西藏後藏阿里轉山 -「 轉山轉水轉佛塔只為看那些最接近天堂的風景」

我地下一高就係近距離睇卡若拉冰川，卡若拉冰川係西藏三大大陸型冰川之一，而都係唯一一個可以近距離觀賞嘅冰川，觀賞處海拔有5400米，但我覺得唔算係話好凍，可能因為有太陽曬住。
呢個入場費都要$50

據說呢度曾經拍咗一套叫《紅河谷》嘅電影，果陣為咗要拍到有雪崩嘅感覺，劇組係冰川放炸藥，diu真係好仆街

呢個時候南京哥好似俾風吹到頭痛，佢就即刻上返車喇，真係好危險。
影咗陣相我地繼續出發。到咗斯米拉山口，就有好多經幡




呢個小女孩係咁叫我地買佢地嘅經幡，話幫我地祈福，我覺得佢好慘，呢個年紀應該係讀書嫁，係言語間聽得出佢無返學，希望你一日唔洗係度再賣經幡，可以好好學習


記得搭咗好耐嘅車，終於去到日喀則市嘅江孜縣。 我地會去白居寺，係呀，西藏真係好多寺。

呢度要高空影落黎先睇到全貌，所以上網搵俾你地睇啦


居寺係西藏獨一無二的寺廟，亦都係藏傳佛教大融合嘅成果。如果想瞭解藏傳佛教，白居寺非去不可。 白居寺原來屬於薩迦教派，後來噶當派同格魯派的勢力相繼進入，各派一度互相排斥，分庭抗禮。最後都係互諒互讓。於是，白居寺便相容薩迦、噶當、格魯3個教派，因而寺內供奉及建築風格亦兼收並蓄、博採眾長。

睇完就返去日喀則去我地今晚住嘅地方喇，日喀則俾我嘅感覺係極度詭異
因為係街到你唔會點見到人 有種感覺覺得自己去咗北韓

呢間就係今晚我同sam住嘅地方，因為呢香港人去西藏都好多限制，類如你一定要住啲三星以上嘅酒店，其他地方見你係香港人係唔俾你入住，所以佢地四個連埋兩個司機就住我地隔離果間客棧。

呢間酒店係更詭異，果門口完全係黑，入面都唔係好開燈，得啲自然光，入到房成間房都係酸醙味，係一打開門啲尾就湧出黎，點知對面房條友都係咁樣打開門等啲味散，我諗係因為太耐無人住。但間房都算乾淨企理同埋都繼大，相對之後已經好好。

安置好啲野我地就一團人去食晚飯喇，繼續都係食川菜，許姐同南京哥佢地成日都食煙，佢地，chur就幾次，真係好擔心佢地會缺氧，我成日叫佢地唔好食咁多啦，會缺氧，佢地都笑我 我係認真。

我都係行兩日，我好似唔止兩個鐘，我完全龜速

可能我果個係廢嘅面包車

係呀，總知聽果女仔講就樣樣都斤斤計較，我果團都無咩野 因為大家都共識咗，同埋我覺得出得黎玩，筆錢都預咗要俾

多謝你嘅支持

係度

LM

Day 11

係酒店食咗個好頹嘅早餐自助餐就出發又去第二個寺喇就係扎什倫布寺，本身同Sam琴日講好咗唔再入啲寺，今日又俾啲兩個姨姨說服咗入去，今次我地六個人報咗個導遊帶我地入影同我地介紹。



西藏啲寺真係好多貓貓

扎什倫布寺係西藏著名嘅四大寺院之一，佢係格鲁派，呢度仲係國家5A級旅遊景區。

會係入殿之前會見琴有寶石嵌咗係地下，呢個好似係比啲藏人跪拜嘅嘅位置。


看完一圈大概就一個鐘左右，之後我地就等上車喇，然後我就同新疆男（我叫佢做浪子，因為佢真係好浪子，好似與世無爭咁）傾下計，佢係漢人黎，不過去咗澳洲讀書，今年係西藏玩完之後就係新疆留一年，之後再返澳洲，佢成日叫我同sam今年之內可以去新疆搵佢玩，我依家諗起佢呢番說話，我諗無咩機會嫁喇，都唔諗住再去大陸，中共真係辜負咗中國好多靚景。

我：
浪子：
（當然係用普通話)

：新疆係味真係有好多教育營？
：係呀，好多人俾佢地帶咗入去，不過係佢話佢有朋友試過翻牆試youtube 俾人cut咗個網絡。
： 我都驚香港遲早會好似新疆咁
：所以你地一定要爭取到，如果唔係真係會變成新疆咁。我係澳洲都有留意香港嘅事。

依家呢返去我地嘅對話都好大感受，我都希望我地可以爭取到，今日新疆明日香港係真，呢個仗只可以成功，香港人加油！！！

之後我地沿住呢個318國道，去到呢個打卡點，呢個打卡點有啲俾你買啲小飾物嘅鋪頭，好後悔咩都無買到


呢條318國道係由上海人民廣場，經南京、武漢、重慶、成都、拉薩，終點為西藏聶拉木縣樟木鎮友誼橋（尼泊爾）
大陸有套戲叫《318號公路》，係講一個女仔揸電單車由上海去西藏嘅一套自我救贖嘅電影，好值得睇。


之後我地又去咗一個小鎮嘅開飯，記得有兩圍枱係啲外國人，佢地去西藏就更加麻煩，要有入藏紙，同埋一定要跟有導遊。另外西藏係每去一個新嘅市或者鎮都要落車過關比佢睇你嘅回鄉證同埋邊防證。我地係呢幾日落過無所次車。

搭咗唔知幾耐嘅車，終於要入珠穆朗瑪峰嘅自然保護區，好開心，我係咁問個車機係咪今晚睇到星喇，佢話應該睇到，呢幾日都好好天，我真係勁興奮！

我已經做咗許姐嘅攝影師


九曲十三彎，坐到頭都暈

轉咗幾廿個彎，撞黎撞去終去撞到去呢個珠峰石，影返張大合照先


本身車機話我地今晚係珠峰大本營到打邊爐，但係呢許姐就話想露一手煮餐飯俾我地食佢好好知我唔食辣，所以係咁話要煮啲唔辣嘅俾我食。車機帶咗我地去一間士多到買餸，你無睇錯，真係一間士多



以為好快到，點知係仲有好長一段路。唔知搭咗幾耐先真係到到咗另一個門口。

呢個位，就要買門票同埋坐環保車嘅錢喇，以往呢去珠峰大本營係淨係買門票就可以，但依家係逼你坐佢啲環保車。
淡季90元旺季180元（5-10月為旺季）
車輛環保費:一架車400元（司機不收門票費）
其實真係好貴

司機係咁話叫我地快啲快啲，想我地趕到天黑前入到去睇珠峰日落
所以每次去到啲影相位，就見我地快啲快啲，唔好係度留太耐, 呢個位一落車係勁風，好似10號風球咁，吹到頭都亂。

呢個係可以見到喜馬拉雅山脈嘅五大高峰，包括咗珠穆朗瑪峰(8844.43M),洛子峰(8516M),馬卡魯峰(8463M),卓奧友峰(8201M)同埋希夏幫瑪峰 (8012M)，我勁後悔淨係帶咗枝28mm，好似點影都影唔到佢嘅震憾咁






之後去到我地上環保車嘅地方喇，我地只係拎一啲必需品上大本營，其他野放我地架車到，然後架車就會泊係呢度。坐呢啲環保車大約 20分鐘左右就會到。

終於到咗，點知睇唔到珠峰全貌，有啲失落，但司傅同我地講晏啲雲會散嫁喇，然後放低啲人係帳篷到，我地7個人右兩個司機師傅就住係同一個帳篷，唔知大家記唔記得，我去納木措住嘅帳篷係一人一床，但今次呢度好似打地鋪咁，一堆人一齊訓，只不過唔係訓地下，不過呢知帳篷俾我想像中好，可能因為係旅行社同呢知帳篷嘅西藏合作開，比較企理乾淨。

放低啲野就自由時間喇，因為南京哥上到黎又有啲高反，所以佢就留係帳篷到休息，然兩個姨姨就準備寫飯俾我地食，我新疆浪子行行下又唔見咗人，所以就得我同阿sam出左去影相，每次我話要出邊度影要行去邊度佢都肯陪我去。


呢個就係傳說中嘅全世界最高嘅郵政局，係度買左一疊postcard，我想講係勁舊嘅相，不過有意義啲嘛


買完postcard同郵票我地就行去睇珠峰啦，今年去嘅時候，大本營因為太多人去，太多垃圾污染。導致大本營下移到絨布寺嘅位置，將原本嘅觀賞點保護，以恢復生態，珠穆朗瑪峰核心保護區海拔超過5000米，生態環境脆弱，人類旅遊活動係度留低咗大量嘅永久生活垃圾，無法被環境自然分解消化，導致珠峰大本營核心區環境越黎越差。所以好多人以為依家大本營唔入得，其實佢只係下移咗落低嘅位置，不過依然希望，大家去到要保護佢，好好愛護呢個咁神性嘅地方 ！


雖然好大風，但真係好感覺，其實5年前我就一直好想去西藏好想去呢度，果陣同一個好重要嘅人講好過要一齊黎，結果呢個約定無疾而終，唔知你仲記唔記得。2019年嘅5月我一個人踏上咗呢個旅程，完成左我地嘅約定，只不過係我自己去完成。

行咗都好一段時間先行到去本來大本營嘅位置，眼睇以為好近，點知都唔係講笑，都真係有啲距離，特別係咁高拔嘅地方，真係好攰，又凍。




本身想等到日落睇日照金山，不過金山無出黎比啲雲遮哂，但有勁多人一早擺哂腳架，右手邊果堆


然後等到咁上下我地就行返去帳篷，許姐煮緊飯俾我地食呀，坐咗一陣終於有屋企飯食勁開心 仲要五餸一湯。真係好好味，不愧係廚師



食完飯其實都9點幾，我地去個廁所，涮個牙洗個面就準備訓喇，因為我太驚去廁所，我仲未接受到啲勁污糟嘅廁所，所以兩個姨姨話去，我又跟住作地，不過公廁無燈，唯有我地一個一個輪流幫大家係門外啲罅都照少少光入去，一入到去已經俾想像中乾淨，起碼叫有得沖廁，去完廁所我一投頭望上天，見到有星星喇，雖然未係好多。

返到入帳篷，我地就準備訓覺喇，我同sam約定左今晚凌晨要走出去睇星，我叫佢一定一定要叫醒我，結果2：00幾左右我地真係去咗出去，其實要起身走出去真係要好大嘅勇氣，加上又凍，我帶哂啲頸巾，著哂衫出去，一抬頭，真係成個天空都係星 好感動，仲見到好大條銀河，真係肉眼就睇到 多謝上天總係會幫我實現所有嘅願望，每次去邊度都睇到想睇嘅野。冰島極光又係，今次又係 好記得係台灣合歡山睇到一次，但果陣係係好急，淨係睇到好大粒好多，記憶好模糊。
另一次係西貢，果陣都係好多，不過一定無係珠峰睇咁震憾，因為係大本營呢度睇，你會覺得伸手就可以摸得到，真係好近好似發緊夢



記得呢一晚仲有一對情侶好似我地咁癲走咗出黎睇星 ，同埋一個叔叔自己走出黎睇，呢一晚就得我地五個痴線佬，無其他人喇，我地一齊訓咗係路中心睇咗好耐嘅星空，係真正嘅星空，然後我地決定行去頭先去影珠峰石碑果個位到睇，果個叔叔行得勁快，轉個頭唔見咗人，我地仲係咗大叫叔叔，叔叔，但無人應我地，成件事好詭異，當下我真心有啲驚。後尾行到好前先見返果叔叔，好彩咋

呢個位影到好似係外太空係火星咁


睇到到連月亮都出黎，好似照亮咗極個珠峰咁，果陣已經5點幾，因為月亮太光令到啲星都變暗了，雖然好凍好凍但好值得！ 我地其實完全黑到連果三個人嘅樣都睇唔到，直到月亮出咗黎因為光咗，果對情侶先話原來今朝係買門票見過我。真係好有緣，後尾想交換聯絡方法，但因為一直都收唔到信號嘅原故所以加唔到佢地，亦都send唔返啲相俾佢地。我地後尾決定返去，打算話一陣約埋一齊出黎睇日出，傾好咗我地就一齊行返去各自嘅帳篷。
返到帳篷，我仲係覺得好凍，完全訓唔到凍到震哂，後來我都唔記得自己隔咗幾耐先訓得著喇 淨係記得好凍，我真係好怕凍

唉我當年唔識影星，out 哂focus 哂左個肉眼睇到既銀河

lm

我諗住隔一排再黎一次過睇哂篇post, 估唔到仲未寫完

Day 12
完全係昏睡咗，無起身睇日出，唔知果對情侶同埋個叔叔有無起身呢？
係果帳篷食咗早餐又要起行喇，所謂早餐就只係一侵雞蛋同粥，臨去前要找數俾個帳篷負責人，佢地真係咩都收錢，啲米又要收錢，果兩個姨姨就好唔鋸，佢地就覺得飯又煮埋俾你食，你都仲收我地米錢，同佢有少少爭嗌，不過都係俾咗，雖然唔係多。
又見到珠峰喇 真係好療癒，終於睇到星空又睇到全貌。



一路想周圍望想搵返果三個人，但我其實都唔係好睇到佢地咩樣最後都係見唔到，搭完環保車之黎，終於換返我地架車喇。今日正式往阿里方向出發！

如果我無記錯，呢條就係雅魯藏布江，係全中國第五長，被藏族視為「搖籃」和「母親河」。


真係去到邊都見到雪山





已經有種落車落到唔想落，不過師傅係叫我地落車影個公路，咁就影下喇，其實未黎之前已經幻想要影一張公路相，但係俾人影啲果啲都無一張係靚嘅 突然好想唱返句，「踏上這無盡旅途 ⋯⋯」


呢度就係叫佩枯措，師傅一直話佩枯措佩枯措，但用普通話就變咗屁股措，我一聽就笑咗好耐，師傅糾正我。 首先我地落咗去近距離接觸呢個「屁股措」，呢個措真係好平靜，我覺得我可以坐係度成日。




之後就高距離觀望，真心相機真係影唔哂，要親眼去睇


之後去咗某一個地方食飯喇，好覺得去呢個廁所係露天，只係有啲牆分左兩格，姐係話，只要裡面果格個人一出黎，經過你個格你就比人一覽無遺，所以我又拉咗個姨姨同我一齊去，佢幫我睇水，嘩，屌我一入到去勁多烏蠅圍住果個窿，真係想嘔，我仲要唔小心望咗落果深不見底嘅窿，我勁驚啲烏蠅要咬我個屁股，真係拿拿聲去完就走番出黎。 我覺得我去完好似成就解鎖咁，成功在西藏去了廁所 ？
食完先記得要影下相，唉，又係川菜


呢個係一個好細嘅湖，不過佢係幾乎係我呢個行程，唯一一個睇到天空之景嘅小湖，所以師傅又叫我地落車影。



見到勁多羊，我沖左埋去，但追唔到佢地， 佢地跑好快




今次真係入阿里，「阿里秘景，天上阿里。沒有去過阿里後藏，不能說自己來過西藏」呢句野你係google 打阿里西藏，一定會出現，不過確實我好認同，因為真係差好遠，好似睇到全世界咁。



見到呢個小冰川，我相信佢係最近先慢慢溶到得返少少。


我地架車嘅師傅，行行下遠離路線，行咗啲山路，完全係佢自己開拓出黎，另一架車已經不見蹤影，佢完全係一個freelance車手
我地黎到馬攸木拉山口，5211海拔

又係雪山



又突然整路，架車停咗就見到呢個人野外去廁所，所以要留個紀念

跟住黎到呢個係馬路上有啲藏人係度擺檔，亦都見到有藏人三跪九叩，我相信佢係去岡仁波齊

繼續見到經幡就要影嘅概念


呢個就係拉昂措湖，人稱鬼湖，海拔4574米，同淡水嘅瑪旁雍措聖湖一路相隔，係微鹹水湖，因此呢個湖水人同動物都唔可以飲用，所以有"鬼湖"之稱，同埋佢係好大浪，一陣我地會近距離觀賞


呢個就係神山岡仁波齊喇，聽日我就要圍住你轉一圈喇！有種好神聖嘅感覺，同埋開給有啲啲驚，自己係果度會有意外，驚行唔哂，好似有種要打大佬嘅感覺。但我都希望我可以堅持行完一整程，平平安安返到香港，我都唔敢同屋企人講。勁後悔無打枝zoom鏡


呢個經幡係對住神山，師傅話圍住佢轉一圈會得到保佑，所以又跟住佢行咗一圈


黎到鬼湖喇 ，我已經懶到叫sam幫我影幾張就算相機都唔拎，但我想講佢部華為嘅色真係好假，唔知佢係咪較錯左啲咩，呢張可以見到湖上仲有啲未溶嘅冰




師傅早兩日叫我地要買啲餅乾去餵海鷗，但我地無人買到，但兩個姨姨有餅乾，所以下一站我地就去呢個瑪旁雍措喇。
瑪旁雍措有呢個“世界江河之母”嘅美譽，係唐朝高僧玄奘在《大唐西域記》中稱為“西天瑤池”嘅地方。亦都係是中國目前實測透明度最大的湖

不過未去到瑪旁雍措我地會係山頂落車影一下呢幾個白塔，師傅話呢度係《2012末日預言》係呢度取景。


之後我地坐返車落去餵海鷗喇，嘩真係勁多海鷗！瑪旁雍措同頭先鬼湖真係好大分別，起碼有咁多動物係度，我完全唔敢餵，同埋我好驚佢地咬我個頭


師傅係咁餵，係咁叫我幫佢影相，我覺得佢係好享受黎帶團，因為每次佢都影相影得耐過我地。


去塔欽嘅路途中，南京哥就wechat我，話叫我影下個天，話有七彩雲彩，一開頭我都唔知佢講咩，影完之先。唔知你地睇唔睇得出呢 ？


我地今晚就要係塔欽住一晚，果度個老闆娘就分享轉山嘅故事俾我地聽，佢話自己一日就可以行得哂，有啲人每日都會去行。我同佢講我好驚行唔完，佢話唔驚嘅，慢慢行一定會行得完，佢仲借咗啲行手扙俾我地，好彩有，因為之後嘅路程無嘅話真係行唔到，同埋佢叫我地千祈千祈唔好沖涼今晚，驚我地會有高反，所以有日無得沖涼。唔知係咪因為太緊張，所以我成晚都訓唔到

然後我仲爭扎要唔要帶相機去嘅時候，最後我淨係決定帶gopro同手機影完，淨係帶咗啲必須品，暖水壺、防曬、唇膏、紙巾同埋少量嘅乾糧⋯⋯ 總知有咁少得咁少

呢排返工好攰，日日返到屋企唔想郁

唔緊要啦！ 有睇過已經好好彩

成日後悔無帶zoom鏡, 其實你好似連wide鏡都無帶?
同埋sam都幾好咁, 你睇唔睇啱人啫
華為模仿leica味, tune到d色好古怪

唉 原本我係覺得佢幾好，後尾返到香港覺得政見唔同好難溝通，講到好燥。
淨係帶左枝28mm走天涯，去到先好想有枝zoom鏡可以近啲影雪山都做唔到。 華為真係好古怪，顏色好假

講起政見唔同,
28~幾多先...28~500就可以走天涯喇

就咁定焦28 ，去歐洲都係呢枝走天涯

定焦28邊夠用, 下次買支18~300嘅專帶去旅行

因為太重喇，我又唔想拎咁多野，下次要諗諗

嫌重就買部DC仔, 依家出咗好多DC仔細細部都可以zoom到好遠, 勁方便

Day 13
朝早6點就要起身，老闆娘煮煲咗啲熱水俾我地整杯面，師傅話叫我地7點前入到去，就唔洗俾買門票，因為啲人無咁早開工。 所以我地食完野，帶齊裝備就一齊出發喇，一行六個就朝住岡仁波齊起行。由住果度行到去買門票果度都要10分鐘。

點知去到買飛果個，點知有人係咁叫我地過去買飛，最後逃票不成功，後面見到另一班人，我地就係咁叫佢行後面走，佢地就咁避開咗啲人，門票係要$150 蚊。

我地就係由塔爾欽出發，順時針行一圈

一出發己經見到有虔誠嘅藏人上緊山，真心真心好配服佢地，有啲仲係婆婆，伯伯。


由天味光行到天光，兩個姨姨都好有勁行得好快，而南京哥就成日都落後，咁我同sam就尾二，而新疆浪子通常都係獨行俠。
我係咁同阿sam講，呢個景好似係非洲睇動物大遷徒咁，好似睇唔到盡頭咁。我覺得自己帶咗冷帽之後好似果啲藍精靈咁


呢個係我地第一個小休站，但其實我地連第一個站都未到，食啲朱古力又繼續行，主要係等埋南京哥。


沿路見到啲好似手臂咁大隻嘅土撥鼠，真係好大隻，好qq，仲要係好多土撥鼠，但佢地跑得勁快，好難先影到佢地


第一站就係經幡廣場，果度有幾個帳篷係可以俾人休息，食下野咁樣，不過呢因為先抖咗無耐，所以我地都唔打算係呢度休息，想係下一個地方休息，但係我真係好後悔當時有咁嘅念頭。可能係因為暫時都覺得唔係太攰，一黎係一開始嘅路段都算係相對比較輕鬆。


兩個姨姨真係行勁快，果然係寶刀未老！我地漸漸分咗4大小隊，因為好多時候真係等唔到大家，我地同兩位姨姨相對比較接近，南京哥繼續包尾，而浪子真係連車尾燈都睇唔到。

不過其實我諗如果唔係我嘅話，sam應該都同新疆人行好快，佢本身都係行開山果啲黎，可能我之前係咁同佢講，我驚行唔完，又驚死係果度，所以佢都跟住我呢個慢慢嘅步伐，內心好想多謝佢，覺得自己一直拖慢佢進度。




途中都會見到一啲印度人係騎馬轉山嘅，聽聞佢地只會轉半程就返去嫁喇

呢個細細粒嘅就係新疆浪人，佢去咗行冰川


開如要行啲係咁輕微上上落落嘅路段，睇好似無咩野，行耐咗都唔係講笑，我琴晚仲要無訓過咁濟，又眼訓又肚餓，係咁要行下坐下，但望到啲風景真係好靚，好一個畫面都好似一幅畫咁，依然係好唔真實。而且因為電話一直都唔係太收到信號，望住呢信大自然，內心係好平靜。係一座座山而前，我就覺得人類真係好渺小



以為6k唔係好遠，一直好想快啲去到第二個補給站，點知行極都未去到，係其中一個位休息嘅時候，我問一個同我地反方向行嘅叔叔，問佢下一個補給站要行幾耐，佢話前面無補給站，聽到我同阿sam都好絕望。之後我就一臉好絕望，果叔叔就送咗一袋包比我地，本來我地係拒絕，叫佢留俾自己，佢話唔洗喇，因為都打算行返轉頭，唔會轉哂。 我地就唯有接受佢嘅好意，多謝完佢之後，我地食咗少少包就繼續行，明明係好肚餓，但又無咩胃口。

我記得當時去到差唔多1點幾先去到，第二個補給站，南京哥係後期追上咗我地，講真佢原來好有後勁。所以佢同浪子一早已經到咗補給站等我地，浪子佢路途上識咗個係止熱寺做野嘅藏人，話可以俾一間房我地今晚過夜，佢話佢行先早啲去睇下咩情況。而我地就諗住等到見到兩個姨姨到咗補給站，我地三個先再出發，咁樣見到對方，起碼安心啲，我就打咗個電話俾佢地，話我地係補給站等佢地。我地各叫咗個湯飯食，果種感覺係純粹只係想要填飽個肚就可以喇，完全係唔講究，我都唔知自己倒咗啲咩落肚。


見到兩個姨姨安全到步後，王姐話好攰呀係，有啲唔想行。我就鼓勵佢，我地要一齊行完，攰就慢慢行，休息下，唔急嘅 ！我地係止熱寺等。 道別之後， 我地三人就再次起動，喇，今次行咗大概兩個鐘左右就到咗止熱寺前嘅橋喇，右手邊係一啲要俾錢嘅住宿黎，而左手邊係止熱寺，當時我地諗住寺止熱寺睇下住唔住到先。

送上Sam嘅背影


結果去到，就見到浪子迎接我地

咁呢其實就係呢寺廟隔離就有啲房俾黎呢度轉山嘅藏人可以係度留宿嘅，係唔洗俾錢嘅，咁浪子佢就叫我入去睇睇先，睇下係味到訓一晚，佢自己就決定咗嘅，因為佢話同果個藏人傾咗話，如果我地6個都住呢度就可以俾一間我地淨係我地六個人一間。咁我就自己入咗去，一入到去有陣好濃烈嘅味，同埋係有啲污糟嘅感覺，有好多藏人係度， 有種唔知咩感覺，不過我都接受到。我就出返去，sam就叫我俾個分，我話4分，之後佢就入咗去，佢一出返黎就話點會有4分咁多，其實我知佢應該係想去對面啲住宿到，因為佢似係有啲潔癖嘅人，但因為其實一來一回，都要好一段時間，所以我都話如果你想過去果邊我同你過去啦，不過最後都係決定跟大隊啦。

不過南京哥就話，覺得住呢度寺廟，係得到佛嘅保佑，所以佢就話既然黎到呢度就住下，都係一晚，我其實就真係無咩所謂嘅，我當時係諗得無咁惡劣。所以後尾決定咗睇兩位姨姨，不過因為佢地黎到都已經係兩個鐘後，所以我地最後都係係呢個寺到留宿。我地去咗參觀呢個寺，呢個寺係一望就望到神山。係勁近距離呢神山，希望你保佑我完成整個轉山之旅



兩個姨姨黎到，睇得出佢地好攰，連野都唔想食，王姐話唔想行，想返落山，話真係好辛苦，因為第二日嘅路程更辛苦，所以我地都話叫佢聯絡個師傅，睇下可以點，不過得到嘅回覆就係要自己係返轉頭，一係就俾錢叫轉山嘅救護隊黎接佢，可能因為太攰嘅關系佢地打算第二日訓醒再決定。不過許姐其實就仲想行，佢偷偷同我講話想同我地一齊行完，我都希望我地六個係可以一齊黎一齊走。

後來我同南京哥同sam就落咗寺下低搵野食，有幾個帳篷，其中一個係有野食，叫咗個面，環境又係惡劣，我覺得自己好似係地下食野咁不過算喇，好嘅一餐，唔好嘅又係一餐， 但呢碗面已經係轉山過程中最好食嘅野


講咗咁耐都未俾大家睇止熱寺訓教果個地方


我聽日再打埋我地係呢度嘅搞笑同可怕經歷