講起會唔會改投,有樣嘢可以分享吓:
有日喺調景嶺巴總等車,聽到兩個等緊接車嘅carlo吹水
Carlo A : 喂你知唔知遲啲呢條線(796C)大改
Carlo B : 都Q唔知公司點解咁鍾意入九龍灣
Carlo A : 整咗壇797出嚟仲唔知死,玩死埋呢條線
Carlo B : 公司以為自己掠到水,但連揸個個都覺得咁兜好慢,搵鬼搭。
Carlo A : 最衰96C本身已經唔多客,公司以為自己好醒,但真係冇改錯名,名副其實蝕水。
(呢個時候796X到咗,Carlo B 上車接力)
排我前面個阿嬸忍唔住問Carlo A 邊條線入九龍灣,Carlo A :你排緊嗰條囉
阿嬸:即係唔再行公路?
Carlo A :唔係唔行公路,但要九龍灣落橋行大運。
阿嬸:咁好慢姐,本身呢條線都成日塞隧道同埋旺角,越搭越耐,我係貪佢方便唔使行咋,有冇搞錯
(呢個時候796C終於到,Carlo A 接車,但原本揸車嗰個司機唔知點解唔落車)
交接完, set好晒嘢之後,Carlo A 繼續同原本個司機喺度屌793
佢兩個仲要越講越興奮,講到好大聲
個阿嬸又嚟料,走去同個司機講要投訴你哋新巴公司
另一位街坊八卦問投訴啲咩,個阿嬸就同佢講司機哥哥話架車之後要入九龍灣兜圈。
原本嗰個司機呢個時候唔再同Carlo A吹水,反而走過來同客吹水
原本個司機:總之呢條線一開二,你去旺角要快就比多啲錢搭新嗰條795X,唔塞亞皆老街但塞紅磡,時間同原本呢條差唔多嘅
個街坊:咁時間同原本差唔多,點解要整條新線收貴我$3,好搵笨喎
原本個司機:我哋公司財困,所以要掠水
你唔好問我點解,我都唔知。早排我哋連糧都爭啲出唔到
阿嬸:總之入九龍灣我唔會搭呢㗎喇,有時去旺角計埋塞車都成一個鐘,再兜路我真係頂唔順。
另一個阿叔都加入討論:司機,如果要入九龍灣係咪即係X(796X)都入埋,我呢啲采頤落車嘅咪好唔方便?
原本個司機:X應該唔入,唔想兜九龍灣你死等X。不過,我哋公司好鍾意兜九龍灣,隨時搵X兜埋入去都唔出奇
個街坊:吓!有冇搞錯啊,以前兩架都好快返到嚟,入乜鬼九龍灣
原本個司機:我哋公司好鍾意冇嘢搞搵嘢嚟搞
趕時間嘅話好真心講搭地鐵好過
原本個司機呢個時候行近Carlo A,兩個再喺度吹水,內容大概又係笑呢個改動白癡,冇嘢搞搵嘢嚟搞
———————————————————————————
所以你話班客會唔會介意比多幾蚊?尚德、調景嶺本身係多公屋,每程比多兩三蚊,來回就$6,會唔會因為所謂方便咗少少改投,我就有保留。唔介意比多幾蚊嘅通常都係海旁嗰班,但嗰度有幾多人會搭巴士?個死位在於尚德有九巴,調景嶺地鐵好方便,難得條796C而家執到唔少客,將佢哋倒走去鐵或者紅巴,要再儲返唔係一件容易嘅事。
好認真,普通客真係未必知道咁樣改,最多就係改完之後搭過一次發現你要兜九龍灣,覺得俾人搵笨之後唔會再搭你,可以話係有機會一去無回頭
至於條795X,好坦白講宣傳真係做得唔好,真係冇乜知名度。不過同樣地,將軍澳出旺角收得貴過$10,本身觀感就唔好。仲要走去塞死亡十字,到頭來時間上同原本差唔多,我個人認為應該好難有原796C嘅魚落搭(兩蚊客除外)
不過咁,我贊成795X彌敦道嗰段應該食到啲新客,問題係佢搶返嚟嘅新客夠唔夠維持加多10架車嘅成本?我就好有保留,仲要未計796C 改793倒走咗嘅收入。只可以祝善巴好運
如果仲有區議員,我諗應該會擺街站簽名反對,因為成件事對調景嶺嗰班人嚟講根本就係最大輸家。名義上線係多咗一條,但係無論時間(793)定係金錢(795X)成本都增加咗,到最尾就會用腳投票,揀鐵算數。
仲有另外一點,好似個阿叔呢啲會喺太子道東上車嘅嗰班人,其實都係輸家。796X同796C雖然都成日聯合到站,但起碼都叫做有得俾你叫雙飛,或者係見到邊架冇乜位就想有位嗰架;改動後,班友淨係可以死等X或者硬食兜九龍灣,如果本身富豪東方酒店上,真係隨時俾佢倒落鐵
我諗你如果俾啲街坊揀,應該大多數人都想維持現狀多啲,呢啲「升級服務」不了
好老實講,如果你有咁多資源不如做返好啲班次先仲實際。而家疏車到一個點,20分鐘一班如果送咗車尾,等得你嚟我落地底都差唔多到目的地
話時話,嗰條798A/B開咗咁多年,屎巴真係完全冇諗過去改善下或者加強服務?798B係難搞,但798A其實多人搭㗎喎,如果有心搞麻煩順便執靚佢