是咁的，廿一歲有咗，所以我要做有錢人

真係唔知

軒哥係垃圾，我話嘅

公公曾經講過，中國人成日話奸商奸商，逢商必奸，故意眨低商人嘅地位所以導致今日唔少人都會先天對生意人有種偏見。

事實上，亦因為商業係將好多嘢量化成金錢處理嘅世界，商人嘅工作一直游走喺最接近人性嘅範疇，所以好多人都自然向人性嘅醜惡屈服。

既然我可以用依個成本得到遠超成果嘅產品，點解要主動增加成本比生產人？掉返轉頭，下次應該壓價，又或者我再有多啲影響力嘅時候，封殺黑龍哥其他收入來源，噉我就可以一直用最低嘅價錢得到高質嘅片。

不過我唔想自己做生意嘅時候主動靠向人性醜惡嘅一面，我知喺商場講道德講底線會好蝕抵，因為商業世界嘅底線只係法律。講起上嚟都好笑，好多人覺得守法就夠，但法律之上有太多嘢管唔到。

但我知道同阿軒解釋噉多都無用，所以我只係回咗句：「你當我任性啦，我係想噉做呀。」差在「吹咩」無講出口。

我將啲宣傳片以一個星期兩條嘅速度上載，而我拍嘅第一條照留喺度。果然如我所料好快見效，好多睇完第一條失敗之作嘅人見到第二條噉大對比，都好踴躍留言：「係咪同一個人拍？」、「高汁咗好多！」、「睇到想飲。」、「好大進步！」、「見到有心做。」、「好正噉。」⋯⋯

唔止留言，仲有好多分享，嗰陣fb仲做到一傳十，十傳百嘅效果，傳吓傳吓，由黑龍哥嘅朋友傳返去黑龍哥手上，佢又傳返畀我。

我望住啲讚好同分享愈嚟愈多，觀看次數破千，再破萬，超開心。

大概過多一個幾星期左右，嚟酒吧嘅新面孔多咗，閒日都唔再冷清，雖然少咗以前嘅寧靜，但噉嘅酒吧先賺到錢。

阿軒同調酒師會問新客人點知道酒吧嘅存在，十個有七個都唔係街客，而係睇完網片想嚟打卡同試下啲招牌雞尾酒嘅人。我之前改餐牌排列嘅效果亦更顯著，好多新人嚟到其實都係揭頭一兩頁，主要想飲網片推介過嘅雞尾酒。

當然啦，改變總係有辣有唔辣，有啲舊客就因為環境唔同咗，覺得太多人離我哋而去，始終魚與熊掌不可兼得。

我計過，網片嘅流量同實客嘅轉換率大概百分之一到三，即係每一百個睇完片嘅人就有一至三個真係會嚟幫襯。每條片大概二三萬人睇過的話都多幾百個新客。

最開心嗰個梗係阿軒啦，酒吧生意好，佢賺多咗好多錢，亦好捨得使錢氹我。

「依家知我勁呀呢？」

「至勁係你啦，老婆仔。呀唔係，老婆大人。」

阿軒叫親我「老婆」，我都特別心甜。我知道咩叫「窮賤夫妻百事哀」，嗰陣終於有錢，就感受到有錢對愛情嘅重要性，真係鬧少好多交。

究竟軒哥點樣將一手好牌玩爛

金仔我係你忠實fans ....

多謝忠粉G持

我哋忙住請人，阿軒要訓練新調酒師，又打算開分店擴充。如果無咩意外發生的話，我估兩三年後就可以結婚，過多兩三年可以買樓，而且我哋兩個都唔使點做嘢㖭。

當你覺得未來一片大好，飄飄然嗰陣，就係出事嘅先兆。

首先第一個意外，喺我同阿軒最幸福最賺錢嘅日子，感情好咗嘈交少咗，自然做愛就多咗。唔止，仲要係無安全措施嘅性愛。

「你唔戴呀？」

「有咩所謂？我養唔起你同BB咩？」男人講依句說話嘅時候真係男人味爆燈嘅時候，雄性激素表露無遺，搞到我更加興奮，點咗頭，更激烈噉回應佢嘅愛。

一次又一次激烈、毫無節制嘅性愛之後，我理所當然噉有咗。依個係第一個意外，本來二至三年後嘅結婚計劃要推前。

媽咪對未婚懷孕特別敏感，所以我帶咗阿軒見佢，佢好心急噉問我哋準備好未，講緊婚紗婚宴婚禮依啲實際準備，唔係心理準備。

不過估唔到，真係心理準備出問題，但唔係我，係阿軒。

我講過嗰陣好忙，酒吧要搞分店，宣傳片要繼續拍，本身嘅酒吧都要經營，阿軒又要訓練新人，又要陪我睇鋪，仲要搞埋結婚，可想而知佢有幾忙。明明賺多咗錢，但就忙到無時停。

而我就浸醉於結婚依啲女人夢寐以求嘅幻想入面，忽視咗阿軒愈嚟愈大嘅壓力。

然後有一日，當我瞓醒嗰陣，身邊嘅阿軒就唔見咗。

我個心好似要跳出嚟噉，完全無先兆，突然間消失，又好似上次噉人間蒸發。

「唔好⋯⋯唔好呀⋯⋯」我好忟，急到要瀨尿噉滯，不停打佢電話都無人聽：「點解要噉⋯⋯點解會噉架？」

就喺我急到就癲，可能動咗胎氣搞到頭暈嘅時候，我見到阿軒留咗封信畀我。

佢條冚家剷唔係走佬呀嘛

我打開睇，入面竟然係解釋返佢之前過大海嘅事：「自從我媽媽過咗身之後，我就染上咗一個好差嘅習慣，傷心嘅時候，我就用賭錢去麻醉自己。」

所以一開始，佢見到我用酒嚟麻醉自己，就好似見到同類一樣。

「我過大海，係想喺一個無人識我嘅環境之下放縱自己，想暫時忘記喺香港嘅一切。今次，都係一樣。留喺香港實在太多嘢煩，酒吧、結婚、開分店、睇鋪、睇樓，我真係處理唔到。容許我暫時離開一下，實在太大壓力⋯⋯對唔住。」

嗰次，係佢第二次消失。

有過第一次嘅經驗，我知道佢會返嚟，但仍然為咗佢嘅安危而日日憂心忡忡。媽咪久唔久問我婚禮搞成點，我都唔知點答好。而阿軒失蹤之後所有重擔都落喺我身上，由於我無佢公司户口嘅使用權，所以酒吧開分店之類嘅計劃只能夠擱置。

之前逐少逐少堆積起嚟嘅成果，好似一座沙堡壘噉，開始頹然倒下。我再次接管酒吧營運，但只有調酒師一個根本產能不足，應付唔到噉多客人，新人嘅調酒技術又未夠班，質素下降自然又流失啲客人。

加上阿軒一直以嚟都無畀我掂銀行户口嘅嘢，所以我只可以用酒吧營業額得返嚟嘅錢去支付營運開支。

呀，嗰陣仲要應付大學考試，一個大肚婆承受噉大嘅精神壓力，令我日日都嘔到七彩。

軒哥作為男人真係廢到仆街

都唔係廢咁簡單，係人渣，無同理心

佢自己掉低啲嘢走咗去自己爽，等人幫佢執手尾，佢真係開心呀

不過我同自己講，只要捱住，捱住，捱到阿軒返嚟，一切就會好。

我無錯過吖，之前我諗只要搞好酒吧，我同阿軒就會幸福，我無錯喎；我諗住拍片宣傳係有用，我無錯喎；我諗住改好酒吧營運方式可以增加收入，都無錯喎⋯⋯

今次，今次都唔會錯，只要阿軒返嚟就會好架喇⋯⋯一切一切都會好⋯⋯

大概一個星期之後，我真係捱到阿軒返嚟。我已經六神無主，淨係識攬住佢喊：「你返嚟就好喇⋯⋯你返嚟就夠喇⋯⋯唔好再走⋯⋯唔好再離開我⋯⋯嗚，有咩都同我講好唔好？我會同你分擔架⋯⋯你唔好再消失喇⋯⋯求下你⋯⋯」

佢好溫柔噉摸住我個頭安慰我：「素怡，為咗你，我會承擔一切。你可唔可以幫我一個忙？」

「幫！咩都幫！你講就得架喇，只要你唔好離開我，我咩都可以做架⋯⋯」諗返起都覺得自己愛得太卑微。

阿軒帶咗我去財務公司，搵我做擔保人借咗五十萬，佢話唔想再等，要快啲畀幸福我，依筆錢係用嚟做首期同埋裝修。

本身就經歷咗一個星期地獄嘅我，突然聽到阿軒噉講，即刻好似上咗天堂噉樣，我嘅理性幾乎喺依一上一落入面被氣流輾壓到一絲不淨。

但我都仲曉問一個問題：「酒吧賺嘅錢⋯⋯唔夠咩？」

阿軒棒起我塊面：「嗰筆仲要留嚟開分店架嘛，嘿？」佢錫咗我一啖：「我應承你，我唔會再消失，唔會再離開你。」

個財務公司職員睇到我哋都眼冤，我好快就我簽咗名，之前為咗阿軒欠債都叫還得七七八八，依家我嘅名義上又再次變成欠債五十萬。

咁都信？

咁撚仆街

之後，阿軒第三次消失，亦係最後一次，無聲無息噉人間蒸發，我亦無再見過佢。

當時我仲好天真，以為佢會返嚟，以為只要照返上兩次噉做，幫佢頂住間酒吧等到佢返嚟，一切就會好轉。

直到我返到酒吧，見到輝哥在場對酒吧嘅擺設指指點點。

「輝⋯⋯哥？點解⋯⋯你會喺度？」

我一直以為咩都唔緊要⋯⋯我仲有間酒吧⋯⋯

但我所諗嘅一切都係錯，仲要大錯特錯。

「吓？你條仔無話你知咩？佢之前過大海賭錢，輸到仆街呀，已經將間酒吧抵押咗畀我。」

我腳下一虛，差啲原地坐低，但可能母性嘅本能要我保護個胎，我一手㩒住旁邊張枱先無跌倒。

喺法律上，間酒吧唔屬於我，阿軒要拎嚟做乜係唔使問過我。我亦無佢嘅銀行户口，唔知佢直接開咗張支票畀自己拎去賭，所以佢嘅口吻講到仲有錢開分店噉。

其實嗰陣時佢户口已經無晒錢，所以先需要五十萬嚟著草，根本唔係咩首期同裝修費。

佢上次返嚟，係存心積累呃我。

啪咔。

有一瞬間，我好似聽到身體入面有啲嘢碎裂咗嘅聲音。

公公⋯⋯

眼淚湧晒出嚟。

公公⋯⋯

我借張枱慢慢跪坐喺地上，喊咗出嚟。

公公啊⋯⋯我應該點做好啊⋯⋯？

仲要孭五十萬
祝條冚家剷長命百歲百病纏身，最好俾人捉去烏克蘭做炮灰

阿軒消失咗，無再返過嚟。

我離開酒吧，喺街頭漫步，好似一個無咗靈魂嘅空殼。我覺得街上嘅路女似無限向前延伸噉，無論行幾遠都唔到盡頭。應該話我連盡頭喺邊都見唔到。

負債五十萬，未婚懷孕，前路茫茫。

我一而再再而三噉打電話畀阿軒，足足幾十次，但可想而知佢係唔會聽我電話。我留言，亦傳短訊畀佢：「我淨係問一個問題，問完我以後都唔會再煩你。」

我想知道一個好重要嘅答案，無論如何都要清楚明白之後先可以決定條路點行落去。

終於，阿軒睇咗我嘅短訊，回咗一句：「好。」

我拖動抖震嘅手指打出阿軒嘅號碼，幾聲嘟嘟嘟之後，終於接通。

「喂⋯⋯」

「喂。」

我哋兩個隔住手機，相對無言。

但係我鼓起勇氣，問咗嗰個問題：「噉⋯⋯我肚入面嗰個點呀？」

唔係問我哋嘅關係點，亦唔係問佢會唔會返嚟，點解佢要呃我，我一心所念嘅，只係佢點睇我哋之間嘅愛情結晶。

佢沉默咗好耐，我內心波濤洶湧，但表面都要壓抑，扮到若無其事，等佢嘅答案。

嗰幾分鐘，好似過咗幾十年噉。

「對唔住。」阿軒嘅答案，令我僅餘嘅奢望都幻滅：「你落咗佢啦。忘記我依個仆街，對你嚟講先係最好架，素怡。」

嗰一刻，我嘅手放喺肚上，阿軒嘅答案好似重錘噉敲碎我嘅靈魂，肚內都有一吓刺痛，或者係連佢都知道，爸爸唔要佢喇。

但我發現自己無眼淚流出嚟，佢嘅答案噉乾脆，我反而鬆咗口氣。第一個反應係無得呃人，我無流眼淚就係無。

我淨係記得自己狠心將拇指㩒落掛線制上嘅冰冷觸感。

我摸住肚，慢慢搓揉，直到痛楚消散。期間阿軒打過畀我，反而係我唔聽佢電話，仲喺所有社交程式入面扑晒佢。我唔想同佢再有一絲半點聯繫，聽完答案，要醒喇。

阿軒噉樣害我，無疑係令我重傷，但亦係一記當頭棒喝。

公公好早已經講過，睇錯男人會有代價。只係今次個代價落喺我身上。

我發現自己雖然大受打擊，但一路喺街上行，都無再流眼淚。

我內心好平靜，好似啲聽完家人死訊都無咩反應嘅電視角色噉。我喺心入面一路問公公應該點做，思緒就帶咗我返以前，搜索公公講過嘅說話。

「有啲問題係解決唔到，嗰啲時候就盡情去喊。」

就算明知喊係於事無補，都要發洩出嚟。

「如果係解決得到嘅問題，可以喊，喊完就諗方法解決。」

對我嚟講，無得解決嘅問題係想阿軒返嚟。但佢唔係一道無答案嘅問題。我唔使再諗咩佢愛唔愛我，佢係咪出軌依啲無聊嘢。

事實就係佢陷害我。

我一直噉為佢，噉愛佢，訓身貢獻自己嘅一切，對佢完全信任，到頭來佢點對我？借我過橋攞五十萬著草，仲叫我落仔忘記佢。

噉嘅男人，需要留戀咩？無咗都唔會可惜，因為有啲人注定係嚟摧毀你嘅生活。就算依家無事，日後都避唔過一劫。而且一齊愈耐，投入愈多，佢就會摧毀得我愈徹底。

我應該慶幸廿一歲睇透阿軒依個男人，如果我四十一歲先被佢噉樣跣一鑊，恐怕就無力再爬返起身喇。

對阿軒，我好快就諗通咗，因為佢擺明儲心積累唔理我死活先會氹我去做擔保人，害得我噉徹底，我對佢嘅愛亦喺理解發生咩事之後隨我破碎到發出聲音嘅心口流走到一乾二淨。

我可以好清醒噉講，我唔再愛佢。

女主角會唔會成世都再無辦法愛人

會愛屋企人

有人會覺得自己為一段愛情投入太多而唔捨得，我反而覺得我投入噉多對方都可以狠心害我，更加證明佢唔值得我愛。

我細細個就聽公公講咩叫沉沒成本效應，最切合人性而反理性嘅理論。就同啲人見住啲股票愈跌愈溝貨，揸得愈耐愈唔捨得止蝕一樣。

個理論放喺愛情，同樣適用，投放愈多感情落去會愈唔捨得。事實上過去投放過嘅一切根本唔係用嚟考慮未來決定嘅要素之一。

如果男朋友對你差，你頂佢唔順，就只需要考慮佢會唔會改，下個會唔會更好。你同佢拍咗幾耐拖為佢付出幾多心機時間認識佢幾多朋友屋企人統統都唔係考慮因素。但人就係會自動拉埋沉沒成本一齊諗嘅生物。

而有時最正確嘅決定，往往違反人性。所以點解所有人走東嘅時候，走西嘅人係最大可能成功。如同巴菲特所講：「別人恐懼我貪婪，別人貪婪我恐懼。」嘅意思一模一樣。

我為阿軒做過嘅一切已成過去，人唔知道聽日會發生咩事，所以先會回想已經發生，無任何未知之數，令人安心嘅昨日。

「成日諗以前幾好嘅人，係因為唔相信聽日會更好。」公公話，當你知道聽日會更好，琴日就不值一提。

用晒積蓄幫佢還債，搞債務重組，幫酒吧轉虧為盈，依一切一切都變得毫無意義。

無錯，就同搞一間公司，中途好努力好努力終於令生意上咗軌道，但一個浪冚埋嚟，公司破咗產，乜都無晒。

創業失敗都尚算得到經驗，但愛情失敗可能咩都學唔到。而我，學識咗唔好輕易相信男人，學識咗保護自己。我唔會再為咗一個男人投入噉多，唔會再毫無保留噉去愛。

又或者話，我對男人同愛情都產生咗入骨嘅恐懼。

人係反面快過火箭嘅生物，但被最愛嘅人背刺實在太痛，我寧願以後都同人保持距離，起碼佢嗰刀拮得無噉痛。

無女人唔想一直天真無邪落去，我哋嘅成長同成熟都係被逼出嚟。

咁都好

女主角勁有料真係
如果現實識到咁嘅人就有趣

阿軒依個人已經唔使再浪費時間去諗，佢以後都會落入我心中嘅黑名單，依啲仆街真係希望由始至終都無識過佢。

你以為噉樣可以整死我？你以為自己攞到五十萬就可以有個比我好嘅人生咩？我唔會就噉放棄我嘅人生，我會還清依五十萬，再倒賺好多好多錢，多到出名，多到你後悔今日噉樣對我。

你可以呃到我擔保人個名，但呃唔走我嘅大腦同思想，我所學過嘅一切都係我人生無形嘅安全網。

就算咩都無晒，我都有信心將失去嘅嘢全部攞返返嚟。推動我要過得更好嘅係憤怒同唔服輸嘅精神，我要有朝一日佢見到被佢害到雞毛鴨血嘅金素怡都可以生活得好幸福。

對阿軒，我仁至義盡，我問心無愧。亦因為我噉，我唔會再花多一秒嘅思緒喺佢身上。

愛情嘅問題雖然無得解決，但我亦唔需要解決。

思緒去到負債五十萬上面，我亦不知不覺返咗屋企，係我同阿軒曾經嘅屋企。過於理性嘅我見到舊物都完全無觸景傷情，證明我對佢嘅愛真係斷晒線，連諗起佢個樣都會作嘔。

我拎咗計數機出嚟，仔細噉計一次我爭財務公司幾多錢。

五十萬，年息大概二點四厘，分六十期共五年還，每月還款大約九千蚊。諗起未來都好頹，每個月有一堆錢毫無意義同價值噉樣使咗出去，如果我有春袋一定揼撚爛佢。

依家首要目標係還債，還清咗先有未來可言。我環視咗屋企內嘅一切：「你做初一，我做十五。」

之後我就搵咗個大袋，將所有可以變賣嘅嘢比如手錶、ps4同遊戲碟、switch同遊戲碟、阿軒嘅波鞋、佢嘅電腦耳機、滑鼠同鍵盤、我放喺床尾嘅公仔等等，執咗兩個大袋。

未完，我仲將屋內嘅梳化、床褥、枕頭被鋪、電視、電腦、飯枱、凳、廚具通通影相，盡量喺唔同角度去影，之後上fb加入啲二手傢具群組，將阿軒屋企嘅嘢放晒上網等人哋出價。

我拎住比較貴重嗰兩袋遊戲機，離開我同阿軒嘅屋企，返我真正嘅屋企。

我無浪費時間，繼續將阿軒嘅遊戲機、遊戲碟、電腦同波鞋放晒上最多流量嘅二手交易平台，睇下邊個出價高就賣畀邊個。