Day 2 - Part 2
上回講到去完北海道大學就返酒店拎行李之後去新千歲機場
雖然我認我崇日,但我真係覺得張機票都靚過人
第一次搭內陸機,一開始以為會好趕所以就係便利店買定Lunch
點知搭國內線由Check In到入閘全個過程好快
所以食完個便利店就用淨低嘅時間黎行國內線啲鋪頭
Btw便利店啲雞胸好好食
同埋近幾次去日本我都會飲野菜汁
除左好飲仲真係好通便
差唔多次次飲完第二日都有得痾
就算係香港有時都會買黎飲
登機喇
係第一次見嘅螺旋槳飛機
8個字左右就已經到左函館,第一次搭咁短途嘅機
條行李運輸帶放左條咁嘅魚係上面,覺得成件事好得意
搭巴士到步函館站後買左張市電+巴士兩日Pass for之後兩日用
然後就去距離酒店5-10分鐘路程左右嘅Hotel Resol Check In
間房次次入到去都聞到UP UP地嘅味,但我仲要住兩晚
休息陣之後就出發去金森紅磚倉庫影夜景喇
搭市電到十字街落車再行過去
倉庫附近見到呢幢叫明治館嘅地方超靚,於是就停低影相
2018見到嘅第一棵聖誕樹🎄
反而金森倉庫冇明治館咁靚
夜晚啲鋪頭收晒,所以影完相就行埋過去八幡坂
唔知係夜晚關係定係早排地震,成個函館市比我想像中靜好多
黎之前我以為都應該會幾多人
呢個時候只係夜晚7點左右,但成條街都冇咩人
今晚本身Bookmark左一間成吉思汗燒肉,
我冇留意原來間燒肉就係金森倉庫嗰頭,以為係函館車站附近
於是我就諗住慢慢行返車站再去食
上回提到,我唔小心將Google Map嘅路線圖Set左做揸車路線
所以就咁睇間燒肉距離函館站大約8分鐘路程
點知又係同今朝一樣行左8-9個字...
發現自己行返返去金森倉庫嗰時仲好意外
姐係話我步行來回左一次金森倉庫
而我到個刻都仲係以為Google Map出現問題而冇留意原因
依家諗返起都覺得自己好戇居
到左成吉思汗燒肉,間野門口痴住Full Booking,
冇計之下要諗下食咩好
不過正正就係因為佢冇位,我就Search下本身聽晚係函館朝市入面食嘅嗰間海膽丼收左未
意外之下發現原來海膽丼聽日同後日都休息
姐係如果我今晚唔食就冇機會了
間野營業時間係到9點,而嗰時都已經就8點半,
好想好想食之下9秒9跑去等市電,落車再瘋狂咁跑去間鋪頭
點知去到明明未9點但開口掛住塊Close嘅牌
未獨遊之前我不嬲好怕醜好多野可以唔問就唔會問
但當時我真係好想食,今次唔食下次唔知幾時再黎函館
猶豫左陣不知廉恥地走入去問唔係開到9點咩
之後佢就當我講當日賣嘅某啲野食已經冇晒
我問佢仲有冇海膽佢話有,於是就俾我入去食
最後都有得食好開心
雖然心底覺得自己好似乞食咁
印象中啲帶子好甜,但係啲海膽唔係好Creamy嗰種
出到黎見到個天好清好多星星
但附近都有啲光所以唔係太影到
Post係到壓縮左好似仲更加睇唔到
一見到好多星個心就好興奮,好想搵次去日本搵個極黑嘅地方影銀河
不過應該要識得揸車先得喇
Day 2完