─02
通訊彈被火機點燃後,莫風便行出走廊將它掉到樓下去,好讓紅紅的濃霧會飄到天空上。
這一舉動,卻給在校園附近周圍搜索的土匪見到:
「六樓呀!佢哋係六樓,全部人去前後樓梯包圍六樓!」在地下層的土匪指住莫風。
莫風馬上返回班房,將門鎖住:「我哋只要捱到犬學派嘅人嚟到就得......」他開始將課室的桌椅推到門邊,擋住一會兒的來敵。
「窗口點搞?」艾匡都把桌椅推到後門。
「佢哋要喺窗口入會有啲麻煩,因為個窗框都幾窄,佢哋應該唔會咁蠢。」莫風說。
很快地,莫風和艾匡二人經已把班房的前後門給塞住,任對方有三頭六臂也要花點時間推開。從課室的正方小窗戶中,可以看到走廊現已火光紅紅,手握住火把前來的土匪,經已將這一層包圍。
「阿福,佢哋將前後都擋住咗......」
「試下一齊推開!!」提議的土匪一馬當先,用全身力氣推著前門。
由於前門入口的凹位空間不大,最多只能容納五名土匪合力將門推開,可是任他們再有力氣,因為莫風的獨特擺放方法,都只是移開了一點點,門只露出一條小小的開縫。
一名土匪心急的將手伸進去想要捷足先登,卻給艾匡抓準了機會,用佩劍往他的手掌猛砍!
「嗚啊!啊啊呀呀!!!啊啊啊──」伸手入來的土匪,手掌被砍得皮破肉裂才成功把手收回。
「做得好。」莫風讚賞艾匡時,留意到有人意圖爬入小窗框。
可是窗框太窄,對方上半身爬入到一半就卡住了:「呃......你......莫......莫風......唔好啊!」莫風毫不猶豫就舉起了弓,向他上半身發箭猛射。
不出十秒,對方上身便像隻箭豬一樣,從大聲求饒,去到一動不動。莫風走近他的身體,打算將插在他身上的木箭拔出循環再用,沒想到拔到第三枝時,那個被射得箭豬的傢伙被拔箭之痛重新激活,用雙臂將莫風緊緊捉住。
「呀啊啊啊!!!你個叛徒......」他一手捉頭、一手捉膊,模樣猙獰得誓要將莫風咬死般。
艾匡叫莫風遇險,馬上舉起佩劍斬落那人的頭顱。
「哧」可能艾匡力勁不足,這記只砍入到敵人後頸的一半。
「嗚......」對方再次受到痛楚的洗禮。
「俾佢一個爽快!」莫風不忍看到他受苦。
於是艾匡又接連砍下兩劍,最終「哧──」的一聲才身首分離,屍體卡住在窗框之間不上不下。
「開門呀!我要女人啊!!」外面的土匪們極度暴躁,就像見到眼前有塊吃不到的豬肉。
「我有方法!」一名土匪提出。
沒多久,他們果然開始改變策略,把裝有土酒的瓶子擲入課室內。一時間,入面發出頻頻的玻璃碎裂聲,渾厚的酒液濁香很快佔滿整間課室,土匪再將火把掉入到室內。
「蓬」有酒精作助燃,火焰開始順著酒液流動的方向瀰漫著。
「佢想用火迫我哋出去。」意會到的莫風,迅速過去想用腳踏熄火焰。但這火開始越生越旺,到後來形成一股小火,地板都燒得焦黑。
「唔出嚟就喺裡面慢慢燒死或者焗死,嘻嘿嘿。」外面的土匪們,一下子轉為被動。
「點算......」艾匡用手掩住口鼻。
「無方法......遠離個火點,等援兵嚟。」莫風凝視住那不溫不猛的火,雙腳退到牆壁的角落。
艾匡學他的,退到另一邊的牆壁角落:「真係希望我嘅英雄會出現......」說罷,艾匡抬頭望向窗外那淒清的月光。
「咳......咳......」艾匡逐漸感到悶熱。
「艾匡公主,做咩咁調皮跑咗出嚟。」莫風見大家都沒什麼可以做,便主動跟艾匡聊起。
「我係俾皇室追殺......」
「即係......你啱啱喺台上,對雷耶斯講嘅嘢係真話?」
「嗯。」艾匡抱住膝,點一點頭。
「我以為你只係臨時作出嚟。」
「如果真係咁......」艾匡聲線真摰的,提出了一個疑問:「咁身為皇室忠誠僕人「犬學派」嘅你,仲會唔會保護我?」
怔然的莫風想了想,及後向她微笑:「會。」
「真係......?」艾匡再三地問:「但咁樣係背叛皇室命令......」
「雖然我脫離咗艾寶琳一段時間,唔知依家入面皇政府局勢點樣,但係我嘅直覺相信,艾匡公主你係一個好人,如果係女皇嘅話,更加係個體恤民眾嘅好女皇。」
「你咁肯定?」
「見你有挑戰雷耶斯嘅勇氣,就知你氣勢唔同。」莫風望那熊熊的火光,又望向那白裡透紅的艾匡:「換轉係普通女仔,可能一早就委屈求全。」
「哈。」艾匡笑一笑。
「但你有一點要改善!」莫風指一指她,說:「以後唔好相信貓,特別係養貓嘅男仔,佢哋就好似貓咁,可能喺你摸緊隻貓時,對你別有用意。」
「你鐘意狗嫁?」艾匡反問。
「你又知?」
「見你加入「犬學派」就知,邊有人鐘意俾人話係皇室嘅走狗。」
莫風苦笑,說出一些曾經的回憶:「我原本初初出嚟想混入依到嗰陣,係帶住隻狼狗,但係呢班雷耶斯有日太餓......就將佢食咗。」
「......」
「嗰陣我為咗大局,為咗起清成個土匪集團嘅底,繼續啞忍,扮到咩事都無發生咁。」莫風眼神放空,繼續徑自地說:「所以,今日見到你喺台上一刀插死佢嗰陣,其實我內心有啲激動......係開心嘅激動。」
「真係?我無令你計劃要告終?」
「你好坦然咁,做咗我一直唔敢輕易做嘅事。」莫風說著說著,低了頭望地下:「或者計劃告終係件好事,我終於可以返去艾寶琳,返去自己屋企。」
艾匡聽完他的訴苦後,彷彿以女皇的名義跟他說了句:
「辛苦你,莫風。」
「有你依一句就得。」莫風輕笑。
「嗷嗚──!」
突然,景嶺書院外傳來像狼的聲音。
「犬學派!佢哋趕到過嚟。」莫風馬上站起。
六樓走廊外,聽到這一聲嚎叫的土匪都紛紛將目光放到大閘那邊,只見數十隻狼犬走了進來,牠們品種不同,但眼神一樣兇悍。