Day 7
琴晚叫咗手舞足蹈嘅姨姨今朝叫醒我,因為佢7點左右就要集合出發去納木措一日遊,因為車程比較耐,所以一日遊係要更早出發,而我去兩日一夜就可以遲一個鐘左右啦。
開始可以訓得好少少,但係都係個人好乾,一早起身執埋啲野同我琴日嘅一日model 告別之後就出發喇,因為聽日我返黎佢就join咗團去珠峰,羊湖果啲,所以我地最後一次見面喇
。大紅就放係hostel ,係hostel 嘅小餐廳食咗個早餐,好似係$10 嘅小自助餐,有啲菜呀、粥、雞蛋之類嘅簡單食物,因為要去到布達拉宮果邊集合,所以都有啲啲趕,我選擇行過去。
其實集合嘅地方就係布達拉宮前嘅白塔果度,大部分嘅團都係果度集合,見到勁多遊客,勁多果啲面包車,我架車終於都黎,係一架好似唔知12人定15人嘅車,我地totel 11個人, 又係有好多廣洲人,有湖南嘅有雲南嘅。 終於有少少要睇景嘅感覺喇 ! 好興奮
不過我想講坐呢架車真係好辛苦,係戥到痴左線,然後唔知係味個司機為左省錢,架車又唔開冷氣,一開窗啲塵又會吹哂入黎,真係兩難。
大量嘅牛,去到邊都係牛
第一站係唐古拉山嘅某一個地方,因為我係影完相上返車先知係邊度,
終於見到好多經幡。 有個男仔帶埋航拍機黎影,佢係成副裝備黎,聽聞佢前兩日想去珠峰影星,因為佢發燒影唔到,所以要再接再黎。
朝早嘅時候都仲係幾好天嫁
呢團似好彩都有三個女仔係自己黎,所以又有人幫我影下相喇
我完程都唔敢飲水,我諗大家都好清楚呢邊嘅廁所係有幾咁惡劣嫁啦,但終於我都係忍唔住想去,於是係下一次再停車果陣諗住去,去到那根拉山口,點知果廁所竟然係無開 !!咁算啦,諗住影下相,大風到嘔,仲飄住微微嘅雪。
大家上網見到西藏嘅女神相係好飄逸好靚,但實際上係咁樣
呢度都有5000幾海拔嫁,呢個牌實在係太多人影,然後趕住上車都影唔到,又要走返上車。
繼續戥到嘔之旅,每次想係果車到影返出去,頂每次都戥到影唔到,起碼手機有幾百張係震到睇唔到影乜嘅相
11點幾左右就到左我地lunch嘅地方喇~
呢個lunch 就係,有幾3-4 種餸任夾任拎嘅,我諗都好食過到日食嘅藏餐
係呢度有胃口有得食野已經好好
話說呢度有個同我一樣年紀嘅女仔,又識講廣東話,所以我地都成日一齊嘅,咁呢我就問佢去唔去廁所,叫佢陪我去,我就話我真係好驚污糟啦,佢就話我地一齊去,然後就閉氣,同埋唔好望落果廁格,即刻除褲就屙落去然後頭也不回走返出去應該ok,佢係咁叫我唔好望唔好望,最後我終於係呢度一嘗呢個西藏嘅廁所,我係呢度個覺得呢個廁所值6分,因為之後我有去過啲更差,所以大家去到呢個食飯嘅地方,記得去!
食完飯就黎到今日行程嘅重點,終於黎到呢個聖象天門喇!
呢個地方車機會俾多啲時間我地影相
納木措係西藏第二大嘅湖泊,亦都係中國三大鹹水湖,我覺得納木措真係好大,大到我覺得佢完全唔似一個湖,成個海咁唔 睇唔到盡頭,同埋唔知點樣先影到佢靚,或者咁講,我呢趟旅程完全覺得好多景都影唔出佢嘅靚,真係要親身去睇先睇到
玩咗一輪之後,我地上返車就開始落雨,落落下好似變左雪咗,然後行咗無耐,佢又叫我地落車,係可以行上山咁嘅地方,但果陣其實見到已經落緊雪,有啲男仔好快咁落左車,我都想落去睇下,然後我又跟住佢地行上去,行到中間,好似經歷咗一場大風雪咁
因為太大雪喇,所以司機就無再帶我地去其他地方,就直接車我地
去咗今晚住嘅地方,去到呢度都係勁凍,我諗我今晚都係同星星無緣,陰天到咁樣。係呀,呢一晚我就係訓呢啲營
然後我地就分咗兩個營,一個男仔營,我地就4個女仔一個營。
啲被係一陣味,好才仲可以接受到,但我想講我之後又訓過啲更加差嘅地方,所以呢個已經算係乾淨喇,但其實都仲係好凍,我仲要揀得慢,得返門口位。 雖然係可以叫人幫你開爐取暖,但係呢係唔可以燒成晚,因為怕會缺氧,所以你要係仲暖嘅時候就訓著,如果唔係真係會好辛苦!
我地四個都係自己一個黎西藏,有兩個係已經有咗小朋友嘅媽咪黎,不過已經離咗婚。聽佢地兩個不斷分享,係咁話依家不知幾好自由自在⋯⋯預期同一個對自己唔好嘅人,倒不如自己一個生活,我贊成嫁!班男仔話今晚要走出黎睇星,我地同佢講,如果有星先走入黎叫醒我地啦,無就唔洗叫啦,因為其實真係好凍,要半夜起身走出個營係需要極大嘅勇氣。
呢個地方有兩個營係俾大家食飯,都係食返啲好似lunch 食果啲野,所以無咩好介紹,黎到呢度唔可以要求啲咩好野食,只為填飽果肚嘅時候,其實咩都要食,因為都無得揀
去到夜晚,呢度會有個類似營火晚會咁,好多藏人會圍住果火堆跳舞,我走咗去望下,因為太凍喇真係,所以我都係敵不過暖暖嘅火爐所以都係走返入營入面。然後就同佢地吹下水,跟住就訓喇。
10點幾就比班男仔叫醒咗話睇星啦睇星啦,頂一出到去睇到3-4 粒,然後就係勁大個月亮,雖然月亮好大好近,同時又好多雲,但我想睇星咋,你地點解都要叫醒我地
然後我就放棄咗喇,佢地好似搞咗一輪都訓返。