是咁的，廿一歲有咗，所以我要做有錢人

咁快有狂蜂浪蝶

我已經習慣咗點樣面對喺酒吧遇到而又無興趣嘅男仔同男人。

「咁好架咩？我點報答你啊？」向佢哋微笑，哪怕我唔想笑。

「你話啦，你咁靚。」

「畀你坐我隔籬囉。」

佢哋問我電話，我通常都會畀，但返到去覆唔覆就另一回事。男人嘛，如果你好強硬咁對佢哋，尤其酒吧都唔知會得罪邊個，最好都係扮接受咗佢哋先。

就算無心情應付，都係要應付。好似返工咁，失戀老闆都唔會理你，總之做好份內事，個世界係咁架啦。

我就係無幾耐前試過得罪人，依家先會學乖。已經無再去嗰間酒吧，費事又撞到條爛仔啦。

嗰次係酒吧經理出手打圓場我先無事。

見過鬼我就怕黑，以後都係採取畀完電話，一返到去就萬年唔覆機嘅策略。沖涼依招真係好好用，最正係真係會有人以為年沖涼沖成晚。

唔好意思搬屋忙斷咗更新

最正係真係會有人以為年沖涼沖成晚

利申我係，我成日好好奇點解啲女仔沖咁耐涼，點解唔甩皮

好笑又sad

「笑咗，要溝你都幾難喎。」

喺污煙漳氣嘅酒吧面對狂蜂浪蝶只可以戴起個微笑面具應酬，唯獨對住調酒師阿軒先可以放鬆吓，傾吓我平日點樣撚狗公。

「唔難囉，我對佢哋無興趣喳嘛。」

一般我去酒吧遇到爛仔狗公，下次就唔會再去費事又撞到，但依間吧我會照去，主要貪佢真係少人，夠靜。同埋真係遇到死纏爛打嘅男仔，阿軒都會幫我解圍。

佢唔算好靚仔，但著住嘅西裝有少少被肌肉撐脹咗咁，加上總係認真調酒嘅樣好吸引我。我知自己心底已經發緊姣，但係無表現出嚟嘅。

阿軒個髮型比較日系，個樣就算加入嵐做成員都無違和感。明明做酒吧但就有啲文青氣息。

有肌肉嘅文青，但又唔係特登操爆肌嗰隻，好啱我心水。我其實超驚啲筋肉人，如果拍拖激嬲佢好似可以一嘢擰甩我個頭咁。阿軒就唔同，佢嘅肌肉量啱啱好畀到安全感我。

「你嚟咁多次都唔見你對邊個有興趣過。」

「吓，我個個都畀電話，你點分？」

阿軒收走我飲完嘅酒杯，瞄咗我一眼：「睇個樣就知你扮嘢。」

睇得穿你戴住面具嘅人，往往特別有吸引力。

我都經常睇穿人哋真面目
結果只有更唔開心

一陣感動湧上心頭：「因為調酒師見客見得多所以知？」

佢擦乾洗完嘅酒杯，直視我，眼神好溫柔：「咁見得多，都要留意先知嘅。」

「你留意我咩？」

「你成日嚟吖嘛。」佢背向我將酒杯擺好，之後忙其他嘢無再望我，唔知係特登定怕醜。

「成日嚟嘅客你都會留意？」

阿軒諗咗諗，雙臂枕喺吧枱，又再次直視我：「唔係架。」

唔知係咪飲咗酒嘅關係，心跳得好快，紅都面晒。嗰刻我哋四目交投，酒吧嘅雜地好似靜晒落嚟，成個世界得返我哋兩個咁。

「你醉喇。」

「我諗都係，今晚都到頂。」我正要拎銀包埋單，阿軒話：「我請你啦。」

我心入面有啲沾沾自喜：「嘩，你又想溝我咩？使唔使畀埋電話你先？」

阿軒忍唔住笑咗出嚟：「你估我係啲狗公咩。」我有啲掃興，仲以為佢會順勢攞埋我電話㖭⋯⋯

「咁你做咩請我？」

「因為我係依度老闆囉。」我有啲驚喜，一直都無諗過原來老闆就喺面前，唔怪得佢成日喺度，原來自己做生意。

我人生第一次，認識到其他做生意嘅人。

「係老闆就要請我架喇咩？你個個客都請架？蝕死你呀。」

阿軒呆一呆，挑起單邊眉毛：「淨係請你，唔會蝕好多啫。」

我得戚咁笑：「咁⋯⋯多謝喎，我有咩可以報答你呀？老細～」

「唔⋯⋯下次嚟話我知你有咩唔開心囉。」

佢嘅要求好特別，但攻勢一浪接一浪，佢因為洗杯長時間接觸洗潔精而變得粗糙嘅手指，輕輕篤一篤我嘴角：「唔想笑可以唔使笑架，知無？」

酒精成為心跳嘅加速劑，我幾乎要暈喇，但又因為聽到依句有啲眼濕濕，即刻擰轉面唔畀佢睇到。

「嗯，走先喇。」

睇嚟軒哥高手嚟

由嗰日開始，我去酒吧嘅頻率就多咗。我同阿軒講咗自己因咩事流連酒吧，公公嘅死對我有幾大打擊，佢一邊做嘢一邊聽。

依間酒吧嘅好處在於少人，夠靜，可能因為我多數閒日去飲，所以阿軒好得閒聽我講嘢。

「我媽咪走咗之後，我都不停麻醉自己。」我感覺到同阿軒之間有深入嘅交流，因為佢都開始講自己嘅過去畀我聽。

「我唔見你飲酒嘅？」

「唔係依樣啦。」

我猶豫咗一陣：「叫雞？」問出口嗰陣我有啲驚，如果佢話係，我會好失望，當堂所有吸引力都無晒。我接受唔到男人叫雞。

「唔係啦傻架咩。我淨係同女朋友上床架咋。」

阿軒答完，我仲失望，唔通⋯⋯佢有女朋友？不過無理由吖，好似佢咁好嘅男仔，無理由會有女朋友架？

我鼓起隨時死心嘅勇氣，試探式咁話：「嘿，有女朋友仲成日同我傾偈，因住我告發你啊。」

阿軒失笑，揑一揑我耳珠：「你邊隻耳聽到我有女朋友？依隻？」

我即刻撥開佢隻手，耳仔已經紅到發熱：「咩啊，啱啱你先話⋯⋯」

「我係話我淨係同女朋友上床，我無話有女朋友。我單身咗一排架啦。」

我個心定咗好多，但唔識點畀反應，搞到氣氛有啲尷尬。

「做咩？睇中咗我呀？知我無女即刻諗點誘惑我？」

「你都傻傻哋。」我將酒杯推畀佢：「飲完喇，洗杯啦單身狗。」

阿軒微笑，手掌擺心口向我鞠躬：「係嘅，單身狗乸。」

正常聽到人哋咁講我應該會嬲，但佢講又嬲唔落。

「喂啊。」

「你塊面又紅晒喇。」

如是者，喺我最唔開心嗰一個月，多得阿軒每一次都令我笑，又令我個心一晚坐幾次越礦飛車，我多少可以從傷心嘅深淵之中分散注意力。

我哋漸漸愈傾愈多嘢，天南地北無所不談，由我做小生意講到中學多人追。

「唔使賣花讚花香喎，我又唔會追你嘅。」

阿軒時近時遠嘅態度令我真係心癢癢咁，有時我覺得我哋下一秒就可能一齊，有時我又覺得佢對我未必真係咁大興趣，係我自作多情緊。

不過當其他男酒客請我飲嘢嗰陣，我偷偷留意阿軒個樣，佢又真係好似呷醋咁架喎，學佛印話齋：「好難捉摸呀！」

直到有一日我去到酒吧，發現調酒師換咗人。

「你係⋯⋯？」

「我？我新嚟嘅。」

「新嚟？今日嚟嘅？」

「嚟咗幾日架喇。」

「阿軒呢？」

個新人上下望一望我：「哦～原來係噉。」

我唔知佢咩意思，嗰刻我個心都跳得好快，但唔係平時嗰種，而係驚同後悔。驚以後都見阿軒唔到，後悔之前一路噉多機會都無同佢交換電話。

「佢賣咗鋪？」雖然阿軒係老闆，但都可以賣咗鋪之後唔再出現。

「噉又唔係。」

「有無辦法搵到佢？你可唔可以畀佢電話我？」

當我慌到手忙腳亂嗰陣，有人拍一拍我膊頭。當我擰過去嗰陣，粗糙嘅手指頭篤住我塊面。

「想要我電話做乜唔直接問我拎呀？」

我一見到阿軒，即刻醒佢一個粉拳：「死仔，嚇死我喇，無啦啦唔見人，以為你著咗草呀！」

阿軒又呆一呆，新嚟嘅調酒師話：「其實我係替工嚟嘅，幫阿軒頂幾日啫。」

「點解要頂幾日？」

調酒師用眼神示意我問阿軒。

「你雖然嚟嘅時間永遠都係咁上下，但每個星期都唔知邊日會嚟架嘛，咪諗住叫人頂一個禮拜，畀個驚喜你囉。」

「咩驚喜？」

「嗱，我今日就搵咗人頂我更架喇，賞唔賞面去食個飯睇場戲咁吖？」

「呵，你又知我係驚喜唔係驚嚇？」

「搏一鋪架咋。我諗我搏中咗啩。」

「你又知？」

「你真笑吖嘛。」被阿軒一講，我即刻揞住個嘴，被人睇穿，真係有好有唔好。

「我假笑囉。」

「咁呀？同我食個飯睇場戲囉，之後就會真笑架喇。」

我終於忍唔住，點咗頭：「咁都被你兜到，好啦，睇吓陪完你我係咪真係會真笑啦。」

阿軒都笑咗，直接就拖住我，拉咗我離開酒吧。

嗰陣我仲未知道，佢將會係毁我一生嘅男人。

個鋪排咁sweet

真係呢條蛋散

你唔識打針食藥？
你冇份爽？

條女都有份爽就代表條仔無責任？

扮連登仔model answer

sorry燥咗

我發現女人總係會不自然噉被地位高同強勢嘅男人吸引，至少我自己就係咁。但往往有依種氣質嘅男仔，骨子𥚃都有壞男人嘅基因。

阿軒都有，只係佢收得比較密。不過收得幾密都好，依種氣質總會唔多唔少喺一舉手一投足嘅縫隙之中洩露出嚟。

應該話，如果阿軒畀唔到依種感覺我的話，由一開始我就唔會對佢有興趣。

阿軒毫無顧忌咁拖住我隻手帶我到戲院，嗰晚睇一套愛情片講霍金，本來想話幾浪漫，但最後兩個人都敵唔過現實，留低嘅只有回憶。不過男主角真係演得好好，我幾乎以為佢就係霍金本人㖭。

睇戲嗰陣，阿軒無拖住我隻手，佢一手揸住爆谷一手拎嚟食，有時會餵我。咁我哋仲未確立關係架嘛，所以我就特登唔畀佢餵，手送到埋口我就擰開個頭。試咗兩次，阿軒好似有啲無癮，隔咗好耐都無再嘗試餵我，搞到我都有少少忐忑，唔會噉少嘢就打擊咗佢信被啩？

有時未正式一齊之前，個心大起大落得仲快仲密。阿軒唔會噉小器下話？但我其實都唔算真係好了解佢，話唔埋架喎，可能佢唔玩得？又可能當咗我對佢無興趣而打退堂鼓？死啦，佢放棄噉點算呢？

「喂，講個秘密你聽。」

正當我仲天人交戰庸人自擾緊嘅時候，阿軒就突擊我：「吓？」

佢用手叫我哄近啲，我一哄埋去，佢就喺我耳邊細細聲講：「其實呢⋯⋯」阿軒嘅吐息挑逗我耳廓嘅神經線，紅暈同灼熱感由耳仔蔓延到面上，好彩戲院夠暗佢睇唔到，應該。

「我急尿。」我褲都除埋你講句噉嘅嘢！

「妖！」我請佢食個粉拳，之後就借開畀阿軒去廁所。

下半場我都好認真噉睇戲，阿軒亦無對我發動攻勢。

真正嘅突襲，係完場之後嘅事。

阿軒問我隻手凍唔凍，大家都知十間戲院有九間都會坐坐吓變雪房架啦，所以出嚟無耐我就下意識答咗凍。

然後，阿軒就捉住我對手：「咁有無暖啲呀？」

心跳加速之下我好快面紅，熱血一流到手心就暖晒，再加埋阿軒粗糙嘅手心傳嚟嘅熱力，本來冰冷嘅手指轉眼間就溶晒雪。

我哋對望，陷入沉默之中。

無耐，我先開口：「暖啲喇。」

「噉就行啦，食嘢喇。」阿軒繼續拖住我行。

「我隻手唔凍喇喎。」

「噉唔一定要凍先拖嘅。」

「噉點解仲拖住呀？乘機呀？」

「一來啦。二來係你無反抗呀。」

聽完，我嘅反叛心理又發作，想揈開佢隻手，但今次佢用少少力捉實我，力度恰到好處，唔會整痛我。

「唉，反抗唔到，唯有畀你拖住先啦。」

「噉就乖。」

或者當你鍾意一個人嗰陣，就係佢講咩都能夠撥動你心弦。又或者係阿軒嘅說話令我諗起公公讚我，所以將對公公嘅好感投射咗喺佢身上。

點都好，嗰一刻我已經好肯定自己對阿軒有好濃烈嘅感覺。

下半場我都好認真噉睇戲，阿軒亦無對我發動攻勢。

真正嘅突襲，係完場之後嘅事。

阿軒問我隻手凍唔凍，大家都知十間戲院有九間都會坐坐吓變雪房架啦，所以出嚟無耐我就下意識答咗凍。

然後，阿軒就捉住我對手：「咁有無暖啲呀？」

心跳加速之下我好快面紅，熱血一流到手心就暖晒，再加埋阿軒粗糙嘅手心傳嚟嘅熱力，本來冰冷嘅手指轉眼間就溶晒雪。

我哋對望，陷入沉默之中。

無耐，我先開口：「暖啲喇。」

「噉就行啦，食嘢喇。」阿軒繼續拖住我行。

「我隻手唔凍喇喎。」

「噉唔一定要凍先拖嘅。」

「噉點解仲拖住呀？乘機呀？」

「一來啦。二來係你無反抗呀。」

聽完，我嘅反叛心理又發作，想揈開佢隻手，但今次佢用少少力捉實我，力度恰到好處，唔會整痛我。

「唉，反抗唔到，唯有畀你拖住先啦。」

「噉就乖。」

或者當你鍾意一個人嗰陣，就係佢講咩都能夠撥動你心弦。又或者係阿軒嘅說話令我諗起公公讚我，所以將對公公嘅好感投射咗喺佢身上。

點都好，嗰一刻我已經好肯定自己對阿軒有好濃烈嘅感覺。

女主角已經不能自拔

食完飯，阿軒送我返屋企樓下。

「咁我走喇。」我屋企喺入大廈前，要先上一個平台。對毫無興趣嘅男仔我唔會畀佢哋接近我屋企附近，跟蹤狂太恐怖喇。有啲好感嘅我會等佢哋送到未上平台前嘅升降機。

至於真係幾鍾意嘅，就畀佢送我到平台，喺我棟樓樓下先分開。

阿軒望住我，突然好認真：「你唔好郁。」

我當堂被佢嚇一嚇：「做咩？」

「你頭髮有啲嘢，咪郁，等我搞。」

阿軒撥弄我嘅頭髮，將我嘅髮絲勾喺耳仔，之後就哄咗埋嚟。

我無退後，無避開。

佢嘅嘴輕輕貼上我塊面，但唔係蜻蜓點水，而係貼實，然後慢慢再錫，愈錫愈近我個嘴。

終於，阿軒嘅嘴唇停喺我嘴前，大家都感受到對方嘅一呼一吸。

我等緊佢錫，但佢好似無打算繼續哄埋嚟。

最後我忍唔住，主動縮短最後嗰三厘米距離，我同阿軒就咁正式開始拍拖。

阿軒起初都只係當我係個普通女仔咁看待，一般嘅行街睇戲食飯啦，同埋做愛做的事。

老實講，我同阿軒其實無太多共同興趣，佢除咗打理酒吧嘅生意之外都無咩特別嗜好。都係啲男人嘢啦，鍾意打機同靚錶靚車，偶爾健身保持身材。但我唔打機，對錶，車同做尖都無興趣，結果每次出街嚟嚟去去都係做嗰幾樣嘢。

就算睇戲同煲劇，大家嘅愛好都唔同，佢鍾意睇啲無營養嘅娛樂劇同爆谷戲，我就鍾意睇商戰或者金融片。

阿軒最鍾意睇嘅係《飛虎出精》呀、《高登闊少踎監日記》之類嘅片，而我就鍾意《沽注一擲》，一套講2008年次按危機同金融海嘯嘅電影。

不過大家都喺熱戀期，見到對方已經好開心，當時都無特別諗夾唔夾嘅問題。

熱戀嗰時，真係無咩共同興趣都冇問題

「阿軒近排開心咗好多。」嗰位調酒師話阿軒自從識咗我，個人好似唔同晒咁，成日笑。

「你都知酒吧咩環境架啦，但同咗你一齊，佢無再成日唉聲嘆氣。」

唔係佢講一講我都唔發現，我鍾意依間酒吧係貪佢少人夠清靜，但喺做生意嘅角度上即係無客人，其實好大鑊。

「係喎，你唔講我都一路無為意。」

調酒師其實同阿軒識咗好多年，佢做開嘅酒吧執笠所以阿軒先接濟佢。當然人工唔會高得去邊。

「阿軒仲爭緊啲街數，唉無法啦，鬼叫周轉不靈咩⋯⋯」

知道依單野之後，我就同阿軒講，我可能幫到手。聽完，阿軒忍唔住笑咗出嚟，嗰刻其實我唔係咁順氣，係由心睇我唔起嗰種恥笑。

「做生意嘅嘢你唔識架喇。」

「點解？因為我細個？因為我係女仔？」

阿軒連正眼都無望我：「唔係啦，總之做生意好難架，你幫我唔到架喇。」

我份人又硬頸又好勝，被人睇死就會躁底，當堂一句得埋去：「你做生意唔叻唔代表其他人好似你一樣咁差囉。」