【第七年】《病港ＩＩ》

「巴爾市。」

「......」

貓吉見我們一面懵懂，續答：「即係以前嘅銅鑼灣，如今夕鯨國最繁榮嘅一個城市。」

「喔......咦，阿貓吉君你又講返粵語嘅？」王達尼居然留意到。

「哈哈，通常跟人慢慢熟絡後，我會轉口語，比較陌生的先用書面語，但也有兩者不斷替換使用的時候。」貓吉笑言。

「繁榮......」王達尼腦內小劇場，已經各種貪婪的幻想：「咁我哋入唔入到去？」

「較困難，除非你們擁有夕鯨國的居民資格，否則一般守門者，都不會貿然給外人進入。」貓吉行到窗邊，仰望那被高樓擠壓得狹窄的小天空：「因為詭人的出現，各個倖存區暫時不敢收留外鄉人......」

「詭人......」

「大概，是兩年前吧？巴爾市內發生了命案，有個名為「陳熠」的外來觀光者，破壞了區內儲水塔後，持刀殺害五名路人，後來從陳熠身上發現，他是名早已病變的病者，就是說......有病者能夠混入人類社會了。」

我腦中仍然回想著，當初見到那一隻詭人的樣貌。

「之後為安全起見，全國關口就封鎖哂？」王達尼抱手。

「嗯，除非認識夕鯨國官員或是經山路偷偷潛入，但山路的話通常會沒命，因為山區有個名為馬谷川的強盜，他和手下的營地就紮根於山上，很熟識林路，經常殺人奪貨。」

「咁即係入城無望......」王達尼越聽越心灰，整個身子軟靠在牆壁慢慢坐低。

「既然把你們帶來，方法倒是有。」貓吉微笑。

「係！？」我都顯得開始在意。

「居聞守在東大橋的守門人，好喜歡喝酒，你在怪獸樓這裡買瓶給他喝吧，說不定心情好，就會放你入去。」貓吉給出辨法。

「但酒......喺呢個時代應該好貴？」王達尼說出難處。

「你那把左輪如果是貨真價實的話，一箱酒也能帶回去。」原來貓吉早就留意到。

在末世下，槍械是僅次於藥物的貴價品。

「好！但話說......阿貓吉君，點解你會咁熱衷幫我哋？你呢種人真係少見！」王達尼雙眸溢出感動之情。

「因為......」貓吉假意兩聲咳嗽：「實不相瞞，我正在撰寫一本名為《外鄉人異聞錄》的書，想找各地外鄉人聽聽他們的故事，因為從來沒有人書寫過這種題材，所以......應該會大賣。」

「咁你就搵中人喇，我哋喺將軍澳勁多經歷俾你寫飽佢！」王達尼挽住我肩膀。

「你願意？」貓吉問我意願。

「嗯，入到去嘅話。」我回答。

「我能幫的就到這裡了，之後我們有幸的話，就在巴爾市碰個面吧。」貓吉作出道別。

「好，約定喺嗰邊見！」王達尼指住貓吉。

「啊，還有一點是，你們應該不用擔心詭人的接近。」貓吉臨走前，說。

「係？點解。」

「因為你朋友身上，有陣狗味，而詭人最怕的東西，便是貓和狗。」

難怪......

在廚房時，那個詭人會轉身逃跑......

「喔！所以你......」王達尼恍然大悟的，胡亂道出貓吉的意圖：「嚟宜到買貓，就係想喺倖存區入面高價轉售！！」

「......」貓吉和我都無言。

「哈哈，並不是所有事情都為了圖利，我單純喜歡貓而已。」貓吉微微一笑，默默從樓梯離開：「好了，真的要說再見了。」

貓吉離開後，我們好像腦袋又變得一片空白。

「咁我哋宜家......快手買枝酒，就過去東大橋嗰邊？」王達尼先開腔。

「好，不過我哋無錢喺身......」我說。

「搵到酒嗰陣自然有方法嫁啦。」

沒有地頭蛇帶領的我們，像隻盲眼小烏蠅在樓內周圍亂逛，為尋找賣酒的地方。直至我鼻子無故嗅到製酒之香，才領著王達尼去到十三樓的釀酒廠。

「點啊？哥仔，你哋搵緊咩啊。」我們在十三樓行不到幾步，就有個粗衣大叔將我們攔住：「想要酒啊？直接門口喺到講，喺到訂得嫁啦，唔洗行入去。」

我探頭偷瞄一眼，看見一些機械在入面運作著，又一些人在手動攪拌著酒池，看起來有模有樣。

「一瓶幾錢？」我問。

「咁就睇你要咩啦，最普通嘅土酒，到風味獨特嘅阿姆羅酒都有！」

「咁如果係用嚟賄賂守門人呢？」我抱手、直問。

「喂......」可以感覺到，王達尼冒出一陣冷汗：「邊有人會直接講個意圖出嚟......」

「哈哈哈哈，賄賂專用酒啊？」粗衣大叔哈哈大笑，隨即認真介紹：「咁就緊係最貴嘅鯨香酒......」

「鯨香酒？有幾貴啊，我千萬富豪嚟嫁喎......」神采奕奕的王達尼，小聲補上一句：「喺艾寶琳。」

「艾寶琳？咩嚟哈哈，不過你唔嫌貴就好辦事！」粗衣大叔舉出一隻手指。

「一蚊？ok，邊到埋單。」王達尼問。

「一萬鯨幣啫！」粗衣大叔說出價錢。

「哇！！！買隻貓都係二百五十蚊，你樽鯨酒要成萬銀......」王達尼明明身無分文，就算成功殺價到只值一元也無用。

「吓......咁市價係咁嫁啦，加埋呢到係黑市，係貴啲嫁喇！酒呢啲奢侈品係咁嫁喇！」粗衣大叔不停向前作勢撥烏蠅，想把我們趕走：「走走走，無錢嘅就走......」

我跟王達尼只好轉身，返回梯間。

「睇嚟交涉失敗。」我說。

「咁唯有做返我黑商最擅長嘅老本行啦。」王達尼伸一伸懶腰。

「偷呃拐騙？」

「總之，今晚再會合，我哋暫時分開先。」王達尼故作神秘，一副笑裡藏刀的樣子：「我要一個人觀察下有呢地方匿埋同走佬。」

跟這個斂財的傢伙來到港島區，也算是福氣，因為單論行動力的話，比起正常人已經超出一般。

這世界紙上談兵的人，實在太多。

可能怪獸樓太臭，又或太擠迫，待在樓層內已有一段時間的我，忍不住要上天台呼吸新鮮空氣，結果天台都有著進行非法勾當的人。但天台不同下面窄狹的間隔，這裡很寬闊、空氣很暢通，舉頭的話更能將整片天空收入眼內。

「噠、噠、噠、噠」一地的電子零件，還有不斷敲鑿的聲音。

聲音來源是來自一部巨大的洗衣機中？天台中央，放著部比正常大四、五倍左右的生鏽洗衣機。

不小心踩到地上某件零件的我，意外觸動到洗衣機內的人。

「邊個呀！」聽上去，是位老人。

隨後，一名穿著白色背心及黑色短褲的老伯，手持鎚子從巨大洗衣機彎腰行出。

「你踩到啊！」那個老伯拿鎚子，指著我的腳。

「唔好意思......」我走路確實要更小心一些。

「唔你老母！」老伯大罵。

「我真係唔小心......」

「我你老母！你知唔知只要一個零件出錯，我升空個陣都隨時會死！到時你賠返條命俾我啊......！？」老伯很是激動。

「你搞緊咩？如果你做緊啲特別工程，應該喺門口貼塊告示牌......」

「我無你呢啲廢青咁得閒，整咩咩告示牌！我仲要拯救全人類，應該係話全香港人。」老伯脾氣稍收，娓娓道来。

「吓？」

「睇嚟你仲未明咩情況，細路。」老伯用銳利的眼光，回盯著我。

「我真係唔知咩情況......」

「我整緊火箭啊。」老伯用力拍一拍那部巨大洗衣機。

「嘭」

「吓！？」我這一聲愕然，就如同洗衣機發出的回響。

「你老尾！」老伯又突然指住我，對我開罵：「你知唔知我喺廢土區執咗幾耐嘢！先整到成部火箭嘅初型出嚟！」

「呢舊鐵係火箭......」我踢一踢洗衣機外殼：「睇得出......絕對睇得出......」

「為咗賠償我嘅損失，宜家要你試坐我火箭一次。」老伯提出無理要求。

「唔太好，咁寶貴嘅機會，唔應該用喺我身上。」然後，趁那個老伯再次返回他的「太空倉」時，我就悄然無聲地離開了。

除了剛才的「太空人」之外，這裡還孕育了不少傑出的人才，包括「軍火大亨」、「化學家」、「孤兒院院長」、「主張身體自主的女性」等等。

不得不說的是，這裡環境惡劣到一個點，生鏽排水渠正流下著深綠色有毒液體，殘舊的牆壁不少外露電線，而且滿地的垃圾滋生著昆蟲。

其中，有一個人是專門做尋人生意的......

我特別在意。

「咩人都搵到？」經過的我，隨口問一句。

「大致上都搵到，倖存區唔大唔小，只要俾到對方嘅形容同描述我就可以。」尋人檔主咬住煙斗，說得輕描淡寫：「講嚟聽聽先。」

我從依稀的記憶中，說出艾匡當晚的衣著：「佢好似係著住套貴族獵人服，同埋拎住把佩劍......」

「唔......」尋人檔主閉目凝思。

「嗯？」

「你等等，我打開緊記憶宮殿......」

「......」

這情況持續了半分鐘後，尋人檔主忽然道出一句：「搵到。」

「搵到？你只係合埋咗對眼半分鐘......」

「佢係咪著住皮靴，仲有白色嘅襯衫。」尋人檔主說出更多資訊。

「係，你居然真係知道？」

「哈？咁睇嚟我講啱咗。」尋人檔主抱起手。

「我要知道佢去咗邊。」

「嘿，咁要睇你......」尋人檔主呈出大手掌：「有咩可以俾到我？」

「我為咗嚟宜到，身上已經咩都無，不過我可以為你販賣我嘅專業......」

「你嘅專業？」

「幫你......」我湊近他的眼睛，說：「殺人。」

「噫呃，咁、咁又唔洗，我要呢樣就夠！」尋人檔主指一指我嘴巴。

「......我唔會做任何淫穢行為。」

「我係指你個口罩！」尋人檔主愣然。

我將貼面的口罩拉下來：「呢個？」

「係！」

「早講。」我把口罩扯下來，拋給他。

尋人檔主一手接住貼面口罩，說：「好，咁你聽實......約莫一個月前，鰂魚涌地鐵站嗰邊發生咗件事，有幾個經常喺嗰區流連，專門欺騙外鄉人嘅不法之徒，死咗喺站內。」

「咁關佢咩事。」

「據聞，有個矮矮地嘅男仔，救咗你要搵嘅女仔，仲由鐵路離開咗。」

「咁表示？」

「咁表示，第一，可以落月台經鐵路移動嘅，只有夕鯨國嘅特別人員。第二，係你可能戴咗綠帽。」

「明白，咁即係佢宜家一定喺夕鯨國區內。」

「大致上都係。」尋人檔主點點頭。

「唔該。」我轉身、離開。

臨走前，我重申一句：「仲有，佢唔係我女朋友。」

「明白嘅，好少男人有勇氣承認自己頭頂發出綠光嘅事實。」尋人檔主回了一句。

在確認艾匡的位置，是在夕鯨國後，我那無爭之心又再無名火起。

今夜之前，

我一定要入到夕鯨國。

傍晚，我在怪獸樓下等待與王達尼會合。

當我再次見他時，他已經滿臉污跡、一身灰塵，像服完苦役一樣。

「喂！葉青。」王達尼見到我後，舉一舉手：「你除咗口罩差啲認唔到你。」

「個口罩賣咗俾人。」

「無所謂啦，反正你個樣都乾乾淨淨咁。」王達尼突然收細聲音，向我低語：「準備好未？」

「你指，偷酒？」

「嗯。」王達尼仰首橫視半空上的送貨繩：「佢哋工作咗成日，宜家應該係休息時段，兩邊運貨量都明顯少咗。」

「你計劃係點？」

「你扮去買酒，但買之前就同佢講，想睇下樣品先。」王達尼把左輪交給我，續說：「如果佢唔信你，就拎把槍俾佢睇！當然唔係叫你威脅佢，而係你有宜把左輪，就證明到你嘅財力。」

正 終於等到2

補第800正評

「明白。」我把左輪收下來。

王達尼握實拳頭，志在必得：「到時你一手搶埋瓶酒，就任務完成。」

「等陣......」我暫停過度興奮的王達尼：「呢個好似唔係叫計劃，呢個係叫強搶。」

「哈哈哈哈，你都蠢唔哂。」突然間，王達尼將左輪收回來。

「嗯......？」

「啱先個計劃，只係講出嚟試下你，睇下你係咪嗰種講咩聽咩嘅人。」王達尼抱手，指一指上方：「計劃當然唔可以咁粗疏，你望下上面先......」

我仰望夜裡紅通通的燈籠，繩索上頻頻運貨的畫面經已不在，工作的吵鬧轉為歡愉的笑聲，似乎大家一天的工作都結束了。

呼出一口冷氣：「點？」

「正門入就實唔得嫁啦，邊有人偷嘢仲由正門入，但可以用宜啲繩索入去。」王達尼又指向樓下一旁的廢棄物：「佢哋擺咗唔少廢嘅空箱喺到備用，可以放你入去，再經由索帶運你去對面。」

我行過去怪獸樓一旁的廢物區，這裡放著的都是他們高空拋下不要的垃圾，或是沒有空間擺放的雜物。對於經常要將原材料運送去另一橦大樓加工的怪獸樓，空箱子是很常見的事物。

我在那裡選了個放得下自己的箱子，就隨便拍一拍走灰塵坐了入去。

「應該可以。」我說。

在怪獸樓，大家的窗戶幾乎都加裝了一枝堅固的鐵杆，上面扣住數條堅韌的繩索，連繫著不同供應鏈的單位。

在今早王達尼的明查暗訪下，他早已找到酒廠對面保安最低的供應鏈單位──木塞廠。因為這個單位功用不大，只是負責製造軟木塞給酒瓶，因此只有兩、三人長駐。

「啊......！」王達尼吃力地，將載有我的木箱抱起：「出發喇......」

我從入箱後就開始沉默，反倒是王達尼喃喃自語，好像很緊張的樣子，但這唸碎的聲音，在五層以後的樓梯就聽不見，因為他搬貨搬得青筋都暴漲了。

好不容易，費了不知多少氣力，王達尼終於把木箱搬上到十六樓的木塞廠。他禁不住放下了箱子，坐在梯間上喘氣。

「嗄......嗄......嗄......」

「點解唔一齊上到十六樓先匿喺箱到？」見他喘那麼辛苦，我問。

「係喎......仆你個......」王達尼說話像要去死一樣：「點解你唔早講......」

「反正你都搬咗我嚟宜到，睇開啲吧。」

「之後要嚟料喇喎......要自己執生......」王達尼說。

「嗯。」

接著，王達尼就將箱子到木塞廠外，並敲一敲門。

「邊位？」從木箱小縫中，我看見對方只開了木門。

「有啲新貨運咗嚟。」王達尼說。

「新貨？無聽過喎、無見過你喎、咁夜收咗工啦喎。」對方一連三個「喎」，令王達尼處於下風。

「嗰邊啲人叫我送嘢嚟，我照做嫁渣～」王達尼假裝成無奈的小員工：「慌死我會入嚟打劫咩！間嘢得啲爛鬼木塞。」

木塞廠的員工聽著聽著，頭頭是道的把門開了：「咁又係，慌死你會打劫咩......」他將鐵閘拉開，一把點４２９口徑槍管隨即對住自己。

「打劫。」王達尼說。

「......」鴉雀無聲。

「入面仲有幾多人。」王達尼續問。

「仲、仲有一個。」木塞廠員工謹慎地回答。

「叫埋佢出嚟。」王達尼用左輪手槍，抵在他的額頭：「唔好有任何多餘行為，否則你個腦會多咗個窿。」

「係、係......係，明白。」員工收到命令後，立即把單位內另一名同伴叫出來。

之後，王達尼繼續給予命令：「你兩個，將個木箱運到去對面十三樓嘅酒廠入面。」

「點解要咁做......」另一名剛出來的員工，問。

「叫你做就做。」王達尼威脅人的時候，跟平日完全是兩碼子回事。

更厲害的是，他的左輪手槍其實沒有子彈，但他還是利用自身的氣勢，把這兩人騙到了。

「嗚......好重。」兩人合力將載有我的箱子搬上窗前，再利用安全扣、麻繩和尼龍繩等東西，將我固定好在吊索上。

不知為何，心跳的驚感悄然而生。

可能是怕，一個意外箱子就直墜到地下。

「三、二、一，推。」兩名員工合力將木箱推去對面大樓的酒廠。

在木箱扣住滑索傳去對面的瞬間，強大的離心力將我牽引，我能清晰地聽見滑索磨擦的聲音，腦內不斷預感著，快要撞往牆身粉身碎骨的感覺。

幸好，當木箱快要到達之際，滑索忽然緩速了。相信怪獸樓的傢伙也是設計過才使用，不然貨品撞爛了就得不償失。

不一會，我聽到附近有腳步聲靠近了。

「哇，對面咁夜送咩嚟？」靠近的人，應該是酒廠員工。

「喂！！咩嘢嚟嫁！」酒廠員工對窗外大喊。

木塞廠的員工回喊：「無啊！普通貨仔今日漏送咋！收咗去聽日先搞啦！」我想應該是王達尼迫他們這樣回答。

「哦！」酒廠員工隨便回句，就將木箱推去某個地方。類似是倉庫的地方，周邊都放滿不同大小的箱子。

我想只要繼續在箱裡等待，然後時機一到，就可以半夜出來偷酒。

可惜的事，計劃總有變數。

在那傢伙推我入來並且想離開之際，他突然回了頭，好奇道：「平時啲木塞冇咁明白。」酒廠員工返回木箱前面，決定要打開木箱......

太多事了。

「呯！」在箱子打開的瞬間，我打出如同昇龍拳的一擊。

直碎其下鄂。

就算是沒有練過的人，只要重拳擊中人體脆弱的下巴位置，都不暈即傷。他連大喊大叫的機會都沒有，就馬上暈死過去，並在他身子要向後傾下時，及時伸手捉住其衣領，然後慢慢將他放落地上。

我輕輕打開倉庫的門，從門縫看見酒廠內的情況。

五個人圍在圓桌玩撲克牌、兩個人站在某部機器旁抽煙談天、還有一個人被我打暈，大致上是這樣。

依我估計，價值不菲的鯨香酒一定放了在特別的地方。問題是在哪裡。就當我有這個疑問時，我的救星又出現了。

「喂！啲鯨香酒你哋放咗喺邊啊！？」對面大樓的木塞廠，又傳來員工的聲音。

相信這個問題又是王達尼用槍迫他們問的，以傳達給我知道。

「喂，對面班友仔好似叫緊我哋？」圓桌其中一人，放下了牌：「又會無啦啦問鯨香酒放喺邊嘅......」

「唔洗理佢哋喇 ~」但顯然地，沒人太在意。

「呢橦樓個個人都想巴結我哋，沾幾啖酒飲吓嫁啦！哈哈哈。」一個長鬚子大漢哈哈大笑，將牌攤出：「同花順啊！正，位位交出鯨幣唔該。」

「唉......」怨聲載道。

此時，木塞廠那邊員工又出聲：「喂！！我咁問係因為見到隔離單位放住幾樽鯨香酒啊！都唔知佢係咪偷返嚟。」

王達尼迫他們說的這一句十分之妙，因為已經觸動到酒廠入面的員工了，一聽見有人持有數瓶鯨香酒，就面色就變得嚴肅。

「今日明明無賣到任何一瓶鯨香酒......」連旁邊抽煙的兩人，也認真下來：「佢哋講真定講假？」

「去酒庫睇下鯨香酒有冇少到，少咗一瓶嘅話，一陣即刻拎齊武器上門。」長鬚子大漢站起身，其他人也跟在後面。

他們一行七人，行到去酒廠某間小房中。因為酒廠是用數十個單位的牆壁打通而成，所以說大不大，說小不小。

我趁他們去查看鯨香酒的存量時，我拾取他們圓桌上的油燈和幾瓶隨處可見的烈酒，默默行到他們擺放鯨香酒的房間前。

「無少到啊......」

「木塞廠班友係咪食飽飯無嘢做啊？」

「狼來了二點零啊？」

「算啦，無唔見係好事。」

「咔」我打開門把油燈掉入去，順勢將幾瓶烈酒擲過去。

原本只是漏瀉油火的燈，轉眼間化為駭人的火舌！開始燃燒周遭的東西，包括木架、木桶、地板等。

「喂、你......」長鬚子來不及指我，我就已經再次關上了門。

「呯──」

「整、整熄啲火呀！！！保護啲酒呀！！！」入面的人慌亂地大叫。

同時間，頂住房門的我感覺到有人正試圖推門。

「你係邊個啊！！！」推門的員工在房間內怒喊。

「啪！啪！啪！」他不斷拍門。

我要做的，就只有死死頂住房門。

原本油燈漏瀉的火勢是不足以製造大火，但再加幾瓶烈酒的話就有有強的助燃能力。在房間裡的他們要麼將燒死，要麼爬窗出外逃生，但要是爬窗就沒有空餘的手去拿酒......

命或酒，就看他們視什麼如寶。

「痴線佬開門呀！！！」入面的員工們瘋狂拍門。

他們有試過合七人之力一起推門出去，可惜的是我推些硬物過來，就足夠頂住房門了。

「唔掂啦，越嚟越多濃煙，開始暈......」他們終於做出，如我期待的行為：「爬窗出去喇！命仔要緊！」

「但啲鯨香酒......」當中，還是有人不捨得：「我飲幾啖先再爬出去！」

其他人同意，紛紛開始大口灌酒：「唔好飲咁多呀！一陣爬去隔離單位再返嚟宜到，捉出面個癲佬然後救火！」

「留啲鯨香酒，咳咳！如果救得快，場火應該唔好燒毀到好多......」

wwoohoo真系黎得及時

飲幾啖先

這裡還孕育了不少傑出的人才，包括「軍火大亨」、「化學家」、「孤兒院院長」、「主張身體自主的女性」等等。

是咪講緊某人？

墨巴好曳，成日抽人水

邊個？

孤兒院長係戀童佬

記憶宮殿

量子記憶法

live咗

有個image棟樓好cyberpunk feel

連病港都識封關

墨巴無啦啦抽一下水

港島同對面岸都統一左病者既叫法

想問M點解會有赤時把傘
同埋赤時喺病港1入面出現過？