召喚lihkg所有學神/P牌巴絲 (114)

落天小熊餅 2024-05-01 17:25:38

柒擒柒縱(河粉) 2024-05-01 22:13:14

Fb group見到，條友自動波6 take,學咗超過80小時 ,仲要想車老婆女女周圍玩

考車血淚史

由2021年7月9號報名考車（自Van)開始，到2024年4月29號，經歷咗考筆試（甲部，2021-09-23），加6次路試如下：

教車師傅羅文廸、考官215、沙駕多石線（2022-09-22）：乙部（泊車、三手肽）合格；丙部（路試）肥咗

22/9四@09:00 駕駛考試
結果乙部合格，因為羅sir 嘅泊車、窄路掉頭秘笈幫我不少，這是值得肯定的，但他教導的路面行駛技巧卻強差人意，起初當我做不到他的要求時，他會不斷重複提醒，但到了中後期，當我仍然做不到時，他就開始鬧我，並且不會將正確方法再講解一次，要我自己去嘗試！大佬，如果我識就唔使問啦！我唯有自己去睇多啲沙駕影片，但幫助不大。最後當然肥咗丙部，肥嘅原因係出咗多石停車場後，到咗銀城街燈位右轉去沙田圍路，轉綠燈後，我與右線嘅大車一齊起步，想右轉前俾考官215踩停，話我太接近物體，咁就肥咗！仲有軚盤控制不當（原來我唔識推拉肽，要到考第四次前，張sir教我時我才發現，這是後話）

＃泊車步驟＃
1. 車輛入R波向後慢駛，中門玻璃窗看到支棍(扭盡左軚
2. 留意右邊鏡，見到半個G字回2圈軚(將頭轆回直
3. 將車輛(頭轆已回直)順向後行，泥擋緊緊過白線扭盡右軚
4. 確保右邊、左邊尾轆泥擋已足夠進入黃色卸貨區位置
5. 拉好手掣、入N波 (已示泊好)

＃窄路掉頭＃
1. 第一手
入D波向住右邊石壆扭盡右軚，到右邊車頭入石壆1/3(回2圈軚回直頭轆)，到靠學牌邊將車輛停定(拉手制、N波)
2. 第二手
入R波扭盡左軚車輛向後行，留意右尾轆泥擋對好石壆底(回2圈軚回直頭轆)，泥擋對好石壆面(將車輛停定、拉手制、入N波)
3. 第三手
入D波扭盡右軚完成窄路掉頭
以上要做到軚快車速慢

教車師傅羅文廸、考官 186、沙駕多石線（2023-04-06）：丙部（路試）肥咗

第二次考路試，我仍然選擇羅sir做師傅，因為只跟過佢學，而且當時還覺得他幾好！但到了考試前一星期左右，我已經不想再跟他學車，因為佢只鬧不教，令我非常絕望，心想如果我合格咗一定去Facebook 唱衰佢，當然最後都係肥咗所以冇咁做！
吸收咗上次嘅失敗經驗，我除咗跟羅sir之外，仲有沙駕補鐘（張sir上 3堂，佢好好人，特別係教我轉灣技巧），還報咗學車易（莫sir上2堂，非常長氣嘅老人家，每次都係講相同嘅嘢，去到某個位要注意啲咩）及學車駅（范sir上1堂，雖然只有一堂，但感覺非常好，聽聞佢出咗去自己教，但只限私家車)，仲入咗一個沙駕學車WhatsApp 群組（到現在我還是活躍分子），從中得到很多group 友嘅有益資訊。

2023年4月6 (四） 12:10 駕駛考試
今次肥嘅原因係腳掣控制不當！其實考官186有踩停過我（轉入汽車廠前安全島有名女子企喺度冇郁，於是我慢流過佢，但186好大聲咁叫我停，仲踩埋腳掣停我），但又冇肥我駕駛錯誤導致考牌主任採取行動！事後諗返，應該係我腳掣控制得唔好，多次震襯佢，所以肥我腳掣控制不當！

教車師傅黃文健、考官 211、沙駕多石線（2023-08-30）：丙部（路試）肥咗

2023年8日30日（三）09:00駕駛考試
到第三次考路試，我要求換師父，於是沙駕派咗黃sir（三柴，羅sir只係一柴）教我，雖然只上咗佢7節，而且佢好少講嘢，教我時大半時間都係瞓覺，但一出聲就教到我嘢，仲俾我揸唔係考試嘅路線，令我進步不少！除咗黃sir, 我都有報沙駕補鐘（又係張sir上 3堂），還報咗學車易（又係莫sir上4堂及鄭sir 上1堂，好串滑咗牙嘅老油條），今次諗住一定合格，點知都係肥咗！原因係臨入多石停車場前，有架大垃圾車喺入口收緊垃圾，於是我喺對面線等佢收完垃圾行開之後先駛入去，等咗半分鐘左右，後面已經有十幾架車，仲呠我快啲行，考官211就問我點解仲唔開車？我話太窄入唔到，想等垃圾車走開先，佢叫我試吓入去，我就開車入去，之後211仲話我係咪入到呀？我心諗如果我唔等立即入去又會話我太接近物體肥我啫！呢個位肥咗我不顧及其他道路使用者、警覺性及判斷力弱。因為冇哂心機，去到插桅桿街轉入牛皮沙街前嘅燈位衝燈過咗白線，又肥埋未有遵照交通燈號指示！
考完之後，心情跌落谷底，決定出去考唔再報沙駕！

教車師傅張文廣、考官 181、永孝街細圈（2023-12-15）：丙部（路試）肥咗

第四次考路試決定抽出面街嘅原因係沙駕WhatsApp group 入面有個谷友🍎第一次沙駕肥咗之後抽出面快期就2 take pass! 所以都想試吓出面抽快期，於是經另一谷友🦄介紹咗張sir俾我，抽快期前我已經約好張sir一但我抽中快期，就俾期我學車，經過三個月左右，12月4號終於抽中快期，我立即通知張sir 俾期我學車，揀日期及時間有少少插曲，因為我用手機版「智方便+」唔能夠登入去，到差唔多11:00都未入到（但10:00開始已經可以揀），我就喺沙駕WhatsApp group 求救，最後得到🍎幫手，揀到12月15號下午三點考永孝街！

第一次見到張sir, 俾我想像中要年輕得多，我以為佢係50-60嘅老資格師傅，點知原來係40歲左右嘅青年才子！由第一堂開始到我take 6 pass 為止，佢從未鬧過我一句（與羅sir剛剛相反）！我覺得學車時師傅唔係唔鬧得我，只係我希望鬧完之後教返我點改善就可以！張sir見到我做錯會教我應該點樣做去改善，所以我感覺跟佢學車無壓力又開心，因為佢成日會同我講笑話及佢學生啲趣事！

2023年12日15日（五）15:00駕駛考試
第四次路試，考永孝街細圈，路程最短但危機最多，我由開始已經特登望多啲鏡，小心翼翼咁揸車，到回程去學禁（返試場前的永基路）都好順利，點知去到永基路小巴站位置連續cut 兩條左線後，才見到一架大貨車在燈口前停低，我以為佢係等綠燈再開車，點知原來係死車，我去到佢後面一架車位左右停車，考官181立即同我講話呢架係死車係唔會開嘅，於是我立即打右燈望右鏡右盲區，之後cut右再cut左然後過燈位，有驚無險過咗，但心情受到影響，再向前行有死車cut右，181話我冇望右鏡，我話有，佢話我兩秒前望過，但開車前無再望，我感到有啲被屈嘅感覺，之後兩線會合我冇望左鏡就直接向前行，181即刻話我仲話有望鏡？！就咁樣我就肥咗未有查看交通情況！

教車師傅張文廣、考官 239、永孝街大圈（2024-02-07）：丙部（路試）肥咗

第五次考路試，我之前已經同張sir講咗，如果抽中快期一定會搵佢教我，因為第四次肥完全係自己太激動先至犯錯，同張sir完全冇關。
幸運地，2024年1月23號又俾我抽中2月7號（年廿八），仲要時間（下午三時）同埋路線（永孝街）都一樣！

2024年2日7日（三）15:00駕駛考試
第五次路試，考永孝街大圈，路程最長但相對容易，本身以為年廿八學校已經放假，貨車運輸應該收咗爐，點知嗰日試場一出嚟啲貨車貨物多到你唔信！但都唔緊要，我都處理到，今次肥嘅原因係發台溫，發雞盲！我去到葵盛圍一個燈口轉左之後有班馬線，在我前面有架大貨車學神，行得好慢，當我過咗燈口去到班馬線前，見到轉咗紅燈，咁我就停低等轉綠燈，等咗一陣，後面又有好多車（好似第三次考試嘅情況），於是考官239就同我講根據香港交通條例，你係可以開車嘅！就咁樣我又肥咗停車位置不正確、不顧及其他道路使用者、駕駛錯誤導致考牌主任採取行動！仲有未能調整車速以適應交通情況我就唔知點解會肥！可能我揸得太慢？！

教車師傅張文廣、女考官 237、永孝街學禁（2024-04-29）：丙部（路試）合格

經過5次肥路試，我問自己係咪唔適合揸車？但我無放棄，張sir都無放棄我！經過兩個幾月抽快期，4月16號又抽中4月29號上午11點15分考永孝街！竟然三次都抽中永孝街，既然上天再比機會我，今次我真係不容有失！終於皇天不負有心人、有志者事竟成！我第六次路試終於合格！

2024年4日29日（一）11:15駕駛考試
第六次路試，考永孝街學禁，雖然係學禁之前從未自己揸過，只能靠張sir示範給我睇及講解要注意嘅事項，但難度不高！今次考路試，準備非常充足，差不多所有嘅情況，張sir都有指教，再加上考車當日，張sir親自揸車到我屋企樓下接我，然後去試場示範多一次學禁段給我睇，知道當日有雪糕筒在路口，需要過物體處理，所以到咗我真係考呢條線，我完全冇壓力咁完成，除此之外，今次幸運地俾我遇到好考官，237係一個年輕女考官，其本上除咗指示我行車路線之外，佢完全冇講其他嘢，最重要係佢全程都冇篤過一下iPad! 令我全冇壓力咁完成考試！所以考車真係要天時地利人和配合、缺一不可！

成功攞到P牌，第一個要多謝嘅當然係張sir, 如果唔係佢從不責罵、無壓力、愉快學車嘅教學原則，好似我咁無天份揸車嘅人，真係唔知幾時先可以考到車牌！第二個要多謝嘅當然係我老婆同兩個女啦！我考6次車，老婆大人從未對我失望或者話我無用！佢每次都話因為我本身就無興趣揸車，所以考唔到都係正常！但係我而家對揸車好有興趣啦！希望之後可以全家一齊揸車周圍去！仲有要多謝嘅就係沙駕WhatsApp group 嘅同學，特別係🍎、🦄、劉瑪利、Janice Li、 Han…

秦始皇🐉 2024-05-01 22:19:31

我岩岩都見到
但你貼曬出黎不如cap 圖啦
好撚金鋼棒