[窮遊豪食逍遙遊]用8日暢遊關東 (東京‧河口湖‧日光‧湘南)

2022：[偷得浮生半日閒]用8日獨遊西日本 (京都‧名古屋‧奈良‧廣島)
https://lihkg.com/thread/3218845/

2019：[帶住父母去旅行]12日橫越日本列島 (札幌 ~ 鹿兒島)
https://lihkg.com/thread/2089476

2019：[腳痛勝景美食團]用12日獨遊關西 (山陰‧琴平‧天橋立‧京阪)
https://lihkg.com/thread/1964209

2018：[極限挑戰]用10日獨遊半個日本
https://lihkg.com/thread/1957043

2018：[帶住母姐去旅行]4日北九州跳板之旅 (廣島‧長崎‧熊本‧博多)
https://lihkg.com/thread/2714170

Lam

序言
關西之旅完結90日之後，我再次踏足日本
因為我知道唔趁少人既時候黎多次，第時一定會後悔
係相隔1256日之後，我重臨東京呢個繁華大都會
食到好好食既餐廳，欣賞到雪頂既富士山，非常滿足
但一切都要經過周詳計劃先得以成事
如果唔係邊有可能去到咁多地方

關東地區既公共交通複雜過關西好多，東京地鐵路線圖鬼劃符咁
https://www.tokyometro.jp/station/202006_number_ja.pdf
買Pass就仲煩，種類太多，要揀到張啱自己用既都唔易
而且得2個月時間Plan行程，又要抽時間寫西日本遊記
仲要準備多幾個應變行程方便天氣唔好走盞，老實講都幾吃力
多得一眾巴打去完之後係旅遊台提供大量最新資訊，幫左我唔少忙
所以今次關東篇既訊息量應該會比關西篇多好多
本身諗住3月先出，但既然有人催咁我就出住先啦



回顧整個行程，天氣對我地係完全冇影響
只要出戶外都會好天，市區自由活動就有得睇落雪
而且完全避過航班禁令，可以話係一帆風順
因為預左有排寫，俾啲靚相大家J住先：

Day 0

老細話前一晚話返半日工先衝過黎機場
我大把假唔駛慳，請足全日訓飽檢查好哂先慢慢搭車去機場
雖然班機3點幾先飛，但我12點就到左機場
今次見唔到大白，但多左好多講英文既人，算係復常？



JAL包2件23kg寄艙行李，我當然冇蝕底拎2個喼啦
但去程其實1個中喼都夠放哂野有突
為左方便走黎走去，我索性攞個大喼套住中喼
加埋都係19.8kg，買多25kg手信都冇問題


係尿兜欣賞香港山景，都幾好諗頭喎


3個月前3個航班顯示屏已經睇哂大半日航班
而家多番好多機，半日就打爆哂

原來老細呢日射波冇返工，1點就黎到機場一齊Check-in
排隊嗰陣職員會先檢查你個Visit Japan Web(VJW)係咪審查完成
唔知係佢地好得閒定係日資服務好
輪到我既時候有職員幫手推件行李去櫃位
上網見唔少人會放粒AirTag入喼費事俾人偷
JAL就要同地勤講聲，搭其他航空公司既話最好都問一問



再提多大家一次，要打齊3針先可以免檢疫入境日本
否則就要有航班出發時間72小時前採樣既PCR陰性報告先得
並且要上載正本證明去VJW，審查後先會有青碼
記住記住確診過唔當1針，總之拮少過3針既都要做PCR
其他問題請移玉步去PCR個Post問，讓專業的來


搞掂就過關，因為冇乜人所以5分鐘就入左禁區
過e道轉左用面容識別要除罩，個口罩令阻住哂
係裡面間Disney Shop偶遇一隻小粉紅


之前禁區隔開左內地航班區同國際航班區，而家開左關乜野都拆哂
但係美食廣場準備落扶手電梯嗰陣見到件令人側目既事
有個著住開襠褲既小朋友攬住佢老母隻腳露住J屌地
真係未出發先興奮，好想快啲離開呢個地方


行到登機口附近，又見到另一個開襠褲係地下碌黎碌去，唉

睇相就知你安排得好，留名待J

離上機仲有一段時間，帶老細行左陣天際走廊
除左多左人影相之外，其實冇乜野變過




啋，乜個花圃配搭埋啲花整到成個墓咁既


以前搭UO永遠都係A32X既細機
今次就搭Boeing 787-9客機，係JAL最新型客機之一


坐傳統航空階級觀念比較重，呢度分開5個Group上機
首先係Business，之後Premium Econ
最後先係我地呢啲地底泥坐既Econ



JAL既787-9有分3款座位排列，呢架係E71
機身接近一半長度分左俾一行2-2-2座位既Business
後面隔塊板就係一行2-3-2既Premium Econ
以我觀察其實都係接近係運空氣，冇乜人坐

787-9 Econ默認配置係一行3-3-3座位，但JAL想乘客舒服啲
每行減左1個位，變成2-4-2座位既JAL SKY WIDER
而且設計過張凳，整薄椅背令每行座距增加
以往搭UO座位闊43cm，座距71cm，又窄又頂膝頭
JAL SKY WIDER座位就闊48cm，座距84cm
連我呢啲高人都覺得個位好闊落，搭幾個鐘都好舒服


輕觸式機上娛樂系統同USB差電頭係基本配備
耳機係用3.5mm插頭，所以自備耳機都可以
老細個Moon禁唔著應該係壞左，不過佢話打Switch唔駛理
我心諗，你同空姐講分分鐘調你去前面坐Premium Econ啦




另外仲送左張氈同枕頭，不過日光日白訓唔到覺唔啱用


以前搭飛機見出面太曬會拉個簾落黎
呢度好高科技，係用窗下面個掣控制透光度
不過敏感度都幾低，好耐都唔轉色
慢到有一刻我以為自己禁壞左個窗
https://streamable.com/zkld9u

難得坐窗口位，梗係要影低起飛啦

起飛後20分鐘空姐就開始派餐，餐牌上官網可以搵到
我冇野唔食，所以就冇改到個飛機餐
如果想食偏啲例如水果餐糖尿餐之類既特別餐
就要係出發時間25個鐘之前憑訂位編號上官網預訂，不另收費
主食係紅酒汁煮雞配牛油飯，出乎意料地好食，正過啲空姐
雞完全唔鞋，菜又唔老，飯有淡淡既牛油味
配埋微酸既醬汁撈埋一齊食好開胃



攞餐既時候順便問空姐要左杯蘋果汁飲
佢順便問埋我要唔要埋出汁(Dashi)，梗係要啦乜都試下呀嘛
味道就同湯烏冬個湯一樣味，但就濃好多
係機艙加壓既情況下可以幫你刺激番味蕾，食野會好味啲


玉子燒同生果正常味道，甜甜地冇乜特別
但係煙鴨胸三色椒沙律我覺得仲好食過主食
沙律菜，車厘茄同四季豆有輕微調味，食落新鮮又多汁
三色椒冇生既苦澀味，反而有陣煙燻味非常惹味
煙鴨胸就有一大粒，一啖啪入口非常爽



哈根達斯雪糕係我最鍾意食既曲奇味


食完雪糕收盤之後空姐又俾左杯綠茶我解滯，好好服務


坐我前面個人未起飛就戴住個耳機訓著左
空姐怕嘈醒佢就唔送餐，然後貼左張告示提佢
但最後都係臨落機俾空姐叫醒，冇飯食


食完飛機餐都差唔多黃昏，影番張相先

看透巴打你打算一次過 post 晒定係慢慢 post？你一次過嘅話我兩個鐘後再返嚟

黃昏時間出面好曬，所以空姐會中央控制較暗哂啲窗
如果你想較番光既話都可以既，禁番窗下面個掣就得
另外機上娛樂系統都幾多片睇
除左媽的多重宇宙同ONE PIECE FILM RED，仲有雷神4同Top Gun Maverick
我就揀左媽的多重宇宙，好笑得黎都幾有意思



睇完套戲班機已經到左鹿兒島附近，仲有個幾鐘就落機



開多套戲黎睇又睇唔哂，所以就玩下JAL個衛星Wi-Fi一小時Plan
使用方法唔難，駁好Wi-Fi之後開Account，最後磅水就得
網速唔慢，上連登碌IG唔疾，Load片同圖都好快
80幾蚊玩1個鐘都唔算太貴




今次班機比預定時間早左好多，3小時10分鐘就降落

降落之後唔駛10分鐘就可以行出機門，立即感到一陣寒意
香港氣溫20度，東京氣溫5度
行去過關沿途有唔少背心職員叫你準備定VJW既截圖
出示審查完成青碼俾佢地睇就會獲發一張Health Card
憑呢張紙就可以行快隊等過關
3個月前係關西機場仲有Counter驗屍咁驗，呢度就唔睇



可能呢個鐘數少機降落，入境櫃台排左5分鐘就到我
流程同之前一樣，出示護照同入境審查碼，再打手指模就得


之後就可以去攞行李，但呢度好多遊客卡關
因為海關申報碼既掃描機得幾部，啲人又唔識用搞到排哂隊
我同老細預先填左紙本申報表，行人工通道唔駛30秒就走得
係冇任何阻礙既情況下，由落機到出大堂全程大約20分鐘
聽巴打講如果撞正多人落機既時間，可能都要個幾鐘

LM又有高質遊記睇

出到大堂就買Tokyo Subway 24-hour Ticket第二朝用
去到遊客中心問職員，見我揸特區護照就同我講廣東話
佢話呢度冇得買，指我去京急站出面個服務中心買
諗住過到去一買就走得，點知搞到差啲趕唔切班車
招呼我個職員可能以為我買完即用，同我解釋京急唔用得
我同佢講第二日先用，佢就話要搭夠5程短途地鐵先回到本
又問我會去邊度，順便推介下啲景點
雖然佢好想幫我，但本大爺趕車唔得閒應酬佢
直接開佢波話我識路Plan好哂，佢先知我咩料拿拿聲俾張飛我
買完就立即同老細用IC Card入閘衝落月台


羽田出市區搭鐵最穩陣，唔塞車之餘又準時
呢度可以揀搭東京單軌電車(Monorail)或者京急電鐵空港線
因為Monorail係JR東日本旗下，周遊券同全國Pass都可以唔駛補錢搭
不過要留意而家換Pass既服務中心開放時間都幾閪
搭到去總站濱松町就可以轉JR山手線去東京其他地方
係星期六日或者假期有張優惠票，500yen就可以搭Monorail全程加山手線內其中一個站落車
其他日子冇Pass搭都得，不過車費貴過京急就唔係咁抵

京急搭法就複雜好多，因為每架列車既總站同停靠車站都有分別
同一個月台可以去到橫濱，品川，東京市區甚至係成田機場
如果本身係路盲，係香港搭鐵或者巴士都會去錯地方既話就要小心啲
最好留意月台班次顯示屏望下下班列車既停靠路線同站
路線圖就唔好睇喇，睇完我怕你仲亂



直通運轉呢樣野我係西日本遊記有提過
總括黎講就係唔同路線駁通，列車可以互相駛到對方區間，方便乘客直達目的地
以上操作並不局限於同一鐵路公司旗下路線，接駁路線數目亦無上限
東京地區因為鐵路競爭激烈，直通運轉情況簡直係喪心病狂
以京急為例，空港線除左同自家公司既京急本線接駁之外
品川方向仲會同其他業者直通運轉，例如都營地鐵淺草線同京成電鐵
可以搭同一架列車由羽田機場搭到去成田機場
去新橋/銀座/淺草呢啲熱門地段唔駛轉車
轉乘JR或者地鐵既費用又會低過Monorail，識搭既話其實幾著數

停靠車站就視乎列車總類，每間鐵路公司都有自己唔同既命名方法
京急去品川方向停站最少既列車就係我身處呢架機場快特
係羽田第三航廈站開出之後就會飛15個站直達品川站，車程16分鐘

老細係日本新手黨，出發前都冇乜點搵過資料，旨意哂我
所以佢見到架車飛站非常有興趣，瘋狂問我點解點解
我覺得佢啲問題都幾值得貼堂，非常似呢度啲伸手黨
----------------------------------------------------------------------
：(指住個廣域路線圖) 我地今晚住上野，係咪要去青砥轉去京成上野站？
：錯，係去品川站轉JR去上野站
：咁點解幅路線圖冇講品川去到上野站既
：因為呢度係京急，JR係佢競爭對手點會教你咁樣搭
：咁樣架...我見京急總站係泉岳寺，點解架車總站會去左京成成田既？
：呢樣野叫直通運轉，架車去到泉岳寺會變左地鐵，去到押上再駁埋京成線過去
：咁痴線架...(指住個停車駅案內)同埋我見站名下面咁多顏色線，每條線去既地方都唔同？
：呢啲線係代表列車等級，呢架車就係最高等級既機場快特，停站最少，去到地鐵都會飛站
：吓，咁如果我想係唔停站既車站落車點算？可能等好耐喎
：正常搭去最近既車站落車，係同一個月台等架低級啲既列車就得，通常時間表有夾過唔駛等好耐



：...我想問Limited Express同Limited Exp.有乜分別
：睇中文啦，前面快特姐係快速特急，所以快過特急
：機場快特快過機場急行我明，但點解機場急行快唔過特急
：你好撚煩呀，搭你就搭啦咁多野講
：...

品川站係東京南面一個超大型轉乘站
除左京急同JR之外仲有新幹線搭，無時無刻都咁多人
所以要排長隊搭𨋢或者上落扶手電梯，攞住好多行李既話都幾煩
搭Monorail去濱松町站轉車可能仲舒服
呢度有一個JR線換乘專用閘口，拍一次IC Card就可以同時出京急閘入JR閘
如果想係度轉用JR Pass既朋友可能會遇到困難，最好行人工通道搵駅員處理
唔想煩就行正常閘口出閘，再行去JR閘口用Pass入閘


品川站有4條JR路線，東京方向除左横須賀線之外全部都去到上野
當中上野東京線就係當中停站最少既路線，搭3個站15分鐘就到
上野東京線係包含左幾條JR路線既列車運行系統
後面有機會講番，呢度先省略
由機場起計大約40分鐘就去到上野，車費只係500yen，又抵又快




搭車雖然好多人，但出左車站之後啲人就唔見哂
我地大約10點抵達上野站，但行去酒店條大路接近冇人
呢2晚住Hotel Wing International Select上野・御徒町
離上野站5分鐘路程，幾年前住過，房細但幾舒適
因為星期六日住兼且遲訂，2晚加埋要1200蚊
間房雖然一眼望哂，但好在係方形，門口夠位開大喼

日本雖然開放左自由行幾個月
但國內人已經慣左自肅唔出夜街，同香港差唔多
所以10點幾呢個時間好多餐廳都收哂，得番少量居酒屋有開
不過我一早已經諗好左食乜，唔駛凍冰冰四圍搵

マイカリー食堂 上野店 [Tabelog評分：3.37]
作為專食咖哩既松屋集團旗下品牌，我對佢既味道非常有信心


以前食松屋都係去門口食券機禁野食
坐低之後就有店員過黎幫你搣食券，煮完就送埋餐過黎
新裝修嗰啲就係食券上面印左號碼，叫號就自己出去攞餐
今次就出現第3款叫餐方法，連食券都唔駛印
就係每個位都放左部平板電腦，坐低之後就自己落單
之後等店員叫你個座位號碼就可以去攞餐
食完先攞張單去自助收銀機嘟條碼自己俾錢
但點解好似煩過用食券機咁多既



手仕込みロースかつカレー 少なめ <600yen>
ラッシー <180yen>
本來叫左炸雞扒咖哩，但落完單個店員就走出黎同我講左一大堆日文
佢手上剩係得Lassi張單，以我既神級理解，9成9係話炸雞扒冇哂
所以我就禁左個炸豬扒咖哩，個店員就走番入去，睇黎我估啱

呢杯Lassi係甜既，濃得黎非常順滑，但我嫌佢唔夠酸
而塊炸豬扒味道同松のや一樣，外脆內嫩
因為係即炸既關係，熱辣辣非常好食
咖哩就分5個辣度，我揀左3度，大約係譚仔小辣級數
有少少辣度之餘但唔會去到苦，對我黎講啱啱好
至於咖哩汁唔係幼滑帶甜既日式，而係香料味比較重既印式
所以食落香得黎又唔會好滯，而且叫左少飯，深夜食份量啱啱好


食完飯都差唔多11點，返酒店準備訓覺
一開電視就見到我地偉大既特首宣傳你好香港
冇眼睇，訓覺



Day0 完

呢日寫完喇
不過而家手上冇乜存貨，下次更新會耐少少

正呀~ 師兄~
Visit Japan 係起飛前幾多日攪最穩陣 ?

2月頭整半個鐘就批咗

你2月中飛 ?

lm

Q：機場快特快過機場急行我明，但點解機場急行快唔過特急？

A：因為急行係急行，特急係特別急行，特別啲所以快啲。中文嚟㗎喎唔好扮唔識啊喇你

買左機票之後即搞就最穩陣，好過到時唔識填又就快飛搞到騰哂雞