「聽聞你口中嘅黑色賢者,將佢帶咗去南邊。」
「細路講嘅嘢,信一半就好。」
「反正,我就係要搵到艾匡,無論天涯海角。」
「我聽講艾寶琳一早將艾匡公主圍捕?」我很難從少佐的口吻分辯真假。
「作為將軍澳區第二大倖存區領袖,你應該知,艾匡已經逃離咗艾寶琳,當日又係疑似俾黑翼嘅鳥嘴人所救。」
「嗯?咁希望你早日捉到佢。」少佐補充上幾句,說:「你係艾寶琳皇室派嚟嘅吧?我哋倖存區一向唔歡迎暗地派遣間諜嘅行為,所以希望你喺傍晚之前離開。」
「我會。」
基於突如其來的情況,我要現在領回武器離開大本營,但我要知道的事情總算清楚了。
「喺遙遠嘅南方......」行出鐵門時,我遠眺南面的天邊。
趁天色未黑之前,我火速回到艾寶琳,並將此事回報給皇室知道。
艾康一聽到是關於艾匡的事,就馬上接見我了。
會面室中,一杯最高級的酥油茶放在我面前侍候著。
「你話,港島區?」
「嗯,我聽到返嚟嘅情報。」我答。
「你喺邊個到聽返嚟。」
「大本營某個好有幫派風範嘅男子。」沒理由跟艾康說出,我是向一個十歲小孩打探出來。
艾康放下手中的水果熱茶,沉默地凝思,然後緩緩道出一句:「今次真係多多安眠藥都唔夠食......都係嗰句......佢唔死,我訓唔著。」
「可以知道下,你一定要殺佢嘅原因?」
我問。
艾康聽完我的提問後,笑了一聲:「好少有人,會夠膽問我嘢,特別係私人問題。」
「咁我係咪會成為,艾寶琳第一個死喺呢種原因上嘅人?」我說。
「唔係,唔會。」艾康將兇沉的目光,放到我身上:「你想知原因?咁我就話俾你知,咁係因為......佢兩年前,飲咗我一杯放喺雪櫃嘅水果茶。」
「......」
「宜個原因,充唔充份?夠唔夠做我要一定殺咗佢嘅理由!?」艾康瞳孔越睜越大,說:「無錯啊!我殺人嘅理由,就係可以咁簡單。」
「......」忍笑,是世上最辛苦的事情。
「哈哈哈哈!!!仲有三年前,某個管理花園嘅小官員盯咗我一眼、一年前幫我按摩嘅侍女按肩按得太大力、兩個月前,成日叫我去探下父親嘅麻煩管家,佢哋所有人都喺上任之後俾我處決哂......而所有討我厭嘅嘢,我都記得一清二楚,如果殺咗佢哋可以換嚟我一秒開心,心情一秒舒暢嘅話,都係好值得!哈哈哈哈哈哈......」艾康狂妄的仰天大笑。
瘋了。