[窮遊豪食逍遙遊]用8日暢遊關東 (東京‧河口湖‧日光‧湘南)

係神社對出巴士站搭10分鐘就會到JR日光站，車費350yen
呢度係日光地區另一個主要聯外既交通總站
可以搭日光線去宇都宮再轉新幹線或者宇都宮線返東京
站體係典型洋風建築，係1912年落成，2017年翻新


站出面望番去日光方向就係男體山
但因為富士山過於震撼，所以對呢個雪山冇感
山下面淺綠色屋頂就係東武日光站，行返過去唔駛5分鐘


雖然仲有20分鐘先開車，但係出面企都係好凍，所以都係上車坐住等
車上面超過8成係外國遊客，果然搭得JR黎既都係揸Pass



雖然日光線得6個站，但因為單線兼要待避
所以係龜速行駛，全程差唔多45分鐘先到

既然黎到宇都宮，冇理由唔食呢度既特產 - 餃子
味噌と餃子 青源 パセオ店 [Tabelog評分：3.49]
呢間餐廳係2021年Tabelog餃子百名店，係車站商場地下


就算係下午3點幾都好好生意，入座率超過7成
我見好多人都係跟餐牌叫Set，但老細話未肚餓剩係黎淺嘗
梗係啦，頭先食成2碗麵咁多
所以我地就單點左2款餃子



源ちゃん焼き餃子 <330yen>
老細唔食蔥所以就叫左定番呢一款
雖然見到個底煎到好焦香，但係唔脆既
餃子皮都幾薄，餡就菜多過肉，食落幾清甜
店員推薦用呢度特製既味噌醬黎食，但我覺得個味麻麻地



万葉柚子みそ餃子 <390yen>
味道黎講我覺得好過上一個，食落有股柚子既清香
除此之外就冇其他評語，都係普通


老細可能對宇都宮餃子期望太高
佢對呢間野咁高分但味道不似預期表示憤慨
我去過日本幾次都明白口味呢家野度度唔同，評分絕不能盡信
唔好難食就得，我又記番起姬路食明石燒嗰次，記一世

食完就返東京，見差唔多夠鐘就落月台排自由席



今次搭到E5系やまびこ，係東北新幹線呢個路段第二快既列車
由呢度搭去東京只需要49分鐘
雖然有一半車卡係自由席，但座位都半滿
下次都係唔好懶㩒張指定席




難得呢日天氣咁好，出去影番陣東京站丸之內站舍先



最後兩晚住既酒店就係京橋Remm
又係連鎖商務酒店品牌，2019年4月開張，算新新地
位置係正地鐵銀座線京橋站上面，酒店門口就有個出口
係東京站八重洲南口行過去都係5分鐘，非常方便
單人房每晚630蚊，係呢個地段唔算太貴
之前諗住訂隔離平少少既京橋Daiwa Roynet
但我又想住下唔同品牌，所以最後冇揀到佢



大樓低層係寫字樓，所以要先搭𨋢上7樓前台Checkin
可能因為房價問題，呢度又收我100yen住宿稅


酒店房感覺上同新橋Daiwa Roynet差唔多大
長走廊都夠位俾我開到2個喼
但廁所門係開向走廊，所以就有啲麻煩

老細話黎左日本咁耐都冇食過拉麵
係喎，我前一日去六厘舎冇預佢喎
所以帶左佢去番東京駅一番街是旦搵間搞掂佢


ひるがお 東京駅店 [Tabelog評分：3.60]
最終佢選擇食鹽味拉麵，因為話脂肪冇咁多冇咁肥
去旅行食野都要睇營養，麻鳩煩



塩ラーメンひるがお盛り <1200yen>
鹽味拉麵配菜有蛋，叉燒同雲吞，附送一粒蝦米
湯底味道好濃厚，係用雞骨魚介同昆布煲成，鮮甜得黎好清爽
麵質非常彈牙而且帶有麥香，同個湯好夾
叉燒好厚但比較瘦，肉味好濃但食落有少少柴
雲吞有2塊，皮多過餡，所以𡁻兩𡁻就吞埋落肚，食唔到味


黑豚肉汁焼餃子 <480yen>
老細頭先食宇都宮餃子好失望，所以叫左個餃黎對比下
呢度既賣相靚啲又大隻啲，咬落去皮脆兼爆汁
不過味道同我買某將既煎餃差唔多，餡料都係比較易散開

之後就翻去新橋Daiwa Roynet攞番寄存既行李
係車廂顯示屏同公告都講到第二日落雪會好大獲
但實地觀察完全唔覺氣溫有急劇下降
不過呢日本身都冇Plan，可能係市內行商場就算






返酒店一開電視就嚇左一跳，因為個開機畫面係酒店自己整
連個遙控同電視OS都係咁，佩服





飲住明治おいしい牛乳，睇住電視
訓住可以調較角度同力度既按摩椅，爽



不出我所料，所有新聞都係報緊第二日好大鑊
又鐵道運休又道路封閉咁，而家睇番好似吹大左
當時希望JR東唔好搞到好似JR西咁
私鐵行緊既時候得佢運休，開打火器燒著路枕呢啲柒野
訓醒先睇下點啦




Day 6完

Ekinet最早1個月前先開放訂飛

Day 7

訓醒一開電視就係報緊落雪新聞
河口湖同箱根白茫茫一片，好彩早啲去
因為落緊雪係望唔到富士山架




咁大個人都未見過落雪，今次一開窗簾就睇到


開心到即刻落樓下7仔買把透明遮行去東京站
沿途雖然冇乜積雪但係超大風，不過都冇上次河口湖朝早咁凍
啲雪一落到地就變冰，所以極跣，好彩我著雪鞋
成就解鎖：✓ 感受落雪




因為都唔係太大雪，JR服務唔係太受影響


東京站間大丸開門前1個鐘已經排長龍，有限定野買？


行番去丸之內站舍，感覺同前一日完全兩個世界

行緊東京站嗰時就收到老細Whatsapp
------------------------------------------------------------------------------------
：喂我行得喇，拍極你門都唔應既，打緊飛機？
：出左去喇柒頭，咁鬼遲醒，你搭地鐵去築地站等我啦
：咁多條線點搭去架，我唔識呀
：凍冰冰冇理由行番去酒店接佢咁戇居架嘛
：你搭1個站去銀座站，之後行去日比谷線月台等我啦
------------------------------------------------------------------------------------
呢日冇Pass，所以唔駛限住搭指定交通工具
係東京站搭丸之內線就會到銀座站轉乘日比谷線
接左老細行埋去場外市場都係20分鐘
作為交通魔童，東京地鐵難我唔到既


築地冇因為場內市場搬左去豐洲或者大雪天氣而影響生意
平日9點半黎到照樣多人到爆炸



係江之島食唔到あさひ本店既章魚仙貝，呢度都有分店


もんぜき通り既食店冇太大變化，牛丼都仲係好多人排隊
當中有一間新開既舖頭賣燒吞拿魚串，排勁長龍
今次就輪到老細不問價排隊

とんぼや [Tabelog評分：3.26]
呢度燒吞拿魚既方法非常低效率，只係得1個人負責
每輪只係燒3串，再細緻地用火槍慢慢燒，3分鐘先搞掂
所以前面10幾人排左超過20分鐘先有得食，見到都肚餓





隔離有黑椒，檸檬汁同七味粉可以加


まぐろステーキ <500yen>
一串燒吞拿魚有3舊，食唔到骨啖啖肉，可以放心食用
雖然燒到接近全熟，但肉質都係非常滑又唔會鞋
調味非常好，香口之餘又冇魚腥味，證明處理得好

食完魚就走去食玉子燒，呢度最出名就係丸武同山長
呢兩間野就好似路德圍亞玉豆腐花同贊和荳品一樣
大家做同一樣野價錢一樣，連評分都一樣，鬥得難分難解
今次一於試哂兩間

丸武 本店 [Tabelog評分：3.49]



我細細個黎食賣緊100yen，過左咁多年都冇加過價
蛋既口感比較實淨，甜度係我接受到既極限，仲食得出蛋味


築地山長 [Tabelog評分：3.49]
因為成本上升，今年1月開始加價50yen，而家賣150yen
但排隊既人冇因為咁樣而少左，反正都唔貴



山長件蛋明顯厚過丸武，橫切面睇落比較Fluffy同多汁
雖然口感嫩過丸武，但甜度有啲難接受，飲緊糖水咁

之後就帶老細去東京站堆地下商場行
行到食飯時間就揀左間鰻魚飯黎食

うなぎ 成田新川 東京駅グランルーフ店 [Tabelog評分：3.36]
呢間餐廳有齊哂鰻魚飯既兩種主流製法
關東製法係燒之前會多一重蒸既步驟，所以肉質淋啲滑啲
關西製法係直接照燒，姐係名古屋嗰種，所以薄啲香口啲


うな重（竹）<4400yen>
坊間用碗裝既鰻魚飯叫鰻丼，通常得3分1條鰻魚，價錢平啲
鰻重就會用方形既漆盒黎裝，份量多啲睇落高貴啲，自然就賣貴啲
而唔同份量係會以松、竹、梅黎分辨
竹姐係中Size，份量有1條鰻魚



呢度既鰻重係關東既製法，因為蒸完吸收左水份所以嫩滑啲
以前食過成田山既川豊 本店[Tabelog評分：3.57]
對比番既話，呢度份量多啲亦燒得香口啲
但汁既味道淡啲，所以唔加山椒粉會有少少腥味


肝吸い係用鰻魚內臟整既清湯，味道唔特別

食完飯就已經冇行程，問老細仲想去邊，佢就話返酒店Hea順便執喼
一日到晚留係酒店做乜鳩，你唔行我自己行
首先再去NEWYORK PERFECT CHEESE補多少少貨
12點幾黎到得番8件同12件裝賣，20分鐘先排到收銀，勁誇張



下一站去明治神宮，搭中央線去新宿再轉山手線去原宿
因為比較內陸既關係，呢度就見到積雪



原宿站西口一出就係明治神宮
眼前呢個南參道第一鳥居因為落成超過100年而老化
所以係2022年係本地用超過250年既木材重新打造
而家望落新既一樣，有啲格格不入



係落緊雨雪既情況下，呢10分鐘路程十分難捱
體感溫度應該跌到零下，因為濕凍


明治天皇好鍾意飲酒，所以參道左右都有奉獻既酒桶



之後就會見到多1個鳥居，穿過佢再行多5分鐘就到本殿





上次黎有結婚儀式睇，今日就人都冇個
又凍又冇野睇，都係走先




JR原宿站曾經擁有東京都內最古老木造站體建築，冇之一
但因為鄰近東京奧運主場館，需要大規模擴建改造
最終係疫情期間2020年開始拆卸，而家拆得七七八八


另外一邊既竹下口同竹下通就冇乜點變過
不過黎呢度都係交差，幫人望下啲女人野同埋行Daiso
本身想食埋可麗餅，但係零度既戶外排隊我怕未食已經凍死

下一站就去羽田機場完成我多年未了既心願
順便去買手信同望下國內線Checkin流程，第時參考
最簡單既方法就係搭山手線去品川再轉京急本線
好似我咁用IC Card既話直接係轉線閘口拍卡就得
如果揸Pass既話就比較麻煩，要行去側邊搵人工櫃位買單程飛



京急本線有好多分叉路線同埋列車種類
所以地下標示左幾條隊代表唔同總站
去機場既話就排藍色隊




尾二站係羽田T3，返香港就係呢個站落車上一層Checkin
但我既目的地係T2，所以就搭到去總站
呢度同黃埔站一樣，係月台要揀定方向出，如果唔係行勁遠
T1係JAL同附屬公司國內線專用客運大樓，T2就係ANA



因為第二日就係日本假期，好多人搭國內線旅行或者返鄉下

ずんだ茶寮 羽田空港 国内線 第2ターミナルビル フードプラザ店 [Tabelog評分：3.07]
ずんだ茶寮係一間仙台專賣毛豆和菓子既甜品店
佢既毛豆奶昔我一直念念不忘，係疫情前我已經上左癮
幾年前我講過會黎羽田機場第二航廈，今次達成願望

[帶住父母去旅行]12日橫越日本列島 (札幌 ~ 鹿兒島)
- 分享自 LIHKG 討論區
https://lih.kg/azfkbNV

ずんだシェイク <330yen>
2018年係仙台先賣緊250yen，都貴左幾多
日元貶值引發3月加價潮，杯野已經加到360yen
呢杯奶昔份量同M記橙汁杯差唔多，淺嘗黎講都好夠
味道咁多年黎都冇變，係香濃奶味之中帶有毛豆碎既清香
因為甜度超高既關係，飲一啖非常提神


如果細杯唔夠喉，仲有大杯同Excella
呢間舖東京大丸有分店，搭新幹線前不妨買番杯上車嘆
而家冇左豆乳版，好可惜

上左電之後就返酒店，當然搭番京急
NEVER TAKE MONORAIL TO/FROM HND

呢程就搭快特，都營淺草線各停
直接搭到去寶町落車行番酒店，加埋唔駛45分鐘，超方便



京成2代3100形係為東京奧運而建造既新車，2019年開始營運
因應會有大量遊客到訪，Long Seat中間係可摺疊座位
非繁忙時間可以用黎放行李，唔駛擺走廊阻住人行路
繁忙時間又可以拉落黎坐多啲人，一舉兩得
去到都營淺草線路段列車就會變左アクセス特急，遲啲講點解



離食飯仲有啲時間就返左酒店開電視睇新聞
一睇就不得了，日本政府最新消息宣布解除室內口罩令
但以大和民族性黎睇，我睇夏天前啲人都仲繼續戴

見到羽田空港以為你已經返香港

去羽田空港食毛豆，但係你又話東京市區有

你過去純粹係因為鍾意京急？

佢都話入去考察

我唔確定佢個心願淨係係到羽田空港，定係想國內線飛一次啫

因為我都係成日飛成田飛到嬲，上次終於羽田，仲喺飛機展望台瞓咗陣，幾開心

有的
不過應該點book

我去親東京都係羽田落機，出市區快靚正
之後可能會羽田搭國內線剷上北海道，所以計下時同望下有乜步驟，睇落都幾簡單

冇經驗幫唔到你