最後試左啱啱上面巴打教嘅邊法,將張相調轉Save再調轉返,
依家終於可以Up到打直影嘅相而又唔洗頭已側咁睇
不過要逐張逐張咁整好麻煩
但都係到講聲唔該晒先!!
Day 2 - Part 1:
行程:中島公園銀杏 -> 北海道大學銀杏 -> 內陸機飛函館
呢一日嘅相將會有大量黃黃的圖
去旅行早起身過返工,有啲人會覺得放假唔訓晏啲好攰,
而我自己就覺得去到我想去嘅地方睇到我想睇嘅野係種享受
所以唔會覺得好攰,同埋搭車啲時間可以用黎訓教
不過都視乎去嘅地方,如果係Hea遊/去度假勝地咁訓晏啲都好
呢日6點半就起身,準備出門口要成個幾鐘
執埋行李8點落樓食酒店早餐
話說當初Book呢間酒店其中一個原因係佢拎過Tripadvisor日本全國酒店早餐排名第8
包埋早餐一晚價錢唔貴,仲有得自制海鮮丼
黎北海道一定一定要食海鮮
野食唔錯同埋海鮮都幾新鮮
啲奶好飲就唔洗講啦
食完Check Out將行李放住係酒店先,之後就落去中島公園睇銀杏喇
淨係一入公園嘅呢條路都來回影左好耐
雙眼全程都程現心心狀態
再行入少少開始有啲紅葉望下,不過其實大部份都跌晒落地了
坐左係張櫈到影相,好寧靜好舒服
一路影一路諗如果香港有個咁嘅地方,我會想坐係嗰到Hea一日
但現實係香港嘅人應該同我一樣諗法,所以有咁嘅地方一定會好逼好多人
執左地下啲落葉黎影相,期間俾烏鴉追左幾次
呢個公園啲烏鴉唔知點解特別大隻,黎左咁多次日本都冇見過有咁大隻嘅烏鴉
就咁睇圖唔係好覺,但佢確實比平常見到嘅烏鴉大幾個碼
呢棵銀杏好特別,有成串楓葉圍住棵樹,
遠睇寧寧捨捨見到有啲紅色(上面幅圖都有影到)
下一站北海道大學,咁話說我睇Google Map,
見到中島公園去北海道大學只需9分鐘路程,
其實心入面有懷疑嘅,因為知道中島公園同北海道大學都隔左幾個站
但係最後都選擇跟Google Map行,點個一行行左9個字先到
呢個情況係接住落黎嘅兩日都有發生,
一開始我係覺得個Google Map有問題,我同FD講佢話係我GPS收得唔好
直到出錯好幾次後我先發現原來自己一直睇緊嘅係揸車嘅路線
不過都冇壞嘅,去旅行慢慢行可以睇多啲野
食個雪糕
途經返琴晚見到嘅大通電視塔同埋舊道廳
北海道大學好大,成個花園咁靚
由入大學開始行到去銀杏大道都行左十幾分鐘
但其實如果搭地鐵係北12條落車好快就到
見到呢隊野嗰陣唔知點解莫名地覺得陰森
啱啱認真望張相先發現原來佢地全部都唔識笑
係咪突登搞陰森系?如果係 咁佢地好成功
我最期待嘅銀杏並木
太靚嘅關係,我忍唔住係到自拍左三五七張
不過冇圖
影夠之後就返返酒店拎行李準備我嘅內陸機初體驗喇
Day 2 - Part 1完
冇諗過自己比自己想像中更長氣
打一日都打勁耐,下一篇開始我會盡量簡潔啲