經過幾日掙扎買咗65T。星際某舖買$999,行貨,少少評價:
音質:我覺得呢個價位算幾好,係好過IconX少少,bass我覺得一般(EQ已經較過),樂器同人聲距離感算唔錯,細緻度幾有驚喜
隔音:講咗Ambient sound先,呢樣做得幾出色,我聽住歌喺旺角同朋友傾偈完全冇問題。如果唔用嘅話,隔音唔算太差,但唔叫好,如果有條友喺身邊行過,我聽住歌都會聽到少少人聲講嘢。不過換過個earbud應該可以改善
通話:打咗幾個電話,喺屋企嘅人話冇問題,喺街嘅人話如果自己喺地鐵應該會唔係好聽到,但我覺得ok啦,如果你喺地鐵,就咁用電話講都未必聽到
連線:喺佢間舖試嘅話左耳完全收皮,因為太多干擾。落咗旺角街頭窒過一次,但唔嚴重,之後搭車全程順暢
其他:個mono真係又愛又恨,如果想用單耳淨係可以用右耳,但個問題係,你可以同時連兩部電話,但你唔可以同人share耳機,因為會有距離限制(官方話20公分/8吋),過咗嗰個距離你會得返右邊有聲。