Day 6 - Part 2
行程:峰屋拉麵 -> 行Aeon -> 美瑛白金青池 -> 札幌
為左唔重蹈覆轍,一落車就即刻留意巴士站位置,影埋相開地圖加埋旗仔先行入去青池
其實有班晏少少先入嘅巴士,但我想睇日夜分別所以係日落前入
入到黎其實已經準備天黑所以暗暗地
不過又真係睇到啲水係淺藍色嘅
如果今日好天出太陽應該會更靚
影左幾張相後就越黎越黑,要等到5點開始有夜間點燈,
但可能因為日落得早,未到5點就有燈喇
第一眼見到著燈嗰下靚到心入面嘩左出聲
上面兩張係啱啱見到著燈頭兩下,
可能影得麻麻地但係好想俾大家睇下第一眼個感覺
之後瘋狂影左好多相,但唔知Post邊張好所以揀左啲出黎
真係好靚
呢到啲燈光係開一陣又熄一陣咁,每次著燈都覺得好靚
!!
上面綠綠地色呢張係因為熄左燈但咁啱隔離個地盤開左燈所以咁,意外地幾靚
開頭其實仲好多雲,影影下居然見到雲開始散,星星開始出黎
雖然側邊啲雲有少少礙眼,但見到星都好滿足
Btw可能要放大幅圖先會見到有星
不過啲燈都幾光,因為每次一著燈啲星星就唔見晒,但一熄燈就出現返
所以要計一計每次大概熄幾多秒再就時間影lol
如果再夜少少應該會仲清,但因為要趕尾班巴士出返車站所以冇辦法等喇
行返出去個時真心有啲驚,但又覺得好興奮
一離開點燈範圍環境即刻變到好黑,有樣估唔到嘅野係我以為行出巴士站條路一定會有人,點知似乎大家都係揸車過黎,得我一個要等巴士
一行出青池會經過一片俾樹包圍嘅空地,一望上個天就見到好多星,好似去左世外桃源咁
但因為太黑冇咩方向感,Plan嗰時都以為會有路燈所以冇帶電筒,淨係用到iPhone內置嗰個,開完淨係夠光照到去腳趾前少少嘅位置
之後行到空地盡頭搞錯左方向差少少撞樹
仲要一行近樹就係咁聽到沙沙聲,冇似有野行過咁,好驚有恐怖野出現
最估唔到係行左出巴士站都仲係伸手不見五指,係啲車路過先會見到光
成條路得我一個好似弱智咁企係到,啲司機經過唔知會唔會以為撞鬼
?
另外所謂巴士站都只係就咁棟左個牌係係車路隔黎嘅樹叢入面
呢幅圖係用電話開左閃光燈影
嚇到個人都震
但係見到個天真係超超超多星,摸黑都要企係路邊影
雖然有雲,但都想講句感謝上天
呢次應該係第一次漆黑中睇星,真係特別閃
平時係香港間唔中會去露營,但係香港啲光害好嚴重,去好多地方都會見到燈光,又或者會有其他營著燈,就算去極黑地方如果有海嘅話附近都會有船
呢晚我都想讚一讚自己好勇敢
最後架巴士遲左一陣先到,幾驚冇車出返去
返到美瑛站7點都未,但已經要等成個鐘先有車返旭川
開始有啲肚餓,不過附近啲鋪頭好似都收晒咁
冇咩野做就坐係車站入面等,
坐左陣有幾個男女著住校服嘅都黎等車,
幾個圍埋一齊係到唱歌同hehe haha咁,
個時做緊2018冬季日劇有村BB拍師生戀嗰套,佢地唱嘅其中一首就係呢套劇嘅主題曲
雖然有少少嘈,但呢個情境好似睇緊現場版日劇咁
不過如果日日放學都要等成個鐘先有車返屋企都幾慘
返到旭川站本身想試多一間拉麵鋪先返札幌,最後又係驚唔夠時間就係Lawson買飯圍同獎項蛋糕上車食
呢個又係每次黎都會食嘅野,今次一個人食晒成卷
個飯團好似成三四百Yen
見佢寫住熱左好食買個陣就叫店員幫等叮一叮,又真係幾好食嘅
札幌啲酒店有啲貴,今晚慳一慳錢住係狸小路入面嘅Hostel
200幾蚊一晚,床單要自己鋪,但最衰係佢連拖鞋牙刷都要加錢先有
Day 6完
題外話,旭川站入面真係又闊落又靚,後悔冇影多幾張相
近出口位個到放左啲枱枱櫈櫈俾人坐,由美瑛返到旭川嗰陣竟然見到有啲人坐左係到溫書
係車站溫書真係第一次見