03
在犬學派成員離開後,M才有空一看艾匡旁邊那具漸漸冰冷的屍體:
「我遲咗。」
眼珠滾滾的艾匡,終於不爭氣地流出淚水。
「鳥嘴先生......」
「對唔住,又要你經歷依種事。」M回想起多年前,白魂在自己面前死去那一幕。
「明明佢哋要殺嘅係我......」艾匡不憤又不甘。
「呢個世界,有時就係咁複雜。」
艾匡雙手掩臉,用力的捏著:「都係因為我走出咗大本營......」
見到艾匡痛恨地自責,指甲的力大得都快要深陷臉皮的肉裹,讓M無意回憶起六年前,自己將老賢推落到大樓下的畫面,感覺就像背負住整個世界的罪惡。
要不是腦內存有「守護大本營」的堅定信念,他早就撐不過去。
於是,M向她提出一個問題:「艾匡,你心中有冇一個堅定不移嘅信念?」
艾匡力度慢慢減輕,於指隙間瞧向M。
「有......」
「嗯?講嚟聽聽。」
「我想要......」艾匡無力地垂下了手,目光放空:「好似白魂大叔咁,可以喺外面自由闖蕩,唔需要再顧其他人,唔需要再以公主嘅身份生活。」
「......」
「但將軍澳區......每個倖存區、每個人,都認識我,都知道我係嚟自艾寶琳皇室。」艾匡似笑非笑,似哭非哭:「鳥嘴先生,只要我一日仲喺世上,就一日都擺脫唔到「公主」呢個身份帶嚟嘅任何事情同麻煩?」
「我好想、好想......」艾匡抬頭,直視住他:「真真正正咁,自由咁生活一次。」
一陣冷風拂過,更顯艾匡的單薄。
「我明白。」M回答。
M將莫風的屍體抱起:「就先好好安葬你朋友。」
艾匡用手抹去淚水,行到景嶺書院的小花園上,用佩劍掘走泥土開個洞,再由M將他放到泥洞中埋葬。
「識咗幾耐?」
「半日。」
「依個動盪年代,可以識到一個朋友半日,已經等於識咗一年。」M安慰。
「莫風......」艾匡蹲下,把手放到凸出的泥土上:「我會幫你報仇。」
M留意到,艾匡眼中的決心。
「你依家報仇就太快。」M將艾匡強行抱到背肩上,說:「報仇,係需要忍耐、係需要隱藏、係需要實力、係需要同伴,你話你想要撇低公主呢個身份?我可以幫你。」
「鳥嘴先生......帶我返艾寶琳,直接降落喺皇室區,我要殺死艾康。」艾匡一個恨字,寫滿在臉上。
「以你依家嘅情況,莫講話艾康,就連佢身邊數量龐大嘅士兵都搞唔掂。」M的說話,如雷貫耳:「復仇都要睇情況。」
「......」
「如果你可以喺嗰到生存到兩年,咁就有資格報仇。」