是咁的,廿一歲有咗,所以我要做有錢人

288 回覆
84 Like 465 Dislike
2023-06-03 23:39:58
「就結果嚟睇,你今次嘅經歷係必須嘅。」

公公話,賺錢唔係錯,但重點係我嘅貨源點得返嚟。

學校嘅酒精搓手液,係學校畀錢買,為咗所有同學都可以使用,特登免費供應。

酒精搓手液同蒼井空一樣係大家嘅,我一個人拎咗去,大家都無得用,得返少量畀得起錢嘅人用,就會變得唔公平。

公公讚我嘅生意頭腦,但嚴厲咁指出我真正嘅錯處。

公公係我嘅Uncle Ben,無咗佢同我講能力愈大責任愈重,我就會淪為一個賺錯錢嘅生意人。

點都好,後來多得公公嘅教育,我好早就比一般人更加知道點樣可以賺錢。

好多人唔知道,窮人同有錢人最大嘅分別在於對金錢認知上嘅偏差。

窮人以為工作就係收入來源,錢就等於工作。
但有錢人知道,錢等於解決問題。當你為世人解決到一個問題,錢就會嚟。

只係一個咁簡單嘅認知差異,就令大家做生意嘅成效有天淵之別。

每一種生意,都係幫人解決問題所以賺錢。

先唔好理競爭,返去早啲嘅時代,快餐就係解決咗人類對「方便、快捷、平」嘅需求問題先會賺錢。

就係咁簡單,我學咗依個概念,又已經躍躍欲試,想喺小學大展拳腳。
2023-06-04 00:01:46
沉寂咗一年之後,我小四嗰年又開始做生意。

嗰時小食部久唔久會推出自家製鮮忌廉包,非常好賣,已經係手快有手慢無嗰種。

我講過小賣部向來先到先得,班餓狗搶屎咁嘅小學雞係唔會排隊。

我考察過四至六年級十二班,逢星期一至五小息前喺操場上體育堂嘅班,佢地係最快可以買到忌廉包嘅人。

我透過再三游說,成功搵到兩個合作伙伴,每星期可以做兩日生意。大牛雞仔同我一樣唔係太有錢,所以每次幾蚊利潤成功吸引到佢地同我合作。

鮮忌廉包賣四蚊,我收七個半,個半係比跑腿嘅報酬。

解決同學們「想食鮮忌廉包但買唔到」嘅問題,錢就會嚟。
2023-06-04 00:37:10
我開檀標榜百分百成功搶到忌廉包,第一日就收到八張單,六十蚊事成我就會收到十六蚊。

相比以前無本生利係賺少好多,無法,始終有咗成本。

非法生意永遠都係暴利,而合法生意通常好難做到,就算有,都好快會吸引其他生意人,真正賺大錢嘅時間實在唔多。

第一日係成功咗嘅,班同學仲當我神咁拜,個個爭住問幾時再有得賣。

我都覺得自己好成功,距離做百萬富翁真係不遠矣。

但第二日返學,我知又出事。

我由嗰時開始就好憎學校,但公公話所有大組織都係一樣,你做嘅生意影響到佢地嘅利益,或者影響太多人嘅利益,規矩就會嚟限制你。

第二日小食部前,棟咗塊牌寫住:
「每人限購一個。」
2023-06-04 04:31:19
2023-06-04 11:02:09
好耐冇見!未睇先留名
2023-06-04 11:22:54
因為ig同Penana都有Po,本身唔諗住擺連登
2023-06-04 11:23:11
好耐冇見!多謝支持!
2023-06-04 11:24:15
面對同學排山倒海嘅期待,我只能同佢地講接唔到生意。

佢地好失望,紛紛話我無料到。你班白痴係咪睇唔到塊牌寫乜呀?

結果我檔生意一日就收皮,有咗成本已經賺得少,仲要搞咩限購令。

我好頭痛,好想賺多啲錢,但我睇唔到新嘅機會。

直到有一次放學去同學屋企玩,畀我發現佢屋企樓下間餅店竟然都有鮮忌廉包賣。

而且佢住土瓜灣區,物價相比外面更平,個包只係賣兩個半。

重點係味道同學校嗰款係一模一樣!

我即刻同個同學傾合作,心中又已經有個發達大計。

問題係我同學都係女仔,唔想拎住袋包返學,亦唔覺得賺錢有乜咁好,於是我只好自己嚟。

我計過數,每朝早啲起身唔係問題,餅店亦為咗做早餐生意通常六七點就開門,我最大嘅成本只係搭多兩程車。

我係小學生,有半價,兩程先等於一程,但講緊會用咗六七蚊出去。

成本價兩個半,而七蚊係固定成本。如果以我目前有嘅資金,十六加零用錢都係廿六,買唔到幾多個。

後來我大個咗學期貨概念學得好快,主要係因為我小學嗰陣已經盲中中用過。

既然資金不足,就賣「未來嘅忌廉包」。
2023-06-04 11:26:14
唔係好明 即係呢個故事係純粹老作?
2023-06-04 11:31:36
參考咗幾個女性嘅創業故事再加老作
2023-06-04 12:12:21
「點會仲買到呀?」同學仔對我抱有懷疑。

「係咯,寫明每人限賺一個架嘛。」

我學精咗,無再將商業機密講畀外人知:「總之信我啦,我一定買到!」

同學仔對我半信半疑,好多人都想睇定啲,所以第一日得三單生意。

我將價格下調到七蚊,於是有二十一蚊加廿六嘅資金。

第二日我一來一回買咗六個忌廉包,反正總有需求,四十七蚊用咗七蚊車費,十五蚊成本,仲有二十五蚊落袋。

賣多三個七蚊出去已經又多廿一蚊。

但今次我無咁好彩,出師未捷身先死。
2023-06-04 13:37:32
事關當時係夏天,買完鮮忌廉包返到學校,等到小息先開賣,但我發現啲忌廉發臭。

「搞錯呀,賠錢啦。」

商業世界就係咁,從來都無人情味。

我淨低嗰廿五蚊要賠返三張單,即係廿一蚊畀人。

朝早仲諗住有四十幾蚊落袋,點知轉個頭就得返四蚊淨。

嗰日放學,我坐咗喺禮堂後樓梯喊,望住嗰四個大餅,覺得前路茫茫。

其實諗返轉頭,嗰陣我都無負債,同依家要面對嘅情況相比真係小巫見大巫。
2023-06-04 15:14:19
2023-06-04 21:30:48
不過公公話過一個生意人好多時都會 經歷四次破產,我都未破產,仲有希望。

於是我又再去土瓜灣間餅店。

公公話過生意失敗投資失利係唔緊要,最緊要係有無從中吸取教訓。

如果失敗後唔反思唔學習,咁就係無價值嘅失敗,依啲失敗累積幾多次,都只係單純嘅失敗。

即係好似愛迪生如果用完鐵嚟整燈膽,失敗完都唔知道「鐵唔用得」,咁佢嘅電燈膽研究就永遠唔會成功。

我要知道自己做錯乜嘢,所以再次去做實地考察。
2023-06-04 22:31:37
金仔
2023-06-04 23:03:05
Halooo
2023-06-04 23:17:28
好耐無見!金仔
2023-06-04 23:23:45
迴響都有。。。
2023-06-04 23:57:51
好耐冇見!
2023-06-04 23:58:38
因為星期六迴響有個活動,所以得到佢哋同意之後放埋上嚟依度做宣傳
2023-06-05 09:01:58
好耐冇見 之前ig見到但係唔慣睇圖就冇追到
2023-06-05 09:42:27
始終兩個平台嘅睇故體驗好唔同,不過幾邊都會繼續嘅
2023-06-05 09:44:50
當日我試咗一嚿鮮忌廉包就大腦過熱,被吸引到即刻投資去做,依種感性騎劫理性分析嘅錯唔可以再犯。

講係咁講,但後來都係犯咗,唔係就唔會被人搞大個肚。

我自覺喺做生意上可以做到完全理性,所以亦以為自己喺愛情上都好理性。

人一唔識反思自己,到頭嚟都係自己受害。

講返當年,我再去餅店觀察,就發現間鋪頭賣唔出嘅鮮忌廉包會擺到第二日賣。

最長甚至會賣到第三日朝早。

而我就係唔好彩買咗最後一轉貨尾,加上天熱又拎住啲包返學等等,令本來質素已經有問題嘅包更易變壞。
2023-06-05 11:47:21
2023-06-05 22:59:01
問咗老闆就知道,每個星期一朝早嘅包係最新鮮,之後就係星期四下午嗰轉。

嗰日我用完最後嗰幾蚊搭車去土瓜灣,無錢返屋企,最後徒步行返去,結果好晏先返到屋企,對腳好痠,但我知道一切都值得。

做好適當嘅調查之後,我又收到十蚊零用錢,可以東山再起。

我設定星期四為開張日,做好星期五嗰轉生意先。

但問題又嚟,以往兩次忌廉包生意失敗令我嘅風評好差,大家都話我啲包又貴又臭。

結果開咗兩星期檔,一單生意都做唔成。

我無亂用自己嘅本錢,二十蚊零用掂都無掂過。

再繼續無客人唔係辦法,一定要諗下點樣令班同學再次相信我嘅品牌。

比著以前,我會喊住問公公點算,但依家我學識咗控制情緒同問啱嘅問題。

「貴係價格嘅問題,臭係商譽嘅問題。前者易解,後者一係花時間重建,一係就靠你嘅觀察力嚟解決。」

公公有時會突登唔講到明,逼我思考,所以我當時只係理解到前面兩招。
吹水台自選台熱 門最 新手機台時事台政事台World體育台娛樂台動漫台Apps台遊戲台影視台講故台健康台感情台家庭台潮流台美容台上班台財經台房屋台飲食台旅遊台學術台校園台汽車台音樂台創意台硬件台電器台攝影台玩具台寵物台軟件台活動台電訊台直播台站務台黑 洞