[窮遊豪食逍遙遊]用8日暢遊關東 (東京‧河口湖‧日光‧湘南)

好 最怕阻住人
Thx

黎到人生交叉點既時刻，時間其實夠我去以下兩個景點：
1. 大石公園
2. 忍野八海

至於離開河口湖返東京市區都有特別多既方法：
A. 搭富士急行線轉JR特急，我冇JR Pass所以太貴唔考慮
B. 搭高速巴士去新宿/東京站，但要提早買飛兼有塞車風險
C. 搭路線巴士去御殿場站，再去埋Outlet，嗰邊大把方法走
我就揀左C，唔駛煩之餘順便去埋忍野八海

如果係獨遊既話1-2-C絕對冇問題，我行路快大家好清楚
但呢種行刑式旅行老細實屌鳩我，所以1同2只能活一個
咁啱我地見到去忍野八海既巴士準備上客
唔諗喇即刻衝上車，大石公園下次有緣再黎

去忍野八海既巴士1個鐘大約有2班，IC Card車費560yen
係河口湖站出面6號のりば上車，同去御殿場同山中湖共用のりば
上車前要睇清楚車門旁邊個LED牌有冇寫忍野八海，因為唔係班班經


巴士中途會經過富士急樂園同富士山站，都幾多人搭
而且大部分路段都係睇住富士山，睇到悶



我地10:45上車，時間表寫係29分鐘後既11:14落車
但你望下我11:19分去到邊，車程預計幾多分鐘


最終我地遲左15分鐘，係11:28先係忍野八海巴士站落車
但下班預定去御殿場站既巴士11:53就會到
假設冇Delay，我只係得25分鐘行，因為再下一班已經係13:23


忍野八海係富士山世界文化遺產構成部分之一
所謂八海係唔符合商品說明條例，因為嗰八海叫自己做"池"
池水經過地底岩層幾十年天然過濾先湧出黎
所以礦物質豐富水質極好，正宗水擘擘水晶晶
蔚藍既池水同富士山結合成完美既山水空間，因而成為名勝之一
落左車沿著河邊既路牌行5分鐘，就會去到其中七海既區域
另外嗰個叫做出口池隔成公里遠，冇咁多時間行過去
當你去Google搵"忍野八海"，會有一個"忍野八海 伏"既紀錄彈出黎
每一個香港人票選既日本中伏景點排名榜都係排到勁前
今次黎到就想睇下係咪真係伏到咁

因為冇時間，我地就直衝睇左最靚嗰個池先
五番霊場 - 湧池
作為第一個見識到既忍野八海，呢個池都幾...迷你
應該仲細過海洋公園睇企鵝個池
呢個池係八海湧水量最多既，所以水質最清澈




呢兩日影相下意識都要連埋富士山一齊影


湧池隔離係中池，大得黎仲有水車轉下轉下，有鴨游下游下咁
但如果唔同大家講清楚，你地可能仲以為佢係忍野八海之一
其實呢個池係人工開鑿，由其他湧泉引水入黎
我唔能夠話佢昆遊客，因為佢仲靚過真正既忍野八海



中池中間有左一個圓形島仔，個入口係舖頭裡面，免費參觀
首先你要經過門口既飲食檔，有即燒草餅，魚糕棒同雪糕
然後行過數之不盡既手信貨架，飾物又有食既都有
跟住再經過入口隔離富士山聖水手水舍先到
受唔住物質引誘既人請小心，你未去到個池已經自動攞左個銀包出黎
正所謂免費既野係好貴架



呢個中池之中池既池水好似寶石咁既色，非常通透
以前有人當左做許願池掟錢落去祈褔
因為多人掟到過度污染，而家放左個牌明令禁止

之前係新倉山，酒店同天上山影過去富士山
因為背景只有藍天，影既對象只有富士山頂，都幾單調
忍野八海呢度多野襯托富士山，我覺得影得仲靚




頭先係天上山公園係由北面望去富士山，叫做裏富士
呢度由東北方望過去，就叫做忍野富士
火山口平滑啲闊啲，吉田登山路線睇得更加清楚

Lm

為免有乜野不測，我地都準時係11:51到站頭等車
好彩唔駛等好耐，架巴士Delay 5分鐘，係11:58到達




巴士中途會經過山中湖同東口本宮富士淺間神社
但因為班次實在太少極難安排，唯有留番下次黎




最終架巴士係12:50到站，搭足接近1個鐘先到御殿場站，車費1300yen
本來河口湖站有高速巴士直接過黎，但目前為止仲係運休

唔知你係邊度搵，我睇番IC Card紀錄
河口湖站去忍野八海車費係560yen

富士急行巴士全線支援IC Card，所以有卡就唔駛煩
上車方法同香港唔同，係後門上車
落車前禁鐘仔，之後司機位隔離既前門落車
https://bus.fujikyu.co.jp/rosen/get-on-bus

如果用IC Card俾錢既話，上車嗰時要拍車門旁邊嗰部機
落車既時候係司機位隔離部機拍卡扣錢就可以落車
如果用現金既話，上車嗰陣係右邊部機仔忟張整理券出黎
整理券上面會有個號碼，車頭屏幕會顯示每個號碼搭到相應巴士站既車費
如果要唱散銀，最好就落車前去司機位隔離部機搞
落車時一次過將整理券同足夠車費入落錢箱
https://www.shizuokabus.co.jp/norikata/

明白哂 應該係我記錯
你岩 560円

中池個池水同啲魚又幾靚喎
但有時間真係寧願去富士吉田行下算

黎到呢度又要諗陣間去完Outlet點樣返東京市區：
A. 去東名御殿場站搭高速巴士，班次多但有塞車風險
B. Outlet搭直達高速巴士，班次少又要網上買飛兼有塞車風險
最後選擇C. 御殿場站轉JR，因為唔知要行幾耐
搭JR時間彈性好多，又唔駛怕冇位，最多咪企
橫掂陣間都返黎，一於放低哂啲野去Locker兩手揈揈行街街
御殿場站都幾多Locker，非假日應該唔會爆滿



呢度去Outlet有免費穿梭巴士，逢00 15 30 45分開出
上車位置係箱根元女口2號のりば
部分由河口湖開去御殿場既巴士都會以Outlet為總站，唔駛轉多次車




穿梭巴士中途會經過東名御殿場站載高速巴士客
唔塞車既話全程大約10分鐘就會到Outlet
呢度分左3個區域，巴士站係West Zone
仲有East Zone同Hill Side，每個區都有條橋互相駁埋
黎到呢度已經差唔多1點半，即刻衝去Hill Side搵野食
行橋嗰陣見到好多人向住我地方向影相
一望番轉頭不得了，原來又係富士山，但山景同頭先睇完全唔同
左邊山頂附近零零舍舍有一忽冇雪，嗰度就係寶永山
係1707年寶永大噴發之後形成，改變左富士山既風貌
因為呢度望過去會同富士山重疊，所以睇得唔清楚
如果係東北面山中湖或者西南面富士宮望過去既話
就會明顯睇到富士山側邊有舊野突起左

本來想食炭焼きレストランさわやか [Tabelog評分：3.52]
但估唔到平日黎都仲勁多人排隊，老細好肚餓就快食左我
唯有退而求其次去隔離既美食廣場，不過因禍得褔
呢度名符其實係一個免費富士山觀景台，啲人掛住影相唔食野



静岡ご当地グルメ屋台 [Tabelog評分：3.26]
食之前首先同富士山影番張相先


炭燒豚丼セット <1298yen>
呢度係用冇咁肥既豚梅肉，雖然冇咁肥但好淋，配微甜醬汁非常夾
但味道就比較普通，我係屋企整應該都調得出呢個味
セット仲送左味噌湯同薯仔沙律，正常味道，食左冇影到


浜松餃子 6個 <638yen>
唔經唔覺我地已經係靜岡縣既範圍，當然要叫啲特產試下
我就叫左浜松餃子黎試，個底煎得好脆，餡料多菜少肉，幾啱我口味
老細叫左富士宮やきそば，但佢嫌油得滯食唔慣



ソ一スマヨ<550yen>
呢個章魚燒睇住佢整，所以係熱辣辣，味道唔錯


大地のハーブ鶏からあげ 3個 <429yen>
好脆口，但味道普普通通

食完飯就係行街，我同老細分頭行事，約定2個鐘後係巴士站等
御殿場Outlet同關西機場臨空城Outlet係同一集團
所以風格同舖頭都大同小異，但呢度多舖啲又大啲，好多野行
但上次已經買左好多，係財政緊絀既情況下就唔亂買野喇
去Champion買左2件折到痴線既衫之後就周圍鳩行影下



係Hill Side望過去East Zone已經大到咁
山頂下面嗰條高柱就係West Zone巴士站，遠到呢


連接East Zone同West Zone既通道叫夢之大橋
係其中一個觀賞富士山既最佳地點之一
不過講真已經睇到有啲厭，有段時間唔想再睇雪山




Outlet開出既穿梭巴士就係逢10 25 40 55分開出，車程都係10分鐘左右
返到去都黃昏，去Locker攞埋啲野就出發返東京
因為拎住好多野，我地決定去新橋Check-in先
放低野再去上野攞番啲喼再番新橋，反正車費唔係好貴

搭鐵返東京有好多方法，新橋係東海道線沿線
所以最舒服就係搭去國府津再轉東海道線，車費1980yen，大約2個鐘就會到
如果係去新宿池袋等既東京副都心區域，就搭去松田轉小田急
時間差唔多但IC Card車費只需要1306yen，平過全JR好多


御殿場線以前係東海道本線既一部分，曾經係全複線
但二戰物資缺乏拆左一邊路軌之後就冇再起番
同時因為坡道過高，所有列車都要停站連接登山專用動力拖卡先可以繼續行駛，形成路線樽頸
係90年前丹那隧道建成，列車可以經坡道平緩既熱海線去到御殿場線東面總站沼津
而且整體距離縮短20%，隨即升格為本線，御殿場線就被降格
但御殿場位處河口湖同箱根中間，地理位置優越，仍舊係交通要道
所以就冇廢線，不過因為全線單線，班次密極有限


JR東海在來線主力313系電車，呢度係2卡編成
即使有打對面坐既位，但老細個大喼太阻掟搞到要坐Long Seat
不過好彩我地坐尾卡，路線大部分站都係無人站
所以好多時只係開司機隔離道門收錢同上落客，冇乜人經過



JR東海英文雖然係JR Central，營運日本中部地區舊日本國鐵鐵道
但東海=東海道新幹線，呢條交通大動脈佔公司總營收超過9成
導致經營重心嚴重傾斜去隻金蛋度，對在來線重視程度唔高
所以到而家都仲有超過一半在來線仲未支援IC Card
包括上次遊記講過俾近鐵打殘既紀勢本線同參宮線


對面月台有一架小田急60000形電車啱啱落客
點解JR站會見到私鐵小田急既車？因為直通運轉
呢架浪漫特快ふじさん來往小田急新宿站同JR東海御殿場站
車程大約1小時40分鐘，基本車費連特急票價2920yen
但1個鐘後先有車，去到新宿又要再轉車，太煩不了


我一向有儲開可樂樽，頭先係天上山公園買左富士山


搭到去下曾我站既時候見到出面好多梅花

搭左52分鐘車終於黎到國府津站轉東海道線
但千祈唔好見車就上，要睇清楚總站名左邊嗰啲日文字
去新橋既話就要搭”上野東京ライン”，唔好搭”湘南新宿ライン”
上左車就代表正式進入JR東日本區域



上野東京ライン姐係上野東京線，係包含幾條JR路線既列車運行系統
因為新建軌道連接上野站同東京站，因而得名
係好多年前，東京站同上野站各自處理東京南同北既鐵道交通
東京站係東海道本線總站，上野站就係東北本線總站
中間除左山手線同京濱東北線之外，仲有專做貨運同列車調度既連接線
有時順便運行直通運轉班次，但班次唔多
之後東北新幹線想由上野站伸延到東京站，但已經冇地再起
結果就拆左嗰條相對冇咁重要既連接線用黎起新幹線軌道
隨住經濟發展，越黎越多人來往東京南北
繁忙時間既山手線同京濱東北線已經係接近人踩人級數
所以政府同JR東日本為左解決呢個交通樽頸
決定係東北新幹線路軌上重新興建連接線，係2015年啟用

起完呢條線之後，南面既東海道線就可以同北面路線直通運轉
往來既人唔需要轉車，而且停站少左可以更早抵達目的地
品川~上野路段，山手線有10個站，上野東京線得3個站
提升左呢個路段既運力又降低山手線使用率，一舉兩得
但對遊客黎講就多左樣野煩，就係路線圖同廣播變得更加複雜
我搭緊呢架列車係東海道線，列車係上野東京ライン 高崎線直通
姐係代表佢會用上野東京線，而且係直通運轉去高崎線
另外仲有一條湘南新宿ライン，之後會搭就唔多講住
我搭緊橙色嗰條線，去新橋唔駛再轉車



老細嫌火車張櫈太熱火燒春袋，企足70分鐘車去新橋
佢全程係度睇路線圖問我野，但對佢黎講似乎有啲燒腦
到出站發覺中伏，拍IC Card出唔到閘
結果要去人工通道搵駅員搞搞佢，幫我地扣番相應車費
諗諗下先醒起頭先係御殿場有影到張Poster
係講JR東海IC Card區域同JR東日本唔共通，但我冇為意
東海呀東海，點解你而家仲玩緊單機


今次揀酒店我盡量揀JR沿線，因為之後幾日會用JR東京廣域周遊券
新橋呢個地方非常完美，因為係8線交匯站，包括5條JR線
仲係JR必停站，唔怕飛站車，搭新幹線既話搭1個站就到東京站
所以呢3晚揀左住新橋Daiwa Roynet，係我首選既酒店品牌
係JR新橋站日比谷口過2條馬路就係
附近有齊7仔F仔L仔便利店，仲好多野食，你要食女都有
間房幾舒服，但係就比我想象中細左啲，可能東京地價貴
但張床都一樣咁大，走廊都仲夠位開大喼

呢度出發去上野都好快，搭上野東京線2個站9分鐘就到
俾個確認電郵前台職員睇就攞得番行李，好方便
返到新橋放低野都8點，就去附近食飯

豚大学 新橋校舎 [Tabelog評分：3.49]
呢間餐廳就係新橋站隔離，第一次去東京既時候就已經想食
但一直抽唔到時間黎新橋呢邊，今次終於得償所願


呢度既主食只有一樣野，就係豚丼，有4個份量選擇
另外仲可以加Set，有半熟強，泡菜等等
全部用食券機搞掂，買完自己搵位坐再交食券


豚丼 中 <750yen>
豚丼セット <150yen>


呢個飯剩係睇相都已經覺得好好食，同Lunch食嗰個冇得比
中既份量有10塊大豚腩片，仲好似燒味飯咁加棵菜點綴下
一上枱就聞到好香醬汁同豬油既味道
豚肉片浸左特製醬油再燒到微微燶邊，但唔會燒過火乾爭爭咁
同食叉燒一樣，有燶邊既先係好叉
醬汁味道偏甜帶少少蒜香，正好中和豬油既油膩感
下面既飯索哂肉汁豬油同醬汁，配埋肉食，一流
再加埋半熟溏心蛋同七味粉一齊食超級夾，正
：我覺得呢餐係人形町今半之後第二好食

頭先個豚丼唔夠喉，臨返酒店前去鳴門鯛燒本舖
買左舊十勝産あずきたい焼，1舊260yen有啲貴


食甜野就當然要配奶啦，首選明治おいしい牛乳
雖然佢價位有啲貴，但餡都係打滿既，脆皮得黎唔太甜



之前係上野同河口湖間酒店網速都係差差地
成晚都上傳唔哂啲相上雲端，但我又冇專登做測試
黎到呢度我終於記得做，網速算幾穩定幾快


我去親旅行都係洗衫，一黎唔駛帶咁多行李會輕啲
二黎唔慣太多污糟衫同乾淨衫放埋一齊
所以食完野沖埋涼就一次過洗哂3日衫，舒服哂
以前黎呢啲投幣式洗衣機要專登唱散銀好鬼煩
而家有Contactless Payment方便好多


等乾衫既時間就當然係睇電視
星期一晚就梗係睇LIVE既月曜から夜ふかし啦


Day 3完

上野東京線居然冇搭 Green Car，唔似你老細作風

都話今次窮遊冇錢呀，慳得就慳啦
利申：未搭過Green

富士吉田有鐵到，時間控制好好多
忍野八海得巴士仲要Delay，走一班等成粒鐘好煩

你同老細講：「呢個係頭等。」
佢就會話：「好啊好啊咁去搭啦！」
咁你再話：「窮遊有撚錢咩？」
佢最後就會：「唉屌我畀啦，買咗咁撚多嘢坐得闊啲好，轉頭返到市區唔使同人逼。」

計劃通

其實由國府津到新橋架車都唔係好多人
反而新橋去上野搭上野東京線就人貼人咁迫
嚇到我同老細回程搭山手線

留名

終於睇到live 嚟緊4月都會走轉東京 唔知咁樣plan好唔好 求點評 第一次去咁耐東京