［26］考緊26？你問我答！

小妹上兩個月考到牌
元駕考第三次終於pass
衰過落腳、跌車、太接近物體同判斷力弱
深明人矮同輕磅喺26上係蝕左啲
但只要練熟基本功，26都可以好輕鬆
首先講講考試常肥嘅原因同解決辦法啦！
利申：只係想做意見交流，並唔係教學，而且每人用車嘅習慣都好個人，邊種方法啱你都要試過先知！

1.黃金右腳
會落腳嘅原因可能係停得太急或者尾制唔夠，渣26一定要善用尾制，可以幫助穩定架車，自然停嘅時間會挨左。建議停車前預早收油門，由架車溜前，再落腳制減速，拉頭brake，拉極力子，伸出左腳，架車呢個時候差唔多完全停哂架喇，輕輕推一推軑向左，架車自然向左傾

2.判斷力不足
判斷力可以由好多野睇到，有人衝出黎，選邊條行車線，出路口等等，考官一日考咁多人，佢地會鍾意考生爽快啲（唔係渣快啲），爽快意思係唔好比佢見到你猶豫不決。我試過出讓路口明明冇車都慢溜出去，呀sir話明知路口前望到你係許可出嘅，你就比油出，一係就停，一係就車，既然出得點解要慢出？

另外考生都好驚考試途中有行人喺路邊行/踩單車，或者打橫喺你面前過馬路，呢啲情況可以點做呢？如果佢喺你行車線上行緊（唔係行人路），你就要做足望鏡擰頭當過死車咁，我行工業村果日唔知邊條友咁好掉左條車軩喺正中間，咁要做嘅都係打燈望鏡擰頭過左佢。過完之後都要打燈望鏡擰頭行返行車線嘅中間。

咁你渣到安全島位有人衝出黎呢？呢啲時候其實你早就要望到安全島有冇人，情況係可以自己避免嘅。

首先佢唔係斑馬線，道路優先權其實係你到，道理上你唔應該停車。下，唔停車咪肥緊？所以你一早就要望定有冇人，如果有人行緊出黎，你就提早減速溜過去（～20-30km)，溜到過去時個人應該差唔多過完馬路，你可以比返油去。咁果個係呀婆行得好慢呢？佢仲喺路中間喎，呢個時候先至停車，咁個官就預早見到你對成件事嘅判斷力。避免左去到先知有人。
如果係佢突然衝出黎呢，基本上你渣到去路口佢仲要衝出黎都冇辦法架喇，停都停唔切，所以就係最好預早望有冇人要過馬路，自己收一收避左啲情況。

3.過死車
元朗好多時兩邊都會有好多大貨櫃死車，考過46嘅朋友就知道，兩邊有車，中間位置只夠一部車騎線行，或者啲職業van司機會好慢咁兩架平排過。咁學神嘅我地又可以點做？咁所以喺我地做過死車動作（望鏡擰頭）前，要望通左對面有冇騎線黎緊嘅車，切記唔好盲中中跟住前面啲職業司機入去呢個死亡地帶，因為當左右兩邊死車，迎面又黎緊車，你又跟住架van，好容易就衰判斷力不足同太接近物體。我地只需要望到迎面果車黎，就定油30-40左右盡快過哂啲死車，越快過哂，危機越少。

過死車途中需要望下鏡同死車，確保佢地冇打燈要開出。
如果你望通左又入左呢個死車地帶，迎面先有車出現呢？就盡可能睇下自己果邊有冇位可以攝返入去（打燈望鏡擰頭入）然後停車，佢過完就做返開車動作同打燈騎線出返黎。冇位你攝呢就要睇有冇一米安全距離喇，有就可以繼續過，呢個距離大約係一個車門左右啦，你要諗如果佢開車門會唔會撞到你，你亦唔好因為驚佢而縮向自己隔離部死車，都要預一米距離架。真係咁唔好彩呢，佢同你近到冇安全距離，咁你就需要停車，當停左車就唔洗理一米架喇，由佢自己繼續過。
都係果句，盡早望遠啲，多望鏡，要自己掌握前後左右嘅路面資訊。

打住咁多先，歡迎各位學神問下問題，大家交流合格心得，以上嘅野除左係我自己試出黎，亦係每次渣完對於自己有疑問嘅地方返去學院問呀sir，問哂自己驚嘅可能性，呀sir都一定好樂意解答你，我當時係畫埋圖問呀sir啲情況要點處理架。

最後提提大家，唔好跟車咁貼，前面有學神行車就預多兩三個車位距離都唔怕，跟學神起步就自己動作都慢啲，爭取同佢嘅行車距離，祝大家都可以順利pass,安全出車！

你問我啦，我唔hea你，盡力為大家帶來合格資訊，我都爬過好多文，但呢啲都係好百貨應百客，未必每篇都啱自己用，希望呢到可以幫到大家啦！

我都準備係元朗考26
考試多數係考邊條路試？
同埋有冇咩號碼既學車係精神既？

路試既時候係咪，聽完個考試阿sir 講完之後，會係邊個位置開始考，開車前洗唔洗扮野較塊鏡個啲？

之後考8字，再出試場，返到駕院，係咪停返一開車個位置就完？ 之後就返入去坐等消息？

我都想問係咪九成工業邨，同埋想問應該收左腳架先上車定上左車先收腳架
黎緊考第二次

上咗先收腳架

我記得，好似係

幾個月前考衰左衰過死車 過死車打燈擰頭呢啲我都好清楚 我應該係衰打燈擰頭之前冇留意對面線有車嚟緊 照出左 如果下次再係咁 係咪應該選擇停車 比對面過左先 我再打燈擰頭抽出？

多數九成都係考工業村，基本上考試用嘅車都係19x，新車黎，啲油門同尾制會應好多，考前會有十分鐘試車，試車時踩多啲尾制感受下。
另外較鏡果啲你要試車時做好哂，開始考就盡量唔好郁塊鏡（考官唔鍾意等），考試開始嘅位置會係報到室出面，正式開始前考官都會同你講一次，你可以試車時問下幫你果個呀sir（有個電單車部嘅呀sir會教你）

最後考完就車頭駛返入去你開始果個位。咁26嘅呀sir都會叫你除反光衣入返去等消息。

不如問踩單車撞到人會有咩法律後果？

屋企幾大？

係九成工業村，上車習慣呢個冇所謂，我就興上左車先收腳架，因為人細粒，收左腳架先上驚扶車唔夠力會跌，咁反正都係撻左車先右腳唔比落地，所以撻車前點上車係冇所謂嘅

我就報左先同屋企人講嘅
學車就冇咩意外嘅，係周身骨痛姐，
但點都要同屋企人講，佢地擔心係正常嘅
做個對屋企負責任嘅26人！

係呀，迎面有車黎，你要喺死車前停車，唔好騎線，就算後車有車爬你頭出都唔好理佢地，照讓照等，因為迎面有車你駛入去都九成衰判斷力不足同太接近物體，我第一次緊張就係衰自己前後左右都有車，架大貨櫃夾敢駛入黎，我仲要自己驚，開始繼續開車唔敢停，所以就衰左。

我屋企唔係試場

https://youtu.be/Vx2L2R7vVXU
https://youtu.be/EY4h6DvtLDU

8字來講呢我就會覺得用以上呢兩條片去睇呢係最清楚嘅，打八字嘅方法有好多，如果你打得叻嘅合埋眼打到個官都會俾你pass。總之當中你冇落腳冇撞駁，打完三個圈都基本上可以出街㗎啦。

咁我就唔prefer淨係用油門控制嘅，因為如果唔熟油門淨係用油門呢就會好錯嘅，所以呢我係油門同尾制都用嘅。

成個動作會係咁：打右燈望鏡擰頭-放極力子到磨擦點-右手比油去到3-4000轉左右-放腳制-定油-望向要轉嘅地方-落斜踩腳制（有需要就收少少油）-落到底望住要轉嘅地方-灣心放腳制-比少少油扭上斜-如此類推再定油做下一個圈

其實打八字最緊要嘅真係視線運用，因為你望去邊對手自然帶住部車去邊，記住眼尾都唔好望下個駁，擰頭望到去pat pat到，克服心理關口呢就一定轉到圈㗎啦。

我臨考第二次之前，落斜收得多左油，架車喺斜路死咗火，跌完車之後我唔敢再打8字，用咗好耐時間先至夠膽再打，其實最主要都係話俾自己知：人人都打得到個八字，自己一定要操控到部車，其實擰個頭夠勁，基本係絕對夠位打，用3/4都夠打。

所以希望幫到大家克服到，8字輕鬆pass啦。

我諗你搵呀sir教完再出車會安全過我教

轉左九龍考啦,個C父 問極唔嬲 幾好


之前選元朗係貪佢就腳,但路線同九龍比 長好多

元朗唔易考架，人多車多，大貨櫃多
不過我都係貪就腳，同埋九龍怕唔認得路

第一次考天光道嗰時，未出試場就落咗右腳，唯一大TICK

好有心覆 Thank you so much 考到會返嚟多謝你 9月尾考

加油！多啲人對26有知識就人人都可以安全出車！