你老母係我阿嫂
2017-08-02 23:57:51
「芒果紫米露、朱古力綿綿冰。」
糖水鋪姨姨嗱嗱臨放低兩碗糖水,就匆匆忙忙去回應其他食客嘅要求。我趁住呢少少時間,稍微調整一下表情,盡量將兩邊嘴角向上扯。
「哦!我記得啦!前排有個女仔喺餐廳度喊得好淒涼,妝都甩晒嘅⋯⋯嗰個就係你!」
「嗯⋯⋯咁你都記得?」
「梗係記得啦,我都未見過有女仔喊都喊得靚過人嘅。」佢將綿綿冰推去我面前,「試唔試啖?」
「唔試啦,」我搖搖頭,「你平時講嘢都係咁口花㗎?」
「唔係呀,對住你先忍唔住咋。」
「唉,我費事理你!」我鼓起兩腮,低頭望住碗糖水。
「嗱,你睇你,嬲都嬲得寧舍可愛嘅。天呀,可唔可以話我知點解會咁呀?」
佢呢番說話,配埋佢皺起眉頭、兩手攤開嘅動作,唔考藝員訓練班真係嘥晒佢啲天分。
「哎呀,救命,夠啦。」我終於都忍唔到笑。
「而家識笑返咪幾好囉。」
時間越嚟越夜,糖水鋪外面越嚟越多人等位。而且,鋪面地方淺窄又人多嘈雜,要傾計嘅都唔係咁方便。
「橫掂我揸咗架車出嚟,不如我哋食完上車再傾,費事霸住呢度啲位。」
「嗯,都好吖。」