Error自肥基本上係我呢十幾年少數會留下深刻印象嘅電視綜藝節目,我本身唔多好呢D嘢,但我竟然會由佢第一集追到結局, 最後嗰段真心係發人深省,重新思考返娛樂,電視綜藝嘅意義
雖然個節目好似9下9下,玩下遊戲射下死亡行星咁又一集, 但如果呢個節目淨係得呢啲元素嘅話係唔會有咁大迴響, 難聽啲講句其實整蠱節目已經
呢個節目癲嘅程度同埋佢嘅衝擊性某程度上不亞於viu記啱啱開台嗰陣播嘅真pk,其實未必個個接受到, 但老頂頂住咗觀眾壓力畀佢繼續播, 節目組亦都冇辜負到老細嘅信任,繼續認真咁做癲嘢,如果冇一個好老細頂住呢D壓力畀個節目繼續run,又或者冇呢班痴線佬畀後輩留低呢D咁特別嘅實驗成果,今日viu未必拍到Error自肥企劃呢D咁特別嘅節目。果實要結果需要良好的土壤同適當嘅施肥先可以成事,而viu開放自由嘅創作環境(土壤)同製作團隊嘅認真鳩(施肥),再加埋班artist(種子)先可以結出今日嘅果實。
另外,呢個節目之所以咁成功仲要歸功於節目組同D演員嘅真性情流露,由接受死亡行星懲罰嘅扭曲表情,到Error四子自肥企劃嘅感言,畀觀眾嘅感覺就係「真」,唔會因為顧慮電視尺度而自行過濾對白同扮大/細反應,唔會迴避黨台粉嘅無理指控直線抽擊;另一方面,製作組瘋狂入鏡介入劇情,甚至直接出一集bts講返套嘢點樣拍, 將個生仔過程直接話畀觀眾知,令個節目更加立體。 我諗呢個節目應該係少數節目呢係會知埋個製作組係乜人。
跟住就係一個靈魂拷問,點解viu可以拍得出呢啲節目而無線做唔到?
首先,大家嘅方針唔同,無線一直以嚟嘅方針係諗點樣可以重振昔日嘅綜藝輝煌,拍出可以電視撈飯嘅綜藝節目,其實佢哋唔係唔做嘢,佢哋都曾經嘗試回應viu嘅出現進行改革,但係,佢哋嘅問題喺佢哋嘅主旋律其實一直冇變過,就係迎合觀眾期望拍出佢哋會受落嘅節目,用另一個講法就係複製成功嘅方程式,人地拍乜自己就拍乜,或者永續自己嘅王牌節目,例如獎門人同歡樂今宵之類嘅作品。呢種模式喺七十至一六年之前其實係幾成功。
一、當時電視台選擇唔多,31台係一四年之後之出現,而且當時資源唔夠都係翻炒節目同魚樂無窮為主,基本上冇乜人睇。亞視……每次都爛出新高度嘅電視台講經咩?
二、娛樂選擇唔多,當時社交網絡、串流影視未普及,D人冇乜娛樂都係要焗住要打開部電視睇。
三、觀眾要求唔高,好似當年歡樂今宵嘅宣傳話齋,觀眾其實只係一日工作完想休息開心下,對節目質素要求唔係咁高(當然啦,要求低唔代表真係拍乜都冇所謂,太破格嘅節目佢哋唔會受)。
結果日復一日到咗2016,viutv橫空出世,對無線一直以嚟節目拍攝方針拉響咗警鐘,因為佢哋已經唔再係唯一一個電視台,觀眾已經唔係一定要睇無線,而佢哋點樣回應呢一個衝擊呢?
由於篇幅所限,容我下文述之。