不過行返啲平啲嘅路已經好好，一開始都仲有少少雪。不過比起頭先要上山已經好好多
每行一陣我都會望返轉頭，睇下見唔見到兩個姨姨，但都見唔到，我問咗幾次阿sam要唔要等埋兩個姨姨，佢話顧唔到咁多，等唔到，因為佢地真係行好慢，但我地又要趕住天黑前一定要行完，所以佢話等唔到，要繼續行。
又有牛喇，唉 我都想俾錢坐牛，唔想行呀
然後就係一路都係行咁樣嘅路，真係好似入咗西遊記咁，啲景好唔真實，但又無咩心情影相，行咗一個鐘左右又見到另一個補給站，我都唔明點解我行咗成朝一個都無，但20k係有好幾個補給站！
而呢啲補給站大部分都有床可以俾啲人留宿，不過果環境都係一樣好惡劣，基本上係呢度就只係滿足人嘅基本生存要求。
好記得轉山前一晚係住宿老闆娘同我地講轉完一圈就會明白，我地人本身就係咩都無，所以你去轉山唔洗帶太多野，帶一啲必須品就可以，對住嘅要求唔好抱太大期望、係天寒地凍嘅時候有得訓有瓦遮頭就已經好好至於野食方面都無得講究，食飽填飽個肚就夠，對我黎講其實好大感受。
呢段路大大話話都行咗最少3-4個鐘，然後我又一路叫話要抖，行到已經係唔想望前面，係望地下行，我覺得自己行到有啲靈魂出竅，完全唔想同人講野，路途中已經唔係好見到有藏人，但都見到有幾批外國人
係休息緊嘅時候我再打多次俾兩個姨姨，終於佢地聽咗我電話果陣5點幾喇已經，佢地原來係頭先我地係落第一個補給站果個沙石懸崖落黎嘅時候其中一個姨姨扭親腳，依家岩岩落咗去果個補給站先收到電話，頭先佢地係山到又打唔到俾救援，只好搵啲藏人一齊慢慢扶姨姨落黎，唉好擔心佢地，所以叫佢地快啲打俾救援隊，叫佢地接佢地落山，但其實都幾麻煩，果個位車又入唔到。希望佢地平安返到住宿啦
至少知道佢地係平安，都安心啲然後又黎到一個補級站，我同sam本身諗緊要唔要入去抖下，然後我地都話算啦，要趁天黑前走到，唔抖喇，所以繼續行，點知過咗無耐，車京哥問我地去到邊，佢話係果個補給站等我地，原來我地已經過咗，因為本來佢係行得快過我地。佢真係有強大嘅後勁！
然後我地繼續行行行，黎到祖楚寺，終於見到似有人住嘅地方，終於見到有車路。以後好快就到，望一望都仲有10k
都係要繼續行，6點幾嘅時候收到浪子嘅信息問我地去到邊，佢話佢岩岩到咗住宿，不過佢係臨最尾4k一個叫宗堆嘅地方叫左車車佢返去，所以佢係無行哂全程。佢都有叫我地問下師傅出唔出黎接我地，不過師傅話車入唔到果個位，我地兩個都打消呢個念頭，我地都覺得既然黎得就要轉哂一整個圈，咁樣中途放棄唔係咁好
所以都係靠自己行
又係懸崖隔離行
行到呢個位以為就到，因為見到個景好似一開始行果個景咁，好似係非洲睇緊動物大遷徙
點解我地會行到咁痴線，你有無一刻想放棄？
有呀，我都好攰，其實你一路話唔想行我都覺得好攰，但係如果兩個都一齊話好攰唔行，就一定會放棄、所以我唯有做話一齊行哂佢，堅持落去果個。
明嘅, 我去西班牙徒步, 都好想遇到香港人, 可惜只係聽到有其他人幾日前遇過. 
我有同佢地講 如果太攰就搵師傅睇有咩方法返去
，吾好死頂。
希望d info真係幫得到你地
