[窮遊豪食逍遙遊]用8日暢遊關東 (東京‧河口湖‧日光‧湘南)

北北線停駛嘅係超快速 特急2015年已經停駛咗

北北線優等列車全滅

我仲以為嗰架野都仲係叫特急

ニューヨークパーフェクトチーズ
食過，呢舊真係好食

食飽買飽手信之後就搭番新幹線去東京
諗住有時間就去禁指定席，點知最近嗰班とき 318居然全部爆滿
唯有早啲落月台排自由席，點知大把位任坐



老細係車上面話想去感受東京下町風情，又搵著我黎搞
呢啲地方唔難搵既，就帶佢去戶越銀座商店街
係東京站轉山手線去五反田站，再轉東急池上線



因為我地一直都用緊JR Pass，唔可以直接行轉乘閘口
所以要用Pass出另一邊既JR閘口，再行去東急閘口用IC Card入閘



搭2個站就會去到戶越銀座，個車站幾靚



戶越銀座係東京最長既商店街，有1.3km咁長
條街冇乜人行得好舒服，啲舖頭全部都細細間咁，種類好多
有好多賣小食既餐廳，有炸雞有雪糕有鯛魚燒，一定餓唔死你
最重要係物價好平，超市既名月都係賣104yen一個
不過老細好似唔係太滿意，話唔係佢所想既"下町風情"
當刻仲覺得佢想睇啲再舊式既街，類似川越嗰類
正常既"下町"放係香港就係女人街同廟街呢類
行左大半個鐘之後就原路搭返酒店
之後佢話攰唔出去，叫我食飯先Call佢

我回復番自由身之後又變番我既獨遊Style
睇番時間都有3個鐘，夠哂時間
第一時間當然想衝去老秋啦，但要搵地方醫下肚先
雖然松屋都唔錯，但諗起呢幾日冇食過拉麵
所以就順路快快手去東京駅一番街既拉麵街搞掂佢
去過東京站行街既人都知道呢度非常容易蕩失路
因為地面同地底幾層都有商場，睇GPS都冇用
如果想去東京駅一番街既話記住出八重洲地下中央口，一出閘就係


六厘舎 [Tabelog評分：3.79]
黎到已經差唔多4點，過哂繁忙時間
但仍然有一間舖繼續要排隊買食券等店員安排位置
細細個就係連登見識過佢個大名，當然要試下
因為我得1個人，所以好快有位坐


特製つけめん (並) <1080yen>
呢度招牌係沾麵，係拉麵既一種，麵同湯分開上
麵條係幼烏冬少少，過左冷河既極太麵
食既時候就好似食凍蕎麥麵咁，夾起一執麵落湯度再食
根據能量守恆定律，每一次"沾"麵都會帶走湯既能量
計埋呢度既冷氣，你唔食快啲個湯就會凍哂唔好食
為左可以縮短浸麵既時間又夠味，個湯會比普通湯拉麵濃好多
所以我一般都好少叫，因為食又麻煩又驚好鹹
但呢度評分咁高，我相信一定有佢既原因
千祈唔好叫拉麵，聽人講係一乾三濕Level


但呢度既湯底濃度我接受到，係濃豚骨湯底加鰹魚粉，所以杰身
而且食到有微微柚子既酸味同清香，感覺意外地清爽
麵條極度掛湯，食落彈牙得黎仲好香麥味，同湯底非常夾
再混合埋大蔥同叉燒碎一齊食，滿足感爆燈


個湯裡面仲有2舊大叉燒同味玉，都非常入味



枱面有好多料俾你加，記住加少少黑七味粉
微辛既味道又令沾麵個味道更加豐富


日本食野好興連汁都撈埋，沾麵都係
食完麵既剩湯加少少熱既煮麵水開稀飲埋佢，都幾正

食完就行番上地面搭出手線，專登行去NY Perfect Cheese望下
本日入荷完売，明天請早，敬請留意


重臨Animate秋葉原2號館6樓，終於入到Lycoris Recoil Fair
上次第一日黎望到爆哂棚，但平日冇乜人就顯得空蕩蕩
整體裝修都幾中學課室Feel，除左紙板人之外全部都係動畫劇照
不過都見到幾多鬼佬同泰國人過黎朝聖同影相
成班係度 ちさとちゃん~~ たきなちゃん~~ 痴漢咁款






周邊區係展期第一日已經全線斷貨咁滯
得番啲好貴既T-shirt或者好唔吸引既襟章同磁石貼賣
再唔係就要先預約，到4月先有得買
不過ミズキ周邊就有大量，官方惡意





Memo就貼左好多支持者對作品既祝褔
當中不乏畫功高強既人士
除左千束黨瀧奈黨之外，原來仲有真島黨

睇完Fair順便行埋間舖下面幾層，掌握最新宅界潮流
要知道作品受唔受歡迎，除左睇下係咪放係當眼位置之外
因為店員對銷量心中有數，好賣會擺出黎吸客
仲可以望下單行本或者文庫會唔會零零舍舍冇左第一話賣
因為啲人見好睇就會買原作第一本返去睇左先，好睇就再買
唔好睇既上網大把中古品放售
因此，戀上換裝娃娃係一套好值得留意既作品
由CloverWorks製作既漫畫改編動畫，上年1月播出
故事雖然係一般校園愛情喜劇背景，但情節出奇地引人入勝
作畫勁靚之餘感情細節位做得恰到好處，甜到糖尿
其製作精良程度可以睇下第2集女主三點式同埋11集男主扯旗
要知道同期動畫有國際燒錢話題大作 - 進擊的巨人同鬼滅之刃遊郭篇
但戀上換裝娃娃熱度緊隨其後，最後幾話更加超越呢兩套野
官方已經確定製作續篇，可以再期待下


秋葉原中央通り繼續都有唔同Cosplay制服既店員派傳單


GAMERS門口仍然擺住第一代LoveLive μ's既周邊
第一期動畫已經播放10周年，我當年仲係睇MX直播，唔認老都唔得



估唔到係呢度都仲係會見到Lovelive痛車
車頭係μ's既凛，車身係虹咲既果林，頸枕係Aqours既花丸
車頂冇認錯就係Aqours既曜，呢位宅宅就係臭DD既代表

跟住就去ホビー天国幫朋友睇動漫周邊
返到東京都仲見到搖曳露營△


上到2樓就望到孤獨搖滾個檔，只係得番小孤獨係扮Gundam
舖頭都抹消左呢個位置既標記，因為乜都俾人買哂
問過店員話未知幾時再有貨
我就奇怪頭先係Animate見唔到有漫畫，似乎全部都斷哂市
呢套由CloverWorks製作既漫畫改編動畫，係上年10月播出
同期動畫有BLEACH千年血戰篇，SPY×FAMILY，水星的魔女，鏈鋸人等等
都係話題新作或者續作，所以孤獨搖滾之前係被睇低一線
原作雖然只係4格漫畫，講述4個女高中生夾Band既故事
但製作組係趣味性同劇情張力取得好好平衡，節奏明快又唔悶
尢其係主角放飛自我既時候，出現大量梗圖同多樣畫風既表現手法，令人眼前一亮
對佢既角色描寫亦非常真實，受到唔少人共鳴，包括我
得罪咁講，Lycoris Recoil係動畫既表現力遠遠追唔上呢套野

而作為音樂題材既動畫，製作組同樣落左唔少功夫
聲優長谷川育美聲演樂團主音，包辦大部分歌曲主唱，歌唱力驚人
佢之前幫女主蕾娜配音既86又係佳作，但迴響冇咁大
而且搵左唔少知名音樂大佬作曲作詞，啲歌好好聽
動畫第5集演出"ギターと孤独と蒼い惑星"LIVE之後
出色既作畫表現配合精彩既音樂，成功引爆海內外對作品既熱潮
剩係呢首歌放左上Youtube兩星期就突破500萬播放
出專輯嗰個禮拜係日本Billboard同Oricon主流音樂排行榜登頂
同時刷新21世紀動漫角色歌曲銷量紀錄，超過20萬

行完動漫野就行去睇大人野，但冇乜野睇得上眼
不過因為怕俾人BAM，我就唔貼圖喇
隔離有間賣Tee既舖頭，買件"変態"衫俾老細都唔錯



行到6點就去番車站，撞正宇都宮線赤羽站附近派彩
因為直通運轉關係，攬炒埋東海道線同湘南新宿線等鐵路大動脈
好彩大部分路段都有振替輸送，但記住揸JR Pass係冇既
雖然影響京濱東北線，但搭山手線返新橋完全冇問題



用iPhone既人唔需要專登買張實體IC卡黎用
因為Apple Wallet支援PASMO同SUICA，可以好似八達通咁一拍就入閘
就算之前有，都可以轉移舊卡餘額去iPhone張卡度
可能有人怕要用Apple Pay增值，會蝕信用卡匯率
其實就唔駛太擔心，因為市區大站會有呢類新式增值機
放部電話係發光嗰個位，再跟指示入Cash就可以增值

鳥貴族 新橋プラザビル店
老細頭先感受唔到下町風情，居酒屋有喇掛
所以夜晚就帶佢去離酒店5分鐘路程既鳥貴族感受下
我地見到門口企左堆人以為要排隊，但行入去問又有位架喎
呢間連鎖串燒專門店開到周圍都係
打住所有單品均一價既旗號越做越大
串燒，炸物，送酒菜，甜品同酒水全部都係單品350yen



去餐廳我好怕睇到手寫餐牌，因為怕字太潦睇唔明
居酒屋嗰啲就更加驚，啲字體懶有Style鬼劃符咁
鳥貴族完全冇呢個問題，因為係用平板落單，唔駛This This This
仲可以轉中文，咁就唔怕落錯單


黎得呢度第一時間當然叫酒飲啦，一大杯都係350yen
我就叫優しいレモンサワー，甜甜酸酸幾易入口
老細就叫メガハイボール，佢話滑得黎又唔苦




呢度環境幾好冇煙味，周圍大部分都係打工仔


5分鐘後啲野陸續咁黎，串燒1碟有2串，2個人啱啱好
呢度既雞串主要有3款口味 - 鹽燒(塩)，醬燒(たれ)，香辛(スパイス)
呢個醬燒雞脾肉都幾惹味，但因為醬多所以唔夠香口


明太子雞串幾好味，個醬有鹹香味，雞又唔會燒得過老


鹽燒雞肉丸好出色，外脆內多汁，咬完唔會散開


椰菜睇啲台灣Blogger話必叫，但試完覺得唔特別
可能係啲女士覺得食左咁多肉要平衡下


鹽燒雞翼同燒豚肉好香口，值得一試



上網睇釜飯要20分鐘準備，所以一早就叫左
飯用雞湯煨成，入面有洋蔥同雞肉，一開蓋非常香，仲有飯焦
但可能因為一路食啲濃味野，味道就顯得有啲清淡

同一時間有朋友同囡囡快閃關東，咁啱就係東京行緊街街
經損友慫恿之後，就話送完條女返新宿酒店就瓹落黎
正所謂偷跳都唔好去咁遠，一於約係新宿等
今次行程本來就冇新宿遊，咁就藉呢個機會帶老細去見識下
係平板度禁埋單就可以行出去俾錢，總共4900yen，一啲都唔貴
最重要係又唔駛我俾錢


係新橋搭JR去東京再轉中央線，25分鐘就到，Pass全包



新宿站作為全世界最繁忙既車站，冇之一，真係好多人
一出東口就會見到Cross新宿大樓上面既3D廣告屏幕
聞名不如見面，立體感做得非常迫真
右邊好矮嗰座野以前係賣生果既老字號百果園
執左之後變左酒場

過左馬路一直向前行就會見到Donki新宿歌舞伎町店
左邊就係男人既天堂 - 歌舞伎町一番街
但睇落Donki先係喎，TENGA SHOP免稅



打過人龍既老細話條街做得極似，招牌一模一樣咁滯
但我就唔係打開機就唔知佢講緊乜
剩係見好多高收入XX，無料案內所同埋牛郎店
不過講開又講，呢度靚女密度又真係幾高，多MK妹




再行入少少係廣場側邊有勁多妹妹仔舉哂牌話800yen任砌飲
只要你行近少少或者望一望，佢地就會夾道歡迎兼落力啲叫，非常架勢
老細扮哂野係呢度行黎行去，睇黎好有興趣
-------------------------------------------------------------------------------------
：咁樣先係真正既東京下町風情呀嘛，我就係要呢啲
：下乜撚野町風情姐扮大文豪，坦白啲好冇
：唔知受唔受遊客玩既呢，好似好平咁
：上到去即刻俾人氹買左支10萬yen香檳你就知，快啲搵個fd先啦
：佢搵我地先啦，陪埋我行多轉睇清楚啲囡囡乜野樣先啦
：...咁好啦(有啲都真係幾正既)
-------------------------------------------------------------------------------------

搵到個fd之後又行多左轉，再討論去邊度下場
本身諗住磯丸水產但滿座，結果...又係鳥繼續
頭先食飽左，所以呢次都係飲野為主，吹下水順便食花生
今次就試優しいみかんのお酒オレンジ割
姐係蜜柑豬閪，入口微酸都幾清爽


之後再飲多杯烏窿閪ウーロンハイ
用烏龍茶既茶香蓋過燒酎既苦味，意外地好易入口


今次埋單都係4500yen，抵到爛
之後就返酒店去樓下便利店買宵夜食
因為頭先隊左4大杯酒，順便買奶飲保護個胃


北海道牛乳を100%使ったミルクシュー <158yen>
Family Mart內部搞左個開發泡芙新口味既比賽
將全國分做6個區域發售限定口味，以綜合評分決定王者
最終結果由東日本既北海道奶油泡芙勝出，可以全國發售
呢個泡芙味道冇其他便利店賣嗰啲咁濃，但奶香味好重，幾好味


睇埋飛鼠扑野就訓覺了


Day 4完

十分好睇，煩請繼續
我開始懷疑你係我分身：理科撚、睇一樣嘅動畫、都係唔打機、鐵膠、沉迷遊日

今日去東京，Ching 有無話覺得邊間餐廳最值得推薦？

值得推薦嗰啲唔早1個月book定食唔到喎

個個都係咁架啦

射射，記低佢先