是咁的，廿一歲有咗，所以我要做有錢人

做得好

我雖然唔知行情，但所有貨品都有個價，只要搵返放相應品質嘅賣家，就大概知道自己件貨巿價大概幾多。噉做唔係要賺盡每一蚊，而係確保自己唔會被人壓太多價，令自己蝕底咗都唔知。

變賣阿軒屋企所有僅餘嘅值錢物資，視乎情況會影響我之後可以動用嘅資金，所以就算為報仇我都唔會鑑平鑑賤賣出去。

成個下午值到夜晚媽咪返嚟之前，我都埋首喺電腦前做資料搜集，睇吓手上嘅貨可以賣到幾多錢，傢具方面甚至已經約緊幾日後交收。

粗略計算，阿軒最值錢嘅遊戲機同波鞋夾夾埋埋可以賣到五六千蚊，加埋傢俬電腦等等配件，拎返七千幾蚊應該無乜問題。

「素怡？返咗嚟呀？」媽咪入屋之後，見到我放喺客廳嘅兩個大袋：「搞咩呀你？」

要嚟嘅始終都要嚟，我最驚就係要面對媽咪，同佢交代成件事。

「你又唔講你返嚟，我無買餸喎。今晚叫外賣好無呀？」

我喺房走出去，見到媽咪嘅身影。佢見到我，或者係女人嘅直覺，又可能係我嘅面色好差，佢已經露出擔憂嘅神色。

「媽咪⋯⋯我有嘢同你講。」

媽咪拉我去飯枱坐低：「咩事呀？係壞消息？」

我點頭，雖然心不甘情不願，但都要承認：「壞消息，好壞好壞嘅消息。」

媽咪呑咗啖口水，望實我，等我宣布壞消息。

我將阿軒搵我做擔保人借錢，人間蒸發，同最後一通叫我落仔嘅電話，所有事都一五一十講晒畀媽咪知。

聽完之後，全屋都陷入沉默之中，空氣好似結咗冰噉，我甚至唔敢正眼望媽咪一眼。

佢咩都無講，企咗起身，行到我旁邊，將我拉入佢胸懷之中。

嗰一刻，結冰嘅空氣融化咗。

媽咪
女主角都好犀利，可以咁快整理到仲同人講

我發唔出一個單音，媽咪嘅舉動殺我一個措手不及。

「我明⋯⋯我明架，我全部經歷過，點會唔明？」當年我都係一個未婚懷孕下嘅產物，媽咪完全喺失去公公支持嘅情況下，獨力養大我。

「當年我連屋企人都無，依家我唔會要你自己一個面對。」

世界上有兩種人，一種係自己仆過街就想後人一齊仆街，另一種係知道仆街嘅痛，唔想後人再受一次嗰種痛苦。

媽咪係後者，依個世界最需要嘅，無比溫柔嘅人。

我喊咗，唔係因為傷心，係因為感動。

「女，媽咪依廿年嚟嘅積蓄唔多，但都可以——」

「唔好。」我打斷咗佢：「依個係我犯嘅錯，我會自己承擔返個後果。」

「噉你要我睇住你還債，咩都唔幫手呀？」

「你只要陪住我，等我知道有屋企返已經好足夠。仲有一點⋯⋯你嘅積蓄係屋企最後嘅安全網，唔可以亂用。」

「但係⋯⋯你用錢噉叻，可以拎嚟做生意，可以拎嚟投資，滾大嚿錢架嘛。」

我搖頭：「生意同投資唔係必賺，我已經負緊債，承受唔起任何風險。」

我大可以拎住全副身家去賭鋪大細，好多人會著眼自己贏咗可以多一倍身家，幻想自己發達之後點點點，但無乜邊個諗輸咗幾大鑊。

做生意又好，投資又好，雖然睇得中嗰陣贏面會大過賭錢，但講到尾都唔係必贏。如果有必贏，依個世界就無窮人。

公公都教我，學贏之前，最緊要係學唔好輸。

而依家嘅我，同不久將來，即係十個月後嘅我都有好沉重嘅包袱，我輸唔起。

「媽咪⋯⋯我想⋯⋯生佢出嚟。所以屋企嘅積蓄真係唔可以亂用。」

聽到我話要生，媽咪更加擔心，佢八字眉下水潤嘅雙眼，好似勸我再好好考慮一次噉。

「你⋯⋯真係決定咗？」

「決定咗。」先唔講我嘅體質如果承受一次墮胎就無機會再懷孕，就算我嘅體質正常，我都想生出嚟。

「真係會好辛苦，我係過來人，所以我問多你一次，你真係決定咗？」

我按住肚，依家已經唔痛，佢嘅存在為我帶嚟堅持嘅勇氣：「我知道⋯⋯畀幾千蚊就一了百了，噉我只要還晒五十萬就夠。生出嚟，我就起碼係負債四百五十萬。」養大一個小朋友平均要用四百萬，點計都唔化算。

生同唔生都係負責任嘅表現，既然係噉仲點解要生？唔生著數噉多。

「媽咪⋯⋯你有無後悔過生我？」

媽咪聽完，就明白我嘅意思，只係攬得我更緊：「無，雖然好辛苦，但無後悔過。」

「但我會後悔，如果我落咗佢。」

「嗯⋯⋯噉就生啦，無論你點揀，媽咪都會支持你。只係我想你真係諗清諗楚，條路唔容行。」

「噉我明知條路難行，都要行呢？會唔會好不孝？生咗出嚟，點都會勞煩到你架⋯⋯」媽咪用大半世人養我已經夠辛苦，我唔想佢再為我嘅錯誤埋單。

「既然你決定咗，媽咪就陪你行。」

依刻，媽咪跨越咗當年嘅悲劇，某程度上，我覺得媽咪比公公仲厲害。佢無趕我出家門，無鬧過我一句，只係溫柔噉接住不停墮落嘅金素怡。

「我以前一個人痛苦，依家我同你分擔吓，應該會好啲架喇。」媽咪現出軟綿綿嘅老鼠仔：「話晒都有經驗，依家咪又係養到你肥肥白白？唔死得人嘅。」

我攬住佢條腰：「多謝你⋯⋯」

「傻嘅，兩母女講啲噉嘅嘢。」

媽咪輕撫我嘅頭髮：「睇到你噉堅強，我點會後悔？」

「對唔住呀⋯⋯」我爆發咗，喊得好大聲：「對唔住呀！我睇錯人！我訓晒身落去！仲連累你！對唔住呀⋯⋯嗚⋯⋯」

媽咪忍住佢嘅哭腔：「無事⋯⋯無事⋯⋯我原諒你。」

正正係媽咪嘅溫柔同堅持，令我更加唔可以認輸。為咗佢，為咗肚入面嗰個，我要喺負債五十萬嘅狀態下逆襲做個有錢人，無論如何，一定要成功！

女主角有個好好嘅媽咪

要還債只有兩個方法，開源同節流。每個月至少要搵到一萬蚊左右先可以解決日常需要。大學學費係問政府借，暫時無還錢嘅逼切性。日後就算要還，由於低息，負擔相對嚟講少好多，不值一提。

咁除咗每月要還嘅九千蚊，一般人要用嘅錢就係衣食住行四方面。好在媽咪向來負責租屋嘅使費，而政府公屋嘅租金都唔貴，所以我哋嘅住屋方面唔使太擔心。

「既然你唔畀我幫你還，噉我就負責返我一直以嚟負責嘅部分啦。」除咗住，食方面只要我喺屋企食飯，媽咪都會買定餸，有時我煮有時佢煮。

「你一路都無畀家用我架啦，咪又係噉樣過。」

有媽咪背後嘅支持，住唔使我負責，食嘅負擔又幫我減輕咗唔少，有依個後盾我真係好感恩。我又諗，被公公逐出家門嘅媽咪當年一定過得好痛苦。

「嗰陣都有啲積蓄嘅，就拎住筆錢出去租屋先囉。到個肚愈嚟愈大，個婦科醫生見一路無人陪我檢查，問咗我兩句，知我係單親媽媽就介紹咗我去搵社工。」

千禧年代仲未係新移民氾濫嘅年代，社會資源雖然都有錯配嘅時候，但真正有需要嘅人唔多唔少都能夠受惠。

媽咪嗰陣好快就輪到上公屋，一住就係廿幾年。講真喺住屋上真係慳唔少，依種大細嘅單位外面起碼七八千蚊先有，但我哋三千蚊都唔使。

細個學政府係個轉移社會財富嘅機制，當真係有政策惠及到窮人，係幫到唔少人一生。我同我媽咪就係例子。

當然我依種思維亦成日被公公鬧，只有無出息嘅人先會依靠政府日日等政府救。

「但有好多人，比如身體同智商有問題嘅人，都真係要人幫架喎。」

「嗰啲係殘疾人，唔係無出息嘅人。」公公向來最睇唔起有手有腳但唔落力改善自己人生嘅人。

「每個人都要對自己嘅人生負責，你想生活好，就付出對等嘅努力。」

「噉如果好努力，一切都無變好呢？」

「噉就唞吓氣，再繼續。」

佢信奉嘅係永不言敗嘅精神，經常話可憐人必有可恨之處。我覺得⋯⋯某程度上都啱嘅。

佢公公講得非常好

言歸正傳，住同食都慳好多，食方面盡量帶飯，前一晚食淨嘅餸菜就留起做第二日嘅午餐。早餐一個包唔使十蚊，午餐慳咗四五十，晚餐返屋企唔使錢。加埋來回車費，每個返學上堂嘅日子大概廿蚊內解決晒佢。噉一個月就算返足二十日學，都係四百蚊，比盡五百內搞得掂。

行方面嘅車費係流動，視乎我嗰日去邊，但都係有限錢。至於衣，我唔打算再買新衫。對女人嚟講真係慘過死，但既然無錢就唔輪到我任性⋯⋯⋯⋯呃⋯⋯可能一個月一件囉⋯⋯唔得喎，三個月？半年？唉，到時先算啦！仲有係護膚品同化妝品，前者盡量慳住用，淨係買可以用到三個月嘅洗面奶，嗰度二百幾蚊除開就七十蚊一個月。有錢淨先去買啲平價面膜久唔久用吓。化妝品淨係重要場合先用，平時盡量素顏。唉，嚟緊都預咗辛苦，個樣實好快殘，反正嗰少少錢都補唔返，噉寧願慳返佢好過。

旅行就唔使諗架喇，娛樂同社交亦唔使預我，咩打邊爐放題唱K按摩自助餐整蛋糕食甜品學瑜珈統統唔做得。

無錢就無社交，係好現實。

起碼等過咗一兩個月，計吓大概有幾多錢淨，先可以久唔久參與一下。好彩進入大四好多人都忙畢業論文，所有社交活動應該都會直線下降。

計完數之後就大概知道，我預一千至千五蚊係我嘅日常開支。已經包埋我要去公營婦產科嘅車費，診金希望唔會太貴啦。

而且依個只係頭七至八個月嘅數，就算我唔著唔食，遲啲個仔出世都要買衫同日用品畀佢，每次一諗到佢我就好焦慮。所有計好嘅數應該都唔會如我所願噉完美，生仔前中後實在太多變數。但我叫自己睇實眼前每一步，過好每一日，生仔嘅事之後再算。

可能有人覺得我好蠢，揀咗生令自己徒增壓力，又揀咗自己節衣縮食去還錢。其實只要落仔同申請破產，所有事都一了百了。

但我感覺當放棄晒依一切責任，我就變得唔再係自己。我唔係宣揚自己負責任有咩噉好噉值得自豪，純粹係我會噉樣選擇，因為我好清楚自己係咩人，想成為咩人，唔想變成咩人。同樣嘅情況，可能有人揀落仔同破產，就好似我之前所講，無論做乜都係負責任嘅方法，我唔會去批評同批判，我又有咩資格去批評人呢？

最緊要係，揀咗就勇往直前，唔好回頭，唔好明知會後悔都言不由衷，噉就夠晒。

節流計好數，就到開源，究竟我一個月可以賺幾多錢？無論點將開支減少，無收入都係還唔到錢。所以之後要計開源賺錢嘅數。

首先我幾乎將阿軒嘅舊物賣晒，有啲餐具廚具無人要都好合理，就留返自己用，不拎白不拎。最後收返大概啱啱六千蚊左右，無我預期嘅七千幾，但都係個好開始。有咗依筆錢，再加埋我一直放喺自己屋企，儲咗十年有多嘅利事錢，至少今個月無即時危險先，噉我就有時間喺下次還款日之前搵工。

作為大學生，最容易賺到錢嘅工當然係幫中學生補習啦。嗰陣時公價大概百五蚊一個鐘，兩個鐘頭就三嚿水，第一個目標係接三個逢星期六補習嘅學生。

噉一個月扣埋車費起碼有三千四五百蚊，之後就到星期日接三個學生，再多一倍錢，保守估計一個月有七千蚊。

同時我都搵埋屋企附近有無小店請人，去咗便利店做收銀、餐廳做樓面、花店做打雜，用嚟填滿我唔使上堂、早落堂嘅日子。嗰啲返學時間想接補習都唔會有學生理你，因為佢哋上緊堂。

大四已經無乜堂上，每個星期有兩日放假，另外一日上半晝就落堂，所以有兩日半可以返工，全日就返收銀同花店打雜，半日就去餐廳喺開下場之前返去幫手。最低工資三十二個半，便利店收銀三十五蚊一個鐘，八個鐘一日二百八十，一個月四日一千一百二十。花店由於缺人手，所以錢多啲，出到六十蚊一個鐘。一日四百八，一個月一千九百二十。最後半日嘅餐廳就係四十蚊，由五點做到十點二百蚊一日，一個月八百。

三份兼職一共三千八百四十，勉強一萬零八百四十蚊。

每月還九千係夠突，仲淨一千八百四十，如無意外扣埋生活費千五，仲有三百四十蚊淨，假如我真係好守紀律就有八嚿水可以儲起。

好啊，每個月都仲儲到少少錢，情況都唔係我諗噉壞。

計算很美好，現實很殘酷。

計劃總係追唔上變化。

女主角真係好值得尊敬

我知道計數係無辦法應對突發情況，但可以令你有大致上嘅目標。其實實行到七八成嘅計劃已經算好唔錯。

我嘅第一個問題係補習學生唔夠，只得一個，就算叫佢喺學校幫我宣傳，效果亦有限。

做收銀、樓面同打雜只係做個攝位嘅齒輪，上面叫你做乜就去做，唔使用腦。但補習完全唔同，單對單補某程度上都係生意嚟，我賣緊指導人嘅服務，只要有方法搵到多啲客就可以確保穩定高收入。

賣產品同服務嘅生意，首先係服務本身有一定價值，噉先可以長期穩定賺錢。商業世界好多人賣垃圾畀人，不過大話始終都會爆，掛羊頭賣狗肉注定唔係長久之計。不過嗰班賣垃圾嘅人都有值得學習嘅地方，佢哋點樣用話術同包裝放大一件垃圾嘅價值，係每個做生意嘅人都應該學嘅手段。

唔止補習學生唔夠數，我連嗰三份兼職都幾乎被人炒。原因無他，第一成日孕吐，我已經帶埋膠袋返工，但一嘔就做唔到嘢。第二係成日急尿，我已經搵有內建廁所嘅地方返工，方便自己唔使為去廁所而來來回回太耐，但急尿嘅頻率都係太密，成日去廁所影響到工作。

「唉，大肚婆真係麻鬼煩。」

「我明你大肚都辛苦嘅。」

「我話知你大肚定跛吖！總之嚟得返工就唔該你盡責啲！咪成日借尿遁偷懶呀！」

以上，分別係便利店經理、花店同餐廳老闆對我嘅訓話。世界總有好人壞人，便利店經理屬於河水不犯井水嗰種人，佢會有怨言，但亦好公正，唔會因為我有咗就特登畀多或者畀少嘢我做，不過其實我知佢已經就住我，至少啲搬貨之類嘅粗重嘢都無叫我做。

花店老闆對我係偏好嘅，典型好人：「其實就諗咗好耐，想同你講根據你工作表現扣返啲人工，但都係算啦。你大住肚都噉返工法，應該都等錢使，我無理由噉對你。」雖然聽上去唔好受，但都好感恩老闆嘅決定。

至於餐廳老闆係嗰種唔理員工死活，伙記死老竇想請假都話關佢撚事嘅仆街嚟，可以的話我都唔係噉想繼續做。可惜我嘅情況唔輪到我揀三揀四。

一諗到嚟緊五年都要噉生活，就會覺得好洩氣。每次受完上司嘅指責我都會好唔開心，好辛苦好鬱悶。

自己匿埋喊完，又好似公公話齋，再繼續。

事情會好起來的

好快過咗第一個月，多得賣嘢嗰六千蚊，我嘅壓力相對少好多，但睇住銀行儲返嚟嘅錢一過咗還款日就消失一大截，就好似睇住自己啲肉被人削落嚟噉。

原本⋯⋯原本我就算辛苦做完嘢，依啲錢都可以落袋⋯⋯可以儲好、可以投資⋯⋯但依家只係用嚟還債，咄一聲就無晒。

學生仲係得一個，照噉計法嚟緊嗰個月就唔夠錢使，我要諗方法盡快達成星期六日一共六個學生嘅目標，唔係好快就走投無路。

「咦咦？你咪阿軒仔條女？」有一晚，喺餐廳返緊工嘅時候聽到一把好熟嘅聲，原來係輝哥。

「分咗手喇。」我講完就想返去做嘢，最好盡量遠離黑社會，但輝哥嚟捉住我隻手。

「咪走得噉急啦，傾兩句先啦。」

佢嘅動作尚算斯文，但都引起咗其他食客嘅注意，我唔想影響老闆生意，就點點頭，利用依個情況再攞少少甜頭。

「傾囉，不過我話晒都返緊工喎。」

「係咩？喂阿蔡！」輝哥叫老闆，後者就烚熟狗頭噉搓住手掌行過嚟：「係，點呀輝哥？」

「我要搵佢傾偈，但佢返緊工喎，噉點呀？」

「唏，叫幾個伙記密啲手咪係囉，當佢放假啦。」

「吓？我唔放得假架，我好需要今日人工，唔係聽日出街都無錢喇！」我即刻扮到好可憐噉樣，輝哥就拍拍蔡老闆：「嗱，人工你照出畀佢，我唔阻你好耐架啫。」

「得得得，輝哥你話點咪點囉。」

之後我就去咗輝哥嗰枱，被幾個黑社會圍住。大肚婆心血少唔嚇得架，真係希望佢哋咪鬼再嚟煩我。

唔通輝哥幫手

坐低之後，我再湊近少少講：「今日收工老闆實借啲已扣我糧，唉為咗你，無計啦。」

輝哥微微一笑：「佢扣你糧就同我講，我補返畀你。仲有，依度五嚿水，當係麻煩你同我傾偈嘅賠償。」

我誠惶誠恐噉收咗張五百蚊紙，不停多謝輝哥：「噉你搵我有咩事呀？」

「聽講以前阿軒仔間酒吧噉好生意係多得你揸旗喎？」

「佢成日消失，我唔理間鋪就等執粒架喇。算係好彩啫。」

我盡量講得隱晦啲唔好暴露自己喺管理生意上嘅特長，因為輝哥九成係想搵我幫手打理生意。

「邊止好彩呀？個調酒仔話你做咗好多嘢架喎。」

既然係噉都無得唔認，原來佢有情報源：「算係咩都試吓噉啦，不過試嗰陣唔知得唔得架，都係搏一鋪。」

「就噉，我唔轉彎末角喇，我有壇生意要打理，就黃色架步嚟嘅，近排被第二個字頭搶咗好多客，但上面話咗唔打得。我想搵你幫手，諗啲計仔幫我搶返啲生意返嚟。你點睇？」

我望吓身旁嘅古惑仔，再望吓輝哥：「呃⋯⋯我有無得揀架？」

輝哥靠前，眼神好兇狠：「無。」

空氣陷入沉默，我忍唔住呑口水。

「噉⋯⋯我想屙尿⋯⋯」

「哈哈哈哈！你講嘢都幾跳喎！放心，講笑啫，我從來唔會逼人嘅。我成日都話，條路點行，係你哋自己揀。」

「即係交易？我幫你我會得到乜嘢呢？」

輝哥諗咗諗，再講：「你真係幫到我搶返啲生意返嚟，打殘對家嘅話⋯⋯我就幫你還清條數，點睇？」

開雞竇好撚好搵㗎
女主角今次想唔發都難

Live

幫完輝哥 然後又奶單大

「你點知⋯⋯」

「阿軒噉爛賭，有幾難估呀？見你一個女人仔都要打埋依啲工就知實被佢跣咗鑊啦。爭幾多呀？講嚟聽吓？」

我猶豫咗一陣，再答：「五⋯⋯五十萬。」

輝哥嘅笑容，好似伊甸園引誘夏娃食禁果嘅蛇：「五十萬，一個女人仔點還呀？唔好話你吖，我哋爭人五十個都怯啦。嗱，你過嚟幫到我手嘅，條數我幫你還清佢，你有我卡片架啦？」

我點點頭，但仲有最後一個問題要問：「噉⋯⋯如果我幫唔到你檔生意⋯⋯又會點呀？」

輝哥聽完，冷冷一笑：「到時你咪知囉。」一句，就令我背脊發麻發到天靈蓋。

「幫手的話，每個月畀一皮你做生活費，事成就幫你填咗嗰五十個。返去諗吓囉，有答案就打畀我啦。」

講完，輝哥就走咗。

依家擺喺我面前有兩條路行，一係去幫輝哥手，踏足搵快錢嘅黑社會勾當，噉就每個月一皮袋袋平安，成事亦可以還清條數。

最大問題係唔知失敗有咩後果。

一係就自己落力喺一個月內搵夠五個學生，然後繼續依家辛苦兼職嘅日常生活，慢慢還債。

我應該⋯⋯揀邊一條路好？

面對兩難抉擇，我一個人諗唔掂。問媽咪又唔會有客觀答案，以佢噉傳統嘅觀念一定揀靠自己。而且佢嘅經驗都係一個人捱到依家，佢嘅答案太主觀。

總有啲事我哋會選擇唔同屋企人商量，所以幾時都好，朋友都係最佳傾訴對象。

一路以嚟慣咗係同輩中嘅異類，人人講買嘢嘅時候我諗緊點賺錢，思維唔同自然好難同人傾得埋。真正可以傾兩句，隨時可以搵又唔怕尷尬嘅朋友就只有黑龍哥一個。

我靠住舊式公屋嘅露台，打電話畀黑龍哥。記得嗰晚夜空灰濛濛，黑夜嘅白雲暗淡無光，遮住月光。

「你嗰邊加塊反光板先！等陣，喂？」

「啊，你做緊嘢呀？唔煩你。」

「素怡？做咩事？」

「呃⋯⋯有嘢想請教你。無阻你吖嘛？」

「阻架，不過你講吖。」

「噉⋯⋯你做完嘢再打俾我啦。」

「好長架咩？」

「人生交叉點呀。」

「噉我拍完嘢打返畀你。」

收線之後，我輕嘆口氣，仍然見唔到黑夜嘅明月。

Live咗 好睇 求加速

龍哥

媽咪發現我有啲煩惱，主動問我咩事。諷刺嘅係我可以同佢講自己未婚懷孕，但就講唔出有黑社會叫我幫手做嘢。

就好似你唔會同個信上帝嘅人討論無神主義一樣，我明知媽咪最憎黑社會，只要扯到少少關係佢都會變得好激動，無辦法，鬼叫我爸爸以前係個古惑仔。

媽咪作為一個千金乖乖女，會被壞男人吸引都係意料之中嘅事，只係估唔到佢一嚟就打大佬。

如果係黑幫入面高級啲嘅骨幹成員起碼都叫唔愁三餐，偏偏佢鍾意嘅只係啲無名無姓嘅爛仔，個腦好似除咗中出即飛就咩都諗唔到嘅雞蟲。

媽咪成日話自己當年鬼揞眼，好似中咗傳銷又或者被邪教洗腦嘅教徒噉，明明一直聽公公話守住貞潔，但為咗佢好似咩規則都抛諸腦後。

某程度上我理解公公當日點解會忍痛逐媽咪出家門，因為爸爸依種擺到明係無前途無實業嘅股票，媽咪都成副身家前途押落去。

我諗依一點係以眼光獨到而自豪嘅公公無辦法忍受嘅。即係明知間公司就執，仲要叫住唔好中個頭埋去，但對方都係中咗，仲愈跌愈溝貨，直到破產都唔識停噉。

又係嘅，媽咪一定會叫女主角唔好幫啲老黑

諗諗下，我就好似聽到公公問我煩緊乜咁。

「我煩緊點樣可以搵多啲私補學生啫。」

「仲未夠數？」

「最少有六個學生，噉我先安全。依家得一個。」

「⋯⋯有無計仔？」

「諗緊⋯⋯但無乜進展。」

「畀啲信心自己，你得架。你有邊次唔得吖？就算點都好你最後都會有辦法。」

賺錢嘅辦法真係周圍都有，重點係我哋睇唔睇得出同諗唔諗到最關鍵嗰條竅。我真係見過有阿婆做清潔，而佢話自己其實有間公司，包咗啲工商廈嘅清潔嚟做，手下團隊有幾十人，專做甲級寫字樓生意。

點解我又係食米線三哥又係食米線，佢會食到叮一聲覺得米線係單大生意，發大嚟做？點解佢嘅思路會有：「牛扒你唔可以餐餐食，米線你可以食好多餐，所以賣牛扒賺得少，米線會賺得多。」

當然每個人本身嘅工作、經驗同專長都唔同，三哥一直喺廚房打滾亦係個廚師，到最關鍵製造出產品嘅一環佢就可以發揮特長。老實講就算我有三哥嘅思路，整唔到一碗好食嘅米線都唔會建立到譚仔王國。

依個世界最賺錢嘅生意就係發現一樣其他人眼中只係件垃圾嘅價值。喺一般人眼中睇到嘅米線只係填飽肚嘅一餐，但喺適當嘅人眼中佢可以化為印錢機。關鍵在於你有無噉嘅眼光。

就算係依家人人都知道係高級食材嘅呑拿魚，曾幾何時都係古代人眼中嘅垃圾。呑拿魚喺進化嘅過程中為咗增加游水嘅動能，變成咗溫血鮮類，身體入充滿血紅蛋白同肌紅蛋白，所以呑拿魚肉係紅色。但又因為溫血令佢非常容易腐爛同發臭，以前釣上一條呑拿魚只以每公斤幾美分嚟結算。甚至有段時間要畀錢出嚟處理依堆大型垃圾。

直到1972年岡崎晃先將呑拿魚由北美空運返日本賣。聽講當年嘅日本人崇洋，覺得外國人嘅任何嘢都係好啲，推崇買外國貨，跟外國人飲食習慣等等，加上嗰個年代嘅日本經濟處於繁盛期，普羅大眾賺到錢自然搵地方使。外國人食紅肉，食牛扒就跟佢哋食。當時飛機上開始出現製冷系統可以保鮮，岡崎晃就將喺北美唔值錢嘅垃圾，倒貼二十美金先可以處理嘅呑拿魚運返日本，打住「海中牛肉」嘅旗號去賣，結果唔使問都知即刻發咗達。唔使好耐其他人都察覺到呑拿魚蘊含嘅龐大利潤，一齊加入分一杯羹。無論點都好，頭啖湯都係岡崎飲到舐舐脷。

依家過咗一個月，我都仲未達到本身個目標，如果我仲有時間同經濟許可，就可以慢慢諗出路。但生活逼人，每個月要還嘅錢係個好現實嘅問題，無錢無時間無人手，一切只可以依賴喺創意上面。

除咗補習之外，我最好諗到一條低風險賺錢嘅竅。講就易，實際上係咩竅要諗到出嚟難過登天。噉易諗到人人都係李嘉誠無窮人架喇。

定還是⋯⋯我幫輝哥好？噉我就唔使再諗點做，唔使再諗點樣解決問題。

只要做好輝哥畀我嘅工作，收咗人工袋袋平安就得。如果繼續搞補習，首先要諗方法增加學生，同時又要諗吓有無新方法可以賺錢，即係起碼諗兩條竅，仲要唔知成唔成功。

一邊充滿未知同風險，另一邊就係穩定收入起碼唔使個個月擔驚受怕。就好似自己創業同返工一樣，唔知點揀先啱。