你老母係我阿嫂
2017-08-22 13:29:59
「諗咁多做咩喎?想見咪見,唔想見咪唔見囉。想做就做,唔好後悔就得啦!」
「無點算㗎喎,順其自然囉。」
突然之間,我腦海入面出現咗呢兩句說話。
原來一直以嚟,我因為以前唔好嘅經歷,而顧慮眼前呢個人會唔會又有咩不軌企圖。但我忘記咗一樣最重要嘅嘢,就係以前還以前,而家還而家。我唔可以單純因為以前唔好嘅經歷,而否定眼前呢個人畀我嘅感覺。
過去,我正正因為有所顧慮,所以多次刻意拒絕見面,無辦法做到順其自然。如今,佢要走啦,要喺我生命之中消失啦⋯⋯我應該把握最後機會,嘗試放手畀我哋嘅故事順其自然咁發生。
我終於喺對話框打字,
「你真係咁想見我?」21:44.
「係。」21:45.
「其實我啱啱返到屋企。不如十點三喺觀塘海濱公園等,好唔好?」21:47.
「好。」21:48.
我哋真正約好之後,我反而鬆咗一口氣,因為唔再需要揞住自己個心,講啲唔係我本意嘅說話。其實我唔知道呢個決定到底係啱定錯,但我諗只要係我想做而又唔後悔嘅就可以啦。
我稍稍補一下妝,就出發去約定嘅地方。
「喂?」依舊喺嗰把小朋友聲。
「唔好意思,我遲咗少少。」
「唔緊要。你喺邊呀?」
「到啦,你著咩色衫?」
「白色裇衫、黑色褸、卡其色長褲。」