[短篇/懸疑故] 飛髮定剃頭 （想追謎底就俾負評）

出咗八，不過樓豬呢兩日肩頸痛到僵咗，打唔到字，第九要等等我

你地再估陣先
個故滲下滲下應該會線索越嚟越多，到時唔洗開故你地都會get到大部分

唔知呢
但睇投票大家都壓倒性投飛髮，唔知係咪覺得剃頭有伏味定單純唔洗剃頭只想飛下髮

仲會唔會有新人（鬼）？

（九）

「唔記得就算啦，但你記唔記得我地應承過童女要好好做人？」

「真係無啵。你會唔會認錯人架？」我和客人來到後閘，往日見靈車出入才有開閘，今次卻留了道閘縫讓我們入，客人此時似乎很識路，我們靠住牆行，他蒙住頭都能夠在後面提我轉左轉右，要從哪道門入他毫不猶豫。

啷啷聲在無旁人的走廊中迴響，我們兩人都心境平靜，絕無趕住投胎意思。

「嘿！算啦算啦。」客人問多兩問，見我十問九唔知，就放棄俾提示：「你乜都唔記得咪幾好，至少呢八九年可以活得得自由自在，今日我地六個都要交成績表嚕，仲講返考試都無乜用，當我無提過啦。」

我真是亳無頭緒，不知道他口中交成績表是甚麼意思，但我下一分鐘就見識到了。

在下一個轉角，一對男女企定定等住我們，男的年約20，冷帽眼鏡文青背心，手中拎住一根竹筷子，低調握在垂下的手中，至於女的其實是一個小妺妺，粉紅T-Shirt短褲波鞋，眼仔大大，正定睛望住我腰間的鈴鐺。

這時男的貼住右邊牆企，女的則貼住左邊，我沒路過唯有停步。鈴鐺沒有發響，客人立即也就停下腳步。「應該未到架喎哥仔。」客人催促。

「你最好除低膠袋先，有人擋住咗兩邊牆。」我解釋，於是客人立即鬆開頭上膠袋，揭起探視，他一認到擋路男女的外貌，立即展現恭敬點頭打招呼，一手把膠袋塞入褲袋，又整理著衣領。

「兩位佛爺，好耐無見。」客人點頭道。

「千祈咪叫我佛爺，我Christian嚟架。」男人耍手兼擰頭，「叫我Raydon就得。你之前係唐樓天檯都見過我，果陣你地全部用個鐵盆養住，條條香魚都黑咪鼆，我就認唔出你地係邊個打邊個啦，但你仲認唔認得我？我果陣成日跟Tina上嚟餵你地。」

「記得！你話想重新讀返個腦外科，話心師始終做翻醫生開腦最拿手。」

「哈哈，你果時個魚仔腦又記性幾好！今日我係嚟幫Tina手，唔洗對我太客氣架啦，好唔好人都好，Tina佢會做判斷。」

這時原來叫Tina的小妺妺開始插嘴：「呢世做人好唔好玩啊？」

客人苦笑：「做香港人唔好玩，不過都好過做條魚。」

「嗱，一陣檢查吓你有無乖乖地做好人啦！你地應承過我大過咗唔會好似Mandy咁黑心，我先俾你地用Mandy個身體嘅。」小妺妺說。

「知道知道，但合格唔合格分別會點？」

「滿意就俾你走，麻麻地就還返你俾Mandy，最多咪做返條魚要等過囉，我同長庚搬咗去英國，你可以試下做炸魚薯條。」

「炸魚薯條咁油膩，塞血管啊。」Raydon掩嘴笑住講。「嘻嘻！對唔住！讀正呢範有職業病。」

「唔識野！長庾煮西餐都好好食架！」小妺妺一臉不忿。「最多我咪幫你成條血脂拎返出嚟，好閒啫！」

看住三人談笑風生，我完全被排除在外，我衰在聽不懂，那就劖不到歌柄。

然後Raydon舉起筷子，開始像個喃嘸佬咦吚哦哦。

「唉，每次聽到尷尬。」小妹妹用手指塞住耳仔。

「跟返傳統做法啫，尊重返！」Raydon又開始唸唸有詞，接著將筷子敲打在客人的額頭上，一下一下，就像和尚敲木魚，這時我聽出了四句半偈：「⋯⋯靈台鎖開見青天，不畏人知畏心師，平生不做虧心事，半夜敲門也不驚，也不驚！」

Raydon話口未完，客人的額頭就發出「卟」一聲，不知從哪彈出了兩扇閉上的紅漆小門封在眉心，Raydon口咬筷子，然後小心翼翼用食指拇指揭開小門，再用留了指甲的尾指伸入客人腦殼，勾出一圈紅線來，掛在口咬住的筷子一邊頭，咬牙拉拉鬆鬆，尾指又勾多幾條線繩纏在筷子頭尾，像是在解繩結。

「Raydon哥你幾好嘢，一啲都唔痛喎！」客人笑說，我見客人在遇到這對神秘男女後就頻頻做表情，半邊下巴肉都快要脫落了，吊吊揈好驚嚇，難怪師傅勸他遮住塊面唔好嚇親人。

Raydon解繩解到一頭大汗，口又咬住筷子講嘢唔清，我大約聽到他講笑推搪，叫還叫唔好加個哥字。

這時小妹妹又幫口解答：「你實係唔痛啦！心師以前都係魚師嚟，不過佢哋最識得解人腦，後來先分咗家啫。」

心師？魚師？我聽都未聽過，你地有無聽過？

好深，要盡量理解

心師？魚師？你地有無聽過？

服務舊讀者，等小妹妹出個場，剃頭故有少少承接魚師故，留返條link先：
https://lihkg.com/thread/2273887/page/1

其實今次講剃頭唔講食魚，樓豬會盡量唔會提太多前設野，不過我都拿捏唔到內文要比幾多解釋去幫未睇過魚師故嘅讀者

不如未睇過魚師故嘅讀者都留個言，等我睇下你地從第九章get到啲咩

講吓get到啲咩，我會負責任解返啲前設，唔洗逼讀者睇魚師故

即刻有，頭先巴士打文

他們是鬼、是魚、曾經是魚、上了身
剃頭揾老襯，可能不是上身，是找主人？
做好魚才可以做人？
咁你係咩？
錦鯉係魚。

好難明

可唔可以又講下你get到咩

返工搭車推一推

接住少少魚師個結局？ 壞女人Mandy 比魚師解完，個身體就比6條魚share用？ 最後今世既”Mandy” 死左， 小妹妹就返黎check 返今世有無做好事去決定今世用Mandy 身體既魚既去向？

我估主角都係其中一條魚，不過唔記得左之前既事？

魚師都去左英國移民呀

歡迎你
出咗第九啦，新讀者到時睇完呢集可摸耳講下會get到啲咩

我get到自己記憶力不夠，可能我都係金魚記憶。

新讀者，睇完有點難明，因可能未睇魚師
現階段理解為應該是那前世恩今世報，理髮店等都不是平常所認知的
應該是些靈異，活像一班死神或活佛為死左的人係審理他們
決定他們下世應該怎樣或者要付什麼的報應。內裡應該加上了一堆佛理
我大約理解到這裡了。

留名等更新

咁大家G唔G主角宜家去咗邊度
提示：唔熟油尖旺可以google 下窩打老道同埋登打士街

有學校，所以是中學生發白日夢。

去左頌雅絲襪公司吧？去個度當然係見工啦！

（十）

我見Raydon突然鬆口，換作單手握住筷子向一邊掀開，筷子上一圈圈的紅線排列整齊，無一絲打結交錯，我諗起織布機、龍鬚糖，又覺得他有驚人天份去做機電幫人紥電線。

「Tina你可以問啦！」Raydon說，又同時著客人彎低身，將額頭道門就返小妹妹視線水平。

客人對兩位他口中的佛爺態度且敬且畏，叫他蹲下膝頭就立即遵命。

「開門就見山㗎啦！我唔兜兜轉轉，借問聲你係咪個好人啊？」小妹妹對住客人額頭的門口問道，我企在側邊，故不見門裡乾坤，我想像門裡面可能是大腦，不過既然頭上都開了一道紅漆門，也不能這麼科學，說不定裡面會住了一位小人。

「參見佛爺！拜見佛爺！仲係咁靚！仲係咁靚」這時門裡傳出古靈精怪的沙啞回應。

「賣哂口乖，做咗衰人怕認咗我鬧係咪呢？」

「講大話！甩大牙！講大話！甩大牙！」

「哈！你都無牙！」Raydon也烏低身對客人額頭說話。

「咩嚟咩嚟？我係咩嚟？」客人頭中聲音問道。

客人本體則是眼甘甘，笑口問道：「我都想知今世元神係咩樣。」

「一陣話你兩個知！但你要答我你係咪好人。」

客人笑得僵硬，面容緊張，他一定也心急想知答案。

「唔係好人！唔係好人！」

客人的爛面難以用血色形容，但他當下一秒心灰上面的表情，我最貼切只能說面如死灰，他很快轉為若無其事的傻笑樣，但我們眼睛對望，大家心照。

「哈，發咗一場夢咁。」客人陪笑了一聲，生硬到痺。

「一陣元神我帶走先，身體去訓低等我啦咁。」小妹妹開句不識溫柔，但也有嘗試後補數句沒作用的安慰：「無事嘅，呢幾年做過人都賺咗，做返魚好快又有得嚟過。」

小妺妺伸出手拍，湊近額頭小門，再講：「出嚟啦，我一陣叫長庚變你做蟋蟀，方便帶你去英國，到時餵比魚食，咁你就可以做返魚架啦！」

「美治美治！」客人頭腦那個似乎叫元神的事物，講嘢有點鄉音，應該是想講咪住，我覺得它不似有心玩嘢，因為它的後半句說得肉緊：「呀慧好慘，呀慧會喊！呀慧好慘！呀慧好慘！」

「呀慧邊個？你女朋友咩？」小妺妺問客人本體。

「呀慧係我未婚妻，今日其實我結婚，嘿。」客人冷笑一聲，這次倒不生硬。「我諗我個元神想留低見埋呀慧一面先，之後就會跟你走。」

「無錯無錯！」元神趕緊和應。

「係真唔係架？口齒口齒，口同齒都計嘅，如果最後原來無，無牙我都會解你個嘴！」

我不知道「解」是甚麼意思，前文後理聽落好可能是拆落嚟的意思，小妺妺說得凶狠，Raydon就講句溫和的話撲火：「Tina意思係肯俾啲時間你，快啲多謝啦！」

「多謝佛爺！多謝佛爺！」客人的元神與本體異口同聲。

「咁唔該你都出出嚟啦！要睇咪係一邊睇，唔係一陣人地閂門之後又要再開一次叫你。」小妺妹說。

這時客人的元神終於從門裡伸出頭來，原來如此，客人的元神是一隻了哥。了哥扭側頭望我，又用沙啞的聲音問道：「借你膊頭，好無？好無？」

我不怕雀仔，點頭道：「隨便你啦！」

了哥一下飛到我肩上，我見客人神志仍然清醒，望到了哥就笑，總算有一下開心笑時不是那種強顏歡笑：「原來今次元神係一隻雀仔。」

我也學到知識了，原來身體元神可以分開，現在客人的元神了哥飛到我身上面，客人的本體同時都可以自主運作的。

此時Raydon抽走了筷子，串串紅線就順住抽走筷子的次序一圈一圈縮回客人額頭，他再小心把那兩扇小門關上，然後用拇指在上面捽兩捽，這時客人的額頭又恢復了原樣。

「好啦，你地走啦！我地係度等埋。」小妺妺說完便讓出了她本來擋住的那一邊牆。

我有問題想問小妺妹，不問不安落：「一陣係咪到我？」

「終於出聲啦咩？」小妺妺反問，又說道：「唔洗咁急啦，新郎哥係第四個，仲未到你，宜家走吧。」

雖然我甚麼都不記得，但如果客人說的是真，他提過一共有六個人，客人排第四，下一個又未到我，也就是說我是第六個了。

究竟我呢世人算唔算係一個好人？

客人點解又唔係好人？

究竟乜野可以決定一個人做得好唔好？

我滿腹疑問，又繼續靠牆帶路，啷啷搖曳，客人再次將膠袋笠住個頭，我早就覺得自己似是在趕殭屍。

短篇故事，講六個太長，新郎排已經第四，你數數

終於得閒返黎睇
都幾深下 遲啲一次過重睇
不過幾正