是咁的，廿一歲有咗，所以我要做有錢人

食完飯沖完涼，我攤咗喺床上，試下感受體內另一個生命。可能因為仲係懷孕初期，我真心感受唔到任何嘢，心跳都係得自己個心喺度跳。

「喂喂，你係咪真係喺入面架？」

我望住自己微微脹起嘅小腹，搓咗幾吓。隔咗一陣，我開始睇手機，望吓黑龍哥幾時打返畀我。我見佢最後上線時間就係我打畀佢之前，到依家都無再上線，拍嘢真係噉忙架咩？

我拎住個手機輾轉反側，又唔係鍾意佢，但都想佢快啲打嚟。我真係需要佢畀啲意見我。

眼白白望咗部電話十分鐘，乜都無，噉等都唔係辦法，唯有求其㩒啲嘢睇吓。作為一個稱職嘅港女當然係碌吓唉豬睇睇有咩買。二零一二年唉豬已經被朱西柏格收購咗，依幾年都眼見愈嚟愈多人用。網絡上嘅畸噢欸勞都爆咗好多個出嚟，當然同依家比點都少人啲，但已經見到好多破萬人嘅帳號賣廣告，靚女少少放多啲靚相上去就好易引倒科勞牙。

有個唔係太熟，早兩年做分組報告叫有啲交情嘅靚女啱啱放咗張泳衣靚相出嚟，點解依個世界會有啲波噉大腰噉幼又白滑嘅靚女，最緊要係點解我唔係佢？我望一望佢啲科勞牙，原來都六七千個，真係唔惹小，但我覺得佢嘅質素值過萬人科勞佢囉。佢叫圓圓，個人幾純真，我都覺得佢幾可愛嘅一個女仔。

為咗防止自己㩒去廣告，我就入咗去睇圓圓啲相，張張都令我依個女人自慚形穢。我仲諗佢個胸噉大，如果有咗實唔使愁奶水唔夠。睇咗好多張賞心悅目嘅靚女相之後，都未等到黑龍哥打畀我。

我見無聊，而且個人生交叉點仲係好困擾我，噉我好難瞓得著，所以我走咗去廚房。廚房有個袋喺地下，係我哋屋企傳統嚟，用完嘅膠樽呀紙盒呀廁紙芯呀都會擺喺嗰度，有時會拎嚟用有時儲埋一堆拎去回收筒。

我拎咗幾個廁紙芯用膠紙痴好，變咗條有啲彎嘅管，之後拎返房。瞓低之後，我將個筒一邊放喺小腹，另一邊放喺嘴前。

「喂喂，你聽唔聽到媽咪講嘢架？」唔使問都知聽唔到，我估佢應該仲未有耳仔啦？

「媽咪依家好煩惱呀，面對緊人生交叉點，你聽吓我呻好無呀？」

我講完即刻有啲後悔，噉快同佢講「煩惱」聽我訴苦，容乜易聽得多一生出嚟就做個負能樣架？都係唔講依啲嘢好啲喎。

「啊，你當我無講過啦，我純粹想同你傾兩句咋，睇吓你畀唔畀到啲靈感我。媽咪到底應該靠自己好吖？定係去幫輝哥手好呀？」

我扮晒嘢噉將隻耳仔哄埋去紙筒度，聽到嘅淨係得啲腸蠕動嘅咕嚕聲。真係傻傻哋，就算佢出咗世都未有耐聽得明我講乜啦，更加唔好講幫我分析同做選擇。

唉，如果有條賺錢嘅竅就好。好想好似達哥讀嗰篇潮文噉有兩個恐怖嘅陶瓷娃娃，教佢哋上網拍賣嗶自己出去然後每晚自己返屋企，第二日再嗶自己出去直到我上車做富婆為止。

聽唔到任何回應，我都無乜癮繼續玩落去，熄燈準備瞓。

lm
十年fans

女主角真係好可愛

「死仔，又話打畀我，無咗件事。」本身係想佢畀意見我，依家唯有自己諗。

當唔知點選擇嘅時候，回歸理性就係最好嘅選擇。如果我對某一個選擇有強烈渴望，噉就咩都唔使諗直接揀，但好明顯我無。

噉就將兩個選擇拆解嚟分析，其實講到尾依家嘅糾結位只係錢。輝哥可以確保我有錢、安全、穩定⋯⋯咪住先，真係安全？

雖然我之前用打工同創業嚟比喻，但實際上涉及黑社會嘅工作，真係可以當成安全同穩定咩？或者喺錢上面真係供給到一張安全網，但日常生活又點？一旦踩咗隻腳入去，想出返嚟就好難。而且喺噉嘅環境之下我會識到咩人？遲下小朋友出世又會接觸咩人？孟母畀三千蚊搬三次屋都係為咗令下一代有個更好嘅環境成長。人以群分，物以類聚，我可以確保自己只係做嘢，但個小朋友又點識分噉多？日日聽粗口見個個都叼住口煙佢反而會覺得唔食煙先係唔正常。

原來當你有咗小朋友，即使佢未出世，諗嘢嘅思路都已經完全唔同。

成個選擇唯一可取嘅只係有糧出，仲要係假設輝哥唔跣我嘅情況之下。而且去幫手，就代表我係奀打輝哥，以後都係聽佢枝笛做嘢嘅妹仔。佢賺一百萬都係分一萬畀我。但做生意諗計仔係自己話事，我賺一百萬就係賺一百萬。依個世界好多人唔擅長做生意，唔想背負風險先會揀安穩嘅路。我都唔想背負風險，尤其係每個月月尾就要還債。但富貴又的確係險中求。以我一路以嚟嘅往績同經驗，我做生意真係得架喎，真係賺到錢架喎，唔係阿軒搞到我一鋪清袋，我真係有信心三十五歲前可以退休。既然一直靠自己都得，點解依家唔靠自己？

仲一有點，輝哥想叫我幫佢打贏對家搶啲生意返嚟，即係我幫佢手一樣要諗竅。如果我係覺得諗商業對策好攰，過到去一樣無得休息。

我開始諗通自己應該揀邊條路，方向已經好明確。突然間，我唔再需要手機，亦無再為黑龍哥打唔打返畀我而坐立不安。所有嘢都睇得前所未有噉清楚。

我喺昏暗嘅房中，望住窗外風景。頭先仲係灰濛濛嘅夜空終於現出一個好似微笑噉嘅下弦月。

我開咗相機想影張相放上艾豬，但係太黑咩都影唔到，結果唯有上網搵張月亮圖擺上去。

「想通了，就看到明月。」

Lm, 有趣

噉當然以我嘅科勞牙數目就唔使旨意有幾百個讚架喇，但五六十個都會有嘅。

等等先⋯⋯其實之前用社交媒體嗰招，咪可以照用返喺依度囉？

我即刻影多張相，打上招私補補習中學生，有朋友需要可以搵我。放完張相，我就安心瞓咗等聽日起身睇吓有無驚喜。

第二朝早再上唉豬，真係有兩個大學識嘅男仔同我講，話有親戚讀緊中學想搵私補。我即刻將所有資料畀咗佢，之後等回音。

噉等回音嗰陣佢哋少不免會撩我傾吓生活嘢，我就話自己打緊三份工呀，被前男友跣咗鑊金搞到爭人好多錢。

「搵我做你條仔好過啦真心。」其中一個借啲已唔知講笑定講真噉調戲我。但我見過鬼真係怕黑，暫時男人都係不了不了。

經過埋琴晚，我發現自己連朋友都唔需要，腦入面亦無浮現公公嘅教誨，完完全全靠自己嘅理性分析再做決定。

我唔需要任何人幫我手，我一個人就夠，一個人都過得好好。

每一個人，無論男女都好，應該都要認清楚自己嘅人生好多時只能夠依賴自己。同一時間我終於收到黑龍哥電話。

「喂素怡？我啱啱拍完通頂喇，你點呀？個人生交叉點。」

「我解決咗啦，等你咩。」

「係呀？噉都好嘅，決定咗行邊一邊就頂硬上行落去。」

「我都係噉話。你呢？拍戲呀？」

「大學功課嚟啫，拍戲，我都想呀，依家香港邊有人開戲吖。」

「我真係唔識你嗰行啲嘢，搭唔到嗲。總之呃⋯⋯加油啦。」

「你都係啦。」

同黑龍哥講完幾句，又準備一日嘅工作。好消息係成功招多咗兩個私補學生，距離目標爭三個人，已經算前進咗一大步。

「幫你搵到客，係咪要請我食飯報答我先？」嗰位叫榮仔嘅男仔已經借勢叫我出去。

「無錢呀，你請我就差唔多。」

「哇，幫你拉客仲要請你食飯？依啲粗重嘢真係要交畀我喇。」

另一位就真係交代完個學生資料講咗幾句就無回，所以分別好大。

我唔理榮仔住，因為我諗到條竅，有機會幫到我賺錢。成唔成功都係後話，但見到唉豬宣傳嘅威力，我相信要成事嘅可能性好高。

於是我就膽粗粗去搵圓圓傾吓，利用佢比我多十幾倍嘅科勞牙，每次出相嘅天然宣傳效應，借勢做生意。

但我估唔到圓圓依個女人會刷新晒我對「女人」依個概念嘅睇法。

想知圓圓係咪臭雞

我同圓圓喺唉豬講咗幾句，就約咗出嚟，佢對我嘅生意計劃好有興趣。

「底褲同爸最好賣。」

「吓？咩爸呀？」

「爸呀。」圓圓喺佢對巨乳前托一托。一段時間無見，佢仲係噉靚女又白滑，真人靚過上鏡，個樣有啲似後生細粒大波版嘅周慧敏。

「哦！胸圍！」

「係呀，你有唔要嘅唔好丟，可以賣畀啲毒撚同變態佬，閒閒地都成千銀架。」

真係開眼界毁三觀：「噉好賺架咩？」

「梗係啦，所以我啲奀打全部都唔會丟唔會捐，一定係擺上網賣。」

「但你點宣傳？唔見你有依啲相架喎？」

「咪訊息度講，日日都有班毒男搲水吹架嘛，應酬幾句就問佢哋有無興趣買我啲底褲胸圍囉。佢哋特別鍾意用過嘅，如果有少少跡嗰啲可以賣貴啲。」

我飲緊熱朱古力，有啲作嘔：「噉你點解唔直接左手入貨右手出貨？」即係嗰頭喺內衣舖買完就放畀班毒男。

「佢哋好醒架，要聞到少少體味先會確定真係用過。你呃得一次呃唔到第二次，佢哋仲有群組講邊個賣假底褲。我因為噉無咗幾個客，不過我無咩所謂，又唔志在。」

我琴晚先諗點樣搵一啲人哋認為係垃圾嘅嘢賣，原來遠在天邊近在眼前，我自己就著住！

「除咗賣底底仲有賣相，有啲人會特登去影，但我就用即影即有，露唔露點隨你啦，露梗係貴啲。一係就連底底一個套裝噉賣。」

好難想像係一個女仔同我講依堆說話。

「最高級就係做援交同ptgf，出吓街睇吓戲使費對方出之餘斷鐘計都千幾二千銀一次。啱feel嘅可以爆埋房，我收緊三千幾。你個下巴就嚟跌喇。」圓圓伸手幫我托返起。

「你⋯⋯唔驚出事咩？」

圓圓天真無邪噉望住我：「出事？會出咩事？我會叫客人戴套，我自己都有食開藥，無噉易中嘅。」

「我唔係指依樣⋯⋯係其他嘢，被人公審呀嗰啲喎。」我想像唔到被人爆自己上網嗰種壓力有幾大，仲要日日提心吊膽，因為唔知邊日會有個唔抵得你嘅人突然出手。

喺連燈見到自己係我今世人最大嘅噩夢。

「就算唔做嘅人都會無啦啦被人公審架啦，我一向橫眉冷對千夫指嘅，被人講吓有咩大不了？仲幫到我宣傳㖭。」

佢嘅思想真係同佢個純情樣完全唔夾，如果我唔係一個噉開放嘅人，可能已經同佢喺某啲位嘈起上嚟。

我向來主張揀咗嘅路唔好後悔就得，圓圓揀嘅路又影響唔到我，我自然唔會去批評佢。依個世界大把女人會噉做，只係大家選擇唔同，而已經唔喺同一條路上嘅人，你點叫佢都唔會行返去你嗰條路。

「依幾款生意，你想做邊樣呀？」

「我想賣衫。」

「好呀，噉你返屋企執一執啲底衫褲——」我截停圓圓：「著喺外面嗰啲衫。」我拉一拉自己衫領。

圓圓睇嚟行家嚟喎

各位姊妹唔好亂咁做啦，屌你老母樓主

圓圓呆一呆：「賣衫？賺好少架咋喎。」

「我成個計劃係想借你嘅粉絲數目做宣傳，你幫我引到人就得，每件賣得出嘅衫我會分返三成利潤畀你，你覺得呢？」

佢摸住下巴，眉頭深鎖：「點解唔賣相同底底嗰啲呀？好賺噉多。」

「如果純粹跟好賺嘅邏輯，係咪應該走粉賣毒品？」

圓圓即刻耍手擰頭：「噉唔得，犯法架嘛。」

「法都有兩種，一種係社會公認嘅法律，另一種係心入面嘅法律，人人都唔同。二手底褲我都會考慮吓，賣相援交就過咗我心入面條界，所以我唔做囉。」

心入面嘅法律有一百個人就有一百套，對虔誠嘅基督徒嚟講婚前性行為係犯法，對素食者而言食肉係犯法，大家有大家嘅選擇，無話啱定錯。只要唔好逼對方揀你個選擇，可以的話就尊重對方嘅選擇，噉就夠晒。如果真係無辦法接受，唯一做法就係斷絕關係。

要改變一個人實在太難，又吃力不討好，留返啲時間改變自己好過。但我唔改變對方嘅同時，都希望對方唔好試圖改變我。

「援交我都明。但賣底底同相，性質上都係一樣啫？」

「我唔慣被人睇自己身體囉，感覺好怪。」被男朋友睇就得。

「你幻想埋依部分呀？噉賣底褲班友仔都會聞同拎嚟打飛機架喎。」

「無丫，佢哋嘅幻想對象唔會係我咪得囉。」一諗到自己個樣同全裸出現喺一個我唔鍾意嘅人嘅腦入面發洩性慾就覺得成身起晒雞皮，我真係接受唔到。

「噉依啲無得避免架喎，行行下街都可能被人望住記低你個樣，返屋企再諗住你嚟打飛機。」

「但唔係我主動造成架嘛。」主動造成叫抵死。

圓圓諗咗陣，點點頭：「我都明嘅，不過有錢唔賺就笨實啲囉。」

「調返轉我叫你走粉，你唔做，我都係覺得你有錢唔賺架。」

「又好似有啲道理喎。即係賣相對你嚟講就等同我心目中嘅走粉？」

我向佢比出大拇指：「全中。」

女主角講得好好

圓圓微微挨後，睇得出佢對我賣正常衫褲無乜興趣：「但就算分三成畀我都唔係多錢啫。」

「如果單件計梗係唔多，但可以賣嘅數量點都多過你要用一段日子先可以出貨嘅二手底底吖。」

我就好似面對緊炒股賺快錢之後，覺得每秒鐘賺錢多過打工嘅股民。如果炒股真係賺到少少錢嘅散户，都會出現一種睇唔起正職嘅心理，因為比較之下正職嘅收入唔夠炒股多。

我唯有用另一個角度切入，重新燃起佢對依單嘢嘅興趣。

「仲有喎，你賺到嘅錢唔完全係你架，一個唔覺意要賠返畀人。」

圓圓露出疑惑嘅神色，我知我喺佢腦入面勾起咗個問號，可以開始畀套震撼教育佢。

「我問你吖，咩錢先係你自己架？」

「咩錢？我賺返嚟嘅錢咪我自己架囉。」

我搖搖頭，唔出聲等佢再諗。

「噉⋯⋯私己錢？」

「錯。」證明佢真係無財務知識，不過我都係借公公教我嘅概念現學現賣啫：「賺到嘅錢唔係你架，你守得住又用得到嘅錢先真正屬於你。」

「點解要守住啲錢呀？邊個會嚟攞呀？」

圓圓問問題嗰陣真係好可愛，傻更更嘅樣加少少八字眉，我係男人真係被佢迷死。

啲𡃁妹太天真喇

「政府。」

「吓？」

「你做生意都要交稅架嘛，睇你個樣噉耐以嚟都無報稅啦？」

「要架咩？」

「點可能唔使呀？你依家未去到買樓買車嘅階段就可以，但最終都係要買資產，唔通你想賣底底做一世咩？你三十歲、四十歲仲有幾多人要？六十呢？你又唔係鮑姐。佢就話有棋靈王要啫。」

「噉⋯⋯我又無諗到噉長遠喎。」

「你算係做緊生意架喇，一個唔好彩畀稅局睇中可能叫你交返一大筆罰款架。」

「噉⋯⋯點算呀？依啲真係唔講唔知喎。」

「所以我先同你提合作，我賣衫分三成畀你之外，之後嘅生意收入支出都用公司正正式式噉做，就咩都唔使驚啦。」

「噉你咪好蝕抵？畀錢我仲幫我。」

「噉我要借用你嘅平台同科勞牙人數做宣傳，梗係要有返啲對應嘅嘢提供畀你啦。」

圓圓恍然大悟噉點點頭：「具體應該點做呢？」

「我會去揀衫，買完就由你著同影相放上去，人哋覺得靚自然搵你買，到時你再彈畀我等我處理訂單畀錢同寄貨就得。」

「噉好簡單啫。」

「係呀，但你影完相就坐定定個個月有錢分喎。」

「噉聽落又真係無得輸，就噉話啦。」

我醒起仲有一樣嘢要圓圓幫手：「係喇，你介唔介意幫我出個post問吓有無人需要補習呀？」

「無問題吖。」

「但記得講，係由唔合格補到合格。」

「喔，好呀。」

女主角真係開善堂

圓圓即刻就幫我宣傳，以佢嘅粉絲數目當然有更加好嘅效果，本身我只係差三個學生，佢一講完好快就有大約十個人搵佢了解下。比我預期中少人，但都好正常，佢個帳號本身就唔係賣依樣嘢，就好似你間舖明明賣玩具無啦啦又賣個護膚品廣告噉九五搭八。

但係你間舖夠多人去，就點都會打中一兩個對護膚品有興趣嘅人。喺適當嘅舖頭賣適當嘅產品先可以將利潤最大化，我雖然識依個道理，但又點諗到之後同圓圓嘅生意都係做錯類似嘅嘢吖？不過依家唔講住，遲啲先再講。

好，我嘅計劃終於上軌道。依十個人入面又有五個可以夾到時間同地點，我決定一個人接晒嚟做。

我將八個學生分成星期六日各四個，再將地點比較近嘅學生放埋一齊，一個接一個，每個兩粒鐘，連埋坐車食飯大概用十個鐘頭搞得掂。

噉我就確保咗每個月有九千二百蚊補習收入，已經夠我還錢。另外三份兼職我都繼續做，賺埋嗰三千八百每個月無病無痛差唔多三千蚊淨，噉我就可以有錢儲之餘分一部分出嚟投資同做生意。

終於解決咗一個大難題，可以安安心心噉休息吓。

辛苦晒女主角
媽媽果然好偉大

「點解你要谷到自己噉盡呀？好等錢使？」

我同圓圓講咗成單嘢，我點樣識阿軒，幫佢搞返起間酒吧到被佢背叛，依家打緊三份工⋯⋯聽到圓圓眼都突埋。

「唉，所以話男人真係無個好。」

「你又被人跣過咩？」

圓圓哈哈大笑：「無囉，聽吓都驚啦。即係你無見過鬼，但聽人講得多撞鬼係點，自然會驚埋一份。」

「我都想訪問吓你，你援交嗰陣有無沉過船？」

佢即刻耍手擰頭，好似聽到啲荒謬理論噉：「無啦，其實我都唔知咩叫做愛。呀，做愛知，愛唔知。」

圓圓話佢由細到大都唔知點先算係愛上一個人，從來都無一種好強烈嘅感覺，男人對佢嚟講只係畀錢佢嘅交易對象。

「可能喺我眼中已經將男人依個物種同變態畫上咗等號，同埋聽咗太多故仔，有啲客結咗婚都去叫雞，我對佢哋唔會產生任何『信任』嘅概念囉。」

真正嘅愛係要真正嘅信，無辦法相信人，就等於無辦法愛人。圓圓眼中嘅男人就好似曱甴一樣，見到依個物種就自然唔會有好感。就算佢哋實際上唔係噉，依啲偏見都已經阻礙咗圓圓愛上男人。

但愛上男人又有咩為？睇吓我嘅下場就知，愛帶嚟嘅傷害仲大，倒不如一開始就唔愛。

「你應該好好用你依家個優勢，同多啲男人講你嘅故事。佢哋成日都想自己做拯救女人嘅英雄，你噉慘實會引到一大堆狗公對你好架。噉你經濟上好多負擔會細好多。」

圓圓數著手指：「如果你搵到五個男人對你好，講到你依家嘅困境，佢哋九成都會睇唔過眼畀錢你使。信我，男人我好熟，佢哋會想用錢救你，每人每月二三千，你一個月都多皮幾嘢用，即刻解決晒你嘅問題！」

佢講得好興奮，雙眼發光，聽到我笑咗出嚟。

「真係被你計到盡喎。」

「梗係，男人好享受畀家用女人使嘅虛榮心架。如果泊到個有米仔，直接做富婆唔使做㖭呀。」

「然後又等被人抛棄。」

圓圓呆一呆，我就繼續講落去：「我依家返幾份工同諗吓啲生意仔做，就係唔想再靠人，我想靠自己解決經濟問題。我又唔係賣嘢畀佢哋，即係佢哋嘅錢係施捨啦，噉我其實同乞衣無分別，只係高級乞衣。」

而且人係有惰性，如果我容許自己鬆落嚟依靠外人嘅施捨，我一定會漸漸依賴依種不勞而獲嘅輕鬆賺錢方法。人一習慣咗不勞而獲就會不思進取，個人價值隨時間下降，最後都係會淪為一條無人要嘅毛巾。

公公講過，有啲人賺錢其實無提供過任何價值，甚至連點做生意都唔使諗，只係用咗小小已有優勢、榨取依種優勢去賺錢。

依種人大部分都賺唔到大錢，賺到都會一個浪冚埋嚟就蝕晒，因為佢哋根本無鍛練過解決問題嘅能力。只有好小部分好好彩嘅人先會賺到錢又守得住。

圓圓就係不停榨取自己外貌優勢嘅人，到有一日佢失去依種優勢，可能到四十幾歲嗰陣被人抛棄的話，之後就會好慘。

當然啦，佢好彩泊到個金龜碼頭人哋又同佢一生一世就咩事都無，但將自己嘅人生交畀好彩同運氣，經過阿軒件事之後我真係做唔到。

「我太驚將自己嘅人生交去外人嘅手，所以我要靠自己。」

最後就係我個人嘅小小執著，我覺得如果唔係靠自己成為有錢人，一切都無意義。

人一習慣咗不勞而獲就會不思進取，個人價值隨時間下降，最後都係會淪為一條無人要嘅毛巾

至理名言

真係大家都好應該睇下呢個故

今次真係最多負皮

我想同我嘅小朋友講返以前媽咪係點樣解決問題，一步一步改善自己嘅生活，我想教佢做一個唔好放棄嘅人，而唔係話：「係呀當年媽咪好辛苦，好彩有你個有錢爸爸先無事。」令佢變成一個將人生依賴外人嘅人。

雖然噉揀係辛苦，喺唔少人眼中係蠢，但我就係想噉揀。

我同圓圓交代咗少少之後嘅安排，我希望依家補習返工大概兩三個月左右，所有嘢上咗軌道同穩定咗之後就正式合作。依段時間我除咗返工，會去開埋公司同公司户口，做足準備之後就再通知圓圓正式搞網店。

老實講，陀住個胎我都唔知依種高強度嘅打工生活自己捱唔捱到。雖然精神上我有信心，但身體有時真係唔輪到我話事。

希望身體生生性性畀我捱到開網店，噉就可以舒服啲。到網店賺到一定利潤，我就可以逐漸辭工，目標係一年後唔使打三份兼職先。

當然現實唔會畀你好過啦，點會估到一開網店就出事吖，做生意真係唔係噉易架葉師傅。