[窮遊豪食逍遙遊]用8日暢遊關東 (東京‧河口湖‧日光‧湘南)

Day1你問我就一定係搭巴士，因為你冇Pass
Day2回程都一樣，如果你Day3全日都澀谷，住新宿都ok
其他其實都ok既，不過Day5,7好似hea左啲

羽田機場去河口湖直達巴士開下晝得一班，所以你可以頭班京急直通地鐵淺草線去日本橋站，或者你自己方法搭去JR東京站，上呢架巴士直去河口湖：

https://bus.fujikyu.co.jp/highway/detail/id/37

如果你安排到東京嘅酒店都係住近日本橋就試下問酒店可唔可以早一日放低行李。

Day 5 銀座係因為條女就我 去一去秋葉原行陣先
然後到佢去銀座行 銀座果到已經搵左好多點可以去玩 買 食 飲
Day 7就未諗到可以做乜 求其講個台場only

羽田直去河口湖果架巴士
好似疫情前係唔止得下晝
我年尾去
唔知有番未 有就唔洗煩
我見新宿好似都有架巴士係去河口湖？

台場可以去埋豐州？
或者有咩建議

時間表暫時到6月，年尾好大可能增加班次。到時有晨早班次你可以搭。詳情請睇官網：

https://bus.fujikyu.co.jp/highway/fujisan

唔該巴打

可唔可以share下銀座唔睇名牌嘅話有咩行？
諗住食篝拉麵

我都係諗住食呢間
其實都係附近有咩行就行
都重搵緊有咩特別可以去

12層u記，5層muji

可能去有樂町果邊？
不過都係飲飲食食多
好多好正既酒吧

想問問買JR PASS 情況
我見而家Klook買JR PASS只可以買到4月8-10, 我想係15-17/5用於去鎌倉同埋來回河口湖
係咪一定要買咗JR pass先可以買富士回遊？但富士回遊一個月前先買會唔會book唔到感謝

唔該晒

唔係對鐵道情有獨鍾建議河口湖搭巴士，鐮倉正價搭鐵道。鐮倉有 pass 你見到平可以買，唔買都得，唔爭好遠。

富士回遊及 JR pass 睇下面個留言：

日本鐵道消息及旅遊情報交流區(79)
https://lih.kg/ztvRHiX
#355 回覆 - 分享自 LIHKG 討論區

車票同Pass都係早1個月先會開售
你5月中先去，4月中先買到Pass同預約車票

富士回遊冇Pass都買得，只係 JR 東京廣域周遊券包足全程
但係你又要考慮埋本身張Pass都唔平，學畢仕仁巴打話齋
剩係去鎌倉同埋來回河口湖就唔駛買Pass
東京去鎌倉車費好平，睇你個勢會去埋江之島，嗰程又要自費
橫掂你預好哂行程，來回河口湖搭高速巴士好過，慳一半有多

你既其他問題應該以下回覆解答到你9成9，你唔明再問
日本鐵道消息及旅遊情報交流區(79)
https://lih.kg/ztvRHiX
#355 回覆 - 分享自 LIHKG 討論區

繼續遊記，前文係#164

6點幾準備天光，仲有成粒鐘先上車，走去搵早餐食
上個Post因為冇薯餅而唔食M記，有人問我做乜唔食McGriddles
今次間M記係車站隔離，我就食俾大家睇


黎到既時候啱啱開門冇耐，人龍排到出門口
但我同老細呢啲高科技人士梗係用App禁啦，出面咁凍
結果買完唔駛3分鐘個餐就拎得
然後我發現原來呢度叫餐係搞掂一個客先到下個，唔怪得之咁低效率啦



マックグリドル ソーセージエッグ セット <540yen>


日本McGriddles有3款：豬柳，悲強，同埋呢個柳強
平時係香港食豬柳強唔太鍾意Muffin包皮，冇味得黎又乾又硬
食早晨全餐送嗰包提子醬又難食，我例牌送俾其他同事食
McGriddles就係用蘸左楓糖漿既厚Pancake做包皮，包面有M記Logo
未食已經聞到好香楓糖味，陣味同M記熱香餅糖漿一模一樣
食落冇想像中咁甜，加埋柳強同芝士甜甜鹹鹹咁，味道出奇地夾
而且口感非常好，一啖咬落去有厚度好實在，唔似香港扁撻撻咁
成個餐加埋薯餅同蘋果汁只係540yen，折合港幣30蚊
性價比高過香港多多聲



老細健康揀橙汁，唔駛加錢就已經係用中杯裝
而且係滿到一插飲管就大爆射，冇冰，抵飲到爛


之後佢話太好食唔夠喉，要追加多1個
於是又手機落單每人屌多1個McGriddles，今次就食悲強
マックグリドル ベーコンエッグ <320yen>


悲強就冇柳強咁好食，可能因為塊煙肉薄得滯冇咁出味
但大家留唔留意到，悲強係俾2隻蛋架

食完M記一天都光哂，有M記既Morning先係Good Morning


行番巴士總站準備上車，程序非常簡單
去番你班車既閘口出示車票俾車長睇
車長用部iPad核對番資料正確就可以上車





我早3個禮拜上網訂位，座位自然係任揀
要訂就梗係訂第一行前面展望席啦
座距非常足夠，放個背囊係腳邊都夠位
但可能我地著得厚衫，兩個大男人坐埋有啲迫


巴士準時7:15開出，但後面中途站會有人上車，所以總站未上滿
因為咁所以就要跟實個時間表上客，太早到都唔得
於是司機保持均速行駛瘋狂俾車過，我見到都有啲燥底
加班車直達河口湖就冇呢個包袱，開車後15分鐘上到高速就過左我地



巴士行經首都高4號新宿線之後就會進入中央道
呢度開始富士山就會係正你前面



去到相模湖附近就開始進入山區
有段時間富士山會消失左


搭左大約75分鐘就會去到大月
巴士就會轉左駛入富士吉田線，正式上山

眼前呢個建築就係大名鼎鼎既磁浮展示中心，係鐵膠朝聖地
除左可以了解磁浮鐵路發展史之外，仲可以睇到真正既磁浮列車試車
連住既架空路軌就係山梨磁浮實驗線
2015年，JR東海L0系磁浮列車係呢度刷新火車最高時速紀錄，達到每小時603公里
呢條實驗線係未來會成為興建中既中央新幹線一部分
首階段工程品川 ~ 名古屋段預定2027年完工啟用，但啱啱宣布延期
靜岡覺得新幹線影響農作物收成
因為隧道會令大井川水系地下水流失，對此要求JR東海解決
但搞笑在靜岡係冇設站既，睇黎似係政治操作想籍此增加のぞみ班次
接近300km距離既車程將會由個半鐘縮短到最快40分鐘
真正做到新幹線扭曲時空，快過搭港鐵由屯門去旺角
不過睇個勢JR Pass未必包，兼且票價唔會平得去邊



經過磁浮展示中心之後就轉左個大彎
大大個富士山就出現係眼前



下面路軌就係富士急行線，景觀會瘋狂俾樓遮住
高速就係高架上面，坐頭排左邊有270度景觀
成程車差唔多有一半時間係望到富士山
睇啲台仔Blogger話搭火車景觀靚過搭巴士，我就唔係咁睇


之前訂車飛因為怕天氣唔好，所以劃到去河口湖
但係今日天氣好，我地就中途跳車落中央道下吉田站
預定8:50到，結果早左5分鐘到
落車既瞬間所有熱情都俾室外氣溫冷卻哂
當時溫度係攝氏5度，地下有冰粒，仲好撚大風，好撚凍呀師父

黎得呢度落車，第一個景點就係新倉山淺間公園
沿著富士山方向一路直行，有路牌提示



沿參道樓梯行上去就會見到"三國第一山"鳥居
呢塊牌匾係天皇御賜俾呢度既富士淺間神社
因為係鳥居後面望番出去，就會望到眼前呢個咁靚既第一山
至於呢度既三國，有指係日本，韓國同偉大既祖國
講太多我怕挑起民族仇恨，收聲了



再行上去就係三國第一山新倉富士淺間神社
個名咁長既原因係因為日本有好多個淺間神社
為左突顯獨特性，所以就係前面加上地理位置或者稱號，俗稱起朵
上個遊記講過日本人自古以來都係山嶽信仰既追隨者
富士山靚到好似有神明存在咁樣，久而久之發展成富士信仰
崇拜地點就係淺間神社，祭神就係日本神話出名靚女既女神木花開耶姬
我之前係去京都貴船神社結社，祭神就係佢家姐石長比賣
除左信仰之外，富士山仲提供唔少靈感俾文化人創作詩詞同藝術作品
有唔少都深入民心，亦奠定外國人對日本文化既印象
於是係2013年登錄為世界文化遺產，包括8所淺間神社
而新倉山呢個唔係其中之一，亦因為交通不便去唔到嗰幾個


神社對面又有個中央高天原遙望地
高天原就係日本諸神居住既地方，所以富士山就係仙景


想再睇靚啲既富士山，就要行上山腰既忠靈塔
一係行神社側邊彎彎曲曲既斜路，都幾斜下
一係一鼓作氣行上398級咲くや姫階段
雖然都幾辛苦，但望番轉頭山景越黎越開揚，頂硬上啦




因為好早上到黎，遊客唔算好多，所以任影
當中有一半係講廣東話既，好親切
有幾對香港同台灣情侶或者一家人仲叫老細幫手揸機影相
而忠靈塔下面好多都係櫻花樹，到時歡迎大家貼相




本來仲想留耐啲，但係左邊舊雲慢慢飄過黎遮住山頂
所以9點半我地已經行番落山去第二度
搭富士回遊頭班車既人而家先行到上黎，下次好運


落左山我地本來預定去河口湖
但老細忽發奇想想去富士急樂園玩機動遊戲
我就冇乜所謂，就Cut左去河口湖自然生活館嗰邊既行程
呢度去河口湖既唯一交通就係行去下吉田站搭富士急行線
去車站條路鋪得特別靚，地下有四季景色既忠靈塔

行到去踏切咁啱俾我見到富士山ビュー特急1號埋站
剩係睇車頭英文字同Logo就認到係水戶岡銳治既作品
佢同時係JR九州設計顧問，所以啲列車都有嗰陣味
呢架紅色特急列車第二第三卡係自由席，JR東京廣域周遊券可以免預約直接上車
至於第一卡指定席就要再俾多900yen既特別車両料金
https://www.fujikyu-railway.jp/fujisan-view-express/timetable/

呢架就係京都丹後鉄道既丹後の海，一紅一藍兩兄弟
又係和式網格同木系風格

見到富士山ビュー特急係一個重要既指標
代表啱啱走左一架9:55去河口湖方向既普通列車
之後就係10:12開出既富士回遊，要俾特急料金
再下一班普通列車已經係10:41既トーマスランド号
無謂係度等成粒鐘，所以我諗住一條直路行去富士山站
嗰度同時有巴士同鐵道搭，途中仲經過レトロ商店街同金鳥居影相
不過老細顯然係唔鍾意行路既人，話俾多啲錢搭車好過

今舖真係眼淚在心裡流，不過米飯班主優先
今次探好哂路下次去就可以加速



駅員好貼心咁係車站既時間表標明特急班次
係隔離寫明Express係要俾多400yen特急料金
就咁睇既話朝早大部分時間每個方向每個鐘得1班普通列車
如果唔想坐特急補錢既話，安排行程要謹慎


由下吉田去富士急樂園只係10分鐘車程
IC運賃224yen，係入場部機拍IC Card就得
但係富士回遊座席未指定券400yen，總共624yen，好貴

靜岡縣除咗東海道新幹線冇特急のぞみ之外，另一個更加大嘅仇係富士山靜岡空港興建嘅時候專登起喺新幹線隧道上面，打算之後可以起情願站。但係由於富士山靜岡空港距離下一個新幹線站掛川站太近，JR 東海以列車加速度太低，各停嘅こだま會阻礙主線嘅のぞみ為由，就算車站由靜岡縣出資興建，JR 東海打死都唔肯起。

而リニア磁浮中央新幹線係有一段仔經過靜岡縣山區大井川嘅河底嘅。咁既然こだま列車會阻礙のぞみ，大井川自然都會因為隧道而乾涸