[窮遊豪食逍遙遊]用8日暢遊關東 (東京‧河口湖‧日光‧湘南)

樓主食唔食納豆

架車好窄，放行李好易阻住人
車費又貴又唔好坐，第一次搭差啲chok親條頸
搭京急去品川起碼全程有電梯，轉乘通過又闊啲
你去新宿去品川轉會快啲

Google Map準喎，NEX係冇左池袋，所以全部都要轉多程車先到

但如果有500 山手線圈優惠嘅話搭monorail 就好啲

千祈唔好方法2 東京站轉車保證你會懷疑人生

我都係

河口湖搭巴士好過

咁我努力試下ig dm問先
之後寫返分享

Day 8
時間過得特別快，係時候講拜拜，準備返歸做社畜
前一日落雪，夜晚又落大雨
但呢朝就晴空萬里，天氣呢家野冇路捉


岸田宣布左解除户外口罩令之後，全部新聞都訪問市民既戴罩意向
結果唔意外，防疫派壓倒性贏勝利，尤其係學生
佢哋既理由我都覺得幾有日本文化特色：
學生A：呢幾年都係戴住罩過，畢業先黎除驚啲FD話我樣衰
JK B：我當左口罩係奶罩內衣架喇，除左好冇安全感
老C：我地當然想學生除啦，影畢業相都唔知邊個打邊個
(以上均為新聞節目採訪既真實說法，絕無半點虛言)


執好哂行李寄存係酒店大堂就出去食早餐
之前咁多日都係我諗，最後一日我交番個波俾老細
結果佢就揀番大門嗰間魚，確實係幾出色既
しんぱち食堂 大門店 [Tabelog評分：3.24]



朝さば文化干し定食 ご飯半割 <484yen> + 高級ネギトロ <99yen>
上次食鮭魚，今次試鯖魚
上次碗飯飽到上頸，今次就叫半碗


文化干し係處理魚肉既一種方式，近似乾式熟成
所以唔似坊間燒鯖魚咁多汁兼一夾就散
而係肉質好結實，食落彈牙又好有魚味
因為燒到外皮脆脆地，非常香口


拖羅蓉乾身得黎散發油光，顏色望落好新鮮
撈落飯度再加少少醬油勁好食，既唔腥又食到油香
今次就變左飯量太少唔夠喉

呢日成田6點幾機，仲有8個鐘大把時間
本來諗住食完早餐就去機場放低便李再行成田山
不過怕呢日公眾假期迫爆個山，所以都係決定留係市區
橫掂天氣咁好，朝早就變左日比谷通り3km散策，俗稱晨運

餐廳對住東京鐵塔方向行5分鐘就係增上寺大門
都營地鐵大門站呢個名就係咁樣黎



但增上寺離呢度起碼仲有200m，沿途都係高樓大廈
呢堆建築同個寺一啲關係都冇，主因又係神佛分離令
係明治時期之前，大門後面都係寺院私有地
德川家信奉淨土宗，家康黎到江戶之後非常關照同屬既增上寺
更將佢定為德川家既靈廟之一，歷代15位將軍有6個安葬係度
另外既靈廟仲有初代家康既日光東照宮同埋三代家光既輪王寺
每修建一次將軍靈廟都會興建唔少附屬建築，寺既面積都會增大
最大既時候甚至超過四個維園咁大

大政奉還後明治新政府上台，推行全盤西化，務求係國力追上西方列強
過程中利字當頭，少不免打擊發展左過千年既傳統文化，例如宗教
幕府時期將軍獨尊佛學，寺廟數量同規模達到高峰，極度有錢
神佛分離令表面上係推崇神道教兼削弱佛教既影響力
實際上係為左以"合法"既途徑將寺廟既土地同資產收歸國有
所得就用黎充實國庫，發展經濟同埋用黎打仗

增上寺因為擁有東京市區大量土地資產，仲帶有將軍前政權原罪
被保(天)皇黨視為舊封建勢力，所以瘋狂批鬥兼抄家
係壓力下被迫自願放棄大部分土地，而家得番唔夠15分之1


而家增上寺正門就變左以前既中門，姐係三門
二戰末期附近同寺廟大部分建築都俾盟軍炸到渣都冇
唯獨係三門倖免於難，所以係東京都內最古老大型建築物之一



門後面就係增上寺大殿，不過冇太大興趣所以行過就算


經側門行過去就可以極近距離睇到好靚既東京鐵塔

日比谷通り條路闊得黎冇乜人，有啲風吹下都幾舒服
但唔知係咪有政要到訪定係有政治活動要搞
沿途轉左既車路都有路障同警員把守，好大陣象

係頭先東京鐵塔行半個鐘就到日比谷公園
見到有堆阿伯係度揸長鏡捕雀，啲器材睇落十分專業




隻雀飛到去邊佢地就追到邊，都幾搞笑


公園對面就係東京三大酒店之一既帝國飯店，歷史有接近140年
曾經接待過唔少國際名人，包括瑪麗蓮夢露
但如大家所見，眼前既第三代建築起好左50年
外牆已經好殘，同附近既玻璃幕牆建築格格不入
所以聯同周邊土地持左者合作一齊重建成個街區
新酒店預計2036年完成，右邊已經開始拆緊樓


公園前面就係皇居既護城河，外苑同埋丸之內地區
轉右過馬路就係銀座地區，好高嗰幢就係東京半島酒店
咁啱見到架1934年出產半島綠RR Phantom II，架野仲行得架嗚呀
不過酒店成皮野一晚你住埋我嗰份




入到銀座都仲見到路障


之後行左去マロニエゲート銀座2館行Daiso，Uniqlo同GU

Daiso位置係銀座一丁目附近，離酒店只係幾個街口
10分鐘就行到返去攞行李，順便塞番啲野入喼
之後就行5分鐘去寶町站搭都營淺草線去成田機場
呢度直通運轉去成田機場既班次唔少，每個鐘大約有3班車


係日本搭既最後一架列車就係5500型，關東之旅正式進入尾聲




成田呢度有3個客運大樓
T1主要係ANA用，HX都係呢邊
T2主要係JAL用，CX UO都係呢邊
T3係T2隔離，專俾LCC用，香港暫時冇機係度飛


東成田站隧道有股神秘既力量吸引住我
可惜冇時間，有緣再黎

每次係日本返地獄都係起飛前3個鐘先有得辦理登機
但ANA同JAL係起飛當日7點開始就得，點解國泰冇既
我地諗住早啲係機場買手信，所以早5個鐘到
早到連班機都未出現係航班顯示屏


成田國際線少人到呢


成田個磅同以前一樣都係咁垃圾，整闊少少得唔得


磅好行李確保冇超重，就玩下以前冇試過既自助登機
首先去自助機㩒番張登機證同行李標籤出黎
印好之後隔離啲空妹自動波走過黎幫我地貼好哂，服務好到呢



貼完標籤就推行李去隔離櫃枱對護照
跟住就可以去部托運機掃番登機證，再放行李就得
全程唔駛5分鐘，點都快過搵空姐慢慢搞



搞掂哂就上4樓搵野食，但係好多地方都圍哂板
就算有做生意，啲開放時間都係鳩到不行，6點已經有一半以上收皮
一風堂開得3個鐘就唔好開啦




成田呢度都有Pokemon Store
門口有一隻著住NRT機師服既特別版比卡超
因為裡面實在太多人，費事正面影

いなば和幸 成田空港店 [Tabelog評分：3.15]
日本本土最後一餐都係老細話事，食炸豬扒
我話行去T3食松屋佢唔制

かきフライとロースかつ定食 <1680yen> + 替え豚汁 <350yen>
炸豬扒食得多，所以就叫左期間限定炸豬扒拼廣島蠔定食
但點解隻蠔仲大舊過塊豬扒，係豬扒少定蠔多


醬料選擇唔多，有紫蘇沙律汁點菜食，酸酸地幾開胃
另外就係豬扒醬，味道同香港食既差唔多


豬扒厚得黎唔鞋仲好多汁，但唔點汁就冇乜味道
肉同個炸皮會分離，睇黎粉太多


蠔就幾出色，Creamy得黎完全唔腥


豚汁放既唔係豚肉片，而係煲淋左既豬軟骨
雖然味道唔錯但好油

食完飯就過關，因為嗰個時段冇乜航班
所以10分鐘就過埋安檢入左禁區
而家離境唔再係護照打印，我見有人問個移民官要印都冇
過到黎第一時間就當然係睇手信，入面最大係得嗰間，唔駛多介紹






完成哂所有親朋戚友任務之後就係等上機
由天光等到天黑




呢程機雖然都係787-9，但今次就係E92
同之前飛黎嗰架E71最大分別在於載客量多2成
Business得番7行1-2-1反魚骨式座位，Premium Econ 3行
Econ就係同之前一樣，係JAL SKY WIDER



座位既一切同飛黎嗰架無異，老細個Moon繼續都係壞既



回程防疫片搵左櫻井翔松本潤黎拍



回家了

總值 6000 円，係咪即係可以退稅

飛左成個鐘先開始派飛機餐，今次有熱辣辣既餐包食


主食係燉煮牛肉配蝴蝶粉，牛肉好淋好入味但個粉有啲硬


鹽泡海鮮拌雜豆就麻麻地，雖然唔腥但味道同質感都好奇怪


沙律同朱古力蛋糕味道一般唔特別



雪糕仍然係哈根達斯


睇哂成套Matrix Resurrections，架機都差唔多到



之前有巴打問我上網快唔快，呢次我就有測速既
上下載有5Mbps，唔快唔慢咁啦


香港當時處於唔駛強制檢測但航班仲未恢復既時期
所以我呢啲行得快既人，落左機唔駛5分鐘就過哂關
但等左差唔多15分鐘啲行李先到，扣佢50分



Hello! Hong Kong



[窮遊豪食逍遙遊]用8日暢遊關東 (東京‧河口湖‧日光‧湘南) 完

呢層我都唔知喎，邊有人Daiso買到退稅先得架

後記
對比3個月前既關西，關東遊客多好多，撞到香港人機會極高
同疫情前比當然仲係好好行，始終某地方既人仲未可以自由入境，多人極有限
以前好抗拒冬天去日本，因為勁凍得黎一落雪就會搞到公共交通大混亂
但冬天既日本原來可以咁靚，富士山個景真係一世難忘
而且仲俾我睇到落雪，一次過滿足哂n個願望

相隔咁多年再次同朋友去旅行，當然有開心有遺憾
可以食到獨遊食唔到既餐廳，人形町今半同蕃YORONIKU絕對值得一去
搭緊車悶悶地既時候有條友係隔離鳩up放鬆下都幾好
不過去景點成日摧我走就有點兒那個
下次都係加多啲景點自由時間，唔係俾佢而係俾我

見到你啲遊記咁好睇，我諗我都要揾時間寫返早排嘅賞櫻觀光列車遊記，當係回報大家一直以來嘅日本觀光資訊

新手想問下白痴問題

食:
Tabelog Android係咪冇apps

交通:
Navitime個apps係咪得日文
東京市內地鐵係咪都唔會飛站