是咁的，廿一歲有咗，所以我要做有錢人

早咗入嚟仲未到高潮位，留住名先

我淨係知你晚晚都係咁姐

留名女主角幫軒哥搞旺咗個架步

Code

阿軒即刻成個人定咗格，可能因為拍咗幾個月拖都未聽過我噉講嘢，有啲錯愕。

「你都未做過生意，你點會明我面對緊乜嘢呀？」

「邊個話我未做過生意呀？我小學嗰陣已經做生意賺錢架喇。」

依家諗返，原來我同阿軒拍拖幾個月，都無好好同佢講過我嘅過去。同樣阿軒亦有好重要嘅過去無同過我講。

「你啲小學雞生意點同我間酒吧相提並論呀？」

「有咩唔同？做生意嘅基本邏輯係相通架嘛！」

「係呀係呀，你做生意係咁叻一早發咗達啦，使鬼好似依家咁窮咩。」

阿軒依句終於踩到我條尾，仲踩到應一應：「因為我要養埋媽咪呀，你估個個好似你噉唔使理屋企呀？」

阿軒聽完，面色一沉，我亦即刻知道自己講錯嘢：「對⋯⋯對唔住⋯⋯」

阿軒父母喺佢細個已經離咗婚，佢由細到大都同媽媽相依為命，亦因為依個背景我同佢先有同病相憐嘅感覺。可惜佢媽媽因為捱得太辛苦，睡眠不足唔小心過馬路搞到被車撞死。

無論點，我都唔應該咁講嘢。

阿軒一定好嬲，但佢忍住咗，輕嘆一口氣就算數。不過成個約會，佢一粒聲都無出過。

之後就出現第一次失蹤，我應該當時就要醒水，阿軒處理問題嘅方法好有問題。佢唔開心嗰陣會直接人間蒸發，無人搵到佢。

嗰陣點會估到，最後一次失蹤，佢就無再出現過，留低我同肚入面嗰個面對殘酷嘅現實。

我去過佢屋企，又去酒吧都搵佢唔到。

酒吧更加係七國咁亂，因為臨近月尾要埋數同出糧，無咗個老闆出糧可想而知幾大鑊。

最重要係日日清人工嘅兼職，佢哋無人工就唔會返嚟，結果得返調酒師一個喺度，但又得佢一個處變不驚：「佢成日都係咁，到時到候又會出返嚟。」

我嗰幾日好似靈魂離開咗身體咁，最主要擔心佢人生安全，無論我點喊點搵佢，佢都好似個黑洞咁將所有聲音同希望呑噬，毫無回應。

每晚都好夜先瞓得著，因為驚佢半夜搵返我。攰到頂唔順瞓著，又會晨咁早紮醒，睇手機望佢上線未，真係好煎熬。

終於，我為咗令自己忙啲攰啲，我直接踩落酒吧，將佢酒吧嘅生意直接接手。

「畀晒酒吧入面所有文件畀我睇，我要知幾多人卜枱、落咗咩貨每月營業額幾多每月成本幾多，有幾多嘢畀幾多嘢我睇。」

好彩調酒師知我係阿軒女朋友，都叫所有員工盡量配合，有幾多記錄盡量搵畀我參考。散工兼職出糧方面由我出錢頂住先。

我出馬重新令酒吧正常運作，之後就開始諗計點樣增加生意。酒吧盤數淨係交租人工水電煤入貨同雜項支出已經幾乎蠶食晒每月收入，此外仲有一項還債嘅支出。

「依啲係阿軒周轉唔嚟嗰陣借嘅財仔嚟。」

阿軒咁辛苦搞酒吧，但實際上每月收入仲低過一般打工仔少少。

筆財仔利息太高，利疊利滾落去好快就會壓跨酒吧嘅所有生意。可以話阿軒開酒吧其實係變相養緊班大耳窿。

首要嘅任務係清咗依條數先，唔係過多一年半載阿軒間酒吧就執笠，執咗仲要爭人一身街數，人生一定玩完。

意識到阿軒一直以嚟承受幾大壓力嘅我覺得好內疚，而更加有決心要幫佢解決酒吧嘅問題。

女主角果然有料

「點解佢唔借低息貸款？」

「唔係咁易架葉師父，佢信貸評級花晒，仲邊有人借錢比佢吖？有頭髮無人想做癩痢，佢一開始都係借低息貸款，但借下借下就搞到要問財仔，唔到佢揀。」

咁即係話，要救佢一定要由我以損害自己嘅方式作為出發點，但為咗阿軒我唔介意。

嗰陣我多年嚟嘅生意賺埋嘅積蓄外加長線投資嘅股票大概可以還到半數，另外一半我就以個人名義借稅季低息貸款還埋佢。

第一次見嗰位大耳窿，係調酒師陪我，約喺酒吧見面。

大耳窿叫輝哥，係個猥瑣又蛇頭鼠眼嘅麻甩佬，佢見到我啲錢，嚇到差啲坐唔隱。

「哇，軒仔發咗達呀？」

「依度係阿軒差你條數，你點點佢。」

輝哥叫手下點錢，然後好奇咁打量我：「軒仔叻仔吖，估唔到條女咁索，仲咁疊水。」佢左右望吓酒吧：「唔見佢嘅？又失咗蹤呀？」

我無答佢。一來我第一次見黑社會，心底仲驚緊，二來我知道講愈少嘢，透露愈少情報，我哋就愈安全，所以盡量沉默寡言。

「咁佢返嚟叫佢再搵我啦。」

我反而有啲疑惑：「點解佢返嚟要搵你？」

輝哥瞪大眼望住我，然後忍唔住大笑：「哈哈哈！阿妹，你唔係軒仔條女咩？點解你會唔知佢去咗邊架？」

見我唔出聲，輝哥繼續講：「過大海呀，佢係賭仔係人都知架啦。你唔係以為好人好姐會搵我借錢下話？」

我望向調酒師，佢擺明身有屎瞞我，心虛之下唔敢正眼同我對視。

手下同輝哥講啱數，輝哥叫佢哋收好啲錢入袋。

「阿妹，咪話阿輝哥我唔提醒你，無底深潭嚟架，你幫得佢一次幫唔到佢兩次架，及早掟煲好過啦。」

「多謝關心。」

「事先聲明呀，有日佢還唔起債嗰陣，我就賣你做雞填數架喇。」輝哥對眼掃向我個胸同腰，搞到我打咗個冷震。

「放心，我確保佢唔會再問你借錢。」

輝哥走到我身邊，手捉住我下巴，泛黃嘅指甲有淡淡嘅煙味：「可能你要借呢？嗱，依張我卡片，要錢咪搵我囉。」

輝哥放低卡片，見我一個廿歲𡃁妹可以噉冷靜，可能覺得唔好玩，終於放手：「幾好吖，平時啲女我行近兩步都驚到瀨尿，你唔止清咗條數，仲噉氣定神閒，阿叔睇好你。」

輝哥轉身帶埋手下走咗，而我亦終於鬆咗口氣。

我望向調酒師，佢嘆咗口氣：「對唔住呀，阿軒叫我唔好同你講架。」

「即係真架啦？」

調酒師點點頭：「唔係咩興香嘅事。至於詳情⋯⋯佢返嚟嗰陣你自己問佢啦。」

「唔使你講我都會。」

我將阿軒差落嘅大耳窿替換成低息貸款，由本來十幾厘息變為兩厘幾，每月還款額大大減少，所以阿軒可以落袋嘅錢增加咗唔少。

反之我就無晒積蓄，我嘅名義上亦多咗一筆稅季貸款要還。諗返起，其實都係我自己一手一腳逐步推自己上絕路，阿軒嘅中出中獎即飛只係催化劑。

問題係當時仍然深愛阿軒嘅我，覺得以自己嘅能力同籌碼去幫男朋友係天公地道嘅事。我唔係話唔應該捨身幫人，而係真係要睇清楚對方係咩人先好幫。

同埋無論幾時都要做好風險管理，幫人都要喺自己能力範圍內幫，當對方愈踩愈深，問題就慢慢累積到超出能力範圍，嗰陣時無論如何都應該抽身。

解決錢銀問題永遠都係靠開源節流，節咗最大筆嘅財仔流，就輪到開源，要諗吓點樣幫酒吧增加生意。

一間樓上酒吧唔似街舖有天然嘅人流同宣傳效應，所以要令酒吧接觸到更多潛在客戶係首要目標。

同時亦要搵出酒吧嘅特色之處，同其他酒吧有咩唔同。酒吧一大特點在於調酒師調制嘅獨家雞尾酒，阿軒間吧都有，同時佢調嘅酒用到嘅材料平、好味又特別、定價高，係最賺錢嘅飲品，只係太少人知。

軒哥前世係咪拯救咗世界？今世先有咁完美嘅女朋友

好彩調酒師向來都熟知阿軒嘅酒譜可以複製出嚟，第一樣著手嘅係為酒吧設計新嘅餐牌，將特色雞尾酒放喺開頭，加啲「調酒師推介」之類嘅字眼，令入得嚟嘅客户都有機會睇到招牌雞尾酒，增加佢哋落單嘅機會。同時亦要將酒重新定價，降低招牌酒嘅入場門檻。

「吓？咁咪賺少好多？」

「招牌菜係用嚟吸引人，唔係用嚟賺錢。正如麥當勞嘅漢堡包其實唔賺錢，真正賺嘅係配菜、薯條、蘋果批依啲產品，而最賺錢嘅暴利係飲品。」

所以我借用相同模式，但逆向操作。以招牌雞尾酒吸引人，再喺餐牌加上雞尾酒嘅「最佳配搭小食」，真正賺錢嘅產品其實係旁邊嘅小食。

「咁咪要入材料？」

「唔係我慳返筆財仔利息做咩呀？多出嚟嘅錢就係噉用。」

我親自落場試唔同嘅酒配咩小食最有特別味道，當堂肥咗幾磅，但的確係會搵到一啲同特定雞尾酒相配成獨特味道，從而令餐牌上嘅推介唔係「齋吹無料到」。

兩個禮拜之內，我馬不停蹄瘋狂處理酒吧內嘅舊問題、新方向，幾乎反轉咗阿軒間酒吧咁濟，務求做到會入嚟嘅客人都可以幫酒吧達到利潤最大化。

搞好內部，就到宣傳。做好產品之後一定要做宣傳，但無錢無資源，點宣傳？

btw麥當勞漢堡包都好賺錢

最賺錢都係⋯⋯地產

當我每日都好忙，處理緊酒吧生意嘅時候，我可以暫時忘記阿軒失蹤為我帶嚟嘅痛苦。

不過就喺酒吧依我嘅模式運作咗三日之後，阿軒終於返嚟。

阿軒返到嚟嗰日係夜晚，直至出現喺酒吧。可能佢無諗過我會喺度，嚇咗跳。

「返嚟喇咩？」

我哋喺燈紅酒綠嘅酒吧再次見面，今次背景嘅雜音比較多，因為客人多咗。

「對唔住。」

「出去傾下？」

阿軒點點頭，我將工作交帶畀兼職同調酒師之後，就同阿軒去咗露台。

阿軒點咗煙，我亦留意到佢返嚟嗰陣，身上已經有淡淡嘅煙味。

「我都唔知原來你食煙嘅。」

我哋之間好似有好多嘢要講，但根本諗唔到點開個頭好，結果就用眼前發生嘅事做話題。

「我係消失嘅時候先會不停食。」

「返咗嚟，係咪會唔食？」

「未知⋯⋯」

一陣令人尷尬嘅沉默之後，我都係忍唔住單刀直入嘅衝動：「點解你消失咗咁耐？知唔知⋯⋯知唔知我幾擔心你⋯⋯」

諗起依兩個星期自己點捱過去，就悲從中來。應該無一個女人係自願撐起半邊天，通常都係被逼。

尖沙咀間鋪可以話係經典案例

文呢文呢

LM

精子可以同精子結合咩？

金仔 文呢

唔好意思，小弟重病，依家好啲，繼續更新！

「對唔住⋯⋯」

「可唔可以唔好淨係講對唔住⋯⋯」眼淚一粒一粒湧出嚟，阿軒唔忍心見我喊，彈走手中嘅煙頭，抱實我。

「其實我走咗之後，第一日已經想返嚟。但我知返到嚟就要面對你，你會問我去咗邊，你會好嬲，你會喊，你會鬧我⋯⋯」

阿軒話，愈係噉諗，就愈難面對。而拖遲一日，感覺問題又會更大更多，由第三日開始佢就無辦法想像見返我會點，有幾多嘢要交代。

慢慢，就完全唔想返嚟。

「我真係好想⋯⋯好想好想，返到嚟之後，你同我講⋯⋯你點呀？我會答，幾好啦，你呢？你就答，你都幾好，問我攰唔攰，我話攰，你就陪我瞓。臨瞓嗰陣，大家講早唞，我會錫一錫你額頭，話我愛你，之後就好似咩事都無發生過咁繼續生活。但我知道⋯⋯係唔可能噉發生架⋯⋯只要我返嚟，同你再面對面，就只有質問⋯⋯道歉⋯⋯」

我靜靜聽住阿軒嘅一字一句，覺得心口有種被鬱悶壓抑嘅感覺。

的確如同佢諗嘅一樣，佢想發生嘅事唔會發生。

「噉⋯⋯你問我啦。」

阿軒有啲錯愕：「咩意思？」

「既然你唔想我問，噉我就唔問。只要你依家安安全全無穿無爛返咗嚟我身邊就夠喇。依兩個禮拜發生咗咩事，你唔想講我就唔會問。」

我擦乾面上嘅淚水，用力深呼吸，之後伸出手向阿軒展示酒吧內嘅環境：「不過你見到依家改變咗嘅酒吧，可能會想知依兩個星期我發生咗咩事。所以，你問我啦。」

我向阿軒展露微笑，希望佢可以安心。

女主角今次真係對條仔太好喇