其實都係尋日朝早既事，不過感覺就似好隔左耐
中間發生左好多事咁)

大約唔到2個鐘既車程，就會達奧入瀨溪流酒店
中間都會有類似中途站，比你去下廁所同買小小野食





今次同之前由大鰐温泉站去弦前既時候唔同啦
心情同外邊景色都截然不同
可以輕輕鬆髮，望住兩邊雪山非常美妙既景色
但又懷住一絲不捨既心情
因為青森真係未玩夠，而且旅情算係真正咁踏入後半部

係旅遊巴上面無咩影相，不過就有2條片
大家對雪地山景有興趣不如入去望望，都好有feel架

1.)
https://youtu.be/TrI6INufdRQ

2.)
https://youtu.be/5tdsgiSEVhs

終於到啦

你搭酒店安排既旅遊巴，落車既時候會有專人接待
除左會幫你拎行李之外，仲會有專屬既櫃枱
唔洗怕一車人要排好耐隊黎check-in

一入去已經見到好靚既大堂
check-in既時候接待員會好詳細講解酒店既設施
位置/服務時間等等，亦會有活動既宣傳單張，floor plan等等比你
唔洗擔心唔識日文，佢會有中文/英文既ver可以拎


因為我又無影到相...所以我會借用人地既遊記既相
去貼比你地睇，一到步時酒店既大堂係點樣
https://im0071.com/2019/10/hoshino-resorts-oirasekeiryuhotel/




寧願借用人地啲相，係想講返酒店依個翻新左既大堂做得好好
因為黎得依啲resort，好多時都係一家幾口
甚至係成個大家族一齊入黎玩
(邊似得我自己今次一個人咁)

睇相就見到佢翻新到好多位
好貼心咁比其他人，小朋友可以座住等check-in
上網睇到仲話會有專人倒蘋果汁比佢地飲添


至完我搞掂check-in之後
就有兩個方向，分別係東館同西館共4層
我果間房就係西館3樓，比較近溫泉，即刻衝上房啦

Floor Plan


小冊子 - 前面

小冊子 - 背面


除左一般房形之外，仲有和室，當中仲有分係咪望到溪流
點解我依個行程會由依間酒店開始plan起咁奇怪呢
正常應該係plan行程，先至慢慢選酒店
就係因為我book到既房形，正正係和室仲要望溪流
平時所有房形本身都唔易book
仲要依幾日係雪祭，和室望溪流我諗都未諗過會book到

以下係官網圖，當然仲有其他類型既
雙人房


和室


和室望溪流 (就咁睇相，睇唔出有咩大分別)


今晚既行程都係非常豐富
所以我暫時唔介紹間我果房住，拿拿聲安置好行李
衝返去東館1樓果邊
未到6點咁急有咩搞呢
如果有望下張小冊子應該會發覺

就係依度非常有名既青森蘋果廚房，食自助放題啦
我先前上官網book左食放題，check-in果時接待員都會再確認多次
到聽日check-out先會比依餐既錢
用膳時間係6-9點，上網睇過話超多人，所以我都決完早少少到

一黎到都已經有幾十人排緊隊，唯有慢慢排等下
陸陸續續都好多人黎到排隊，好彩頭先咩都無搞就衝落黎先

叫得青森蘋果廚房，裝修當然會配合返
一過到黎就會見到有大大個餐廳名，頭頂仲釣左多蘋果既燈飾
排隊既地方，即係唯一進入餐廳既通道，旁邊就有幾個玻璃櫃
放滿整整既蘋果，一個簡單而有標誌性既design
令到大家唔記得係度食過咩，都一定記得黎過依度食野










仲有無一日一蘋果 醫生遠離我依支歌仔唱
有既我拎哂返黎派比大家

終於輪到我啦，安排左我座窗口位，出面就係雪景黎
因為外面已經入黑，一影會背哂光


出去行一圈，野食賣相都幾靚既，花款唔會特別多，算係應有盡有
黎得呢度，唔會話要求5星級酒店既級數
食佢成個配套已經值哂
(其實唔食佢就無野好食)

平時少拍片，睇返先發覺又唔定，轉黎轉去好暈
https://youtu.be/T5Z-bncbLdE


其中最特別係依度有3款蘋果汁任飲，分別係富士，王林，另一種叫津輕
成餐我瘋狂飲左勁多杯

一開始我都係拎刺身先，勁多隻甜蝦，超鐘意食
帶子 三文魚 吞拿魚 鰻魚 就碎件咁上，正常質數，都新鮮
(想講返，我無好似贏國人咁拎走哂全部甜蝦架
我拎果時有職員refill緊)






跟住繼續食冷盤，沙律，燒牛肉等等
因為都算係開胃菜等等，酸酸甜甜幾醒胃
反而今轉拎左少少墨汁魷魚飯同忌廉魚西蘭火，少少溜

我真係好鐘意食沙律同雜菜雜菇，炒牛肉
個雜菜雜菇好特別，總共有7種類，比較少見既有人參



沙律


7色雜菜雜菇


炒牛肉


普普通通既天婦羅，茄汁意粉，冷麵就正


跟住夾到好核突既甜品
Tiramisu，黃豆粉黑糖蕨餅等等


仲有最後依個雪糕+一個波蘿包既物體
其實係黎到依度必試，新鮮焗出黎既蘋果批，入邊超多蘋果蓉
再加自己吱出黎，非常濃厚牛奶味既軟雪糕一齊放入口
做ending簡直係絕配呀

巴打食量驚人
我本來6月去奧入瀨

大家係咪又諗我會孤獨的美食家上身呢
今次無啦，上面post幾多，就係我食左幾多咋
下午1幾點係青森食完大大碗既海鮮丼
依家6點幾7點真係食唔落

所以好多中式同西式既我無咩點食，其餘大部份都試過哂
蘋果汁都起碼飲左成8杯(佢個杯又細既，飲2-3啖就一杯)











我真係好欣賞佢7色雜菜雜菇依個擺法
分哂顏色，令到你好想全部款都夾返去食

唔算食得多啦
今次自助餐，除左刺身我都係食得一轉咋

依度唔係主打刺身
款式少，碎件咁上
不過質素ok既







中式野無食過
但其實我鐘意食濕米




依個好似係啲鄉土料理黎，菇湯幾清甜
其實我更加鐘意食菇


仲有少少咖哩飯飯，麵豉湯就無影到


甜品有幾款我食唔落

之前講話點解食佢既配套都值呢
我自己去日本旅行，如果唔係跟團
(細路仔果時先會跟屋企人join旅行團去日本)

一定唔會係酒店食佢既早/午/晚餐
因為日本實在太多好野食
出邊周圍搵下有咩小店，隨時有意外既驚喜
(又孤獨的美食家上身)
而且好多時會體驗到好地道既飲食習慣

至於今餐，應該係數一數二係酒店食既一餐
當然依類resort同普通酒店會唔同
依度係有主題，非常有特式

食物味道，質數只要係正正常常
懷住一個渡假既心態就會食得好開心











裝修當然唔係頂級
但係貫徹主題，令到你依一餐
由到步排隊，到你離開既時候
個感覺都好統一，成個體驗非常之好，令人印象深刻

有一個四字詞語，唔知個意思岩唔岩用
但我走果時就諗起
食色性也

食得非常之大滿足，跟住就上返房，放低幾両，又再出門啦

平時住普通酒店，大家通常都係行完街食完飯宵夜，就去沖訓覺
依就唔同啦，不論早上，日間，晚上都有唔同既活動比你報名參加
去體驗奧入瀨溪流唔同既生態同景色

就以我2月為冬天為例
https://www.oirase-keiryuu.jp/activity/?m=2

唔同活動，有唔同既人數限制
基本上係依度既住客就可以免費參加
但某部份既活動需要付加費用

スノーシューハイキング


冬の奥入瀬渓流ツアー


八甲田山樹氷シャトルバス



所有活動上官網就可以預約報名
例如朝早車你地出森林，一路嘆住杯咖啡一路感受下溪流既氣息
或者車你去睇瀑布，冬天就可以安排你八甲田山睇樹冰
本身我都想去樹冰，不過今次留得一晚唔夠時間去
而我就預約左都係冬天限定既氷瀑ライトアップツアー
官方中文譯名係 冰瀑璀璨點燈

架火車肯開返門比你，唔係你可能狂拍車門都無人理你

唔係有車死火，成條奧羽本線停哂
班車應該走左得返我一個係月台

不過日本啲車長應該會望清楚先開走既

你下次去白濱果間川久食 buffet

有咁多蘋果汁但冇蘋果酒

做咩講到我剩係周圍去食野架