是咁的，廿一歲有咗，所以我要做有錢人

阿軒都忍唔住笑咗一聲，但佢對眼係紅晒。

「依兩個禮拜⋯⋯酒吧發生咩事？」

我就將佢走咗之後，一連串嘅事講晒出嚟，包括我幫佢還清財仔、打理酒吧同重新訂立營業方針嘅種種。

最後仲有依家生意面對嘅樽頸問題，只要我哋諗通點宣傳吸引多啲街外客，酒吧要重新賺錢一啲都唔難。
阿軒聽到呆晒，佢無諗過喺佢消失做廢青嘅兩個星期入面我可以一邊返學一邊打理酒吧，效果仲遠超佢想像。

之不過，我唔問，阿軒就真係一直都無講佢嗰兩個星期發生咩事。我從輝哥口中知道佢過咗大海，根據佢嘅口吻，阿軒十成十係去賭錢。

我明知答案，但我無問。阿軒都知道我嘅問題，但無主動畀答案我。

嗰晚，我上咗佢屋企，好耐無同佢一齊瞓。

阿軒沖完涼，我問佢：「你點呀？」

佢意會到我嘅意思，一層薄霧喺佢眼內泛起：「幾好呀，你呢？」

「我都幾好。你攰唔攰呀？」

「攰喇。」

我空出旁邊嘅位置，輕拍兩下：「攰就瞓啦。」

阿軒慢慢上床，熄燈，冚被。

「早唞。」

「早唞。」

阿軒轉身向我，將我拉近，錫咗我額頭：「我愛你⋯⋯真係好愛⋯⋯好愛⋯⋯」

昏暗之中，感覺到佢濕咗嘅面容。

「多謝你⋯⋯」阿軒不停重複，多謝我，多謝我。

正常嚟講，如果佢今晚打算主動同我做愛，我一定會拒絕。我諗喺佢未一五一十講晒過大海做過乜畀我聽之前，我係唔會同佢親熱。

點知佢完全無噉嘅意思，只係好似個喺大海盪失路嘅細路仔，當我水泡咁攬到實一實。

睇到佢噉可憐，我反而自動為佢奇怪嘅行為搵理由護航。

佢一定係好痛苦。佢一定係承受咗好多好多，多到唔知從何講起。

結果當晚我就忍唔住同阿軒濕吻，我哋攬實對方，渴求對方嘅身體同有節奏嘅快感。雖然嗰晚都係無戴套，但好好彩無中獎。

有句說話叫上得山多終遇虎，一次又一次僥倖逃過責任，令我更加輕視無做足安全措施嘅性愛。

個天對我好得意，喺我失意嘅時候從來唔會落井下石，永遠都係當我得意，樂極忘形嘅時候就會重重將我由頂峰丟落谷底。

繼續!

如同阿軒嘅願望噉，第二日瞓醒就好似咩事都無發生過一樣，繼續過我哋嘅生活。

阿軒過大海嘅事，成為我心入面一條微不足道嘅小刺。

我哋兩個開始著手諗計，睇吓點將酒吧推廣畀街客。喺無錢嘅情況下，阿軒建議用傳統宣傳方法派傳單。

「你以前無派過？」

「派過呀。」

「有無多咗客？」

阿軒無言以對：「我夠知落電視廣告會多人睇啦。有錢先得架。」

「諗個唔使錢又做到電視廣告效果嘅方法先得⋯⋯」

我自己由中三開始就無睇過電視，唔少身邊朋友都同我一樣。反而我媽咪啲師奶朋友就仲會睇，但我哋酒吧唔係做師奶生意，喺電視台落廣告其實都唔會有用。

如是者淨係諗點宣傳一條竅都諗咗我成個月。所幸係我幫酒吧改革咗一輪之後，第一個月生意額已經明顯改善咗，所以阿軒好信我。

睇到實績，佢唔再覺得我係個唔識做生意嘅學生妹女人仔，但亦無當我係救世主。可能係身為男人心底𥚃其實唔係太想女朋友喺佢做得差嘅領域上出彩。

所以我一直都感受唔到阿軒由心而發嘅感激，永遠都隱隱約約有種：「唓，好叻咩？」嘅潛台詞喺佢嘅舉手投足之中。

感覺還感覺，就算阿軒實際內心幾唔服幾唔忿氣都好，事實就係我打理酒吧之後好快改善咗好多問題，所以就算逼不得已都好，阿軒都會選擇相信我提出嘅建議。

而我亦好清楚自己有關宣傳方法嘅建議幾有份量，將會直接左右酒吧，甚至我同阿軒嘅未來。依個建議雖然無形，但非常沉重，所以我唔想草率。

借埋錢...唉

軒哥哩啲真係典型大男人，係都唔肯認自己技不如人

一打唔使找

佢個名

會付責任架， 不過你自己埋單啫。
同銀包冇錢但又去食大餐一樣，埋單個時話我會付責任架， 一係報警一係洗碗囉。

低條數都係你咩返

btw金仔好耐冇見

咁個bug的確係， 打針食藥的確係女仔保護自己嘅一個好方案嚟嘅。。
想ons又好，想拍拖都好。 安全第一！

00後係咪唔識嘢咩都負皮咗先

好久不見～

你個名好正

依個樽頸位令我好辛苦，但諗唔到就係諗唔到。而落手落腳打理酒吧做「實事」嘅阿軒就覺得我好虛無縹緲，喺佢眼中只有幫手洗碗拖地服侍客人先係做生意。

「諗吓就掂，噉個個做生意嘅人都唔會噉辛苦啦。」

好彩我永遠有第一個月生意好轉嘅免死金牌，實績永遠係令人收聲嘅最好方法。

「有時真係一條行得通嘅竅就可以令盤生意起死回生。唔係點解創業會叫創業？」

「創業咪就係開創自己業務咯，唔係點解？」

「噉只係第一層理解，創業其實係講創意嘅事。利用創意去解決問題，為客人帶嚟價值。所以一條啱嘅生意竅噉重要。」

創意係概念，將無形嘅概念化為有形嘅產品、平台、服務，只要依啲事物可以解決愈大嘅問題，自然能夠賺愈多嘅錢。

「但我係做酒吧，唔係阿里巴巴呀。」

酒吧只係解決人類需要消遣娛樂嘅問題，而且巿場上亦有太多太多唔同選擇，永遠唔會賺到真正嘅大錢。

我依家嘅方向，只係從酒吧嘅角度出發，解決酒吧自身嘅問題。每解決一個問題，都有對應嘅價值，就算唔係即時，唔係錢。公公係噉樣教我。

不過我深信，一旦解決到推廣畀街外客嘅問題，隨之而嚟嘅就係收入增加。

講咗噉耐，最重要都係條竅，噉到底係乜呢？

如果以依家嘅社會狀態睇返，好多人都會覺得個方法其實好簡單，但我二十歲嗰年未發展到阿豬阿狗都識，所以當年我哋嘅做法飲到頭啖湯。

「哇，搞咩？」調酒師見我同阿軒拎住兩個大大嘅紙皮盒返酒吧，嚇咗一跳。

「我諗到點宣傳！」

我去拎𠝹刀開盒。

「乜鬼嚟架？」調酒師望向阿軒，後者聳聳膊頭：「唔好問我，我都唔知。」

兩個男人過嚟幫手開箱，拎出入面嘅腳架同燈。

之後我喺背囊拎出一部中等性能嘅相機，大聲宣布：「我哋拍網片！」

事緣我有日唔使上堂，喺屋企無聊得滯開電視睇，見到《都市閒情》教緊煮嘢食，我就開始有個模糊嘅概念。之後即刻上youtube睇片，望下有無人教煮嘢食，原來真係有。

既然有嘢食，噉嘢飲呢？

我嘗試搵調酒，當年仲未有好多關於調酒嘅片，有嗰啲都充滿表演色彩，教人調酒嘅亦更少，因為一般人唔會有工具喺屋企玩調酒，所以只係得好簡單嘅雞尾酒類教學，而且點擊率亦唔高。

我就係喺依度睇到機會。

當年facebook同youtube仲未較到個演算法噉閪，只要開專頁同放短片都會有正常同合理嘅觸及率，根本等同免費喺電視台落廣告。

但文字、聲音同影像嘅傳播率唔同，有得睇片就無人想睇字，所以要靠拍片令多啲人睇到。

「你哋用最華麗嘅方法調酒，我哋拍低佢放上網，等人哋睇到就嚟依度飲酒！」

阿軒對依個提議半信半疑，但我就非常之有信心，我唔介意外人唔理解我，因為由細到大我都係異類。當其他小朋友玩緊玩具我已經諗緊點賣玩具，不一樣嘅思維注定做乜都係孤獨。

即使我已經有男朋友都好。

女主角真係好正

兩篇好大對比

不過有竅，唔代表你實行到。喬布斯諗得出智能手機，都要靠一大堆設計師、電腦工程師等等有相關技術嘅專業人士先做到出嚟。

我係諗到發展方向，阿軒佢哋亦係調酒方面嘅專家，但我哋無人識拍片，更加唔識剪片。

夾硬嚟當然無好結果啦，拍咗剪完明明不堪入目，但人就係只要餐飯係自己落手落腳煮就難食都會覺得好味。

就係噉，我以阿軒調製雞尾酒嘅短片諗住打響頭炮，喺唔同嘅社交平台上開好專頁，準備迎接成功。

一個星期過去，幾個平台夾埋得唔夠一百人睇，仲要好多負評話條片拍得好差。

「唔好噉啦，唔得咪諗過第二條竅咯。」阿軒見我成個人謝晒，頻頻安慰我。

不過我好快諗通咗，唔係方向問題，係執行問題。當我唔去理嗰幾十個負評，集中去睇寥寥幾個支持嘅評論，我就知道依種模式有得做。

「我哋放錢落宣傳度，搵人拍片。」

講到錢，阿軒就無噉想我繼續搞落去：「我哋啱啱先賺返少少錢，又放錢落去宣傳？」

「唔係賺啲錢返嚟做乜呀？」

「自己使咯！」

「生意唔係噉做架。你唔投資又點會有回報？」

「我淨係知你依家個宣傳方式唔掂，喺錯嘅地方投資點會有回報？」

當雙方都認為對方嗰套行唔通，嘈交嘅時間就愈嚟愈多。講到尾，錢始終喺阿軒手上，而更重要嘅係佢仍然對我嘅商業頭腦無由心而發嘅信心。

「你唔好唔記得依家酒吧有數返都係因為我咋！你唔理嗰陣唔通仲會有錢賺呀？」

阿軒一面難色：「你⋯⋯講好咗唔提嗰陣嘅事。」

當你心情唔好嗰陣，心中嘅小刺往往會令你特別唔舒服，更加不吐不快：「你想我唔提，噉點解你唔主動話我知到底發生過咩事？」

所以合夥做生意係好麻煩

呢篇呢個有情有義有腦，嗰篇嗰個又自私又唔知自己想點，hurt完人又唔理人感受，就算叫有少少腦，我都只會覺得佢係個臭閪

「唔通我講咗，你就真係會唔提咩？」

我心入面知道，唔會。

「你講清楚我咪唔提囉！」我同所有情人一樣，無論知定唔知另一半嘅過去都好，火遮眼嗰陣都會撩起對方嘅創傷嚟攻擊。

阿軒表情一沉，我個心亦一沉，突然眼淚就湧咗出嚟，因為我好驚佢又突然消失。

見到我喊，阿軒只係呆呆望住，無任何表示。

「點解⋯⋯我哋會變成噉？」

我都想問，點解呢？

明明係佢話好愛好愛我，明明我已經幫佢還清財仔，明明我令佢間酒吧有返多啲錢賺，明明我已經如佢所願一直無過問佢消失嘅事，點解我哋會變成噉？

「嗰晚你話好愛好愛我，我都一樣好愛好愛你，因為好愛先會將間酒吧嘅事攬上身，我明明無害過你，一直都係想你同你檔生意搞得好好睇睇，點解你一路都唔信我？」

我好似個無助嘅小朋友一樣，唔知點做，淨係坐喺地下喊。

「明明搞好咗酒吧我哋就會好，點解你唔信我喎？嗚⋯⋯點解呀⋯⋯」

終於，阿軒唔忍心，走過嚟攬住我，輕掃我背脊：「對唔住⋯⋯係我無用⋯⋯對唔住⋯⋯」

嗰晚嘈完交，阿軒決定拎錢畀我搞宣傳。

「講到尾，其實啲錢都係靠你賺返嚟，點用，你絕對有話事權。」

我拎住阿軒開畀我嘅支票，錫咗佢一啖：「多謝你肯信我。」

「多謝你無同我分手。」

或者係我個人太著眼於問題同解決方法，所以我從來無諗過因為噉而同阿軒分手。

「我公公話過，上一輩嘅人見到有嘢爛咗，會諗點整，唔係丟咗佢。」

後來依句說話變咗網上嘅語錄，但的確表現到上一代嘅價值觀。

眼下要解決嘅問題，只係得返令酒吧吸引街外客，我有信心好快就會做到成績。

我有信心令阿軒間酒吧賺大錢。

我以為，我一直都以為，又或者話深信，當解決咗酒吧嘅問題，我同阿軒就可以好似童話故事入面嘅王子同公主噉，幸福快樂生活落去。

就結果上嚟睇，我係啱晒。我用阿軒畀我筆錢去請我大學嘅傳理系同學幫手拍片，噉當然我唔會亂噉揀，決定合作之前我會睇佢哋嘅作品，亦會面試睇佢哋做人態度係點。

我唔係內行人，只可以憑感覺，覺得邊個拍嘅片比較靚就叫佢面試。但世事好難兩全其美，拍片有質素嘅，九成都係知自己有優勢，所以唔識謙卑啲對人。到有誠意嗰幾個，啲片又真係強差人意。

「又唔使噉愁嘅。」

「唔愁就假喇，我無咩時間再磨落去，我唔想到最後要被逼揀個唔係太滿意嘅人。」

「噉到時真係揀唔落手嘅，咪我幫你手囉。」

「你？」

「我拍嘅片都唔差架，你要唔要睇吓吖？」本身黑龍哥只係幫我喺傳理系搵人，因為佢就係讀傳理，但我反而無諗過佢原來都可以係幫手嘅人選。

人有時就係噉，靠得太近反而睇得唔清楚。

「好呀。即管睇下你拍成點！」

結果唔使問都知，我請咗黑龍哥幫手。佢啲片雖然唔係話電影級水準，不過以大學生嚟講已經算有質素。再對比埋之前其他同學嘅片，都係頭幾位。噉做生不如做熟啦，反正以前都同黑龍哥合作過，我都知佢為人係點，唔使同新人夾過。

「不過你無咗中二病屬性我真係好唔慣。」

「大二仲有中二病就死得啦。」

同黑龍哥講到好價錢之後，就同佢約好一日上嚟做嘢。事前我要將當日會拍咩酒話佢知，佢就叫我準備起碼夠整三杯以上嘅材料。

我將要準備嘅功夫交托畀阿軒同調酒師。同阿軒鬧完交之後，佢都無再懷疑我，好聽話聽我指揮。

黑龍哥帶埋佢嘅團隊，瘦虎肥牛一齊上嚟我哋酒吧仲帶咗一大堆器材上嚟。除咗相機同鏡頭，仲有打燈器材。

黑龍哥開始操刀，我先知咩係專業。要打燈，仲要喺唔同角度拍攝。瘦虎肥牛兩個手腳好快，肥牛負責打燈，瘦虎就揸機，反而我一直以為負責拍攝嘅導演黑龍哥先係咩機器都唔使掂嗰個。

黑龍哥會同我哋講解條片有咩效果，邊個角度影埋去，因為佢唔想只係得正面鏡頭。佢會同阿軒講幾時會見到佢個樣，幾時用慢鏡拍攝，令我哋對成片有個初步概念。

「估唔到你拍片嗰陣都幾型架喎。」係我未見過嘅黑龍哥。

「被電影魂附身，所以可以透過攝取異世界嘅魔力將拍攝技能強化到封頂！」

「你係咪又發作⋯⋯」

「啊⋯⋯拍嘢嗰陣係噉⋯⋯」

「大二病！」

黑龍哥尷尬到向我伸脷。

黑龍哥型撚到

我哋大概用咗七日時間，喺開鋪之前連續拍幾個鐘頭，搞到阿軒同調酒師特別攰，因為之後仲要直踩。

頭一兩日都幾好玩，但第三日阿軒又有微言，我唯有氹佢盡力做埋佢。好彩第四日黑龍哥就畀咗個初剪我哋睇，見到成果阿軒先有返幹勁。

「嘩，估唔到出到嚟係噉喎。」阿軒都好驚訝拍到出嚟比我哋想像中都好。

「初剪嚟架咋初剪嚟架咋。」仲要只係初剪。

「我終於知點解你會鍾意拍片。」

「吓？」

「因為拍片就係你嘅魔法。」

我見到黑龍哥突然有淚水湧上眼框，但佢即刻抬高頭：「梗係啦，本大爺就係電影魔法師！」佢指向我：「睇住嚟，我會喺港產片依個被惡魔蹂躪過嘅異世界，成為拯救蒼生嘅大勇者！」

我輕輕拍手：「好嘢。」當時我唔知黑龍哥想做嘅事到底有幾難，如果知道，我諗我會拍得大力啲。

最後黑龍哥終於剪好完成品，一開場就有柔和嘅爵士樂襯底，喺略為裝飾過嘅吧枱現出我哋酒吧嘅商標，之後轉為雞尾酒嘅材料，阿軒出馬開始調製，搖調酒樽嘅時候係慢鏡，到倒出酒嗰陣用咗幾個角度拍啲酒撞到杯底捲起嘅浪花，最後係酒嘅特寫，喺旁邊現出酒名，黑幕，出我哋酒吧嘅名、地址、聯絡電話、fb同ig。

「超額完成喎⋯⋯」我拍嗰條垃圾真係無得比，我甚至覺得自己嗰條已經無資格稱做「片」。

由於質素太好，我實在唔忍心畀之前個價，所以喺畀錢嘅時候我主動加咗人工畀黑龍哥。

阿軒當然又唔滿意啦：「邊有人好似你噉架，主動加重自己成本負擔。」

但我覺得噉先係一個商人應該做嘅事。

點解咁多負評？

軒哥真係好唔識人性